MATYE 5

1Wi gâ janma nya me nyiŋi ga na ge, wɔ̀ɔ luʔu angolo yugu na mà klɛn. Wi ploʔofɛɛ à pe kɛri wì krugu. 2Wɔ̀ɔ ki hli mà na pe krɛʔɛ mà yo:

Jesu wí ma frɛmɛ ní cɔlɔʔɔ kayoʔo yo

(Luk 6:20-23)

3«Bee pé na pè cun fyomo fɛɛ,

pé nyɛ frɛmɛ ní,

mɛjɛn Nyɛʔɛlɛ masaʔa ki klɛ́n mà pee kan.

4Bee pé nyɛ yɛpɛnrɛ ní ge,

pé nyɛ frɛmɛ ní,

mɛjɛn Nyɛʔɛlɛ lí bi ba pe fɛn.#5:4 ma wèle wa Esa 61:2 ni wè.

5Bee pé nyɛ lanyimi fɛɛ ge,

pé nyɛ frɛmɛ ní,

mɛjɛn tra tí bi ba bo pe krɔʔɔ.#5:5 ma wèle wa Ŋuʔu 37:11 ni wè.

6Sinmi mi laa kí nyɛ bee na nɛ pa funŋu nì,

ní nyujɔʔɔ ní ge,

pé nyɛ frɛmɛ ní,

mɛjɛn pé bi ba din.#5:6 ma wèle wa Esa 55:1-2 ni wè.

7Bee pé na nyugara taʔa ge,

pé nyɛ frɛmɛ ní,

mɛjɛn Nyɛʔɛlɛ lí bi ba nyugara ta pé na.

8Bee pe lama mí nyɛ pé na finmi ge,

pé nyɛ frɛmɛ ní,

mɛjɛn pé bi ba Nyɛʔɛlɛ nya le.#5:8 ma wèle wa Ŋuʔu 24:3-4 ni wè.

9Bee pé na mlara nì,

ní nicere ko de,

pé nyɛ frɛmɛ ní,

mɛjɛn Nyɛʔɛlɛ lí bi da pe yeri li pii.

10Bee pé na cɔlɔ sinmi mi kala na le,

pé nyɛ frɛmɛ ní,

mɛjɛn Nyɛʔɛlɛ masaʔa ki klɛ́n mà pee kan.#5:10 ma wèle wa 1Pyɛ 3:14 ni wè.

11Nyiŋi o nyiŋi ga hɛɛn pé bi da ye teri

bì da ye cɔlɔ bì da flɛnʔɛ ye na pomo mì bɛfu na

na kɔsɔ na ge,

pa ye bo frɛmɛ ní.#5:11 ma wèle wa 1Pyɛ 4:14 ni wè.

12Ye po lafiʔimi nì,

ye da yɔʔɔrɔ,

mɛjɛn tonro kpangbanŋa nyɛ wa ye ma namuru ni de.

Ki podeme ma miì na,

pe dá bo na Nyɛʔɛlɛ leyoo cɔlɔ be,

bee pe da glú mâ po wa yè yɛ̀ʔɛ̀ ma ge.#5:12 ma wèle wa 2Masa 36:16; Pit 7:52 ni wè.

Kɔ nì, ní kpɛnmɛ nì pi kayoʔo

(Mar 9:50; 4:21; Luk 8:16; 18:33)

13Yèé yé nyɛ nɛbo kɔ wi drunya kan we. Di kɔ wi tanma nà mi nyini wí ni ge, pòo gban bì yraʔa kà le wa wi nî wi klàn nɛ. Wùu gban bì yraʔa kà no adi. Nàʔa po ban, pa poo wa dala na, hɛɛn pe dɔɔ tànrí.#5:13 ma wèle wa Mat 9:50; Luk 14:34-35 ni wè.

14Yèé yé nyɛ drunya wi kpɛnmɛ. Kàʔà ga kí nyɛ wa angolo yugu na ge, kòo gban bì hra.#5:14 ma wèle wa Jan 8:12; 9:5 ni wè. 15Hɛn wà ná jé lamba mu bì bɔɔ tyɛʔɛ so noʔo na. Di wi noo cɛʔɛ́ wi tyɛʔɛhaʔa na, jango wi da bari hɛɛn pè bɛfu kan bee pé nyɛ wa go ni ge. 16Ki podeme miì na, kí ma yala yè kpɛnmɛ mi da bari ban kpo hɛɛn kan be, jango pe da yè kahrangmaʔa nyaʔa ge, pe da yè To kpɔʔɔ we, ŋa wí nyɛ wa namuru ni de.#5:16 ma wèle wa 1Pyɛ 2:12 ni wè.

Jesu wí ma pe krɛʔɛ Nyɛʔɛlɛ furu kayoro ní

17Yò gáa ki honri bì yo mí ma pan jango bì ba Nyɛʔɛlɛ li furu kayoro ní li leyoo pe kayoro cɔʔɔ de. Mi ìn ban bì ba ti cɔʔɔ. Mí ma pan bì ba ti funŋu. 18Mí biʔi yo ye ma kanyɛmɛ na, nyini ga na namuru ní tra ní pí nyɛ wa ge, sɛbɛ pyɔ tatunŋu wà nigbe, ná kiì ban, yraple là nigbe ìn bi fara wa Nyɛʔɛlɛ li furu kayoro sɛbɛ ni we, fɔ yrɛbɛ pì bɛfu pi tonnyiŋi na.#5:18 ma wèle wa Luk 16:17 ni wè. 19Ki kala na, nà hɛn wà bi jé kayople là ma wa Nyɛʔɛlɛ li furu kayoro ni de bí da hɛɛn krɛʔɛ be bí yo pe daʔa hanri ban ge, Nyɛʔɛlɛ pa li dɔɔ cun hɛntatunŋu wa Nyɛʔɛlɛ masaʔa ni ge. Di hɛn o hɛn ŋa wí bi da li furu kayoro kpɔʔɔ de bì da hɛɛn krɛʔɛ be bì yo pe da ti kpɔʔɔ ge, Nyɛʔɛlɛ pa li dɔɔ cun hɛnkpangbanŋa wa Nyɛʔɛlɛ masaʔa ni ge. 20Mí biʔi yo ye ma, yè sinmi nà mi ìn doro Furu sɛbɛ cɛnfɛɛ ní Farisiyee womo na me, yòo gban bì je wa Nyɛʔɛlɛ masaʔa ni ge fyeu.

Jesu wí ma pe yɛri lagbanma kala ní le

21Yé maʔa loʔo mà yo pe daʔá yo wò tokpɔɔ ma be mà yo: ‹Mò gá hɛn kpo.› Nà wà bí hɛn wà kpo ge, pɔɔ yala pe kiti kon wí na.#5:21 ma wèle wa Nyi 20:13; Lado 5:17 ni wè.

22Mí biʔi yo ye ma kanyɛmɛ na bì yo: Nà wà bí lama gban wi nibo wà nì ge, pɔɔ yala pe kiti kon wí na. Nà wà biʔí yo wi nibo wà kan bì yo: ‹Letɔʔɔ,› pɔɔ yala pe kitikpɔɔ kon wí na. Nà hɛn wà bí wà po: ‹Ticere fɔlɔ› wi má ni, pɔɔ yala cɔlɔʔɔ deʔe ní ge. 23Ki kala na, nà ma pan ma sràʔá ní be sraʔá farahaʔa na ge, nà ma lama to kala là nì la lí nyɛ wa mo ní, ma nibo wà nì, yè kpafoʔo ni ge, 24ma ma sràʔá yaʔa we be sraʔá farahaʔa na ge. Mo ní, ma nibo nì, ye yo ye flìn kpɛn, ma nà ban ma ba ma sràʔá fara we.

25Mo ní, ŋa nì wí na can má ni ge, nà ye plɛn bì da sye kiti konhaʔa na ge, ma ki kala kɔ yè kpafoʔo ni, nyiŋi ga na yé ma plɛn ná sye kloʔò na ge, jango wò ga má kan kiti konfɔlɔ ma, wi ma kan sorasiyee ma pe ma le kaso nî.

26Mí biʔi yo má ma kanyɛmɛ na, mòo nyini wa fyeu kí po mɛ ìn ki sari ge, ali tamba wà nigbe wóo gori.

Jesu wí ma pe yɛri cɛkpere ti namyɛʔɛ na ge

27Yé maʔa loʔo mà yo: Ki dá yo ban mà yo: Mò gá ma nibo cɔ kpe.#5:27 ma wèle wa Nyi 20:14; Lado 5:18 ni wè.

28Di mì mí biʔi yo ye kan, hɛn o hɛn ŋa wí bi cɛlɛ wà nya bùu wele tipeʔe ge, paʔa bo wí moo kpe kɔ wa wi lama ni me. 29Ma kaligi nyɛlɛ nà li má kan ma kapeʔe hanri, ma li fàrà, ma li wa. Mɛjɛn kí nyɛ pronʔo má kan ma awiʔi kà nigbe bi jɔʔɔ́, sanni pé bi yà ma wre tì bɛfu wa wa cɔlɔʔɔ deʔe nî ge.#5:29 ma wèle wa Mat 18:9; Mar 9:47 ni wè. 30Ma kaligyɛʔɛ nàʔa má kan ma kapeʔe hanri, maʔa kon maʔa wa. Mɛjɛn kí nyɛ pronʔo má kan ma awiʔi kà nigbe bi jɔʔɔ́, sanni ma wre tì bɛfu tí bi yà je wa cɔlɔʔɔ deʔe ni ge.#5:30 ma wèle wa Mat 18:8; Mar 9:43 ni wè.

Jesu wí ma pe yɛri cɛprɔʔɔ cɔʔɔmo ní

(Mat 19:9; Mar 10:11-12; Luk 16:18)

31Àʔa ní ma yo: Hɛn o hɛn ŋa wí bi wi cɔ wa we, wi cɛprɔʔɔ cɔʔɔmo sɛbɛ kan wí ma.#5:31 ma wèle wa Lado 24:1-4 ni wè. 32Di mì mí biʔi yo ye ma bì yo: Hɛn o hɛn ŋa wí bi wi cɔ wa, nà ki ìn bo wi nagbere kala li ge, paʔa bo ki woo wí moo kân wɔ̀ɔ nagbere kapeʔe po, nòo naŋa wà pɔri nɛ ge. Cɛlɛ ŋa pé ma wa ge, hɛn o hɛn ŋa wí buu kpe, paʔa bo wí ma cɛkpere kapeʔe po.#5:32 ma wèle wa 1Kor 7:10-11 ni wè.

Jesu wí ma pe krɛʔɛ mà yo pò gáa pe klan

33Yé maʔa loʔo nɛ mà yo ki dá yo wò tokpɔɔ ma be mà yo: Mò gá mà klan waʔafe na. Di nà ma mà klan wò fɔlɔ na we bì yo má bi yraʔa kà hanri, ma baʔa hanri.#5:33 ma wèle wa Sraʔa 19:12; Ton 30:2; Lado 23:21 ni wè. 34Di mì mí biʔi yo ye ma bì yo mò gá mà klan fyeu. Ali mò gá mà klan namuru na de, mɛjɛn tí nyɛ Nyɛʔɛlɛ li masaʔa aconʔo gi.#5:34 ma wèle wa Sak 5:12; Esa 66:1; Mat 23:22 ni wè.

35Mò gá mà klan tra na de, mɛjɛn tí nyɛ li cyeʔe pahaʔa gi. Mò gá mà klan Jerusalɛmu kàʔà na ge kpo, mɛjɛn kí nyɛ masa naŋa kpangbanŋa wi kàʔà.#5:35 ma wèle wa Ŋuʔu 48:3; Esa 66:1 ni wè.

36Mò gá mà klan ma yugu na ge, mɛjɛn mòo gban bì ma yujoʔo kà nigbe hanri ki po fiʔi, ná kiì ban, ki po wɔʔɔ. 37Kí ma yala yè ee wi po ‹ee,› yè ayo wi po ‹ayo.› Mɛjɛn nà ye kà haʔa waʔa na ge, ki woʔo paʔa jɛ Sotanri ma ŋa pé na yeri Hɛnpee ge.#5:37 maʔa tonli Sraʔa 19:12; Lado 23:22 ni wè.

Kapere fwɔʔɔ tonmo kayoʔo

(Luk 6:29-30)

38Yé maʔa loʔo mà yo: Ki dá yo mà yo: Kí ma yala nyɛlɛ bí nyɛlɛ fwɔʔɔ ton. Ganla bí ganla fwɔʔɔ ton.#5:38 ma wèle wa Nyi 21:24; Sraʔa 24:20; Lado 19:21 ni wè.

39Di mí biʔi yo ye ma bì yo: Ŋa wí ma tipeʔe hanri má na ge, mò gá ki fwɔʔɔ ton ge. Di nà wà bi ma kmó wa ma kaligi kaca na ge, ma kamolo woʔo krɛʔɛ ge wi ma kpo. 40Nà wà bí jori pe kiti kon má na jango wi ma dreple syɔ ma ma ge, moo yaʔa wi kpangbanŋa syɔ ma ma kpo. 41Sorasi naŋa nà wà bi má po ma wi tuʔuru tugu, ma plɛ̀n wí ni jiji, ye cilo pyɔ nigbe tanʔa, ye cilo pii syɛn tanʔa.

42Nà wà bí yraʔa kà nyɛri má ma ge, maʔa kan wí ma. Nà wà bí jori wí bi fwɔʔɔ kon má ma ge, mò gá kruʔu wa wí ma.

Wò bɛnfɛɛ pe da wo glanʔa

(Luk 6:27-28,32-36)

43Yé maʔa loʔo mà yo ki dá yo mà yo: Ma nagoro wi da ma glànʔá. Ma bɛnfɔlɔ wi da ma bɛ̀nʔɛ́.#5:43 ma wèle wa Sraʔa 19:18 ni wè. 44Di mì mí biʔi yo ye ma bì yo: Yè bɛnfɛɛ pe da ye glanʔa. Ye da nyɛrí bee kan pé na ye cɔlɔ ge, 45jango ye yè To lɛ̀ ŋa wí nyɛ wa namuru ni de. Mɛjɛn wí na wi yaa yrigi ge hɛnpee kan be kpo, ní hɛnkmaa ní be, na hɔgɔ pan ge hɛnsinbee kan be ní hɛnkloboo ní be kpo. 46Ye nagroboo nà pee bí da ye glanʔa dron ge, paʔa bo yé ma nyaʔa tonro ta? Misari syɔfɛɛ poò naʔa hanri ban kpo yo? 47Nà ye da yè heme woo pee nigbe syeri ge, paʔa bo yé ma nyaʔa kakpɔlɔ hanri? Basɛriyee pèè wò naʔa hanri ban yo? 48Kiì kala na, kí ma yala ye sìn ye fùnŋú nɛ pa yè To wí nyɛ sinŋi pomo ma na ge, ŋa wí nyɛ wa namuru ni de.»#5:48 ma wèle wa Sraʔa 19:2; Lado 18:13 ni wè.

Currently Selected:

MATYE 5: NLK10

Highlight

Copy