MATYE 13

Caflaa yomɛlɛ

(Mar 4:1-9; Luk 8:4-8)

1Jesu wi gâ nyini wa go ni ki wlɛʔɛ na ge, wɔ̀ɔ kɛri mà yâ glɛn wa lɔkpɔʔɔ tanla, jango bì hɛɛn krɛʔɛ be. 2À hɛɛn fafaʔabaa mà bâ gboʔolo wì tanla. Pe fafaʔama na me, wɔ̀ɔ je mà klɛn wa nyumu kɔrɔ ni. Janma à mi yere be nyumu tanla me.#13:2 ma wèle wa Luk 5:1-3 ni wè.

3Wɔ̀ɔ kaʔa fafaʔagaa tyɛʔɛ pé na yomɛʔɛ ni mà yo: «Wlɛʔɛ kà na, caflaa wà dà gɛri bì yàá wi akaba pibi nyraʔa. 4Pɔɔ gáa pi nyraʔa wa wi kere ni de, à pà ma to kloʔò na. Kajɛnʔɛ à ke pan mà bâ pi jɔ. 5À pà ma to nɛ andaʔa na. Tra ìn dà bo be fafaʔara. À pi fin ticaʔaga, mɛjɛn tra ti ìn dà bo tikpliri. 6Yaa ki gâ nyini mâ pi wa, à pi waʔa, mɛjɛn niri ìn dà bo pí na fafaʔara. 7À pà ma to nɛ huru deʔe na. Huru à ti jɛ mà pi tón. 8À pà yâ do trakmara deʔe na. À pì bâ sɛ. À pà ma sɛ too kɔgunnu kɔgunnu, À pà ma sɛ too tandanri. À pà ma sɛ fonɛrɛ mà kɛ kɛ̂ kɛ̂. 9Naakpoʔo nyɛ ŋa na, wi nagruʔu can, wi da nurú.»

Nyaʔa na Jesu wi na nyu yomɛʔɛ ni ge

(Mar 4:10-12; Luk 8:9-10)

10Wi ploʔofɛɛ à pe flo wì tanla mòo yugu: «Nyaʔa ma kan má na kayoro nyu pe kân yomɛʔɛ ni ge?» 11Wɔ̀ɔ pé po: «Nyɛʔɛlɛ lí maʔa kân ye ma ye gbàn ye li masaʔa ki kahraʔa cɛn ge. Di li ìn ki kân hɛɛn pe tɔɔ ma be. 12Mɛjɛn ŋa ma yraʔa ta, pé bi ba kà haʔa wa wi ma, jango wi ta fafaʔa. Di ŋa wi ìn yraʔa kà ta ge, cɛnri ŋa wí nyɛ wí ma ge, pé bi bɔɔ syɔ wí ma.#13:12 ma wèle wa Mat 25:29; Mar 4:25; Luk 8:18; 19:26 ni wè. 13Ki kala na, mí na nyu pé kan yomɛʔɛ ni, mɛjɛn pé na wele, di poò na nyaʔa. Pé na nuru, di poò na nuru kanyɛmɛ na. Ga pé na nuru ge, poò na ki kɔ̀rɔ́ cɛnni we. 14Nyɛʔɛlɛ leyoo Esayi wi kayoro tí ma funŋu pe na, da wi dá yo mâ yo:

Yé bi baʔa loʔo kmaʔa,

di yòo ki kɔ̀rɔ́ cɛn we.

Yé bi baa wele kmaʔa,

di yòo da nyaʔa. # 13:14-15 ma wèle wa Esa 6:9-10 ni wè.

15 Mɛjɛn ki hɛɛn bee

pe lama mí ma tòn pé na.

Pe naakpoʔo à ke pɛn pé na kpo.

Mɛjɛn pé ma pe nyɛʔɛ tón ge,

jango pò gáa nyaʔa pe nyɛʔɛ ní ge,

bì da nuru pe naakpoʔo ni ge,

pò ga ní bì da kaʔa cɛnni

wa pe lama ni me,

bì grɛʔɛ mì Nyɛʔɛlɛ kan le,

jango bì pe pwɔʔɔ.

16Di yèé yé nyɛ frɛmɛ na, mɛjɛn yè nyɛʔɛ ké na nyaʔa. Yè naakpoʔo à ke na nuru.#13:16-17 ma wèle wa Luk 10:23-24 ni wè. 17Mí biʔi yo ye ma kanyɛmɛ na, Nyɛʔɛlɛ leyoo ní hɛnsinbee fafaʔabaa dá jori bì ga nya yèé yé na nyaʔa ge. Di pe ìn ki nya. À pe cori bì ga loʔo yèé yé na nuru ge. Di pe ìn ki loʔo.

Caflaa yomɛlɛ li kɔ̀rɔ́

(Mar 4:13-20; Luk 8:11-15)

18Ki kala na, ye caflaa yomɛlɛ li kɔ̀rɔ́ loʔo we. 19Hɛn o hɛn ŋa wí na masaʔa kayoro nuru de, di nà wi ìn ti kɔ̀rɔ́ cɛn we, wiì ŋa nòo ti loʔo, Hɛnpee wi na pan kpo mà bâ ti fara, da pé ma tòn wa wi dihon na we. Pii bi pí ma to wa kloʔò na ge. 20Ba pí ma to wa andaʔa na ge, kiì gi ga ŋa wí ma Nyɛʔɛlɛ kayoro loʔo de mâ pa tí na kpo lafiʔimi nì ge. 21Di ti ìn niri ta wa wi lama ni me. À ti ko wa wi nî mà nyiŋi cɛnri ta kpo. Lama mi wleleme nì, ní cɔlɔʔɔ ní pi gâ ban Nyɛʔɛlɛ kayoro kɔsɔ na, ki woʔo à kuu kân, wɔ̀ɔ hru kruʔu ma kpo. 22Ba pí ma to wa huru deʔe na ge, kiì gi ga ŋa ma wí na kayoro nuru de. Di ki drunya ŋa wi kaʔa honriʔi ní, ní masaʔa fanlaʔa ní à pi pan mà bâ kayoro tón de, à ti ko tonro fun. 23Ba pí ma to trakmara na de, piì bi ba ŋa nì wí na kayoro nuru de kmaʔa mà na ti cɛnni mà na pibi seri, too kɔgunnu, too tanri, pà fonɛrɛ mà kɛ kɛ̂ kɛ̂.»

Akakmaba nì, ní nyapeʔe ní pi yomɛlɛ

24Wɔ̀ɔ ní mà yomɛlɛ là kmo pé kan nɛ mà yo: «Nyɛʔɛlɛ masaʔa kí nyɛ nɛ pa naŋa wà wi ŋa wí na akakmaba nyraʔa wa wi kere ni de. 25Hɛɛn pe bâ syɛn ná ŋolo nyiŋi ga na ge, wi bɛnfɔlɔ wɔ̀ɔ pan mà bâ nyapeʔe pibi nyraʔa wa akaba ni be mà hru mà kɛri. 26Akaba pi gâ ba fin nyiŋi ga na mâ ba sɛ ge, nyapeʔe àʔa fin mà po wa pi nî kpo. 27Kere fɔlɔ wi tungɔɔ à pe pan mà báʔà yo wí kan mà yo: ‹Kundiʔi, mɛ ìn dà akakmaba nyraʔa wa ma kere ni de yo? Ki nyapeʔe kí ma jɛ hanbe?› 28Wɔ̀ɔ pé po: ‹Na bɛnfɔlɔ wà ma ki woʔo ga hanri ge.› Wi tungɔɔ à poo po: ‹Má yo wo yaʔa klɔʔɔ yo?› 29Wɔ̀ɔ pé po: ‹Ayo, mɛjɛn nà ye yo yé bi da nyapeʔe klɔʔɔ ge, kana, pa ye da akakmaba klɔʔɔ be kpo. 30Ye pì syɛnmu yaʔa pi da lɛʔɛ fɔ akaba konnyiŋi ki ba no. Akaba konnyiŋi nàʔa gá ba no ge, pa miʔi yo pi konfɛɛ kan be bì yo: Ye nyapeʔe kpoʔolo ge kpɛn, yeʔe pwɔ pwɔʔɔlɔ pwɔʔɔlɔ, jango ye baʔa hògó. Ye nà da ye akaba kon, ye ba pi le wa na bolo ni le.› »

Mutaride tiʔi pibi yomɛlɛ

(Mar 4:30-32; Luk 13:18-19)

31Wɔ̀ɔ yomɛlɛ là kmo pé kan nɛ mà yo: «Nyɛʔɛlɛ masaʔa kí nyɛ nɛ pa mutaride tiʔi pyɔ nyɛ, ŋa hɛn wí ma kpe mà yɔ́ɔ ton wa wi kere ni de.

32Ki tiʔi pyɔ wí nyɛ tatunŋu mà toro akaba pibi pì bɛfu na. Nòo gá ba fin ge, wi naa lɛʔɛ mà bâ gbɔʔɔ mà toro akaba pì bɛfu na mà bâ grɛʔɛ tiʔi. Kajɛnʔɛ ke na báa ke heʔere hanri de wa ki kaclara ni de.»

Bru ajrɛʔɛgɛ wɛgɛ yomɛlɛ

(Luk 13:20-21)

33Wɔ̀ɔ ní ma yomɛlɛ là kmo pé kan nɛ mà yo: «Nyɛʔɛlɛ masaʔa kí nyɛ nɛ pa cɛlɛ wi bru ca nyɛ ga wí ma tonli tonlihaʔa tanri mâ ajrɛʔɛgɛ wɛgɛ le wa ge. Àʔa craʔa mà ca kì bɛfu nyi.»

Kala la na Jesu wi dáa yomɛʔɛ kmo ge

(Mar 4:33-34)

34Jesu wi dá ki kaʔa gee kè bɛfu yo janma ma me yomɛʔɛ ni. Ali wi ìn dà kala là yo pé kan yomɛlɛ fun. 35Wi daʔá hanri ban, jango kayoro ti gbàn ti fùnŋù, da Nyɛʔɛlɛ leyoo wi dá yo ge mâ yo:

Mí bi na nò nyɛʔɛ ge

bì yomɛʔɛ kmo.

Mí bi kahraʔa yo gee ke dá hra

mà kpe drunya wi hlinyiŋi na. # 13:35 ma wèle wa Ŋuʔu 78:2 ni wè.

Nyapeʔe yomɛlɛ kɔrɔ́

36Wɔ̀ɔ janma yaʔa me be mà je go ni. Wi ploʔofɛɛ à pe flo wa wì tanla mà bɔ́ɔ̀ po: «Ma kere nyapeʔe yomɛlɛ kɔrɔ́ tyɛʔɛ wo na.» 37Jesu wɔ̀ɔ pé po: «Caflaa ŋa wí ma akaba pikmaba nyraʔa be wiì wi ŋa Hɛn Pyɔ ní we. 38Kere tiì di da drunya ní we. Akaba pikmaba piì bi ba Nyɛʔɛlɛ masaʔa pii ní be. Nyapeʔe kiì gi ga Sotanri wi pii ní be, ŋa pé na yeri Hɛnpee ge. 39Bɛnfɔlɔ ŋa wí ma ki nyapeʔe nyraʔa ge wiì wi ŋa Sotanri ní we. Akaba konmo miì mi ma drunya tonnyiŋi nì ge. Akaba konfɛɛ pee bɛ mlɛŋɛyee ní be. 40Pé na nyapeʔe kpoʔolo mâ naʔa hori pomo ma na ge, drunya wi tonnyiŋi na, kí bi ba bo ban kpo. 41Hɛn Pyɔ wí bi ba wi mlɛŋɛyee troʔo be bee ma pé na pe tɔɔ kanʔa á pe na tun kapere ni, ní bee ní pé na kapere hanri, jango pe ba pè bɛfu kpoʔolo pe pe yrigi wa wi masaʔa ni ge, 42pe pe wa wa kwɔkpɔʔɔ ni ge, pe da gbèlé, pee daʔará wa, pe da ganʔa kun ge wa. 43Ki nyiŋi na, hɛnsinbee pa pe da nyi bì da funŋu wa pe To wi masaʔa ni nɛ pa yaa ki hîn nyini mâ na funŋu ge. Naakpoʔo nyɛ hɛn ŋa na, wi nagruʔu can, wi da nurú.

Krɔʔɔ hrama yomɛlɛ

44Nyɛʔɛlɛ masaʔa kí nyɛ nɛ pa krɔʔɔ nyɛ, ga pé ma hra wa kere ni de. À naŋa wà ma yáʔà nya màʔa hra mà kɛri mà yâ wi yrɛbɛ pì bɛfu pɛrɛ mà kɛri mà yâ ki kere syɔ de.

Ncɛnbyɔ kmaa yomɛlɛ

45Nyɛʔɛlɛ masaʔa ki klɛ́n mà po nɛ pa yawafɔlɔ nyɛ ŋa wí na ncɛngmara ca de. 46Wi gaâ ncɛnbyɔ wà nya kmaa nigbe ge, wi pɛrɛ à ti po gbanra. Wɔ̀ɔ kɛri mà yâ wi yrɛbɛ pì bɛfu pɛrɛ mà bɔ́ɔ̀ syɔ.

Fyɔcaa faala yomɛlɛ

47Nyɛʔɛlɛ masaʔa kí nyɛ nɛ pa fyɔcaa faala nyɛ la pé ma wa wa lɔkpɔʔɔ ni ge mâ fyɔjɛnʔɛ kè bɛfu fara lí ni ge. 48Nà li nyi ge, pe na li klé mà li fara mà bâ glɛn lɔgogo na mà fyɔɔ tyonri be. Bee pé nyɛ kmaa be, pe na pe le alere ni mà tipee wa be. 49Kí bi ba bo ban kpo drunya tonnyiŋi na ge. Mlɛŋɛyee pé bi ba hɛnpee tyonri be bì pe yrígi wa hɛnsinbee ni be, 50bì pe wa wa kwɔkpɔʔɔ ni ge. Pa pe da gbele bì da daʔara bì da ganʔa kun ge wa kpo.

Krɔfonŋo nì, krɔlɛʔɛ nì

51Yé ma ki kaʔa kè bɛfu loʔo yo?» À poo po: «Ee.» 52Wɔ̀ɔ pé po: «Furu sɛbɛ cɛnfɔlɔ o sɛbɛ cɛnfɔlɔ ŋa wí bi grɛʔɛ Nyɛʔɛlɛ masaʔa ploʔofɔlɔ ge, wí nyɛ nɛ pa masa naŋa ŋa nyɛ wí na yrɛlɛbɛ ní, ní yrɛfonmo fara wa wi kyɛʔɛ yrɛbɛ ni be.»

Jesu wi kàʔà woo pé ma ce wí ma

(Mar 6:1-6; Luk 4:16-30)

53Jesu wi gâ ki yomɛʔɛ gee kmo ge kɔ, wɔ̀ɔ jɛ be ki deʔe na ge. 54Wi yâ je wa wi kataʔa ni ge, wɔ̀ɔ yâ pe krɛʔɛ wa pe sɛrigo ni ge. Àʔa pé fo. À pe naʔa nyu mà yo: «Ki naŋa wí ma ki ticlimi nì, ní ki kafonŋoo ta hanbe? 55Tiri tɛfɔlɔ pyɔ wiì ban ki naŋa nì we yo? Wi no wiì ban pé na yeri Mari we yo, mâ na wi cyɛɛn wà yeri Jake, ní Josɛfu nì, ní Simo nì, ní Juda nì we? 56Wi cɛpii poò nyɛ naʔa wo nì yo? Ki naŋa ŋa wí ma ki yrɛbɛ ba pì bɛfu ta hanbe?» 57Mɛjɛn wi da pé bɛn. Jesu wɔ̀ɔ pé po: «Hɛn wà wò naʔa ŋa wí bi da Nyɛʔɛlɛ leyoo faʔara we, nà ki ìn bo wi kàʔà woo ní, ní wi go woo bɛ ge.»#13:57 ma wèle wa Jan 4:44 ni wè. 58Di wi ìn dà kafonŋoo fafaʔagaa hanri wa pe babama kɔsɔ na we.

Currently Selected:

MATYE 13: NLK10

Highlight

Copy