MATYE 14

Jan Batise wi kùʔù kayoʔo

(Mar 6:14-29; Luk 9:7-9)

1Ki nyiŋi na Galile klo fɔlɔ Erɔde wi gâ Jesu wi kayoʔo loʔo ge, 2wɔ̀ɔ kí yo wi tungɔɔ ma be mà yo: «Jan Batise wi. Wi nyɛ́ mà nyini kuu ni be. Kiì ma kan wɔ́ɔ na gbanni ná ki kafonŋoo hanri ge.» 3Mɛjɛn Erɔde wi dá Jan co mòo pwɔ mà yɔ́ɔ̀ le wa kaso nî Erɔjade kala na, ŋa wi dá bo Erɔde wi conlo Filipe wi cɔ we. 4Mɛjɛn Jan wi dáa ki nyu wí kan mà yo: «Ki ìn yala ma Erɔjade kpe we ma cɔ.»#14:4 ma wèle wa Sraʔa 18:16; 20:21 ni wè.

5Wɔ̀ɔ naʔa ca bùu kpo. Di wi dáa fyaʔa Juwifiyee na be, mɛjɛn pe dáa Jan cun we Nyɛʔɛlɛ leyoo.

6Di Erɔde wi henyiŋi fɛti wi dá bo wí ma tyɛʔɛ. Erɔjade wi picɛ wɔ̀ɔ pan mà báa yo be hɛɛn pe yɛʔɛ̀ ma ge. Àʔa klan Erɔde ni we. 7Ki kala na, wɔ̀ɔ nofele kon wí ma mà yo nòo da yraʔa o yraʔa ga ca, pɔɔ ki kân wí ma fɔ mà wì klan ki kayoʔo na ge. 8Wɔ̀ɔ Erɔde po we: «Ma Jan Batise yugu kan naʔa ná ma tasa ni,» mɛjɛn wi no wi wi dá ki woʔo ga yo wi ma ge. 9Àʔa masa naŋa bɛn we, di pɔɔ da gâ wì klan, áʔa ní mâ po nɛ pe dáa li bee ní pé nyɛ be adi tabali na we, wɔ̀ɔ yo wí biʔi kân, 10mà hɛɛn tun mà yo pe ya Jan wi yugu kon ge wa kaso go ni ge. 11À pe pan wi yugu nì ge wa tasa ni mà báʔà kân picɛpii ma we. Wɔ̀ɔ yáʔà kân wi no ma we. 12Jan wi ploʔofɛɛ à pe bâ wi wre kpe de mà yâ ti le fanʔa ni mà yáʔà yo Jesu ma we.

Jesu wí ma nabii 5 000 kan, à pe li

(Mar 6:30-44; Luk 9:10-17; Jan 6:1-14)

13Jesu wi gáʔà loʔo nyiŋi ga na ge, wɔ̀ɔ hru mà yâ je nyumu kɔrɔ kà ni mà kɛri sinbriʔi ni wì yɛ nigbe. Janma mi gáʔà nya banmɛ ge, à pe na jrɛʔɛ kyɛ̀rɛ̀ ni mà tanʔa mà kɛri wì krugu. 14Wi gâ nyini wa nyumu kɔrɔ ni ge, wɔ̀ɔ janma nya mí ma kpoʔolo be. Pe nyugara à ti wa wí na ceŋge. Wɔ̀ɔ pe yabaa pwɔʔɔ be kpo.

15Ki yaakwɔʔɔ na, wi ploʔofɛɛ à pe flo wa wì tanla mòo po: «Má ma yaa nya kí ma kɔ ge. Ki deʔe ga kí mɛɛ nyɛ sinbriʔi deʔe. Ki kala na, ma janma yaʔa mi kɛri kyɛ̀rɛ̀ ni, pe ya akaba syɔ.» 16Jesu wɔ̀ɔ pé po: «Ki ìn yala pe da sye. Yèé tapoboo, ye pe kan pe lì.» 17À poo po: «Yraʔa kà wò naʔa wo ma fɔ mà laʔa bru kɔgunnu nì, ní fyɔbiʔi syɛn ní.» 18Wɔ̀ɔ pé po: «Yè pì kpe, ye pan pí ni,» 19màʔa yo janma kan me mà yo pe klɛn nya na ge. Wɔ̀ɔ bru kɔgunnu kpe ní fyɔbiʔi syɛn ní we mà yɛʔɛ̀ jrɛʔɛ na wele wa namuru ni de mà Nyɛʔɛlɛ syeri le mà bru konʔolo mòo kân wi ploʔofɛɛ ma be. À poo tiʔibi janma na me. 20Pè bɛfu à pe li mà tìn. À pe brukonro kpoʔolo ní fyɔkonro ní da ti korí ge, à ti kpogoo kɛ̂ mà kɛ syɛn nyi. 21Di bee pe dá li ge nabii pe dá saamo mà kɛ kɔgunnu nyoʔo kɔ ge (5 000). Cɛɛ ní, pii ní, pe nò koò nyɛ wa, bee pe dá bru ní fyɔbiʔi ka be kpo ge.

Jesu wí ma tanʔa nyumu yugu na

(Mar 6:45-52; Jan 6:15-21)

22Ki nyiŋi na, Jesu wɔ̀ɔ wi ploʔofɛɛ po be pe je nyumu kɔrɔ ni, pe klu wi yɛʔɛ̀ wa lɔgogo ki tɔ na ge, mɛjɛn wí bi jɛ be janma tanla me bì pe yaʔa pee sye. 23Wi gâ janma po mi da sye ge, wɔ̀ɔ jɛ be mà kɛri mà yâ luʔu angolo yugu na wì yɛ nigbe, jango bì yà Nyɛʔɛlɛ nyɛri le. Yaa ki dá bo kí ma je kɔ, di wɔ̀ɔ ko wa wì yɛ nigbe. 24Nyumu kɔrɔ ki dá bo leʔe lɔgogo nì ge. Nyumu à mi na jrɛʔɛ mà na tun wa nyumu kɔrɔ na ge, mɛjɛn tiflɛʔɛ ki dáa pe finni. 25Kpɛnmɛ mi gáa jɛn bì do nyiŋi ga na ge, Jesu wɔ̀ɔ na tanri wa nyumu yugu na na pan pè krugu. 26Ploʔofɛɛ pe gɔ́ɔ̀ nya wí na tanri wa nyumu yugu na ge, àʔa pe lama wlele me pe na. À pe yo: «Nyìli li,» na taʔara mɛjɛn pe dáa fyaʔa. 27Di Jesu wɔ̀ɔ kí yo pé kan kpo mà yo: «Ye yè lama fiʔi me. Yò gáa fyaʔa. Domi wi.»

28Pyɛri wɔ̀ɔ wí po: «Wò fɔlɔ, nàʔa po mo wi, maʔa yo ná ma bì da sye mà krugu wa nyumu yugu na ge.» 29Wɔ̀ɔ yo: «Ta ban.»

Pyɛri wɔ̀ɔ nyini wa nyumu kɔrɔ ni ge mà na tanri wa nyumu yugu na na sye Jesu krugu we. 30Wi gâ tiflɛʔɛ nya ge, fyara à tuu co. Wɔ̀ɔ na cɛn bì bunŋu wa. Wɔ̀ɔ taʔara gbanʔa mà yo: «Wò fɔlɔ, ma na syɔ.» 31Jesu wɔ̀ɔ kyɛʔɛ haʔala mòo co kpo mòo po: «Naŋa, ma pama mí nyɛ tatunmu. Nyaʔa ma po mɛ ìn baʔa na ge?»

32Pe gâ hru mâ je wa nyumu kɔrɔ ni ge, tiflɛʔɛ àʔa yere. 33Bee pe dá bo wa nyumu kɔrɔ ni ge, à pe kunbiʔi kán wì tanla mà yo: «Kanyɛmɛ na, má nyɛ Nyɛʔɛlɛ li Pyɔ.»

Jenesarɛti yabaa pwɔʔɔmo

(Mar 6:53-56)

34Pe gâ nyumu kon me kɔ mâ nyini wa ki namyɛʔɛ ki tɔ na ge, à pe no Jenesarɛti klo klɛnmɛ na me. 35Ki deʔe hɛɛn pe gɔ́ɔ̀ wele móò cɛn ge, à pe tunmu troʔo wa ki klo klɛnmɛ kyɛrɛ tì bɛfu ni mà na yabaa pè bɛfu kpin na sye pé ni wì krugu, 36noo fɛn mà yo wiʔi yaʔa pe da màʔá wi dreʔe kanla na le. Bee pe dá màʔà ki na ge, pè bɛfu à pe pwɔʔɔ.

Currently Selected:

MATYE 14: NLK10

Highlight

Copy