LUKE 8

Cɛɛ pe dá blɛn Jesu ní we

1Ki kruʔu ma, Jesu wɔ̀ɔ kɛri mà yáa nyari wa kyɛ̀rɛ̀ tì bɛfu ni, kyɛkpandoro yoo, kàpleʔe yoo, na Nyɛʔɛlɛ li masaʔa kayotanʔa jari ge. Wi hɛɛn kɛ̂ mà kɛ syɛn pe dá bo wí ni mà plɛn cɛɛ pèè ní. 2Wi dá gbosuu prɔ ki cɛɛ ni be mà pe yara laʔa de pe na kpo. Pé na wà yeri Mari, Magidala kàʔà woo we, ŋa ni gbosuu nasyɛn pe dá nyini ge.#8:2-3 ma wèle wa Mat 27:55-56; Mar 15:40-41; Luk 23:49 ni wè. 3Pé na wà yeri Jane, Erɔde wi gbejanra cofɔlɔ ŋa pé na yeri Kusa, wiì cɔ wi mà plɛn Susane nì, ní cɛɛ fafaʔabaa pèè ní nɛ. Pe dáa Jesu ní, wi pitunbee pe cromo lari pe na pe kyɛʔɛ yrɛbɛ ní be.

Caflaa yomɛlɛ

(Mat 13:1-9; Mar 4:1-9)

4Ki nyiŋi na ge, hɛɛn fafaʔabaa dáa jrɛʔɛ kyɛ̀rɛ̀ tì bɛfu ni na sye Jesu krugu we. Pe gáa gboʔolo wì tanla ge, wɔ̀ɔ yomɛlɛ kmo pé kan mà yo:

5«Caflaa wà dà gɛri bì yàá akaba pibi nyraʔa. Pɔɔ gáa pi nyraʔa wa wi kere ni de, à pà ma to kloʔò na. À pe pi tanʔa. Kajɛnʔɛ à ke pi jɔ. 6À pà ma to andaʔa na. Pi gâ fìn nyiŋi ga na ge, à pi waʔa, mɛjɛn ki deʔe ki ìn dà bo nyiŋi. 7À pà ma to nɛ huru deʔe na. Huru à ti plɛn na lɛʔɛ pí ni teme na fɔ mà bâ pi co. 8À pà ma to tra kmara deʔe na. Ki wobo à pi fín mà sɛ, pà too kɔgunnu kɔgunnu.» Wi gâ ki kayoʔo gâ yo ge kɔ ge, wɔ̀ɔ pé po: «Naakpoʔó nyɛ ŋa na, wi nagruʔu can, wi da nurú kpo.»

Nyaʔa ma kan Jesu wɔ́ɔ na yomɛʔɛ kmo ge

(Mat 13:10-17; Mar 4:10-12)

9Ki kruʔu ma, Jesu wi ploʔofɛɛ à poo yugu mà yo: Ki yomɛlɛ la li kɔ̀rɔ́ wí nyɛ nyaʔa ní? 10Wɔ̀ɔ pé po: «Nyɛʔɛlɛ lí maʔa kân ye ma ye gbàn ye li masaʔa kahraʔa cɛn ge. Di kí na nyu pe tɔɔ kan be yomɛʔɛ ni, jango:

‹Nà pe jaʔa wele kmaʔa,

pò gaʔa nya.

Nà pe jaʔa loʔo kmaʔa,

pò gaʔa cɛn.›#8:10 ma wèle wa Esa 6:9-10 ni wè.

Tyaflaa yomɛlɛ li kɔ̀rɔ́ yomo

(Mat 13:10-23; Mar 4:13-20)

11Ki yomɛlɛ li kɔ̀rɔ́ wí ŋa: Akaʔa pibi ba pé na nyraʔa ge, pí nyɛ Nyɛʔɛlɛ kayoro di. 12Ba pi dá do kloʔò na ge, pí nyɛ hɛɛn bee bɛ pé ma kayoro loʔo de. Ki kruʔu ma, Sotanri wɔ̀ɔ pan mà bâ ti fara wa pe lama ni me, jango pò ga ba bì syɔ. 13Andaʔa deʔe wobo be, pé nyɛ hɛɛn bee bɛ pé ma kayoro loʔo de mà ti co lafiʔimi nì. Ɛɛn di, ti ìn niri ta wa pe nî, mà kan pé ma nyiŋi cɛnri kɔ wa pama kloʔó ni ge mà na hru kruʔu ma, kagbanla nyiŋi na ge. 14Ba pi dá do huru deʔe na ge, pé nyɛ hɛɛn bee bɛ pé ma kayoro loʔo de. Pe dáa sye yɛʔɛ̀ ma ge, ki drunya ŋa wi honriri nì, ní wi masaʔa nì, ní wi yrɛbɛ pi tɔ pi laa como nì me pí ma pe yrigí mà kan ki akaba pibi wosɛbɛ poò na lɛʔɛ. 15Ba pí to tra kmara deʔe na ge, kí nyɛ bee bɛ pé ma kayoro loʔo de mà ti co lafiʔimi nì, ní dihonkmaa ní, na pibi seri lagunmu ní.

Lamba yomɛlɛ

(Mar 4:21-25)

16Hɛn wà ná jé lamba mu bì dɔɔ tonni so noʔo na, ná kiì ban asyɛnʔɛ noʔo na. Di wi noo cɛʔɛ́ wi tyɛʔɛhaʔa na, jango bee pé na jin wa go ni ge, pe da wi kpɛnmɛ nyaʔa me.#8:16 ma wèle wa Mat 5:15; Luk 11:33 ni wè. 17Mɛjɛn yraʔa kì bɛfu ga kí nyɛ hraʔa ge, paʔa bá nyini finmi na. Ee, yraʔa kì bɛfu ga kí nyɛ tonʔò ge, pa peʔe cɛn bìʔi yrígi finmi na.#8:17 ma wèle wa Mat 10:26; Luk 12:2 ni wè.

18Ki kala na, ye da yè kɔrɔsi pomo ma na yé na nuru ge. Mɛjɛn Nyɛʔɛlɛ lí bi ba kà haʔa wa ŋa ma yraʔa kà nyɛ wí ma ge. Di yraʔa kà wò nyɛ ŋa ma ge, ga wí na honri mâ yo kí nyɛ wí ma ge, Nyɛʔɛlɛ lí bi ba ki woʔo syɔ wi ma.»#8:18 ma wèle wa Mat 25:29; Luk 19:26 ni wè.

Jesu wi no nì, ní wi cyɛɛn ní

(Mat 12:46-50; Mar 3:31-35)

19Jesu wi no nì, ní wi cyɛɛn ní à pe kɛri wì krugu. Pe ìn yà gban bì no wí na hɛɛn pe fafaʔama kɔsɔ na. 20À poo po: «Ma no nì, ní ma cyɛɛn ní pé nyɛ wa yerehaʔa dala na le. Pé ma cori bì ma nya.» 21Wɔ̀ɔ pé po: «Bee pé na Nyɛʔɛlɛ kayoro nuru mâ na ti kpɔʔɔ ge, ki woo pee bɛ pé nyɛ na nyɛɛ mâ po na cyɛɛn be.»

Jesu wí ma tiflɛgbɔʔɔ yrìgí

(Mat 8:23-27; Mar 4:35-41)

22Wlɛʔɛ kà na, Jesu ní, wi ploʔofɛɛ ní pe da jé nyumu kɔrɔ kà ni. Wɔ̀ɔ pé po: «Ye pan wo cakpɔʔɔ pari woʔo kon.» À pe kɛri. 23Pe gáa sye nyiŋi ga na ge, Jesu wɔ̀ɔ ŋolo. À tiflɛgbɔʔɔ ma jɛ wa cakpɔʔɔ na ge. Pe nyumu kɔrɔ àʔa na cɛn bì nyi nyumu ní me fɔ à pe na cɛn bì bunŋu wa mi nî. 24À pe yâ Jesu nyɛ́ we mòo po: «Kundiʔi, Kundiʔi, wó bi gu.»

Wɔ̀ɔ nyɛ́ mà yo tiflɛʔɛ nì ge, ní nyumu ma nì mi dáa jrɛʔɛ ge mà yo pi yèré. À pi yere. Deʔe àʔa ko pyeriʔi gbundun. 25Wɔ̀ɔ pé po: «Yè pama mí nyɛ hanbe si?»

Di à pe na fyaʔa na kafonlo waʔa na naʔa nyu pè ma mà yo: «Han wi banmɛ ge, wɔ́ɔ na nyu tiflɛʔɛ nì, nyugbɔmo nì, á pi noo kpɔʔɔ ge?»

Jesu wí ma gbosuu fɔlɔ pwɔʔɔ

(Mat 8:28-34; Mar 5:1-20)

26À pe yâ no wa Jerasa kàʔà woo pe klɛnmɛ na me, ma mí nyɛ wa Galile klo sinmi na me. 27Nyiŋi ga na Jesu wi gáa nyini wa nyumu kɔrɔ ni ge mâ trigi tra na de, ki kàʔà hɛɛn à wà moo flin. Gbosuu dá bo wí ni. Mà kpe nyiŋi fafaʔa na, wi ìn dàá kpasyoro ni, wi ìn da syɛn go ni kpo. Di wi dáa gori kuwama ni. 28Wi gâ Jesu nya we, wɔ̀ɔ taʔara mà yâ kunbiʔi kán wì tanla màʔa yo wí kan gbanʔa mà yo: «Jesu Nyɛgbɔfiʔi Pyɔ, nyaʔa nyɛ wò kpafoʔo ni? Mí na ma fɛn, mò gá tipeʔe po ná na.»

29Wi dá yo ban, mɛjɛn Jesu wi dá yo gbanʔa kɔ gbosyo nì we mà yo wi nyini wa naŋa ni we. Ali ki gbosyo wi dáa jrɛʔɛ wí ni nyiŋi fafaʔa na. Hɛɛn pe dáa timoro ni wi cyeʔe na ge ní wi kyɛrɛ̀ nì de mà noo pun nyoʔomo nì. Di wi dáa ki apwɔbɔ pì bɛfu konʔolo. Gbosyo wɔ̀ɔ noo prɔ noo troʔo sinbriʔi ni. 30Jesu wɔ̀ɔ wi yugu mà yo: «Pé na ma yeri mɛlɛ?» Wɔ̀ɔ yo: «Pé na na yeri Nyɛʔɛmɛ.» Wí dá yo gban mɛjɛn gbosuu fafaʔa dà je wí ni. 31Ki gbosuu à pe Jesu fɛn we mà yo wò gaʔa yo pé ma bì yo pe ya je wa cɔlɔʔɔ deʔe na ge.

32Di wa angolo na le, calayee pèè dá bo wa fafaʔabaa na li. Gbosuu à poo fɛn mà yo wi pe yaʔa pe ya je wa ki calayee ni be. Wɔ̀ɔ yereʔe na. 33Ki nyiŋi na ge, gbosuu à pe nyini ki naŋa ni we kpo mà yâ je wa calayee ni be. À pe fɛ ticaʔaga mà trigi wa angolo noʔo na ge mà yâ do wa cakpɔʔɔ ni ge mà jɔ mà ku.

34Paʔa da gâ hanri ban, calayee naʔafɛɛ á peʔe nya ge, à pe fɛ́ mà kɛri mà yáʔà jari wa kàʔà ni, ní kere kàpleʔe ní ge. 35Hɛɛn à pe pan bì ba ga wele kí ma hanri ge. Pe bâ no wa Jesu na we, à pe naŋa nya we ŋa ni gbosuu pe dá nyini ge. Wɔ̀ɔ po wi yugu kí ma syɛn wí na mà po wí ma dreʔe le mà klɛn Jesu tanla we. Fyara à ti pé co. 36Bee pe daʔá nya pomo ma na gbosuu fɔlɔ wí ma pwɔʔɔ ge, à peʔe tanli pe tɔɔ ma be. 37Ki nyiŋi na ge, Jerasa kàʔà klɛnmɛ woo pè bɛfu à pe Jesu nyɛri we mà yo wi nyini wa pe klɛnmɛ ni me, mɛjɛn pe da fyá ceŋge. Jesu wɔ̀ɔ je nyumu kɔrɔ ni ge, jango bì hru bì da sye. 38Ŋa wi dá bo gbosuu fɔlɔ á pe nyini wí ni ge wɔ̀ɔ Jesu nyɛri we mà yo wí bi blɛn wí ni. Di Jesu wɔ̀ɔ wi nuŋu mà yo: 39«Hrú, maa sye ma kasyɛn ma ge. Kì bɛfu ga Nyɛʔɛlɛ lí ma hanri má kan ge, ma yaa ki tanli.» Wɔ̀ɔ kɛri mà yáa ki jari ki kàʔà dere tì bɛfu na, ga Jesu wí ma hanri wí kan ge.

Picɛple ní cɛlɛ ŋa nì wí maʔa Jesu wi dreʔe na

(Mat 9:18-26; Mar 5:21-43)

40Jesu wi da gâ hru mâ kɛri kɔ ge, janma à mi yɔ́ɔ̀ co kmaʔa, mɛjɛn hɛɛn pè bɛfu pe dáa wi hanni. 41Ki nyiŋi na, à naŋa wà ma pan Jesu krugu we, pé noo yeri Jarusi. Wi dá bo Juwifiyee pe sɛrigo lagwɔ wà wi. Wɔ̀ɔ bâ kunbiʔi kán Jesu tanla mà noo nyɛri mà yo wiʔi yaʔa, wi kɛri wa wi kasyɛn ma ge. 42Mɛjɛn pyɔ nigbe dá bo wí ma, picɛple. Wɔ̀ɔ po wí ma yɛʔɛ kɛ̂ mà kɛ syɛn nyoʔo ta ge. Wi dá bo yaŋa na cɛn wí bi gu.

Nyiŋi ga na Jesu wi da gáa sye ki naŋa wi kasyɛn ma ge, janma à mi noo frɛnʔɛ ceŋge. 43Cɛlɛ wà dà bo be yaŋa, wi dá bo cɛɛ pɛʔɛ ní fɔ mà ta yɛʔɛ kɛ̂ mà kɛ syɛn. Wi dá wi kyɛʔɛ yrɛbɛ pì bɛfu kan dɔʔɔtrɔyee ma be, di wɛ̀ ìn gban bùu pwɔʔɔ. 44Wɔ̀ɔ pa Jesu na we mà yâ màʔà wi dreʔe na ge. Ki nyidege na, wi disyan ga ki dáa ŋu ge, àʔa yere. 45Jesu wɔ̀ɔ yo: «Han ma màʔà na na?» Pè bɛfu pa pe da gâ yo pee ban ge, Pyɛri wɔ̀ɔ yo: «Kundiʔi, janma mí na ma gbanni mà na ma frɛnʔɛ namyɛʔɛ kè bɛfu na.» 46Di Jesu wɔ̀ɔ wí po: «Ayo, hɛn wà ma màʔà na na, mɛjɛn mí maʔa cɛn mà yo sye wà ma nyini ná ni.» 47Cɛlɛ pɔɔ gáʔà cɛn mâ yo wòo gban bí hra ge, wɔ̀ɔ na hiʔiri fyara na de mà na sye Jesu krugu we mà yâ kunbiʔi kán wì tanla. Hɛɛn pe yɛʔɛ̀ na ge, wɔ̀ɔ kì bɛfu tanli wí ma ga ki dɔɔ́ kan wɔ́ɔ maʔá wí na ge ní ga nì wí ma pwɔʔɔ ki nyidege na ge. 48Jesu wɔ̀ɔ wí po: «Na pyɔ, ma pama mí ma ma pwɔʔɔ. Ta sye nyimi na.»

49Wi dá bo wí na nyu adi, à hɛn wà ma jɛ wa sɛrigo lagwɔ wi kasyɛn ma ge mà báʔà yo Jarusi ma we mà yo: «Ma pyɔ wí ma ku. Mò gáa krɛʔɛfɔlɔ teʔe we adi.» 50Di Jesu wɔ̀ɔ ki kayoro loʔo de mà Jarusi po we: «Mò gáa fyaʔa. Ma pà dron. Wí bi syɔ.»

51Pe yâ no wa go na ge, Jesu wi ìn ki ta hɛn wà bi jé wa wi ní fɔ mà gâ laʔa Pyɛri na, ní Jan nì, Jake nì, ní pyɔ to ní, ní pyɔ no ní pee na ge. 52Hɛɛn pè bɛfu pe dáa gbele na taʔara gbanʔa pyɔ wi kala na le. Jesu wɔ̀ɔ yo: «Yò gáa gbele. Wi ìn gu. Wí na ŋolo.» 53À pe noo tyɛʔɛ, mɛjɛn pe daʔa cɛ́n kmaʔa mà yo wi kú. 54Jesu wɔ̀ɔ wí co kyɛʔɛ na mòo yeri gbanʔa mà yo: «Na pyɔ, jɛ̀.»

55Wɔ̀ɔ nyɛ́ mà jɛ kpo. Jesu wɔ̀ɔ yo poo kan wi lì. 56Àʔa wi hefɛɛ fo be. Di Jesu wɔ̀ɔ kí yo pé ma gbanʔa mà yo, ga kí ma hanri ge, pò gaʔa yo hɛn wà ma.

Currently Selected:

LUKE 8: NLK10

Highlight

Copy