LUKE 9

Jesu wí ma wi ploʔofɛɛ kɛ̂ mà kɛ syɛn tun we

(Mat 10:5-15; Mar 6:7-13)

1Jesu wi dá wi ploʔofɛɛ kɛ̂ mà kɛ syɛn kpoʔolo be mà fanŋa kan pé ma ní sye ní jango pe da gbànní pee gbosuu pè bɛfu prɔ, pe da yabaa pori be. 2Wɔ̀ɔ pé tun mà yo pe yaa Nyɛʔɛlɛ li masaʔa kayoʔo jari, pe da yabaa pori be. 3Di wɔ̀ɔ pé po: «Yò gá yraʔa kà kpe kodanʔama woʔo: kangandanʔa gɛ yoo, kasyaʔa gi yoo, bru wi yoo, gbejanra di yoo. Yò gá drere syɛn syɛn kpe.#9:3-5 ma wèle wa Luk 10:4-11; Pit 13:51 ni wè. 4Nà ye yá drigi go o go ga ni, ye kò wa ki gotege ni fɔ yè kɛrinyiŋi ki ba no. 5Kàʔà o kàʔà ga woo ìn bìʔi ta ye trìgì pe na ge, nà ye gáa nyini wa ki kàʔà ni ge, ye yè sabara taplɔʔɔ kori ge. Paʔa bo pé ma jɛnlɛ la lí bi da pe yrɛʔɛ ge.»

6À pe kɛri mà yáa nyari kyɛ̀rɛ̀ kyɛ̀rɛ̀. Deʔe kì bɛfu na, na kayotanʔa nyu mà na hɛɛn pori be.

Erɔde wi lama mí wlele Jesu wi kala na

(Mat 14:1-12; Mar 6:14-29)

7Ki nyiŋi na, klo fɔlɔ Erɔde wi gâ ki kaʔa gee loʔo ke dáa hanri ge, wi lama à mi wlele wí na, mɛjɛn hɛɛn pèè dáa ki nyu mà yo: «Jan wí ma nyɛ̀ mà nyini kuu ni be.»#9:7-8 ma wèle wa Mat 16:14; Mar 8:28; Luk 9:19 ni wè. 8À pèè ma yo: «Eli wí pan nɛ.» À pèè ma yo nɛ: «Fanfan Nyɛʔɛlɛ leyoo wà wi wi nyɛ́ mâ nyini ge.» 9Erɔde wɔ̀ɔ hín yo: «Mì mi dá Jan yugu kon ge. Ɛɛn di, mí na ki kaʔa gee nuru gɛɛ? Han wi wí na ke hanri ge?» Wɔ̀ɔ naʔa ca bùu nya.

Jesu wí ma nabii 5 000 kan, à pe li

(Mat 14:13-21; Mar 6:30-44; Jan 6:1-14)

10Pitunbee pe gâ hru mâ pan ge, pe daâ ga hanri, à pe báʔà yo Jesu ma we. Wɔ̀ɔ pé co, à pe kɛri pè yɛ wa Bɛtisayida kàʔà namyɛlɛ na le. 11Di hɛɛn pa pe da gáʔà cɛn ge, à pe kɛri wì krugu. Wɔ̀ɔ yâ pe co kmaʔa na Nyɛʔɛlɛ li masaʔa kayoʔo nyu pe kân. Bee pe dá jori bì bwɔʔɔ ge, wɔ̀ɔ na pe pori.

12Yaa ki da gáa jɛn kí bi gɔ nyiŋi ga na ge, Jesu wi hɛɛn kɛ̂ mà kɛ̀ syɛn à pe pan mà bɔ́ɔ̀ po: «Ma ki hɛɛn yaʔa be pe kɛri wa kyɛ̀rɛ̀ da ni tí nyɛ wò tanla ní kere kàpleʔe ní ge jango pe ya trigihaʔa ta, pe lì, mɛjɛn wó nyɛ deʔe ga na, sinbriʔi deʔe gi.» 13Di wɔ̀ɔ pé po: «Yèé ye pe kan pe lì.» À pe yo: «Bru kɔgunnu nyɛ wo ma dron ní fyɔɔ syɛn ní. Má ma cori wo kɛri wo ya hro syɔ ki janma mì bɛfu kan yo?»

14Ali nabii pe dá saamo mà kɛ kɔgunnu nyoʔo kɔ ge (5 000). Wɔ̀ɔ wi ploʔofɛɛ po be: «Ye pe tɛnŋɛ deʔe deʔe, deʔe nigbe ki hɛɛn too syɛn ní kprɔʔɔ kɔ we.» 15À peʔe hanri ban mà pè bɛfu tɛnŋɛ tɛnŋɛ. 16Wɔ̀ɔ bru kɔgunnu kpe ní fyɔbiʔi syɛn ní we mà yɛʔɛ̀ jrɛʔɛ namuru mà Nyɛʔɛlɛ syeri pi kala na le, ki kruʔu ma, mà pi konʔolo mà pi kân wi ploʔofɛɛ ma be, jango pe pi tìʔìbí hɛɛn na be. 17Hɛɛn pè bɛfu à pe li mà tìn. À pe brukonmo ní fyɔgonmo kpoʔolo be ba pí kori ge. À pi kpogoo kɛ̂ mà kɛ syɛn nyi.

Pyɛri wí yo Jesu wí nyɛ Nyɛʔɛlɛ li wofràa

(Mat 16:13-19; Mar 8:27-29)

18Wlɛʔɛ kà na, Jesu wi dáa Nyɛʔɛlɛ nyɛri le wì yɛ nigbe, di wi ploʔofɛɛ pe dá bo wa wi ní. Wɔ̀ɔ pe yugu mà yo: «Hɛɛn pé yo han wi ná ni?» 19À poo po: «Pèè ma yo: Jan Batise wi má ni. À pèè ma yo: Eli wi má ni. À pèè ma yo nɛ: Fanfan Nyɛʔɛlɛ leyoo wà wi má ni ŋa wi nyɛ́ mâ nyini ge.» 20Wɔ̀ɔ pé po: «Di yèé bɛɛ, yé yo han wi ná ni?» Pyɛri wɔ̀ɔ wí po: «Má nyɛ Nyɛʔɛlɛ li wofràa.»#9:20 ma wèle wa Jan 6:68-69 ni wè.

Jesu wí ma wi kùʔù kayoʔo yo

(Mat 16:20-28; Mar 8:30 - 9:1)

21Wɔ̀ɔ kí yo pé ma gbanʔa mà yo, pò gá ki woʔo ga yo ge hɛn wà ma. 22Wɔ̀ɔ kí yo pé ma kpo mà yo: «Kí nyɛ jiji wi Hɛn Pyɔ wi ba jɔlɔ fafaʔa wa lagwɔɔ ní, sraʔá farafɛɛ pe lagwɔɔ ní, ní Furu sɛbɛ cɛnfɛɛ pe kyɛrɛ̀ ni. Pe bɔɔ cè, poo kpo, wlɛʔɛ tanriwoʔo na, wi ba nyɛ̀ wi nyini kuu ni be.»

23Wɔ̀ɔ kí yo nɛ hɛɛn pè bɛfu ma mà yo: «Nà hɛn ŋa biʔi nya wí bi ba ná na, kí ma yala wi kruʔu wa wi nadanma kaʔa ma ge, wi da wi tipraʔa tugu ge wlɛʔɛ kì bɛfu na, wii ban nà krugu. 24Mɛjɛn hɛn o hɛn ŋa wí bi da jan wi yugu syɔmo ní wì yɛ, pɔɔ baʔa punŋu. Di hɛn ŋa wí bi wi nyuwyeʔe punŋu ge na kɔsɔ na, wi yugu paʔa ba syɔ wí kan. 25Hɛn wí bi nyaʔa tonro ta, nàʔa po wí ma drunya yrɛbɛ pì bɛfu ta, di kí po wí ma wi nyuwyeʔe punŋu kɔ, ná kiì ban, kí po wí na sye cɔlɔʔɔ deʔe na ge. 26Mɛjɛn mí na fɛrɛ tonni hɛn o hɛn ŋa na mà plɛn na kayoro ní de, ki woo pɔɔ baa fɛrɛ tonni mì Hɛn Pyɔ na we kpo, nyiŋi ga na mí gà hru bí ban na kpangbanma ní, ki na po pé yo, na To nì, ní mlɛŋɛkmaa pe womo nì me. 27Mí biʔi yo ye ma kanyɛmɛ na bì yo: Pèè nyɛ naʔa ye ni yerehaʔa, pe ìn bi gu kpɛn sanni pé bi Nyɛʔɛlɛ li masaʔa nya ge.»

Jesu wi wamagrɛʔɛmɛ

(Mat 17:1-8; Mar 9:2-8)

28Wi dá ki kayoro yo pe kân, àʔa ta wlɛrɛ natanri, wɔ̀ɔ Pyɛri nì, Jan nì, ní Jakeyee co mà kɛri pé ni. À pe yâ luʔu angogo yugu na mà yâ Nyɛʔɛlɛ nyɛri le.#9:28-35 ma wèle wa 2Pyɛ 1:17-18 ni wè. 29Nyiŋi ga na wi gáa nyɛri ge, wi yɛʔɛ̀ ki pomo à mi wa mà krɛʔɛ. Wi dreʔe fanna, àʔa wa mà krɛʔɛ mà na fligi pere pere. 30-31Ki nyidege na ge, à nabii syɛn ma pè tyɛʔɛ kpangbanma paʔama ní mà na nyu Jesu ní we. Pe dá bo Mowisi nì, ní Eli nì. À pe na nyu wí ni pomo ma na wí bi ba gu wa Jerusalɛmu kàʔà ni ge jango bí Nyɛʔɛlɛ li nadanma hanri me. 32Di Pyɛri nì, ní wi nibyee ní pe dá bo na ŋolo ceŋge. Ŋlomo mi gâ jele pe na ge, à pe wi kpangbanma paʔama nya me mà nabii syɛn nya be wì tanla yerehaʔa. 33Ki nabii syɛn pa pe da gáa sye mâ Jesu yaʔa we be ge, Pyɛri wɔ̀ɔ yo: «Kundiʔi, kí nyɛ kmaʔa á wo po naʔamɛ ge. Wo kajoro tanri kmo. Kà bí bo ma woʔo. Kà bí bo Mowisi woʔo. Kà bí bo nɛ Eli woʔo. Ɛɛn di, ga wi dá yo ge, wi ìn ki cɛn.» 34Nyiŋi ga na wi dáa ki kaʔa nyu ge, à faʔa kà ma pan mà bâ pe tón. Ploʔofɛɛ pa pe gáʔà nya faʔa ki pe tón banmɛ ge, à pe fya. 35À pe ákpolo là loʔo wa faʔa ki lama ni me, à li yo: «Ki woo ŋa wí nyɛ na Pyɔ wi, ŋa mí ma fara ge. Ye da nurú wí ma.»#9:35 ma wèle wa Esa 42:1; Mat 3:17; 12:18; Mar 1:11; Luk 3:22 ni wè.

36Pe gâ ki àkpolo loʔo le kɔ, Jesu wi ploʔofɛɛ à pe Jesu nya we wì yɛ nigbe. À pe pyeri. Ki nyiŋi na ge, kaʔa gee pé ma nya ge, pe ìn là yo hɛn wà ma.

Jesu wí ma gbosuu prɔ pyɔ wà na

(Mat 17:14-18; Mar 9:14-27)

37Ki kpɛntoʔo na ge, à pe trigi wa angogo yugu na ge. À hɛɛn fafaʔabaa ma bâ Jesu flin we. 38Naŋa wà dà bo wa janma mi nulala ni le. Wɔ̀ɔ taʔara gbanʔa mà yo: «Krɛʔɛfɔlɔ, mí na ma fɛn, na nyugara ti wa má na, ma na pyɔ wele we na kân, mɛjɛn wí nyɛ ná ma nigbe. 39Gbosyo na jrɛʔɛ wí ni. Nòo gá jɛ wi nî ge, pyɔ wi na fo mà taʔara. Gbosyo wi noo kpoʔoró gbanʔa mà kan takpɔʔɔ ki naa nyini wa wi nò nî ge. Ki gbosyo wi nyinimi mí nyɛ gbanma, mɛjɛn wi hîn pyɔ cɔlɔ ceŋge mà ná nyini wí ni. 40Mí ma ma ploʔofɛɛ nyɛri be mà yo poo prɔ̀ wi nî. Di pe ìn gban bùu prɔ.»

41Jesu wɔ̀ɔ yo: «E, yèé ŋaŋa hɛɛn be, yé nyɛ pama fun mà po hɛnkloboo dɛ. Kí ma yala bì nyiŋi jori ta naʔa ye nì bí da lagunmu cun ye nì ge? Wɔ̀ɔ naŋa po we: Ta ban naʔa ma pyɔ nì we.»

42Pyɔ wi gáa ban ge, gbosyo wɔ̀ɔ wi can tra na de mà noo kpoʔoro gbanʔa. Di Jesu wɔ̀ɔ taʔara gbosyo na we mà pyɔ pwɔʔɔ we mòo kân wi to ma we. 43aNyɛʔɛlɛ li fanŋa ki kpangbanma à mi pè bɛfu fo ceŋge.

Jesu wí na wi kùʔù kayoʔo nyu ge nɛ

(Mat 17:22-23; Mar 9:30-32)

43bPè bɛfu pa pe da gáa kafonlo wa wi kahranʔa na ge. Wɔ̀ɔ kí yo wi ploʔofɛɛ ma be mà yo: 44«Kayoro da mí bi yo ye ma ge, ye ti cò kmaʔa. Tí da: Pé bi ba Hɛn Pyɔ le we hɛɛn pe kyɛrɛ̀ ni de.» 45Di ga Jesu wí ma yo ge, pe ìn ki loʔo. Ki dá bo pé na hraʔa mà kan pe ìn ki kɔ̀rɔ́ cɛn we. Ali pa pe da gáa fyaʔa ge, pe ìn dihon ta bùu yugu ki kayoʔo ní ge.

Han wi wí nyɛ kpangbanŋa we

(Mat 18:1-5; Mar 9:33-37)

46Ki nyiŋi na, kakara dá jɛ wa ploʔofɛɛ pe kpafoʔo ni ge. Pe dáa ki nyu pè ma mà yo wiwii mà kpɔʔɔ pe tɔɔ na be. 47Jesu pɔɔ da gâ pe honriʔi cɛn ge, wɔ̀ɔ pyɔ wà kpe mòo yrigí wì tanla, 48mà pe po: «Hɛn o hɛn ŋa wí bi ki pyɔ co we kmaʔa na kala na le, paʔa bo wí ma domi co we kmaʔa kpo. Hɛn o hɛn ŋa bí domi co we kmaʔa ge, paʔa bo wí ma na tunfɔlɔ wiì co kmaʔa. Mɛjɛn ŋa wí nyɛ yè bɛfu ni tatunŋu, ki woo pɔɔ ba bo hɛnkpangbanŋa bì doro yè bɛfu na.»#9:48 ma wèle wa Mat 10:40; Luk 10:16; Jan 13:20 ni wè.

Ŋa woò na can ye nì, wí na ye hari

(Mar 9:38-40)

49Ki nyiŋi na ge, Jan wɔ̀ɔ Jesu po we: «Kundiʔi, wo di yâ hɛn wà nya wí na gbosuu prɔ ma yele na le. À woo po wi làʔá kí na, mɛjɛn woò nyɛ wò woo wà wi.» 50Di Jesu wɔ̀ɔ wí po: «Yò gáa wi yrigí. Mɛjɛn nàʔa po hɛn ŋa wò na can ye nì, paʔa bo wí na ye hari.»

Samari klo kàʔà kà woo ma ce Jesu ma we

51Pa Jesu wi luʔunyiŋi ki da gáa nori ge, wi honriʔi àʔa ko wi krɛlɛ liì na wa Jerusalɛmu kàʔà ni ge. 52Wɔ̀ɔ pitunbee tun wa wi yɛʔɛ̀ ma ge. À pe kɛri mà yâ je wa Samari kàʔà kà ni bì yà wi trigihaʔa kala tyonri wi kân. 53Di ki woo pe ìn ki ta bì trigihaʔa kân wí ma, mɛjɛn pe daʔá nya wí na sye Jerusalɛmu kàʔà ni. 54Ploʔofɛɛ bee pé na yeri Jake nì, ní Jan nì pe gâ ki woʔo nya ge, à pe yo: «Má ma cori woʔo yo wo yo kwɔʔɔ ki jɛ̀ wa namuru ni, ki ba do pé na, ki pe kpo yo?»#9:54 ma wèle wa 2Mas 1:9-16 ni wè.

55Di Jesu wɔ̀ɔ wa mà krɛʔɛ mà pe yɛri gbanʔa. 56Ki kruʔu ma, Jesu ní, wi ploʔofɛɛ ní à pe kɛri kàʔà kà ni kì yɛ.

Hɛɛn bee pé yo pé bi ba Jesu na we

(Mat 8:19-22)

57Pe gáa sye kloʔò na ge, à hɛn wà maʔa yo Jesu ma we mà yo: «Mí bi ba má na bì da sye deʔe o deʔe ga na má na sye ge.» 58Jesu wɔ̀ɔ wí po: «Wyeʔe nyɛ nya poon ma be, à heʔere ma po kajɛnʔɛ ma ge, di yugu tyɛʔɛhaʔa wò nyɛ Hɛn Pyɔ ma we.» 59Jesu wɔ̀ɔ kí yo wà ma nɛ mà yo: «Ma pà ná na.» Ki woo wɔ̀ɔ yo: «Wò fɔlɔ, ma na yaʔa bì yà na to le we kpɛn.» 60Di Jesu wɔ̀ɔ wí po: «Ma kuu yaʔa pe da pe woo ni be. Ɛɛn di, mo tapolo we, maa sye ma yaa Nyɛʔɛlɛ li masaʔa kayoro jari de.» 61À wà maʔa yo nɛ mà yo: «Na fɔlɔ, mí bi ba má na, di ma na yaʔa bì yà sari na heme woo na be kpɛn.»#9:61 ma wèle wa 1Mas 19:20 ni wè. 62Jesu wɔ̀ɔ ki woo po we: «Ŋa wí bi ca co niri da krugu tí na fali ge, nòo da wele kruʔu ma ge, ki woo ŋa wí ìn yala Nyɛʔɛlɛ li masaʔa nì ge.»

Currently Selected:

LUKE 9: NLK10

Highlight

Copy