LUKE 10

Jesu wí ma hɛɛn 72 tun

1Ki kruʔu ma, wò fɔlɔ wɔ̀ɔ ní mà hɛɛn too tanri ní kprɔʔɔ ní hɛɛn syɛn fara. Dere da na wiì wí na sye ge ní kyɛ̀rɛ̀ nì de, wɔ̀ɔ ki woo tun be wa syɛn syɛn pe klu, pe kɛri wi yɛʔɛ̀ ma. 2Wɔ̀ɔ pé po: «Ali akaba ba pí lɛ kɔ ge, pí nyɛ fafaʔa wa kere ni de, di pi konfɛɛ poò fafaʔabaa. Ki kala na, ye kere fɔlɔ nyɛri we, jango wi akaba konfɛɛ pèè troʔo wa nɛ kere ni de. 3Yee sye. Welé, mí ma ye troʔo nɛ pa mbapiʔi nyɛ ge wa sanwyeʔe kpafoʔo ni. 4Yò gá gbejanra alege kpe, kana kasyaple li yoo, ná kiì ban, sabara di yoo. Yò gaâ yere bì da hɛɛn syeri bì da mori wa kloʔò na ge. 5Nà ye ya je go o go ga ni ge, ye klu ye yo: ‹Nyimi bí bo ki go woo ma be.› 6Nàʔa po naŋa wà nyɛ wa ki go nî ge, ŋa wí ma yala nyimi ní me, yè nyimi pa mi go wi na. Ná kiì ban, pa mi hru bì ban yè krugu nɛ. 7Ye kò wa ki go kiì nigbe ni. Nà pe da yrɛbɛ ba kanʔa ye ma ge, ye da pi ka, yee jo. Mɛjɛn tungɔɔ wí ma yala wi sràʔà nì ge. Yò gá nyini go kà ni bì je kà ni nɛ.#10:7 ma wèle wa 1Kor 9:14; 1Tim 5:18 ni wè.

8Nà ye ya je kàʔà o kàʔà ga ni, ki kàʔà woo nà pe ye co kmaʔa, nà pe da yraʔa o yraʔa ga kanʔa ye ma ge, ye daʔa ka. 9Ye da kàʔà ki yabaa pori be, yee ki nyu ki kàʔà woo ma be ye yo: ‹Nyɛʔɛlɛ li masaʔa kí ma no ye na.› 10Ná ye ya je kàʔà o kàʔà ni, nà pe ìn ye co kmaʔa, ye nyini, yee sye ki kàʔà lama kloro ni de, yeʔe yo ki hɛɛn ma be ye pe po:#10:10-11 ma wèle wa Pit 13:51 ni wè. 11‹Ali yè kàʔà taplɔʔɔ ga kí ma traʔa wa wò klɔrɔ na de, wó biʔi tuʔu wò na. Paʔa bo ye ma jɛnlɛ la lí bi da ye yrɛʔɛ ge. Kiì nì kì bɛfu ní, kí ma yala yeʔe cɛn Nyɛʔɛlɛ li masaʔa kí ma no ye na.› 12Mí biʔi yo ye ma, Sodɔmu kàʔà kiti wí bi ba jɛrɛ bì doro ki kàʔà ga ki woo na kiti konwlɛʔɛ na ge.»#10:12 ma wèle wa Hli 19:24-28; Mat 11:24; 10:15 ni wè.

Kyɛ̀rɛ̀ da woo wò na pa Jesu na we

(Mat 11:20-24)

13Korasɛn kàʔà woolo, cɔlɔkpɔʔɔ nyɛ ye na dɛ. Bɛtisayida kàʔà woolo, cɔlɔkpɔʔɔ nyɛ ye na kpo dɛ. Mɛjɛn, kafonŋoo gee ké ma hanri ye ni ge, nàʔa po pe da ké hanri wa Tire nì, ní Sidon kyɛ̀rɛ̀ tiì ni ge, ti hɛɛn pe dá bi da gbanni bì da kasyara drere ni bì da pè fligi tyonro ní, jango bì daʔa teri hɛɛn na be, peʔe cɛn pe yo pé ma kruʔu wa pe kapere ma de.#10:13 ma wèle wa Esa 23:1-18; Esek 26:1 - 28:26; Jow 4:4-8; Amo 1:9-10; Sak 9:2-4 ni wè.

14Kiì nì kì bɛfu ní, Tire nì, Sidon kàʔà nì ti kiti wí bi ba jɛrɛ bì doro yè woo na we kiti konwlɛʔɛ na ge. 15Yèé bee, Kapɛrinamu kàʔà woolo, yé ma paʔa na mà naʔa nyu mà yo, yé bi gbɔʔɔ ceŋge fɔ bì no wa namuru ni de yo? Ayo dɛ. Yé bi jɛrɛ fɔ bì no wa kuu kaʔa na ge.#10:15 ma wèle wa Esa 14:13-15 ni wè.

16Jesu wɔ̀ɔ kí yo wi ploʔofɛɛ ma be mà yo: «Ŋa wí bi da nuru ye ma ge, ki woo pɔɔ bo wí na nuru ná ma kpo. Di ŋa wí bi je ye ma ge, ki woo pɔɔ bo wi cé domi ma we kpo. Ali ŋa wí bi je domi ma we, pɔɔ bo wi cé ŋa ma wí ma na tun ge.»#10:16 ma wèle wa Mat 10:40; Mar 9:37; Luk 9:48; Jan 13:20 ni wè.

Hɛɛn 72 pe hrubanma

17Ki kruʔu ma, hɛɛn too tanri ní kprɔʔɔ ní hɛɛn syɛn wɔ̀ɔ hru mà pan lafiʔimi nì mà bâ yo: «Wò fɔlɔ, ali gbosuu pe daâ ná wo kpɔʔɔ ma yele na le.» 18Wɔ̀ɔ pé po: «Mi dá bo na wele, à mi Sotanri nya wí jɛ wa namuru ni de mà trigi mà bâ do tra na de nɛ pa namuru yreʔe nyɛʔɛmɛ nyɛ me. 19Yè wèlé, mí ma fanŋa kan ye ma jango ye da gbànní ye da wɔrɔ nì, ní noyee tanri be, ye yè bɛnfɔlɔ wi fanŋa kì bɛfu ja. Yraʔa kɛ̀ ìn bi gban bì kala là hanri ye na.#10:19 ma wèle wa Ŋuʔu 91:13 ni wè. 20Ɛɛn di, yò gá bo lafiʔimi nì wɛʔɛ bì yo gbosuu pé na ye kpɔʔɔ. Di ye po lafiʔimi nì ga na yè yegee ké nyɛ wa nyoŋoʔo namuru ni de.»

Jesu wi lama mí ma fiʔi wí na ceŋge

(Mat 11:25-27; 13:16-17)

21Ki nyidege na ge, Jesu wi lama à mi fiʔi wí na ceŋge Nyɛʔɛlɛ li Nyìli li fanŋa ni ge. Wɔ̀ɔ yo: «Na To, mí na ma syeri, mo ŋa namuru ní, tra ní pi fɔlɔ we, ga na ma dá ki kaʔa gee hra ge ticlimi fɛɛ ní kaʔa cɛnfɛɛ na be mâ ke tyɛʔɛ pii na be ge. Ee, na To, mí na ma syeri, mɛjɛn ki da ma glán maʔá hanri ban ge. 22Wɔ̀ɔ hɛɛn po be: Na To wí ma yrɛbɛ pì bɛfu kan ná ma. Hɛn wɛ̀ ìn Pyɔ cɛn we, nà ki ìn bo To wiì wi ge. Hɛn wɛ̀ ìn To cɛn we kpo, nà ki ìn bo Pyɔ wiì wi ge, ní ŋa na Pyɔ wí ma cori buu cɛʔɛ́ ge.»#10:22 ma wèle wa Jan 3:35; 10:15 ni wè.

23Wɔ̀ɔ wa mà krɛʔɛ màʔa yo wi ploʔofɛɛ pee nigbe ma mà yo: «Frɛmɛ nyɛ ye ma ceŋge kaʔa gee kala na yé na nyaʔa ge. 24Mɛjɛn, kanyɛmɛ na, fanfan ni we, Nyɛʔɛlɛ leyoo fafaʔa nì, ní klòʔo fɛɛ fafaʔa dàá ki ca bì ki kaʔa gee nya yé na nyaʔa ge, di pe ìn ke nya. À pe naʔa ca nɛ bì kaʔa gee loʔo yé na nuru ge, ɛɛn di, pe ìn ke loʔo.»

Samari klo woo hɛncɛnŋɛ yomɛlɛ

25Ki nyiŋi na ge, sɛbɛ cɛnfɛɛ à wà ma jɛ mà yere bì Jesu po bùu wele. Wɔ̀ɔ yo: «Krɛʔɛfɔlɔ, mí bi nyaʔa hanri bí nyuwyeʔe bajegɔ ta we?» 26Jesu wɔ̀ɔ wí po: «Pé ma nyaʔa nyoŋo wa Nyɛʔɛlɛ li furu kayoro ni de? Dee di, mɛ ín na nyaʔa nuru nà ma dɔɔ nyu ge?» 27Sɛbɛ cɛnfɔlɔ wɔ̀ɔ wí po: «Kí ma yala ma fɔlɔ Nyɛʔɛlɛ li da ma glànʔá ma dihon wì bɛfu ní, ma nyìli lì bɛfu ní, ma fanŋa kì bɛfu ní, ma honriʔi kì bɛfu ní. Ma nibo wi da ma glànʔá nɛ pa mo má na mà glanʔa pomo ma na ge.»#10:27 ma wèle wa Sraʔa 19:18; Lado 6:5 ni wè.

28Jesu wɔ̀ɔ wí po: «Ma ma yo kmaʔa. Maa ki woʔo kì bɛfu hanri, pa ma nyuwyeʔe ta ge.»#10:28 ma wèle wa Sraʔa 18:5 ni wè.

29Di ki naŋa wi dáa ki ca bì tanʔa kan wi ma. Ki kala na, wɔ̀ɔ Jesu po we: «Han wi wí nyɛ na nibo we?» 30Jesu wɔ̀ɔ wí po: «Naŋa wà dà jɛ Jerusalɛmu kàʔà ni na sye Jeriko kàʔà ni. À nikonmoo pèè ma bâ do wí na mà wi drere fara de wi na mòo kmo ceŋge mà kɛri mòo yaʔa be. Wɔ̀ɔ na cɛn wí bi gu. 31Ki nyidege na ge, à sraʔá farafɔlɔ wà ma ki kloʔò kpe ge na sye. Wi bɔ́ɔ̀ nya nyiŋi ga na ge, wɔ̀ɔ wi hlɔʔɔ mà toro namyɛlɛ na. 32Ki podeme na, à Lefiyee woo wà ma bâ no be kpo ki dedege na ge mà bɔ́ɔ̀ nya. Wɔ̀ɔ hlɔʔɔ mà toro namyɛlɛ na kpo. 33Di Samari klo woo wà dà ki kodege kpe na sye mà yâ no wí na. Pɔɔ gɔ́ɔ̀ nya banmɛ ge, wi nyugara à ti wa wí na.#10:33-34 ma wèle wa 2Masa 28:15 ni wè. 34Wɔ̀ɔ flo wa wì tanla mà yâ hùnmù nì, ní dufɛn wo wa dere da na pe dɔɔ kmó móò kla ge mà ti pwɔ pwɔ wí na. Ki kruʔu ma, wɔ̀ɔ wi pa wa wiì wi sofɛntala na le mà kɛri wí ni nabonmoo trigihaʔa kà na mà yáa wi fwo. 35Ki kpɛntoʔo na ge, wɔ̀ɔ gbejanra fara too syɛn mà ti kân nabonmoo trigihaʔa fɔlɔ ma we mà yo: ‹Ma dɔɔ kɔ̀rɔ̀si. Nà ma ga kan bì haʔa wa na woʔo na ge, nà mi ga hru bí baa doro ge, domi pa mi ki fwɔʔɔ tón ge ma ma.› » 36Jesu wɔ̀ɔ sɛbɛ cɛnfɔlɔ yugu we mà yo: «Ki hɛɛn tanri ni we, wiwii ma po nibo naŋa ŋa ma nikonmoo pé ma to wí na ge?»

37Wɔ̀ɔ yo: «Wi nyugara tí ma wa ŋa na ge wiì wi.» Jesu wɔ̀ɔ wí po: «Mo fanna, ta sye ma yaa kiì tege hanri.»

Jesu wi kɛri Marite nì Mari kasyɛn

38Jesu ní, wi ploʔofɛɛ ní, pe gáa sye ge, à pe yâ je kàʔà kà ni. À cɛlɛ wà mòo trigi wa wi go nî ge, pe dáa ki cɔ yeri we Marite. 39Ki cɔ wi conlo wà dà bo be, à pe noo yeri Mari. Wɔ̀ɔ klɛn be wò fɔlɔ tanla we mà na wi kayoro nuru de. 40Di Marite wi lama mi da wlelé wí na tunŋu ki fafaʔama kala na le. Wɔ̀ɔ pan Jesu krugu we mà bɔ́ɔ̀ po: «Na fɔlɔ, na conlo wí ma na yaʔa nà yɛ nigbe bí da tunŋu ko ge, koò nyɛ má ma yraʔa kà yo? Maʔa yo wí ma moo po wi na haʔa.»

41Di wò fɔlɔ wɔ̀ɔ wí po: «E Marite, ma lama mí ma wlele má na kaʔa fafaʔagaa kala na, à ma na honri ké na. 42Ɛɛn di, kala nigbe li lí nyɛ cromo wolo ge. Akmaʔa ga Mari wí ma fara ge, pe ìn bi gàʔa syɔ wí ma.»

Currently Selected:

LUKE 10: NLK10

Highlight

Copy