LUKE 16

Masa naŋa wi krɔʔɔ welefɔlɔ wi kayoʔo

1Jesu wɔ̀ɔ ní màʔa yo wi ploʔofɛɛ ma be mà yo: «Naŋa wà dà bo wa masa naŋa. Ki woo wi dá wà kpe mòo tɛnŋɛ wi kasyɛn yugu na ge. À wà ma kɛri mà yáʔà yo masa naŋa ma we mà yo: ‹Ma krɔʔɔ welefɔlɔ wí naʔa cɔʔɔ.› 2Masa naŋa wɔ̀ɔ ki krɔʔɔ welefɔlɔ yeri we mà bɔ́ɔ̀ po: ‹Ga mí na nuru ma namyɛʔɛ na ge kí nyɛ mɛlɛ si? Pomo ma na má ma tunŋu kɔ ge, gbejanra da tí ta ge yoo, da tí fa wa ge yoo, maʔa tyɛʔɛ ná na, mɛjɛn mɛ ìn bi gban bì bo na krɔʔɔ ki welefɔlɔ adi.› 3Wi krɔʔɔ welefɔlɔ wɔ̀ɔ kí yo wa wi lama ni me mà yo: Mí bi nyaʔa hanri, mɛjɛn na kundiʔi wí yo wí bi na wa tunŋu ni ge? Mi ìn bi gban bì fali. Ɛɛn di, bì da hɛɛn nyɛri nɛbo fyomo fɔlɔ wi ge, paʔa da fɛrɛ tonni ná na. 4Ga mí bi hanri ge, jango nòo ga na wa tunŋu ni, hɛɛn pé da na cùn kmaʔa wa pe goro ni de, mi ná màʔa cɛn san. 5Wɔ̀ɔ wi kundiʔi wi fwɔrɔ fɛɛ yeri be pè bɛfu nigbe nigbe mà báʔà yo kplɛɛ ma we mà yo: ‹Na kundiʔi wi fwɔʔɔ kí nyɛ má na jori?› 6Ki woo wɔ̀ɔ yo: ‹Hùnmù barikoro too kɔgunnu.› Wɔ̀ɔ wí po: ‹Ma fyala, ma fwɔʔɔ sɛbɛ kpe we, ma klɛn, ma hùnmù barikoro too syɛn ní kprɔʔɔ nyoŋo.› 7Ki kruʔu ma, wɔ̀ɔ ní màʔa yo wà ma nɛ mà yo: ‹Mo wɛɛ, wi fwɔʔɔ jori nyɛ má na?› Ki woo wɔ̀ɔ yo: ‹Akpa kasyakpandoro tí nyɛ saa kɔgunnu.› Wɔ̀ɔ ki woo po we: ‹Ma ma fwɔʔɔ sɛbɛ kpe we, ma kasyakpandoro saa ticɛrɛ nyoŋo.› 8Ki kundiʔi wɔ̀ɔ wi krɔʔɔ welefɔlɔ son we, ŋa wi ìn dà bo sinŋi ge, mɛjɛn wi dá ki woʔo ga hanri ge ticlimi nì. Kanyɛmɛ na, drunya woolo pé nyɛ ticlibee. Pé ma pe hɛnnyɛɛ kaʔa cɛn ge mà toro kpɛnmɛ woo na be.

9Mí biʔi yo ye ma bì yo: Ye da nagroboo ca yè kân ki drunya masaʔa nì ge, jango yè woʔo nàʔa gá ba gɔ, Nyɛʔɛlɛ li ye co kmaʔa wa bajegɔ korohaʔa na ge. 10Ŋa wí nyɛ pama ní kayrigee ni ge, ki woo wí nyɛ pama ní kpo kakpandoʔo na ge. Ŋa wi ìn bi bo sinŋi kayrigee na ge, ki woo wòo bo sinŋi kakpɔʔɔlɔ na ge kpo. 11Ki kala na, nà ki ìn bo ye dá bo pama ní ki drunya masaʔa na ge, han wi wí bi ba krɔcɛnŋɛ le wa yè kyɛ̀rɛ́ ni de? 12Nàʔa po ye ìn dà bo pama ní wa hɛn wà masaʔa kala na, pa han bí ba yè woʔo kân ye ma?

13Tungɔɔ wà wóo gban bì da tunŋu ko kundiʔiyee syɛn ma. Mɛjɛn pa wà bí dɔɔ bɛnʔɛ, wà bí dɔɔ glanʔa. Welé, pɔɔ wì pwɔ wà na bì laʔa wà na. Yòo gban bì da tunŋu ko Nyɛʔɛlɛ kan le bì nì bì daʔa ko gbejanra kan de.»#16:13 ma wèle wa Mat 6:24 ni wè.

Jesu wí ma pe krɛʔɛ kaʔa kèè ní

(Mat 11:12-13; 5:31-32; Mar 10:11-12)

14Farisiyee pe dá ki kaʔa kè bɛfu loʔo, à pe na pè kle wí na, mɛjɛn gbejanra ti dáa pe glanʔa ceŋge. 15Wɔ̀ɔ pé po: «Yèé bɛ yé na yè teri hɛnsinbee hɛɛn yɛʔɛ́ na ge. Di Nyɛʔɛlɛ lí ma yè lama cɛn me. Mɛjɛn yraʔa ga ki kpɔʔɔ́ hɛɛn ma be, koò nyɛ yraʔa Nyɛʔɛlɛ li yɛʔɛ̀ na ge.

16Nyɛʔɛlɛ li furu kayoro sɛbɛ ní li leyoo sɛbɛɛ ní pe dá bo fanŋa nì fɔ mà bâ no wa Jan wi nyiŋi na ge. Mà kpe ki nyiŋi na ge, pé na li masaʔa kayotanʔa nyu ge. Hɛɛn pè bɛfu à pe na pè kpanŋi bì da jinʔi ni. 17Di namuru ní, tra ní nà pi kɔ, paʔa bo hanridanʔa bì doro Nyɛʔɛlɛ li furu kayoro ti nyoŋomo tatunmu punŋumu na me.

18Hɛn o hɛn ŋa wí bi wi cɔ wa we bí wà kpe nɛ ge, paʔa bo ki woo wí ma cɛkpere kapeʔe po. Cɛlɛ ŋa pé ma wa ge, naŋa ŋa wí buu kpe, paʔa bo wí ma cɛkpere kapeʔe po.#16:18 ma wèle wa Mat 5:32; 1Kor 7:10-11 ni wè.

Masa naŋa nì, ní Lasare nì

19Masa naŋa wà dà bo wa, wɔ̀ɔ na pɛgbanra drere ni, ní kpasyokmara nì de mà na hutanra li wlɛʔɛ kì bɛfu na. 20À fyomo fɔlɔ wà ma po wa kpo. À pe noo yeri Lasare. Wi dáa bin syɛnhaʔa wa masa naŋa wi kasyɛn goyɛʔɛ na ge. À namoro ma po wí na wi wre tì bɛfu na. 21Hro da ti dáa ŋu wa masa naŋa wi tabali noʔo na ge, wɔ̀ɔ cori bì da ti li. Ali poon à pe báa wi namoro laali de. 22Fyomo fɔlɔ wɔ̀ɔ bâ gu, Nyɛʔɛlɛ mlɛŋɛyee à pe pan mà bɔ́ɔ̀ kpe màâ wi tyɛʔɛ Abrahamu tanla wa Nyɛʔɛlɛ kaʔa ni ge. Masa naŋa fanna, wɔ̀ɔ bâ gu. À poo le. 23Nyiŋi ga na wi da gáa jɔlɔ ceŋge wa kuu kaʔa ni ge, wɔ̀ɔ wi yugu jrɛʔɛ mà wele mà Abrahamu nya we wa deleʔege na. Lasare wɔ̀ɔ po wa wì tanla. 24Wɔ̀ɔ taʔara mà yo: ‹Na to Abrahamu, na nyugara ti wa má na, ma Lasare troʔo we naʔa wi ya kabɛlɛ minala le wa nyumu ni me, wi ba li pà wa na na nɛlɛ na le, jango li nyìŋí. Mɛjɛn mí na cɔlɔ ceŋge naʔa ki kwɔʔɔ ga ni ge.› 25Di Abrahamu wɔ̀ɔ wí po: ‹Na pyɔ, ma lama toʔo ni, maʔa cɛn ma yo ma dá ma akmaba pì bɛfu ta kɔ ma nyuwyeʔe nyiŋi na ge, di Lasare wɔ̀ɔ yrɛtipebe ta. Ŋaŋa ni ge, wí nyɛ nyimi na, mo à ma po cɔlɔʔɔ ni. 26Mà haʔa wa ki woʔo na ge, wyekpɔticuʔugu nyɛ wa wòó ní, yèé ní wò kpafoʔo ni ge. Kiì ma kan bee pé cori bì jɛ naʔamɛ bì gɛri wa yè krugu ge, pòo gban bìʔi hanri. Pèè wóo gban bì jɛ wa yèé ma be bì ban naʔa wòó krugu be.› 27Masa naŋa wɔ̀ɔ ní mà yo nɛ: ‹Na to, nàʔa po kiì gi, mí na ma fɛn, moo troʔo wa na to go woo ma be. 28Mɛjɛn na cyɛɛn kɔgunnu nyɛ wa na ma. Kí ma yala wi ya pe kàlì, jango pee pò gá ban naʔa ki cɔlɔʔɔ deʔe ga na ge.› 29Abrahamu wɔ̀ɔ wí po: ‹Mowisi nì, ní Nyɛʔɛlɛ leyoo ní pe kayoro tí nyɛ wa pe ma. Kí ma yala pe da ki woro nuru de.› 30Wɔ̀ɔ yo: ‹Eʔe, na to Abrahamu, di nàʔa po wà ma nyɛ̀ mà nyini kuu ni be bi gɛrí wa pè krugu ge, pa pe kruʔu wa pe kapere ma de.› 31Di Abrahamu wɔ̀ɔ wí po: ‹Nàʔa po poò na Mowisi nì, ní Nyɛʔɛlɛ leyoo pe kayoro nuru de, ali nà wà ja nyɛ bì nyíni kuu ni be, pòo baʔa na.› »

Currently Selected:

LUKE 16: NLK10

Highlight

Copy