LUKE 15

Mbyɔ ŋa wí punŋu ge

(Mat 18:12-14)

1Nyiŋi kà na, misari syɔfɛɛ ní, ní kapere hanrifɛɛ pè bɛfu ní pe dáa flo wa Jesu tanla we, jango bì da wi kayoro nuru de.#15:1-2 ma wèle wa Luk 5:29-30 ni wè. 2Farisiyee ní, ní Furu sɛbɛ cɛnfɛɛ ní à pe noo hanʔa mà yo: «Ki naŋa ŋa wí na kapere hanrifɛɛ cun be kmaʔa na li pé ni kpo.» 3Ki kala na, Jesu wɔ̀ɔ ki yomɛlɛ la kmo le pe kân mà yo: 4«Wiwii nyɛ naʔa ye ni, nà mbara too kɔgunnu bí bo wí ma, á wà nigbe ma punŋu, wò gá wi mbara ti tɔ yaʔa de be sinbriʔi ni bì gɛri ŋa krugu wí punŋu bì yáa wi ca fɔ bi gɔɔ́ nya ge? 5Nòo gaa wí nya ge, pɔɔ bo lafiʔimi nì fɔ bì wi mbyɔ kpe bùu pa kpeca na bì da sye wí ni kàʔa ge. 6Nòo ya je kàʔa ge, pɔɔ wi nagroboo ní wi nibyee yeri bì pe kpoʔolo bì pe po: ‹Ye po lafiʔimi nì ná ni. Mɛjɛn na mbyɔ ŋa wi dí bunŋu ge, mi yɔ́ɔ̀ ca mòo nya.› 7Mí biʔi yo ye ma bì yo: Kí nyɛ ban kpo, nàʔa po kapere hanrifɔlɔ nigbe ma kruʔu wa wi kapere ma de, pa lafiʔigbɔmo bí bo wa namuru ni de ki woo wi kala na bì doro hɛnsinbee too ticɛrɛ ní kprɔʔɔ ní hɛɛn nacɛrɛ na we, bee pe ìn jori bí kruʔu wa pe kapere ma de.

Tamba punŋumu yomɛlɛ

8Ná kiì ban, cɛlɛ wiwii nyɛ wa, ŋa tambayee kɛ̂ bi bo wí ma, á wà ma punŋu nigbe, wò gá lamba mu bì go pɛ ge bì dɔɔ ca lafiʔimi na fɔ bì yɔ̀ɔ nya ge? 9Nòo gɔɔ́ nya kɔ ge, pɔɔ wi nagroboo ní wi nibyee kpoʔolo be bì yo: ‹Ye po lafiʔimi nì ná ni. Mɛjɛn na tamba ŋa wi dá bunŋu ge, mí moo ca mòo nya.› 10Kí nyɛ ban kpo yèé ní be. Nàʔa po kapere hanrifɔlɔ nigbe ma kruʔu wa wi kapere ma de, pa lafiʔimi bí bo Nyɛʔɛlɛ mlɛŋɛyee ma be.»

Naŋa wà pyɔ punŋumu yomɛlɛ

11Wɔ̀ɔ ní mà yo: «Pii syɛn dá bo naŋa wà ma nabii. 12Pyɔ tatunŋu wɔ̀ɔ kí yo wi to ma we mà yo: ‹Na to, krɔʔɔ ga mí gà ba da wa ma woʔo ni ge, maʔa kan ná ma.› Wɔ̀ɔ kí tiʔibi wi pii syɛn kan be.

13Ki gâ wlɛrɛ cɛnri kɔ kɔ ge, pyɔ tatunŋu wɔ̀ɔ wi krɔʔɔ pɛrɛ mà ki gbejanra kpe de mà kɛri tí ni wa klo là ni leʔe mà yâ wi krɔʔɔ cɔʔɔ ge wa kakloʔo hranma na ní kyɛnrɛ ní de. 14Wi gâ wi krɔʔɔ li, áʔa kɔ nyiŋi ga na ge, à funbeʔe ma bâ do wa ki klo na le. Fyomo à mi to wí na. 15Ki kala na, wɔ̀ɔ yâ tunŋu ca ki klo pyɔ wà ma. Ki woo wɔ̀ɔ wi troʔo kere ni mà yo wi yaa calayee naʔa wa. 16Wi dá jori bì yàá dinni akaba ba na calayee pe dáa ga ge, ɛɛn di, hɛn wɛ̀ ìn dàá pà kanʔa wí ma.

17Wi da gâ wi lama honri me, wɔ̀ɔ yo: Tungɔɔ fafaʔabaa nyɛ na to ma we. Pé na li na tinni. À hro tà na kori. Di domi, funŋu kí na na kpun naʔamɛ ge. 18Mí bi jɛ bì da sye na to krugu we bì yɔ̀ɔ po: ‹Na to, mí ma tipeʔe po Nyɛʔɛlɛ na le mà tipeʔe po mo na we kpo. 19Ki ìn yala pe da na yeri ma pyɔ adi. Ma na kpe nɛ pa ma tungɔɔ nyɛ we.› 20Wɔ̀ɔ jɛ na sye wi to krugu we.

Di wi da gâ bo wa leʔe, wi to wɔ̀ɔ wí nya wí na pan. Wi nyugara à ti wa wí na. Wɔ̀ɔ fɛ mà yɔ́ɔ̀ co mòo traʔa wì na mòo fyon. 21Pyɔ wɔ̀ɔ wí po: ‹Na to, mí ma tipeʔe po Nyɛʔɛlɛ na le mà tipeʔe po mo na we kpo. Ki ìn yala pe da na yeri ma pyɔ adi.› 22Kiì nì kì bɛfu ní, wi to wɔ̀ɔ kí yo wi tungɔɔ ma be mà yo: ‹Ye ya drekmaʔa kpe ga kí nyɛ kmaʔa mâ toro tì bɛfu na ge, yee banʔa ni ticaʔaga. Ye baʔa le wí na. Ye feʔeŋe le wi kabɛlɛ na le. Ye sabara le wi cyeʔe na ge.

23Ki kruʔu ma, ye pan nupyɔ kpangbanŋa ní we, ye bɔɔ kpo. Wo lì kmaʔa, wo fɛti hanri. 24Mɛjɛn na pyɔ ŋa wi dá gu, wi nyɛ́ mà po nyuwyeʔe na. Wi dá bunŋu, di mí moo nya nɛ.› À peʔe hli mà na fɛti hanri we.

25Àʔa hín bo pyɔ lagwɔ wi dá bo wa kere ni. Pɔɔ da gáa ban ge, wi báa nori kasyɛn tanla ge, wɔ̀ɔ yɔrɔ ti tunnumu loʔo me. 26Wɔ̀ɔ tungɔɔ wà yeri mòo yugu mà yo: ‹Nyaʔa ma po wa?› 27Ki woo wɔ̀ɔ wí po: ‹Ma conlo wiì wi wí pan ge. Ma to wɔ̀ɔ bâ nupyɔ kpangbanŋa kpo we, mɛjɛn wí ma hru mà pan wì krugu mà po gbanŋa.› 28Ɛɛn di, pyɔ lagwɔ wi lama à mi gban wí na. Wi ìn ki ta bì je wa kasyɛn ni ge. Ki kala na, wi to wɔ̀ɔ pan mà bɔ́ɔ̀ fɛn. 29Wɔ̀ɔ wi to po we: ‹Welé, mí na fali má kan gbanʔa ki yɛʔɛ gee kè bɛfu na. Mi ìn je je ma kala là ma fyeu. Di, kiì nì kì bɛfu ní, mɛ ìn jé ja ŋkapiʔi kà kan ná ma jango bì ja fɛti hanri na nagroboo ní be. 30Di ma pyɔ ŋa wí ma ma krɔʔɔ kpe ge má yáʔà cɔʔɔ cɛɛ nagbefaʔa fɛɛ na ge, nyiŋi ga wi gâ ban ge, à ma bâ nupyɔ kpangbanŋa kpo wí kan.› 31Wi to wɔ̀ɔ wí po: ‹Na pyɔ, mo má nyɛ naʔa ná ni nyiŋi kì bɛfu na. Na yrɛbɛ pì bɛfu pi klɛ́n mà mo kan. 32Di ki dí yala wo fɛti hanri, wo po lafiʔimi nì, mɛjɛn ma conlo ŋa wi dá gu, wí ma nyɛ̀ mà po nyuwyeʔe na. Wi dá bunŋu. Wo ní mòo nya nɛ.› »

Currently Selected:

LUKE 15: NLK10

Highlight

Copy