LUKE 14

Jesu wí ma yaŋa pwɔʔɔ

1Fyonriwlɛʔɛ kà na, Jesu wi da yâ jɛ wa Farisiyee hɛnkpangbanŋa wà go nî, jango bì li wi ní. Bee pe dá bo wa à pe na Jesu kɔrɔsi we kmaʔa. 2Naŋa wà dà bo be wì tanla, wre à ti po wí na tinri. 3Jesu wɔ̀ɔ sɛbɛ cɛnfɛɛ ní, Farisiyee yugu be mà yo: «Kí ma yala Nyɛʔɛlɛ li furu sɛbɛ ní we bì yaŋa pwɔʔɔ fyonriwlɛʔɛ na ge, dee di, ki ìn yala bìʔi hanri.» 4À pe pyeri. Jesu wɔ̀ɔ kyɛʔɛ pa wi na mòo pwɔʔɔ mòo troʔo. 5Wɔ̀ɔ pé po: «Wiwii nyɛ naʔa ye ni, wi pyɔ nòo to kɔ̀lɔ́ ni, ná kiì ban, wi nò wi yoo, áʔa po ki woo wòo gɛri ticaʔaga bì yɔ̀ɔ yrígi wa kɔ̀lɔ́ ni we ali nàʔa ja bo fyonriwlɛʔɛ na ge?» 6Pe ìn kayoʔo kà ta bìʔi yo ki woʔo na ge.

Klɛnhaʔa frama pomo ní, ní hɛɛn yerime pomo ní

7Jesu pɔɔ dáa hɛɛn bee kɔrɔsi pe dá yeri ge, pomo ma na pe dáa yɛʔɛma aconro fara ge, wɔ̀ɔ yomɛlɛ là kmo pé kan mà yo: 8«Nà hɛn wà bi má yeri cɛprɔʔɔ fɛti na ge, mò gaa glɛn yɛʔɛma aconʔo na. Kana pé ma wà yeri kpo ŋa wí kpɔʔɔ́ mâ toro mo na we.#14:8-10 ma wèle wa Yom 25:6-7 ni wè. 9Nàʔa po ban, ŋa wí ma yè bɛfu syɛn yeri we, pɔɔ yà no wa ma na bì ma po: ‹Ma ki aconʔo ga kan ki naŋa ŋa ma we.› Ki nyiŋi na, fɛrɛ pa ti don má na, ma na gɛrí, ma ya glɛn kruʔuma aconʔo na. 10Di nà pe má yeri ge, ma ya glɛn kruʔuma aconʔo na. Nàʔa po ban, ŋa wí ma ma yeri nòo gá ban, pɔɔ ba ma po: ‹Na nagoro, ta sye ma ya glɛn yɛʔɛ̀ ma, degmaʔa na.› Ki nyiŋi na, bee ní yé ma kpoʔolo ná li ge, pa pe ma kpɔʔɔ.

11Mɛjɛn hɛn o hɛn ŋa wí na wì kpɔʔɔ ge, pa pe ba ki woo cɛrɛ we. Di ŋa wí bi da wì cɛrɛ ge, pa pe bɔɔ kpɔʔɔ.»#14:11 ma wèle wa Mat 23:12; Luk 18:4 ni wè.

12Jesu wɔ̀ɔ kí yo ŋa ma wi dɔɔ́ yeri mâ yo wi ya lì ge mà yo: «Nà ma yaagbanʔa hro hɔʔɔ, ná kiì ban, yebliʔi woro di yoo, mò gá ma nagroboo yeri, kana ma cyɛɛn bɛ yoo, kana ma heme woo pe tɔɔ bɛ yoo, kana ma nibyee bee pé nyɛ masaa pee bɛ yoo ge. Ná kiì ban, ki woo pa pe da bì mo yeri we hro limi ma na bì ma woʔo nuŋu ge ma na kpo. 13Di nà ma hukmara hɔʔɔ, ma fyomo fɛɛ yeri, klɔyara fɛɛ ní, lemloʔomoo ní, ní fyoon ní. 14Pa ma ba frɛmɛ ta, mɛjɛn ki woo pòo gban bì ma woʔo ki nyoʔo nuŋu ge ma na. Ɛɛn di, Nyɛʔɛlɛ lí bi ba ma woʔo nuŋu ge ma na hɛnsinbee pe nyɛmanyinimi wlɛʔɛ na ge.»

Naŋa wà hutanra hɔʔɔmo yomɛlɛ

(Mat 22:1-10)

15Bee pe dáa li ge, pa wà dà gâ ki kayoʔo loʔo ge, wɔ̀ɔ yo: «Hɛn ŋa wí bi ba li wa Nyɛʔɛlɛ li masaʔa ni ge, ki woo pɔɔ bo frɛmɛ ní.» 16Jesu wɔ̀ɔ wí po: «Naŋa wà dà yo wí bi yebliʔi hukmara hɔʔɔ mà hɛɛn fafaʔabaa yeri. 17Linyiŋi ki gâ no ge, wɔ̀ɔ wi tungɔɔ wà tun wa bee ma wi dá yeri jango wi yaʔa yo pé kan wi yo: ‹Yee ban, ye ba lì, mɛjɛn nyiŋi kí ma tyɛʔɛ.› 18Di pè bɛfu à pe na kayoʔo nigbe nyu mà yo wiʔi yaʔa. Pe ìn bi gban bì gɛri wa. Kplɛɛ wi dá yo: ‹Mí ma kere syɔ. Kí ma yala bì gɛri bì yà ti wele. Mí na ma fɛn, maʔa yaʔa.› 19À wà ma yo: ‹Mí ma niri kɛ̂ syɔ. Mí na sye bì yáa fali tí ni jango bì ti po bì ti wele. Mí na ma fɛn, maʔa yaʔa.› 20À wà ma yo: ‹Mí ma cɛlɛ pɔri. Ki kala na, mi ìn bi gban bì gɛri wa.›

21Ki tungɔɔ wɔ̀ɔ hru mà kɛri mà yáʔà yo wi kundiʔi ma we. Ki nyiŋi na, go fɔlɔ wi lama à mi gban wi na. Wɔ̀ɔ wi tungɔɔ po we: ‹Ta sye ticaʔaga wa kàʔà lama kloro ni de ní ki kobiʔi ní ge ma ya fyomo fɛɛ yeri ní klɔyara fɛɛ ní, ní fyoon ní, ní lemloʔomoo ní be.› 22Cɛncɛnbo, tungɔɔ wɔ̀ɔ bâ yo: ‹Kundiʔi, ga ma dí yo ge, kí ma hanri kɔ, ɛɛn di, go ki ìn nyi.› 23Ki tungɔɔ wi kundiʔi wɔ̀ɔ wí po: ‹Ta sye wa sinbriʔi kogbɔrɔ na de, ní ki kobiʔi ní ge, ma ya hɛɛn ciʔili be, ma pan pé ni, jango na go ki ba nyì. 24Kanyɛmɛ na, hɛɛn bee mi dá yeri ge, ki woo wà nigbe ìn bi na yebliʔi hro tà laali bì ti wele.› »

Ma bi nyaʔa hanri bi grɛʔɛ Jesu wi ploʔofɔlɔ ge

(Mat 10:37-38)

25Ki kruʔu ma, hɛɛn fafaʔabaa dáa nyari Jesu ní we. Wɔ̀ɔ wa mà krɛʔɛ mà yo pé ni mà yo: 26«Hɛn o hɛn ŋa wí bi ba ná na ge, ki woo wòo gban bì bo na ploʔofɔlɔ fɔ kí po mí noo glanʔa mâ toro wi to na we ní wi no nì, wi cɔ nì, wi pii ní, wi cyɛɛn ní, wi lɛɛ ní, ní wiì wì tapolo ní we. 27Nàʔa po hɛn woò na wi tipraʔa tugu bì da ba ná na ge, ki woo wòo gban bì bo na ploʔofɔlɔ. 28Wiwii nyɛ naʔa ye ni ŋa wí yo wí bi gokpɔʔɔ fan wi ìn glɛn bí ki fanma pɛrɛ co de kpɛn ge, nàʔa po wi gbejanra tí bi yala wi gbàn wiʔi fan ki kɔ́ ge? 29Ná kiì ban, nòo klu bì noʔoma le we, nà wi ìn gàʔa fan ki kɔ́ ge, bee pé bi daʔa nyaʔa, pa pe dɔɔ tyɛʔɛ 30bì daʔa nyu bì yo: ‹Ki naŋa ŋa wí ma go hli naʔa fanri. Di wi ìn gban bìʔi fan ki kɔ.› 31Ki podeme na me, klo fɔlɔ wiwii wi, nàʔa po wi corí bì yà mlaʔa kmo klo fɔlɔ wà nì nɛ, kí po wi ìn glɛn biʔi tonlí kpɛn biʔi cɛ́n, nàʔa po wiì nì, wi mlagmoo saamo pii syɛn mà kɛ kɛ̂ nì (10 000), pa pe gban bì ŋa ja wí na pan wì krugu wi hɛɛn saamo pii kɔgunnu nì we (20 000)? 32Nàʔa po wòo gban bìʔi hanri ge, sanni masa naŋa wi tɔ wí bi ba no wí na ge, pɔɔ hɛɛn pèè tun pe yaʔa yo wí ma pe yo wi mlaʔa ja ge, jango tanma bi jé pe kpafoʔo ni. 33Kiì tege gi yèé ní be kpo. Hɛn o hɛn ŋa ye ni, wi ìn kruʔu wa wi yrɛbɛ pì bɛfu ma ge, wòo gban bì bo na ploʔofɔlɔ.

Kɔ wi tanma kɔmo yomɛlɛ

(Mat 5:13; Mar 9:50)

34Kɔ wí nyɛ kmaa, di kɔ wi tanma nà mi nyini wí ni, hɛn pɔɔ nyaʔa le wí ni bùu klan nɛ ge? 35Wòo gban bì tra no, ná kiì ban, nojɔʔɔ gi fɔ naʔa laʔa poo wa dala na le. Naakpoʔo nyɛ ŋa na ge, wi nagruʔu can, wi da nurú.»

Currently Selected:

LUKE 14: NLK10

Highlight

Copy