LUKE 17

Kapeʔe

(Mat 18:6-7,21-22; Mar 9:42)

1Ki kruʔu ma, Jesu wɔ̀ɔ kí yo wi ploʔofɛɛ ma be mà yo: «Kanyɛmɛ na, kaʔa kèè bi ba hanri bì hɛɛn kan pe kapeʔe hanri. Ɛɛn di, hɛn ŋa wí bi ki kaʔa hanri ge, cɔlɔkpɔʔɔ nyɛ ki woo na we dɛ. 2Sanni wí bi ki pipleʔe gee là nigbe kan li kapeʔe po, paʔa bo wí ma pronʔo pe ŋglɛngbɔʔɔ pwɔ wa wi atiʔi na ge, pe yɔɔ wa wa nyugbɔmo ni me. 3Ye da yè kɔrɔsi.

Ma syɛnwoo nà wà bí tipeʔe kà hanri, moo yɛri. Nòo kruʔu wa wi tipeʔe ma ge, ma ki tipeʔe yaʔa ge wi kân.#17:3 ma wèle wa Mat 18:15 ni wè. 4Nòo tipeʔe hanri má na wlɛʔɛ nigbe na bì da hanrihara nasyɛn, nòo ní bì da sye mà krugu bì da kɛrihara nasyɛn ge bì yàá ki nyu má ma bì yo: ‹Mí ma kruʔu wa na tipere ma de,› ma ki tipere yaʔa de wi kân.»

Pama

5Pitunbee à pe wò fɔlɔ po we: «Ma kà haʔa wa wò pama na me.» 6Wò fɔlɔ wɔ̀ɔ yo: «Ali nàʔa ja bo yè pama mi dí bo nɛ pa mutaride tiʔi pibi nyɛ be, ye dí bì gban bìʔi yo ki syaʔa tiʔi ma ge bì yo: ‹Ma mà kɔ, ma ya mà tyɛnmu wa nyugbɔmo ni me,› paʔa yè kayoʔo kpɔʔɔ ge kpo.

Tungɔɔ wi tunŋu

7Nàʔa po tungɔɔ wà nyɛ wa ma ma, ŋa wí na fali, ná kiì ban, wí na mbara naʔa de, nòo jɛ wa kere ni de bì ban, pa ma bɔɔ po: ‹Ma ba glɛn, ma lì kungreʔe yo?› 8Ayo. Di pa maʔa yo wí ma bì yo: ‹Ma ya na hro hɔʔɔ de. Nà ma ga tí hɔʔɔ, ma ma dreʔe le ge, ma pan tí ni. Ma ba na kan bì li bì jɔ kpɛn. Ki kruʔu ma, mo pa ma na gban bì li bì jɔ.› 9Pa ma tungɔɔ wi gâ ma kayoro kpɔʔɔ de, pa ma jori bùu syeri yo? Ayo dɛ. 10Kí nyɛ ban kpo yèé ma be. Ga pé yo yé hanri ge, nà ye kì bɛfu hanri, nàʔa kɔ nyiŋi ga na ge, kí ma yala ye yo: ‹Wó nyɛ tonro fun tungɔɔ, mɛjɛn ga ki dí yala wó hanri, kiì nigbe gi kpo wó ma hanri ge.› »

Jesu wí ma yanyɛʔɛ fɛɛ kɛ̂ pwɔʔɔ

11Jesu wi dáa sye Jerusalɛmu kàʔà ni, wɔ̀ɔ yáa doro wa Samari klo nì, ní Galile klo nì ke kpafoʔo ni ge. 12Wɔ̀ɔ yâ je wa kàʔà kà ni. À yanyɛʔɛ fɛɛ kɛ̂ moo flin mà yere leʔe 13na taʔara naʔa nyu mà yo: «Jesu, wò fɔlɔ, wò nyugara ti wa má na.» 14Wi gâ pe nya ge, wɔ̀ɔ kí yo pé ma mà yo: «Yee sye, ye ya yè tyɛʔɛ sraʔá farafɛɛ na be.» Pe gáa sye ge, à pe pwɔʔɔ.#17:14 ma wèle wa Sraʔa 14:2-32 ni wè.

15Wà nigbe da gáʔà nya wí ma pwɔʔɔ kɔ ge, wɔ̀ɔ hru mà pan mà báa Nyɛʔɛlɛ kpɔʔɔ le gbanʔa ceŋge, 16mà kɛri mà yâ do Jesu tanla we mà yɛʔɛ̀ kàn wa tra na de mà noo syeri. Ki woo wi dá bo Samari klo woo. 17Ki nyiŋi na ge, Jesu wɔ̀ɔ yo: «Hɛɛn kɛ̂ ban pe dá bwɔʔɔ ge yo? Hɛɛn nacɛrɛ pe tɔɔ pé nyɛ hanbe si? 18Ki hɛɛn wà nigbe ìn gban bì hru naʔa bì ba Nyɛʔɛlɛ kpɔʔɔ le, fɔ mà gâ laʔa ki nabonŋo wiì nigbe na yo?» 19Wɔ̀ɔ wí po: «Jɛ̀, maa sye. Ma pama mí ma ma pwɔʔɔ.»

Nyɛʔɛlɛ li masaʔa ki panma

(Mat 24:23-28,37-41)

20Wlɛʔɛ kà na, Farisiyee pe dá Jesu yugu we mà yo: Nyɛʔɛlɛ li masaʔa kí bi ban nyaʔa nyiŋi na? Wɔ̀ɔ pé po: «Nyɛʔɛlɛ li masaʔa koò na pan pomo ma na hɛɛn pé bi gban bí daʔa nyaʔa ge. 21Pòo ki yo kpo bì yo: ‹Kí na pan naʔa,› kana, ‹kí na pan wa.› Mɛjɛn Nyɛʔɛlɛ li masaʔa kí nyɛ naʔa yè nulala ni le.»

22Wɔ̀ɔ kí yo wi ploʔofɛɛ ma be mà yo: «Nyiŋi kà bi ba dyɛʔɛ, ga ni yé bi baa ki ca bì wlɛʔɛ nigbe nya ga ni Hɛn Pyɔ wí bi ba wì tyɛʔɛ ge. Ɛɛn di, yòo ki nya. 23Pé bi baʔa yo ye ma bì yo: ‹Wí nyɛ naʔamɛ ge,› kana, ‹wí nyɛ wamɛ ge.› Yò ga gɛri wa. Yò ga ba kà na. 24Mɛjɛn hɔgɔ ki în nyɛʔɛ wa namuru ni de pomo ma na mà kpe namyɛlɛ là na fɔ mà bâ no li tɔ na le, kí bi ba bo ban kpo Hɛn Pyɔ wi panwlɛʔɛ na ge. 25Di kí ma yala wi cɔlɔ kafafaʔagaa na kpɛn, ki nyiŋi ga hɛɛn poo cè. 26Ki dá hanri pomo ma na Nowe wi nyiŋi na ge, kí bi ba hanri ban kpo Hɛn Pyɔ wi nyiŋi na ge. 27Hɛɛn pe dáa li na jo na cɛɛ pori na pe pii kanʔa be à pe na pe pori. À pe naʔa hanri ban fɔ mà bâ no wlɛʔɛ ga na Nowe wi da gâ je wa nyumu kɔrɔ ni ge. Ki nyiŋi na, nyufafaʔa àʔa pan mà bâ pè bɛfu kpo.#17:27 ma wèle wa Hli 7:6-24 ni wè.

28Kí bi ba bo nɛ pa Lɔte wi nyiŋi woʔo nyɛ ge. Hɛɛn pe dáa li na jo na yrɛbɛ syo na pi pɛrɛ na fali na goro fanri.#17:28-29 ma wèle wa Hli 18:20 - 19:25 ni wè. 29Di Lɔte wi da gâ nyini wa Sodɔmu kàʔà ni ge, kwɔʔɔ ní kiribi ní à pi jɛ wa namuru ge mà bâ do nɛ pa hɔgɔ nyɛ mà pe bɛfu kpo.

30Kí bi ba bo ban kpo wlɛʔɛ ga na Hɛn Pyɔ wí bi ba wì tyɛʔɛ hɛɛn na be.

31Ki wlɛʔɛ na ge nà ŋa bí ba bo go yugu na, wi kyɛʔɛ yrɛbɛ pí po wa go lama ni me, wò gá drigi bì yà pí kpe. Nà ŋa bí bo kere ni, wò ga hru kruʔu ma wi yrɛbɛ krugu be. 32Ye lama to ga nì ki dá hanri Lɔte wi cɔ na we.#17:32 ma wèle wa Hli 19:26 ni wè.

33Nà hɛn ŋa bí daʔa ca bì wi nyuwyeʔe syɔ ge, pɔɔ ki punŋu. Di ŋa wí bi wi nyuwyeʔe punŋu ge, ki woo pɔɔ baʔa syɔ.#17:33 ma wèle wa Mat 10:39; 16:25; Mar 8:35; Luk 9:24; Jan 12:25 ni wè. 34Kanyɛmɛ na, ki yebliʔi ni ge, hɛɛn syɛn bi ba bo asyɛnʔɛ nigbe na. Pa pe wà nigbe kpe bì wi tɔ yaʔa we. 35Cɛɛ syɛn bi baa sun teme na. Pa pe wà nigbe kpe bì wi tɔ yaʔa we. 36[À nabii syɛn bí bo kere ni, pa pe wà nigbe kpe bì wi tɔ yaʔa we.] » 37À poo po: «Wò fɔlɔ, kí bi ba hanri hanbe?» Wɔ̀ɔ yomɛlɛ kmo pé kan mà yo: «Akuʔu ki hîn bo deʔe ga na, kakadubayee pe naa pè kpoʔolo wa ki deʔe kiì na.»

Currently Selected:

LUKE 17: NLK10

Highlight

Copy