PITUNBEE 3

Lemloʔoŋo pwɔʔɔmo

1Wlɛʔɛ kà na Pyɛri nì Jan nì pe dáa sye Nyɛʔɛlɛ li sràʔá go ni Nyɛʔɛlɛ nyɛrimi nyiŋi na ge. Ki dá bo yaapraʔa na. 2Naŋa wà dà bo wa pe dɔɔ́ he, wɔ̀ɔ po lemloʔoŋo. À pe noo kpin na pan wí ni mà báa wi teri be wlɛʔɛ kì bɛfu na sraʔá go goyɛʔɛ ga na pe dáa yeri Goyɛkmaʔa ge, jango wi da nadanma yrɛbɛ nyɛri sraʔá go ki jefɛɛ ma be. 3Wi gâ Pyɛri nì Jan nya we pé na jin wa sraʔá go ni ge, wɔ̀ɔ na pe nyɛri mà yo poo kan nadanma yraʔa ní. 4Pyɛri nì Jan nì we à pe nyɛʔɛ kán ge wí na. Pyɛri wɔ̀ɔ wí po: «Ta wo wele.» 5Lemloʔoŋo wɔ̀ɔ na pe wele mà naʔa nyaʔa nɛɛ wí bi yraʔa kà ta pé ma. 6Di Pyɛri wɔ̀ɔ wí po: «Gbejanra nì tɛ nì wò na ma. Ɛɛn di, ga nyɛ ná ma ge, mí biʔi kân má ma. Jɛ̀, Jesu Krisi ŋa Nasarɛti kàʔà woo we wi yele na le, ma da danrí,» 7mà lemloʔoŋo co wi kaligyɛʔɛ na ge mòo jrɛʔɛ. Ki nyidege na ge, wi tɔwɛrɛ nì, ní tɔgungee ní ge à pi fanŋa ta mà hri. 8Wɔ̀ɔ ye mà jɛ mà yere mà na tanri mà plɛn wa pe ní sraʔá go ni mà na tanri na yeri na Nyɛʔɛlɛ sonni le. 9Hɛɛn pè bɛfu bee pe dá bo wa ge à poo nya wí na tanri na Nyɛʔɛlɛ sonni le. 10À poo cɛn mà yo ŋa wi dí bo na klɛn be sraʔá go Goyɛkmaʔa na ge mâ na nadanma yrɛbɛ nyɛri be wiì wi. Ga kí hanri wí na, àʔa pé fo mà honriri wlele de pe na.

Pyɛri wí ma kafonlo li kɔ̀rɔ́ tyɛʔɛ we pe na

11Wɔ̀ɔ Pyɛri nì Jan co we mà traʔa pé na. Ki kafonlo pa li gâ hɛɛn pè bɛfu fo banmɛ ge, à pe fɛ mà pan pè krugu mà bâ gboʔolo sraʔá go goyɛʔɛ ki “jasaʔa ni ga pé na yeri Salomo woʔo ge”. 12Pyɛri wi gáʔà nya banmɛ ge, wɔ̀ɔ hɛɛn po be: «Israyɛli klo woo, nyaʔa ma po wa á ye na kafonlo waʔa na ge? Nyaʔa ma po wa yé na nyɛʔɛ kanni ge wo na ge nɛbo wò fandaʔa gi, ná kiì ban wò Nyɛʔɛlɛ fyara tiì di da tí ma ki naŋa kan wɔ́ɔ na tanri ge? 13Abrahamu nì, Isake nì, Jakɔbe nì pe Nyɛʔɛlɛ le mâ po wò tokpɔɔ pe Nyɛʔɛlɛ ge liì li la li dá li tungɔɔ Jesu kpɔʔɔ we, ŋa ye dá le hɛɛn pe kyɛrɛ̀ ni de mâ ce wí ma Pilate wi yɛʔɛ̀ na ge, nyiŋi ga na Pilate wi laa dà bo bùu wa wí da sye ge.#3:13 ma wèle wa Nyi 3:15 ni wè.

14Wi dá bo Nyɛʔɛlɛ li hɛncɛnŋɛ mà po hɛnsinŋi. Di ye dɔɔ cé mà Pilate nyɛri we wi hɛɛn kpofɔlɔ wiì wa ye kan.#3:14 ma wèle wa Mat 27:15-23; Mar 15:6-14; Luk 23:13-23; Jan 19:12-15 ni wè. 15À ye nyuwyeʔe ki kanfɔlɔ kpo we, di Nyɛʔɛlɛ à luu nyɛ mòo yrígi kuu ni be. Wòó wó nyɛ ki woʔo ga ki jarifɛɛ. 16Ki naŋa ŋa yé na nyaʔa mâ cɛn ge, Jesu wi yele li braʔa kiì gi kí kan wɔ́ɔ po fanŋa nì wi pama Jesu na we mi kala na le. Pama miì mi ma wí ta Jesu ma we mí ma kan wɔ́ɔ gbanma ta banmɛ yè bɛfu yè yɛ̀ʔɛ̀ na ge.

17Di ki tɔ na ge, na woolo, mí maʔa cɛn mà yo yèé ní yè lagwɔɔ ní be ye dá ga hanri ge, ye ìn dà ki kɔ̀rɔ́ cɛn we. 18Di ga Nyɛʔɛlɛ li da glú mâ yo fanfan ni li leyoo pè bɛfu pe noro na de mâ yo li Nyɛʔɛlɛ li wofràa wí gà ba jɔlɔ ge, kiì gi lí ma funŋu banmɛ ge. 19Ki kala na le, ye kruʔu wa yè kapere ma de ye yɛʔɛ̀ kan Nyɛʔɛlɛ ma le, jango li yè kapere tuʔu de li ti làʔá ye na, 20fyonrinyiŋi ki jɛ̀ wa wò fɔlɔ ma we ki pan. Wi Nyɛʔɛlɛ li wofràa troʔo we ŋa wiì wi dá fara kɔ ye kan, Jesu we. 21Kí ma cori wi kò wa namuru ni de fɔ bì ba no nyiŋi ga na yrɛbɛ pì bɛfu pí gà ba hanri fonmo ge. Nyɛʔɛlɛ li daʔá yo ban fanfan ni we leyokmaa pe noro na de. 22Ali Mowisi wɔ̀ɔ yo: Wò fɔlɔ Nyɛʔɛlɛ le lí gà ba leyoo wà yrigi naʔa yè klo woo ni be nɛ pa mì nyɛ we. Nòo gá ga yo ye ma tɔʔɔ ge, yeʔe lòʔó wí ma.#3:22-23 ma wèle wa Lado 18:15,18,19 ni wè. 23Di hɛn o hɛn ŋa wi ìn bi ba loʔo ki leyoo ma we, ki woo pɔɔ jɔʔɔ bì fara wa Nyɛʔɛlɛ hɛɛn pe nulala ni le.

24Nyɛʔɛlɛ leyoo bee pe dá yo ge mà kpe Samyɛli wi nyiŋi na ge ní wi kruʔu ma woo pe woʔo nì ge, ki woo pè bɛfu pe dá ga jari kpo kí gà ba hanri ki wlɛrɛ da ni de. 25Nofele la Nyɛʔɛlɛ li da gón leyoo pe noro na de, lí nyɛ yèé ma mà plɛn la nì li da gón yè tee ma be, nyiŋi ga na li daʔá yo Abrahamu ma we mâ yo: ‹Heme mì bɛfu naʔa tra na de mí gà ba lafiʔimi ta ma kluʔu pyɔ wà ma.›#3:25 ma wèle wa Hli 22:18 ni wè.

26Nyɛʔɛlɛ li da gâ li tungɔɔ yrigi we, à li klu mòo troʔo naʔa yèé ma, jango wi ba ye kan lafiʔimi nì, wi yè lama krɛʔɛ me ye na nigbe nigbe yè kapere kaʔa ma ge.»

Currently Selected:

PITUNBEE 3: NLK10

Highlight

Copy