PITUNBEE 2

1 Pantekote wlɛʔɛ ki da gâ no ge, sɛrifɛɛ pè bɛfu à pe po kpoʔoloboo deʔe nigbe na. 2Pe kacɛnlɛ à tunnumu mà ma gâ jɛ wa namuru ni de. Mi dá bo nɛ pa tiflɛgbɔʔɔ womo nyɛ me ga kí na funnu ge. À mi bâ go kì bɛfu nyi pé na ga pe dá bo klɛnhaʔa ge. 3À pe nɛŋɛɛ kèè nya nɛbo kwɔnyigee gɛ. À ke canmu mà klɛn pé na nigbe nigbe. 4Pè bɛfu à pe nyi Nyɛʔɛlɛ li Nyìli ní le màʔa hli na klòʔo ke tɔɔ ke hɛnrɛ tà nyu, nɛ pa Nyɛʔɛlɛ li Nyìli li dá bo na ti ni wa pe noro ni de pomo ma na ge.

5Ki nyiŋi na Juwifiyee bee pe dáa Nyɛʔɛlɛ kpɔʔɔ le pèè dáa gori wa Jerusalɛmu kàʔà ni ge. Pe dá jɛ klòʔo kè bɛfu ni naʔa drunya ni we. 6Ki tunnumu pa mi gâ hanri ge, à hɛnfafaʔa ma fɛ mà pan. Hɛn wì bɛfu wi dáa nuru pé ma wi hɛntara tiì ni. 7Àʔa hɛɛn pe honriʔi wlele ge pe na. Ki da pé fo, à pe na kafonlo waʔa na. A pe naʔa pin: «Ki woo bee pé na nyu ge pè bɛfu Galile klo woo ban yo? 8Ki mɛɛ nyɛ mɛlɛ wò bɛfu nigbe nigbe á wo na nuru pé ma wò hɛntara ni de, da pe dá wo he ge? 9Pariti klo woo ní, Mɛdi klo woo ní, Elamiti klo woo ní, ní bee ní pé na kori wa Mɛsopotami klo ni le, ní Jude klo nì le, ní Kapadɔsi klo nì le, ní Ponte klo nì le, ní bee ní pé na kori wa Asi klo ni le, 10mà plɛn Friji klo nì le, ní Panfili klo nì le, ní Ejipite klo nì le, ní Libi klo li klɛnmɛ ma nì mí nyɛ wa Sirɛne kàʔà namyɛlɛ na le, ní nabonmoo bee ní pe jɛ́ wa Hrɔmu kàʔà ni ge, 11mâ po Juwifiyee ge mâ plɛn pe srɛʔɛ ki jefɛɛ ní be, ní Krɛti klo woo ní, ní Arabi klo woo ní, á wo na nuru pé ma á pe na Nyɛʔɛlɛ li kakpɔʔɔlɔ nyu ge nigbe nigbe wò hɛntara tiì ni ge.»

12Ki dá pè bɛfu fo mà pe honriʔi wlele pe na. À pe naʔa nyu pè ma mà yo: «Nyaʔa kala li la le sin?» 13Di à hɛɛn pèè na sɛrifɛɛ tyɛʔɛ be mà naʔa pin: «Pe tín hundanʔa na ge.»

Kayoʔo ga Pyɛri wi dá yo Pantekote wlɛʔɛ na ge

14Ki nyiŋi na Pyɛri nì pitunbee pe tɔɔ kɛ̂ mà kɛ nigbe ní we, à pe jɛ mà yere. Pyɛri wɔ̀ɔ wi àkpolo jrɛʔɛ le gbanʔa na nyu hɛɛn ní be mà yo: «Yèé bee yé nyɛ Juwifiyee wo nì ge, ní yè tɔɔ yè bɛfu ní yèé bee yé na kori naʔa Jerusalɛmu kàʔà ni ge, ye nagruʔu can na kayoʔo ma ge yeʔe cɛn kmaʔa. 15Ki woo bee be hunmù ìn pe co nɛ pa yé naʔa honri pomo ma na ge, mɛjɛn kí nyɛ jɛfanʔa yaa here na adi. 16Di ga Nyɛʔɛlɛ leyoo Jowɛli wi dá yo kiì gi ga ge mâ yo:

17‹Nyɛʔɛlɛ lí maʔa yo mà yo:

Wlɛrɛ tanʔara na de,

mí bi ba na Nyìli trigi

hɛn wì bɛfu na.

Yè pii nabii yoo cɛɛ yoo

pa pe ba grɛʔɛ Nyɛʔɛlɛ leyoo.

Yè najɛɛ pa pe da gori

nyɛmɛɛ bì da

ŋloro kaʔa nyaʔa ge

bì da Nyɛʔɛlɛ li kanyɛmɛ

cɛnni me.

Yè lagwɔɔ pa pe da

ŋloro ŋolo bì da Nyɛʔɛlɛ

li kanyɛmɛ cɛnni me.#2:17-21 ma wèle wa Jow 3:1-5 ni wè.

18Ee, ali ki nyiŋi na ge

mí bi ba na Nyìli trigi

na tungɔɔ na be nabii yoo

cɛɛ yoo,

pa pe ba grɛʔɛ

Nyɛʔɛlɛ leyoo.

19Mí bi ba kakpɔʔɔlɔ hanri

wa namuru ni de

bì da jɛnʔɛlɛ hanri wa

tra na de.

Ké gee:

disyan nì, kwɔʔɔ ní,

ní wriwɔʔɔ ní.

20Sanni wò fɔlɔ

wi wlɛʔɛ kí gà no ge,

ga kí nyɛ kpangbanŋa

mâ po kmaʔa ge,

yaa kí gà ba wɔ,

yege fanna paʔa nylaʔa

nɛ pa disyan nyɛ ge.

21Ki nyiŋi na ge,

hɛn o hɛn ŋa wí bi

wò fɔlɔ wi yele yeri le,

ki woo pɔɔ syɔ.›

22 Israyɛli klo woo, ye ga loʔo mí bi yo ye ma ge. Jesu Nasarɛti kàʔà woo wiì wi ŋa Nyɛʔɛlɛ li dá fara móò tyɛʔɛ ye na kafonŋoo ní ge gee ké nyɛ kakpɔʔɔlɔ mâ po jɛnʔɛlɛ, gee li dá hanri wa wi kyɛrɛ̀ ni de yè nulala ni le, nɛ pa yèé tapoboo ye jáʔà cɛn pomo ma na ge. 23Hɛn wà dà ki hɛn le we yè kyɛ̀rɛ́ ni de, nɛ pa Nyɛʔɛlɛ li da glú mâ ga kon máʔà cɛn ge mâ yo ki hanri ban. À ye bɔ́ɔ̀ kán tipraʔa na ge hɛnpee pe kyɛrɛ̀ ni de mòo kpo.#2:23 ma wèle wa Mat 27:35; Mar 15:24; Luk 23:33; Jan 19:18 ni wè. 24Di Nyɛʔɛlɛ à luu nyɛ mòo yrígi mòo syɔ kùʔù ki cɔlɔʔɔ ma ge, mɛjɛn kùʔù ki ìn dà gban bùu co wi kò waʔa ni.#2:24 ma wèle wa Mat 28:5-6; Mar 16:6; Luk 24:5 ni wè. 25Ali Dafide wi dá yo wi kala na le mà yo:

‹Mi dáa wò fɔlɔ nyaʔa we

nyiŋi kì bɛfu na na yɛʔɛ̀ ma.

Wí nyɛ na kaligi na,

jango yraʔa kà wò gá

na lama wlele me na na.#2:25-28 ma wèle wa Ŋuʔu 16:8-11 ni wè.

26Kiì gi kí kan na lama

mí ma fiʔi ná na ge,

na nonɛlɛ fanna

á li na nyu lafiʔimi nì ge.

Ali na wre ti fanŋa funmu

mì bɛfu ní,

na honriʔi kí bi glɛn

fyonriʔi na.

27Mɛjɛn mo Nyɛʔɛlɛ

mɛ ìn bi ba na nyìli yaʔa le

wa kuu kaʔa ni ge.

Mɛ ìn bi baʔa ta ma tungɔkmaa

wi wre ti fònʔó.

28Má ma kloro tyɛʔɛ de

na na da kí ma yala bì gbe,

jango bì nyuwyeʔe ta ge.

Nà mi gá bo mà tanla

nyiŋi ga na ge,

pa ma na lama fiʔi me

na na ceŋge.›

29Na woolo, yè nà yáʔa bì wò tokpɔ Dafide wi kayoʔo yo ge ye kan kpeʔele. Wi dá gu. À poo le. Wi fanʔa kí nyɛ naʔa wo ni fɔ mà bâ sun alaʔa na. 30Di pɔɔ dá bo Nyɛʔɛlɛ leyoo, wɔ̀ɔ ki cɛn mà yo Nyɛʔɛlɛ li daʔá yo wí ma mà klanʔa na mà yo lí bi ba wi kluʔu pyɔ wà tɛnŋɛ be wi masaʔa aconʔo na ge.#2:30 ma wèle wa 2Sam 7:12-13; Ŋuʔu 132:11 ni wè.

31Wi da glú mà ga cɛn Nyɛʔɛlɛ lí gà ba hanri ge. Wɔ̀ɔ yo Nyɛʔɛlɛ li wofràa wi nyɛmanyinimi mi namyɛʔɛ na ge mà yo: ‹Nyɛʔɛlɛ li ìn dɔ̀ɔ yaʔa wa kuu kaʔa ni ge. Wi wre ti ìn dà fonʔo›.

32Ki hɛn ŋa pé na yeri Jesu we, Nyɛʔɛlɛ li da bɔ́ɔ̀ nyɛ mòo yrígi. Wòó wò bɛfu wó nyɛ ki kala li jarifɛɛ. 33Mɛjɛn li dɔɔ́ jrɛʔɛ mòo luʔu li kaligi na ge. To Nyɛʔɛlɛ li nofele la li da gón ge, à li li tón wí ma, la li dá bo Nyɛʔɛlɛ li Nyìli wolo le. Wɔ̀ɔ lí trigi naʔa nɛ pa yé naʔa nyaʔa náʔa nuru pomo ma na ge. 34Mɛjɛn Dafide wi ìn dà luʔu namuru ni de nɛ pa Jesu wi da luʔú pomo ma na ge. Di wiì wì tala wɔ̀ɔ yo:

‹Wò fɔlɔ wí maʔa yo

na fɔlɔ ma we mà yo:

Ma ba glɛn na kaligi na#2:34-35 ma wèle wa Ŋuʔu 110:1 ni wè.

35fɔ bi ba ma bɛnfɛɛ le be

ma cyeʔe noʔo na.›

36Ki kala na le, yèé Israyɛli klo hɛɛn yè bɛfu, yeʔe cɛn kmaʔa ye yo ki hɛn ŋa pé na yeri Jesu we, ŋa ye da gán tipraʔa na ge, Nyɛʔɛlɛ li dɔɔ́ hanri wò fɔlɔ mòo hanri Nyɛʔɛlɛ li wofràa.»

37Pe gâ ki woʔo ga loʔo kɔ ge, àʔa pe ya dihon na we ceŋge. À peʔe yo Pyɛri nì pitunbee pe tɔɔ ma be mà yo: «Wò woolo wó bi nyaʔa hanri san?» 38Pyɛri wɔ̀ɔ kí yo pé ma mà yo: «Ye kruʔu wa yè kapere ma de. Yè bɛfu nigbe nigbe ye yè kân pe ye batise Jesu Krisi wi yele na le. Nàʔa po ban ge, Nyɛʔɛlɛ pa li yè kapere yaʔa de ye kan bì ye kan Nyɛʔɛlɛ li Nyìli ní le. 39Mɛjɛn nofele lí nyɛ yèé wolo, ní yè pii ní be, ní hɛɛn pè bɛfu ní bee pé nyɛ leʔe ge, yèé yè bɛfu bee wò fɔlɔ Nyɛʔɛlɛ lí gà yeri ge.»

40Pyɛri wi dá kayofafaʔara haʔa wa pe ma mà ti fligi pé kan mà na pe fɛn mà yo: «Ye yè syɔ cɔlɔʔɔ ga ma kí bi ba do hɛnpee na be naʔa ki klo ni le ge.» 41Bee pe da yeré wi kayoro na de mâ pè kân á pe pé batise pe dá hɛɛn saa kɛ̂ mà kɛ kɔgunnu nyoʔo kɔ ge. À pe haʔa wa pe tɔɔ na be ki wlɛʔɛ na ge. 42A pe pè kân pitunbee pe ploʔomo ma me, ní pe kpoʔolomo ní me, mà plɛn pe hro limi nì me, ní Nyɛʔɛlɛ li nyɛrimi ní me.

Sɛrifɛɛ pe tanʔama kaporo

43Pa kakpɔʔɔlɔ ní jɛnʔɛlɛ fafaʔagaa dáa hanri wa pitunbee pe kyɛrɛ̀ ni de ge, fyara à ti na hɛɛn pè bɛfu cun. 44Hɛɛn pè bɛfu bee pe da yeré Jesu na we, à pe na pè nyaʔa su mà na pe yrɛbɛ hanri be pè bɛfu wobo.#2:44 ma wèle wa Pit 4:1,32-35 ni wè. 45Ali pe dá bo na pe kere nì pe kyɛrɛ̀ yrɛbɛ pɛrɛ be mà na ki gbejanra tiʔibi de pe ma, ŋa nì wi cromo woro, ŋa nì wi cromo woro. 46Wlɛʔɛ kì bɛfu na pe dáa gboʔolo wa Juwifiyee pe sràʔá go ni ge mà po lademe ní. À pe na hro li de goro tì bɛfu ni na akaba ka be lafiʔimi nì, ní lagmama nì. 47Pe dáa Nyɛʔɛlɛ sonni le. Pe kala à li na hɛɛn pè bɛfu glanʔa. Wlɛʔɛ o wlɛʔɛ wò fɔlɔ wɔ̀ɔ na pèè hari pé na, bee Nyɛʔɛlɛ li dáa syo ge.

Currently Selected:

PITUNBEE 2: NLK10

Highlight

Copy