PITUNBEE 4

Pyɛri nì Jan nì pé ma pe woʔo yo

1Nyiŋi ga na Pyɛri nì Jan nì pe dáa nyu ki hɛɛn ní be ge, sraʔá farafɛɛ pèè ní, sraʔá go sorasiyee pe lagwɔ ní, ní Saduseyee pèè ní à pe pan kpo. 2Pe lama à mi horo pé na ga na pitunbee syɛn pe dáa hɛɛn ploʔo be mà naʔa pin: Jesu pɔɔ da nyɛ́ mâ nyini kuu ni be ge, hɛɛn pe tɔɔ fanna pé gà ba nyɛ bí nyini ge. 3À pe ki pitunbee syɛn co we mà pe le kaso nî mà pe yaʔa wa fɔ ma bâ no ki kpɛntoʔo na, mɛjɛn yaa ki dá bo kí ma kɔ kɔ. 4Kiì nì kì bɛfu ní hɛɛn bee pe da loʔó pitunbee pe kayoro ma de ge, à pe fafaʔa ma yere tí na. Ki nyiŋi na, sɛrifɛɛ bee pé nyɛ nabii be pe nò àʔa hɛɛn saamo mà kɛ kɔgunnu nyoʔo kɔ ge (5 000).

5Kpɛnmɛ mi gâ do ge, Juwifiyee pe yɛkluu ní, lagwɔɔ ní, Mowisi wi kayoro sɛbɛ cɛnfɛɛ ní be à pe yâ gboʔolo wa Jerusalɛmu kàʔà ni ge. 6Sraʔá farafɛɛ pe lagwɔ ŋa nì pé na yeri Ani ge, ní Kayifu nì, Jan nì, Alɛkisandre nì, ní sraʔá farafɛɛ pe lagwɔɔ pe heme woo pe tɔɔ pè bɛfu ní pe dá bo wa pe nî. 7À pe Pyɛri nì Jan yrìgí we be pe nulala ni le mà pe yugu mà yo: «Ki woʔo ga ge yèé yé maʔa hanri nyaʔa fanŋa nì, ná kiì ban, han yele na?» 8Ki nyiŋi na, Pyɛri wɔ̀ɔ nyi Nyɛʔɛlɛ li Nyìli ní le mà pe po: «Yèé Israyɛli hɛɛn pe yɛkluulu ní, ní pe lagwɔɔ ní be, 9nàʔa po yé na wo yugu alaʔa nî ge kmaʔa ga na wo dí hanri yaŋa na we mâ yo di nyaʔa gi ga ki dí gan ki woo ŋa wɔ́ɔ pwɔʔɔ ge, 10yè bɛfu mà plɛn Israyɛli klo hɛɛn pè bɛfu ní yeʔe cɛn ye yo Jesu Krisi, Nasarɛti kàʔà woo we, wi yele liì li, ŋa yèé be ye da gán tipraʔa na ge, Nyɛʔɛlɛ á luu nyɛ móò yrígi kuu ni be, wiì kala li la lí kan ki naŋa ŋa we wɔ́ɔ jɛ mâ yere nɛ yè yɛ̀ʔɛ̀ na ge gbanŋa ge. 11Hɛn ŋa pé na yeri Jesu we wiì wi ŋa Nyɛʔɛlɛ li nyoŋomo mi daʔá yo mâ yo:

‹Ŋglɛnʔɛ ga yèé go fanfɛɛ

ye dá faʔara ge,

àʔa hin bâ grɛʔɛ

go ki noʔoma ŋglɛngblɛʔɛ.›#4:11 ma wèle wa Ŋuʔu 118:22 ni wè.

12Syɔmo mí na taʔa wiì nigbe ma, mɛjɛn yele là wò naʔa drunya ni we syɛnwolo, la Nyɛʔɛlɛ li dá gan hɛɛn ma be liì bi gban bì wo syɔ.»

13Lagwɔɔ pa pe da gâ Pyɛri nì Jan nya we pé ma horo ná nyu banmɛ ge, àʔa pé fo, mɛjɛn pe daʔa cɛ́n mà yo ki woo bee pe ìn dà Juwifiyee pe sɛbɛyee ploʔo be bì bo kala cɛnfɛɛ. À pe ní mà pe cɛn kpo mà yo pee bɛ pe dáa blɛn Jesu ní we. 14Di ŋa wi dá bwɔʔɔ ge, pa pe gɔ́ɔ̀ nya be yerehaʔa Pyɛri nì Jan tanla we, pe ìn kayoʔo kà ta bì jan pé ni adi. 15À pe pitunbee po be pe nyini wa kiti konhaʔa na ge. Ki kruʔu ma pee à pe pè nyaʔa na, 16mà yo: «Wó bi nyaʔa po sin ki hɛɛn bee na be? Mɛjɛn, kanyɛmɛ na me, pé ma ki kafongbɔlɔ la hanri le finmi na kpeʔele. Hɛɛn pè bɛfu bee pé nyɛ naʔa Jerusalɛmu kàʔà ni ge à peʔe cɛn. Àʔa hín bo wòó be wo ìn bi gban bì kakara leʔe ni adi. 17Di kí ma yala woʔo yo pé ma gbanʔa wo yo di pò gáa nyu hɛn wà nì ki yele la na le adi, jango ki kayoʔo ga ge kò gáa jari hɛɛn ma be bì da sye.» 18À pe pitunbee yeri be mà báʔà yo pé ma gbanʔa mà yo pò gáa nyu hɛɛn ní be Jesu wi yele na le adi, ná kiì ban bì da pe ploʔo lí ni pinni pinni.

19Di Pyɛri nì Jan nì we à pe pé po: «Ye kà faraʔa ni cɛɛn, nàʔa po kí nyɛ sinŋi Nyɛʔɛlɛ li yɛʔɛ̀ na ge wó da nurú yèé ma sanni wó bi da nuru liì ma ge. 20Mɛjɛn ga wòó wó ma nya mâ loʔo ge, wo ìn bi gban bìʔi yaʔa bayoʔo.» 21À peʔe yo pé ma gbanʔa nɛ mà na na pe wá, à pe na sye. Pé bi pe cɔlɔ pomo ma na ge pe ìn mi cɛn hɛɛn pe kala na le, mɛjɛn hɛɛn pè bɛfu pe dáa Nyɛʔɛlɛ kpɔʔɔ le kala la na li dá hanri ge. 22Àʔa hín bo naŋa ŋa ki pwɔʔɔmo kafonlo li dá hanri wí na ge, wi yɛ̀ʔɛ́ ke dá bo ke wɛ́ yɛʔɛ́ too syɛn na we kɔ.

Sɛrifɛɛ nyɛrimi jango pe dihon ta

23Pe gâ pitunbee wa be, à pe kɛri sɛrifɛɛ krugu be. Ga sraʔá farafɛɛ pe yɛkluulu ní lagwɔɔ ní be pe dí yo pé ma ge, à pe kì bɛfu tanli pe woo kan be. 24Nyiŋi ga na pe gáʔà loʔo ge, à pe kpoʔolo mà Nyɛʔɛlɛ nyɛri le mà yo: «Wò fɔlɔ kpangbanŋa, mo ŋa namuru ní tra ní nyugbɔmo nì, ní pi lama yrɛbɛ pì bɛfu ní pi hanrifɔlɔ we ge, #4:24 ma wèle wa Nyi 20:11; Neʔe 9:6; Ŋuʔu 146:6 ni wè. 25mo wi ma daʔá yo Nyɛʔɛlɛ li Nyìli li fanŋa nì ge wò to Dafide, ma tungɔɔ, wi nò ni ge mâ yo:

‹Nyaʔa ma po wa klòʔo ke tɔɔ

ke woo pe dáa pè kpɔʔɔ ge,

hɛɛn á pe na dɛnbɛrɛ kon waʔafe ge?#4:25-26 ma wèle wa Ŋuʔu 2:1-2 ni wè.

26Tra ti klòʔo fɛɛ be pe dá jɛ,

pee ní klòʔo lagwɔɔ ní be,

à pe pè kpoʔolo wò fɔlɔ

Nyɛʔɛlɛ li wofràa na we.›

27Mɛjɛn, kanyɛmɛ na, ki kàʔà ga ni ge, Erɔde nì, Ponse Pilate nì, mà plɛn klòʔo ke tɔɔ hɛɛn ní, ní Israyɛli klo hɛɛn ní be pe dá pè kpoʔolo mà can ma tungɔkmaa Jesu ní we, ŋa ma dá fara wí po Nyɛʔɛlɛ li wofràa we,#4:27 ma wèle wa Mat 27:1-2; Mar 15:1; Luk 23:1,7-11; Jan 18:28-29 ni wè. 28jango ga ma da glú mâ kon ma fanŋa nì mâ yo ki hanri ma nadanma na, ki hanri ban. 29Wò fɔlɔ, ki tɔ na ge, ma pe kayogbanra wele de. Wòó bee wó nyɛ ma tungɔɔ be ge, ma wo kan wo da ma kayoro nyu de fyara fun. 30Ma ma fanŋa tyɛʔɛ ge hɛɛn na be, jango yabaa pe pwɔʔɔmo ní kaʔa ní gee ké nyɛ jɛnʔɛlɛ mâ po kakpɔʔɔlɔ ge pì bɛfu pi da hanri ma tungɔkmaa Jesu wi yele na le.» 31Pe gâ Nyɛʔɛlɛ nyɛri le kɔ ge, deʔe ga pe dá bo kpoʔoloboo àʔa kpoʔoro. Pè bɛfu à pe nyi Nyɛʔɛlɛ li Nyìli ní le. À pe na Nyɛʔɛlɛ li kayoro nyu de fyara fun.

Sɛrifɛɛ pe dáa pè hari pomo ma na ge

32Sɛrifɛɛ pè bɛfu pe dihon wi dá grɛʔɛ nigbe, nyìli nigbe. Hɛn wɛ̀ ìn dà bo naʔa pin wi yrɛbɛ pí nyɛ wiì nigbe wobo, di pi dá bo pè bɛfu pe wobo.#4:32 ma wèle wa Pit 2:44-45 ni wè. 33Pitunbee à pe po wò fɔlɔ Jesu wi nyɛmanyinimi mi jarifɛɛ na ki kayoro nyu de fangbɔʔɔ ní. Nyɛʔɛlɛ à li na pè bɛfu hari ceŋge. 34Wà kacrolo ìn wi ja pé ni, mɛjɛn bee pe dá bo kere nì, ná kiì ban goro ní ge hɛn wi na ti pɛrɛ́ mà pan ki gbejanra nì de, 35mà bâ ti le pitunbee pe kyɛrɛ̀ ni de. Pe na tí tiʔibi pe kân, ŋa nì wi cromo woro, ŋa nì wi cromo woro.

36Naŋa wà dà bo wa pe dáa wi yeri Josɛfu di pitunbee à pe noo yeri Baranabasi, ki na po pé yo “fɛnfɔlɔ”. Wi dá bo Lefiyee woo wà wi mà po Sipre klo woo. 37Kere tà dà bo wí ma. Wɔ̀ɔ ti pɛrɛ mà pan ki gbejanra nì de mà bâ ti le pitunbee pe kyɛrɛ̀ ni de.

Currently Selected:

PITUNBEE 4: NLK10

Highlight

Copy