YouVersion Logo
Search Icon

PITUNBEE 26

26
Pɔli wí ma wi woʔo yo ge Agripa ma we
1Agripa wɔ̀ɔ Pɔli po we: «Wó ma ma kân kloʔò nì ge ma ma woʔo yo ge.» Ki nyiŋi na, Pɔli wɔ̀ɔ wi kyɛʔɛ jrɛʔɛ ge mà na wi woʔo nyu ge mà yo:
2«E klo fɔlɔ Agripa, ki klán ná ni ceŋge bí gban bí na woʔo yo ma yɛʔɛ̀ na alaʔa nî ge bi ní bí nà syɔ Juwifiyee pe baʔa kayoro tì bɛfu ma da pe na baʔa ná na ge. 3Mɛjɛn má ma Juwifiyee pe kalɛʔɛ kaporo nì ní pe kakara cɛn de kmaʔa ceŋge. Mí mɛɛ na ma fɛn ma lama kpo me ma lòʔó ná ma.
4Mí na na nyuwyeʔe sinni pomo ma na mà kpe na najɛrɛ nyiŋi na ge, Juwifiyee pè bɛfu pé ma mi cɛn. Ki da hlí wa na klo woo pe nulala liì ni mà na bâ no wa Jerusalɛmu kàʔà ni ge. 5Pa pé ma na cɛn kí ma mo ge, nàʔa po pé biʔi ta, pa pe gban bìʔi yo bí yo mi dá bo na Farisiyee pe kloʔò tanri ge, ga kí nyɛ gbanʔa mà toro wò srɛʔɛ kloro tì bɛfu na.#26:5 ma wèle wa Pit 23:6; Kɔl 3:5 ni wè. 6Ŋaŋa ni ge, pé na kiti kon ná na, mɛjɛn mí ma pa nofele la na Nyɛʔɛlɛ li da gón wò tokpɔ̀ʔɔ́ ma be ge. 7Wò klɛnmɛ kɛ̂ mà kɛ syɛn mi hɛɛn pé na Nyɛʔɛlɛ kpɔʔɔ le ceŋge yaagbanʔa yebliʔi mà paʔa na mà yo Nyɛʔɛlɛ lí bi ba nofele ton le pe ma. E klo fɔlɔ, Juwifiyee pee bɛ bee pé na baʔa ná na ki nofele li kala na le ge. 8Yèé Juwifiyee be, nyaʔa ma po wa yé naʔa honri náʔa nyaʔa nɛɛ hɛn wòo gban bì yereʔe na bí yo Nyɛʔɛlɛ lí bi ba kuu nyɛ be bi pé yrigi ge sin?
9Mì tapolo we mi daʔa honrí màʔa nya nɛɛ kí ma yala bì kaʔa fafaʔa hanri bì Jesu Nasarɛti kàʔà woo wi yele cɔʔɔ le.#26:9-11 ma wèle wa Pit 8:3; 22:4-5 ni wè. 10Kiì gi mi dáa hanri wa Jerusalɛmu kàʔà ni ge. Mì mi dáa Nyɛʔɛlɛ li hɛnkmaa fafaʔabaa tonni kasogoro ni. Sraʔá farafɛɛ kpandoo pee bɛ bee pe da ná kan ki sye ní we. Nà pe gá yo pé bi da ki woo kpun be, mi na yeréʔé na kpo. 11Mi dá bo na pe cɔlɔ nyiŋi fafaʔa na wa Juwifiyee pe sɛrigoro tì bɛfu ni mà naʔa ca bì pe ciʔili pe Jesu wi yele cɔʔɔ le cuʔugu. Na dihon pɔɔ dá gban na na wɛʔɛ pe kala na le ge, à mi yáa pe cɔlɔ fɔ na jin wa klòʔo ke tɔɔ ke kyɛ̀rɛ̀ ni de.
Pɔli wí ma wi lama mi krɛʔɛmɛ kayoʔo yo
12Sraʔá farafɛɛ kpandoo pa pe da gâ na kân ki sye ní we mâ na kân kloʔò nì ge kpo ge, à mi kɛri Damasi kàʔà ni.#26:12-18 ma wèle wa Pit 9:1-19; 22:6-16 ni wè. 13E klo fɔlɔ, yaa ki da ga bâ gban nyiŋi ga na ge, mi ní wa kloʔò ni ge, à mi paʔama mà nya mí ma jɛ wa namuru ni de mà bâ mì nì na koblɛɛn kɛli be. Ki paʔama mi dá bo na funŋu mà toro yaa ki womo na me. 14Wò bɛfu à wo to tra na de. À mi ákpolo là loʔo. À liʔi yo ná ma Juwifiyee hɛnrɛ ni de mà yo: ‹Sɔli, Sɔli, nyaʔa ma po á ma na na cɔlɔ ge? Pa má na can ná ni ge, kí na ma ya nɛ pa ma dí bì timoganla folo wa li tifrimi deʔe na ge.› 15Do mì à mi yo: ‹Na fɔlɔ, han wi má ni?› Wò fɔlɔ wɔ̀ɔ ná po: ‹Mì wi Jesu we ŋa mo má na cɔlɔ ge. 16Di ma jɛ̀ ma yèré ma cyeʔe na ge, mɛjɛn mí ma nà tyɛʔɛ má na jango bì ma fara ma po na tungɔɔ ma po na kaʔa ke jarifɔlɔ pa má ma na nya pomo ma na alaʔa nî ge ní gee ní mí gà ba dyɛʔɛ má na ge. 17Mí bi ba ma syɔ Israyɛl klo hɛɛn ma be ní klòʔo ke tɔɔ ke hɛɛn ní be, bee ma mí bi ma tun ge. 18Ma ya pe nyɛʔɛ nyɛʔɛ ge pé na, jango pe nyini wa womo ni me pe je wa kpɛnmɛ ni me, pe nyini wa Sotanri wi klɛnmɛ ni me pe je wa Nyɛʔɛlɛ li klɛnmɛ ni me. Nà pe pa mì na we ge, pe kapere ti yaʔa pé kan pe pe woʔo ta ge bee ni pe klɛ́n mâ Nyɛʔɛlɛ liì kan ge.›
Pɔli wí ma kayotanʔa jàrí Agripa ma
19Ɛɛn klo fɔlɔ Agripa, ga mi dá nya, áʔa jɛ wa namuru ni de nɛbo ŋloʔo gi, mi ìn jeʔe ma. 20Di à mi klu kpɛn mà naʔa jari wa Damasi kàʔà woo pee ma. Ki kruʔu ma, à mi báa ki jari wa Jerusalɛmu kàʔà woo ma be mà plɛ̀n Jude klo lì bɛfu ní, ní klòʔo ke tɔɔ ma ge, mà naʔa pin pe kruʔu wa pe kapere ma de pe yɛʔɛ̀ kan Nyɛʔɛlɛ ma le. Pe da kaʔa gee hanri ké biʔi tyɛʔɛ pé ma kruʔu wa pe kapere ma de.#26:20 ma wèle wa Pit 9:20,28-29 ni wè. 21Ki kaʔa kee gɛ ke dá gan Juwifiyee á pe yâ na co wa sraʔá go ni ge mâ naʔa ca pé bi na kpo ge. 22Di Nyɛʔɛlɛ lí ma na haʔa fɔ mà bâ sun alaʔa na ge. Mí nyɛ naʔamɛ ge na na srɛmɛ teri me hɛnkpandoo ní hɛnyribee na be. Mi ìn kayoʔo kà haʔa wa ga na Nyɛʔɛlɛ leyoo ní Mowisi nì pe dá yo mâ yo kí gà ba hanri ge, 23mâ nì mâ yo Nyɛʔɛlɛ li wofràa wí bi ba jɔlɔ, mâ yo nɛ wí gà ba glu bi nyɛ́ bí nyini kuu ni be ge bí paʔama kayoro jari de Juwifiyee ní klòʔo ke tɔɔ hɛɛn ma be ge.»#26:23 ma wèle wa Esa 42:6; 49:6; 1Kor 15:20 ni wè.
Pɔli wí naʔa ca Agripa wi pà Jesu na we
24Pɔli pɔɔ dá bo na wi woʔo nyu ge banmɛ ge, Fɛsitusi wɔ̀ɔ kí yo gbanʔa mà yo: «Pɔli, ticere ma jɛ ma nî. Ga má sɛbɛɛ ploʔo wɛʔɛ ge ma kan kí ma ticere jrɛʔɛ má ni.» 25Pɔli wɔ̀ɔ wí po: «Fɛsitusi kmaa, ticere ìn jɛ na nî, di mí na kayocɛnrɛ nyu ní hɛncelebee kayoro ní. 26Klo fɔlɔ Agripa we wí nyɛ ki kaʔa gee ke cɛnmɛ ni. Kiì ma kan mí ma horo na ke nyu wí kan finmi na. Mí ma paʔa na mà yo ki kaʔa ge lɛ̀ ìn dà hra wi na, mɛjɛn ki woʔo ga ki ìn dà hanri hrama ni. 27Klo fɔlɔ Agripa, má ma yere Nyɛʔɛlɛ leyoo pe kayoro na de yo? Mí maʔa cɛn mà yo má ma yere tí na.» 28Agripa wɔ̀ɔ Pɔli po we: «Má naʔa honri bì na krɛʔɛ Krisi woo ki nyiŋi cɛnri ŋa na we yo?» 29Pɔli wɔ̀ɔ wí po: «Ali nàʔa ja bo ki nyiŋi cɛnri ŋa wiì wi yoo, nyitiklonʔo gi yoo, mí na Nyɛʔɛlɛ nyɛri le, kò gá bo mo nigbe wi, di pe tɔɔ pè bɛfu bee pé na nuru ná ma alaʔa nî ge, pe krɛ̀ʔɛ̀ nɛ pa mì tapolo nyɛ we fɔ mà gâ laʔa ki nyoʔomo ba na na ge, pà wò gá bo pé na ban.»
30Klo fɔlɔ Agripa nì, klo fɔlɔ Fɛsitusi nì, ní Berenisi nì, hɛɛn bee ní pe dá bo wa pe ní klɛnhaʔa ge, à pe jɛ. 31Pe gâ nyini kɔ ge, à pe na nyu pè ní mà naʔa pin: «Ki naŋa ŋa wi ìn dà kala là po la lí ma yala poo kpó, ná kiì ban, poó le kaso nî ge.» 32Agripa wɔ̀ɔ Fɛsitusi po we: «Nà ki ìn dì bo ki naŋa ŋa wi dá wi kayoʔo kân ge kɔ Sesare ma we, ma dí bì gban bùu wa wi da sye.»

Currently Selected:

PITUNBEE 26: NLK10

Highlight

Share

Copy

None

Want to have your highlights saved across all your devices? Sign up or sign in