PITUNBEE 25
25
Pɔli wí yo Sesare bi yà wi kayoʔo kon ge
1Fɛsitusi wi gâ glɛn wa klo na le kɔ ge, wlɛʔɛ tanriwoʔo na ge, wɔ̀ɔ jɛ wa Sesare kàʔà ni mà kɛri Jerusalɛmu kàʔà ni. 2Sraʔá farafɛɛ pe lagwɔɔ ní, ní Juwifiyee pe yɛkluu ní be à pe pan mà báa baʔa Pɔli na we be wi ma mà noo fɛn mà yo, 3wi pe nadanma hanri wi yo pe pan Pɔli nì we be Jerusalɛmu kàʔà ni ge. Àʔa hín bo pee be pe dá dɛnbɛrɛ kon Pɔli na we mà yo pé bi bɔɔ kpo wa kloʔò na ge. 4Di Fɛsitusi wɔ̀ɔ pé po Pɔli wí nyɛ wa Sesare kàʔà kaso nî we. Di cɛncɛnbo wiì Fɛsitusi we, wí bi ba hru bì gɛri wa nɛ. 5Wɔ̀ɔ ní mà yo: «Ki kala na le, hɛɛn bee pé nyɛ hɛnkpangbanmaa ye ni ge, pe plɛ̀n ná ni pe kɛri wa. Nàʔa po ki naŋa ŋa wí ma tipeʔe kà po ge, pe ya ki baʔa kayoʔo yo ge wi na.»
6Fɛsitusi wi dá wlɛrɛ da kɔ wa pe nî ge, ti ìn dà doro wlɛrɛ natanri, kana wlɛrɛ kɛ̂ na we. Ki kruʔu ma, wɔ̀ɔ hru mà kɛri Sesare kàʔà ni ge. Ki kpɛntoʔo na ge, wɔ̀ɔ yâ glɛn wa wi kiti konhaʔa aconʔo na mà yo pe pan Pɔli nì we wi kân. 7Pɔli wi gâ ban ge, Juwifiyee bee pe dá jɛ wa Jerusalɛmu kàʔà ni ge, à pe jɛ mòo kɛli na katipeʔe fafaʔa nyɛli na ke pa wí na. Àʔa hín bo pee be poò gban bì ki kaʔa là kɔ̀rɔ́ cɛn bùu nyɛli hɛn kan. 8Pɔli wɔ̀ɔ wi woʔo yo ge mâ yo: «Mi ìn kala là po tipele Juwifiyee pe kalɛlɛ là na, ná kiì ban, pe sraʔá go na ge, kà na Sesare na we.» 9Di Fɛsitusi pɔɔ dá jori bí Juwifiyee pe nadanma kala liì po ge, wɔ̀ɔ Pɔli po we: «Má ma cori bì gɛri wa Jerusalɛmu kàʔà ni ge pe ya ma kiti kon we wa na yɛʔɛ̀ na yo?» 10Pɔli wɔ̀ɔ yo: «Mí nyɛ yerehaʔa naʔamɛ ge Sesare wi kiti konhaʔa aconʔo tanla ge kɔ. Kí ma yala na kiti wi kon naʔa ki deʔe ga kiì na. Mi ìn kala là po tipele Juwifiyee na be, nɛ pa mo tapolo má maʔa cɛn kmaʔa ge.» 11Nàʔa po mí ma kapeʔe kà hanri ga kí ma yala pe na kpó ge, mi ìn jè na kùʔù na ge. Di náʔa po kayocɛnŋɛ kala wò wa ki kaʔa gee ni pé ma baʔa na na ge, hɛn wà wo wa ŋa wí bi gban bi ná kan pé ma ge. Do mì mí ma na kayoʔo kân ge Sesare ma. 12Fɛsitusi wi gâ yo kɔ wi hɛɛn ní be ge, wɔ̀ɔ ná Pɔli po we: «Pa má ma ma kayoʔo kân ge Sesare ma we, má bi ba gɛri wi deʔe na ge.»
Pɔli wí na nyu Agripa nì Berenisi nì pe yɛʔɛ̀ na
13Wlɛrɛ tà gâ gɔ ge, klo fɔlɔ Agripa nì Berenisi nì à pe pan be Sesare kàʔà ni bì ba Fɛsitusi syeri we. 14Pe gâ wlɛrɛ tà kɔ wa ge, Fɛsitusi wɔ̀ɔ Pɔli wi kayoʔo yo klo fɔlɔ ma we mà naʔa pin: «Felikisi wi dá naŋa wà yaʔa naʔa kaso nî we. 15Mi gâ gɛri Jerusalɛmu kàʔà ni ge, sraʔá farafɔlɔ kpangbanŋa ní, ní Juwifiyee pe lagwɔɔ ní be à pe yáa baʔa ki naŋa na we wa na kân mà naʔa ca kayoʔo ki tanʔa wí na. 16À mi pé po Hrɔmu woo pe kalɛʔɛ ban bí hɛn kan wi baʔa hɛɛn ma kí po pe ìn je yeré bí kiti kon kpɛn teme na, ki fɔlɔ wí gban wí wi woʔo yo ge kpɛn ge. 17Pe gâ blɛn ná ni mâ pan naʔa ge, mi ìn ki yaʔa ki da mori. Ki kpɛntoʔo na ge, à mi yâ glɛn wa na kiti konhaʔa aconʔo na ge mà yo pe pan ki naŋa nì we na kân.
18Wi baʔa hɛɛn pe gâ yere mâ na wi baʔahaʔa kayoro nyu de nyiŋi ga na ge, katipeʔe gee mi dá bo na honri mâ yo pé bi ba wí na ge, pe ìn ki kaʔa là nyoʔo yo. 19Di pe dáa kakara wa wí ni pee pè tala pe srɛʔɛ kloʔó kaʔa kèè na, ní naŋa wà kayoʔo ní pe dáa ki naŋa yeri we Jesu. Wi dá gu, di Pɔli wɔ̀ɔ yo wí nyɛ nyuwyeʔe na. 20Do mì we mi ìn ki kakara da ti konmo cɛn me. À muu yugu, nàʔa po pɔɔ ki ta bi gɛrí wa Jerusalɛmu kàʔà ni ge, ki kaʔa gee ke kiti wi ya gon wa ban ge. 21Di Pɔli pɔɔ gâ wi kayoʔo kân ge klo fɔlɔ kpangbanŋa ma we ge, à mi yo pe dɔɔ welé naʔa fɔ bì ba no nyiŋi ga na mí gɔ̀ɔ troʔo wa Sesare krugu we.»
22Agripa wɔ̀ɔ Fɛsitusi po we: «Mì tapolo mí ma cori bì loʔo ki naŋa ma we kpo.» Fɛsitusi wɔ̀ɔ yo: «Má bi ba loʔo wí ma kpɛndo.»
23Ki kpɛntoʔo na ge, Agripa nì Berenisi nì we à pe pan hɛnkpangbanmaa panma na mà plɛn sorasiyee pe lagwɔkpandoo ní, ní kàʔà hɛnkpandoo ní be mà bâ je wa kiti konhaʔa deʔe na ge. Fɛsitusi wɔ̀ɔ hɛɛn tun mà yo pe pan Pɔli nì we. À pe pan wí ni. 24Ki nyiŋi na ge, Fɛsitusi wɔ̀ɔ yo: «Mo klo fɔlɔ Agripa nì, ní yè bɛfu ní yèé bee yé nyɛ naʔa wo nì ge. Yé na ki naŋa ŋa nyaʔa we. Juwifiyee pe janma mì bɛfu mi da gɛrí wa nà krugu Jerusalɛmu kàʔà ni ge mà pan naʔamɛ ge nà krugu nɛ mà na taʔara mà yo ki ìn yala wi kò nyuwyeʔe na adi. 25Mì mí maʔa nya wi ìn kala là po la lí ma yala poo kpó ge. Di ki naŋa ŋa wiì wì tapolo we pɔɔ gâ wi kayoʔo kan klo fɔlɔ kpangbanŋa ma we, à mi yo mí bi bɔɔ troʔo wa wi ma. 26Mi ìn kayoʔo kà ta ga mí bi ja nyoŋo bì droʔo wa na fɔlɔ ma we wi kala na le. Ki kala na le, à mi yo pe pan wí ni naʔa yè yɛ̀ʔɛ̀ na ge. Klo fɔlɔ Agripa, mí ma cori wi yèré nɛ mo ma yɛʔɛ̀ kiì na kpabu, jango wi yugulu kruʔu ma ge, ga kí ma yala bi nyoŋó ge, bìʔi cɛn. 27Mɛjɛn mí maʔa nya ki woʔo ga ge, koò kahranla bí kaso fɔlɔ troʔo deʔe kà na, pé na baʔa wí na yugu ga na kí po ki ìn nyɛli ge.»
Currently Selected:
PITUNBEE 25: NLK10
Highlight
Share
Copy

Want to have your highlights saved across all your devices? Sign up or sign in
Bible Society of Côte d'Ivoire