PITUNBEE 27

Pɔli we krɛlɛ Hrɔmu kàʔà ni

1Pe gâ wlɛʔɛ kon mâ yo wo ba je nyumu kɔrɔ kà ni wo kɛri Itali klo ni le, à pe Pɔli nì kaso fɛɛ pèè plɛn mà pe kân sorasiyee lagwɔ wà ma ŋa pe dáa yeri Juliyusi ge. Ki da bo klo fɔlɔ kpangbanŋa wi sorasiyee klɛnmɛ lagwɔ wà wi. 2À wo je Adramite kàʔà nyumu kɔrɔ kà ni ga ki dáa sye mà yáa nyìŋí wa Asi klo yerehara na de. Arisitarike ŋa wí nyɛ Maseduwani klo woo we mâ po Tesalonike kàʔà woo we, wi dá bo wa wo nì. À wo na sye. 3Ki kpɛntoʔo na ge, à wo yâ je wa Sidon kàʔà ni ge. Pa Juliyusi wi dá kmaʔa hanri Pɔli na we, wɔ̀ɔ wí kan kloʔò nì ge mà yo wi ya wi nagroboo wele be, jango poo haʔa wi cromo yrɛbɛ na be. 4Wo gâ jɛ be ge, à wo traʔa wa Sipre klo namyɛʔɛ na ge mà li yaʔa wòó ní tiflɛʔɛ nì wò kpafoʔo ni, mɛjɛn tiflɛʔɛ ki dáa jrɛʔɛ wò yɛsinmi na. 5À wo nyugbɔmo pari mà mi kon, ma mí nyɛ wa Silisi klo nì Panfili klo tanla le ge. À wo yâ je wa Mira kàʔà ni wa Lisi klo ni le. 6Wa ki deʔe na ge, Sorasiyee lagwɔ wɔ̀ɔ Alɛkisandre kàʔà nyumu kɔrɔ kà nya ga kí na sye Itali klo ni le. Wɔ̀ɔ wo le waʔa nî.

7À wo na sye yɛɛrɛ wa nyugbɔmo na me mà wlɛfafaʔa ta. À wo gâ mi ka mà bâ no wa Kinide kàʔà tanla ge. Tiflɛʔɛ ki ìn wo yaʔa woo sye wò yɛsinmi na me. Ɛɛn à wo kɛri Salimone kàʔà namyɛʔɛ na. À wo Krɛti klo yaʔa le be wòó ní, tiflɛʔɛ nì wò kpafoʔo ni. 8À wo na mi ka naʔa traʔa mà yâ no deʔe kà na, pé na ki deʔe yeri ge Nyumu Kɔrɔ ti yerehakmaʔa. Kàʔà kà dà bo be ki deʔe tanla ge, pe dáa ki kàʔà yeri ge Lase kàʔà.

9Paʔa da gâ bo nyifafaʔa mà toro be wo na ge, su wi conyiŋi áʔa po kí ma toro kɔ ge, nyumu kɔrɔ tanʔala à li ko tɔbɛnʔɛ wolo. Ki kala na, Pɔli wɔ̀ɔ kí yo màʔa sari pe na, mà yo: 10«Na woolo, mí maʔa nya wò nyumu kɔrɔ tanʔala lí bi bo cɔlɔʔɔ ní, ní kacɔʔɔgɔɔ fafaʔa nì. Ki ìn bi gà danʔa nyumu kɔrɔ ní ki lama tuʔuru tiì na dron, di wòó hɛnwyee be wò nyuwyeʔe paʔa bunŋu wa kpo.» 11Di sorasiyee pe lagwɔ wɔ̀ɔ pa nyumu kɔrɔ ki fɔlɔ nì, ní ki fɛfɔlɔ ní pe kayoʔo kiì na mà toro Pɔli wi woʔo na ge. 12Pa ki nyumu kɔrɔ ti yerehaʔa deʔe ki ìn dà bo kmaʔa wyere nyiŋi na ge, à pe fonʔo ma yo pe jɛ̀ be ki deʔe na ge pe da mi ka pe no wa Fenikisi kàʔà na ge, jango pe ya wyere nyiŋi kɔ ge wa ban, nàʔa po kí biʔi ta ge. Fenikisi kàʔà ki dá bo Krɛti klo nyumu kɔrɔ ti yerehaʔa deʔe kà na kì yɛ. Ki sinmi mi dá bo wa yaa jehaʔa namyɛʔɛ na.

Tiflɛgbɔʔɔ ma jɛ na funnu nyugbɔmo na

13À tiflɛble là ma jɛ wa yaa ki jrɛhaʔa kamolo namyɛʔɛ na ge mà báa funnu pé na. À pe naʔa nyaʔa nɛɛ ga pé na ca bí hanri ge, kí biʔi ta. À pe nyumu kɔrɔ ayrigiʔi timoganʔa jrɛʔɛ ge mà jɛ be na traʔa wa toon Krɛti klo namyɛʔɛ na ge. 14Di cɛncɛnbo à tiflɛgbɔʔɔ kà ma jɛ wa ki klo li namyɛʔɛ na ge, pé na ki tiflɛʔɛ yeri ge “Yurakilon”. 15Àʔa bâ nyumu kɔrɔ kpe ge gbanʔa. Pa wòó wo ìn gban bí nyumu kɔrɔ ki yɛʔɛ̀ kan ge wa tiflɛʔɛ ki jrɛhaʔa ma ge, à wo wò yaʔa tiflɛʔɛ ma ge. Àʔa na sye nyumu kɔrɔ ní ge. 16À wo yâ doro klo là tanla tatulu wa nyumu nulala ni le. Pe dá bo na ki klo yeri le Koda. À wo lí yaʔa wòó ní, tiflɛʔɛ nì wò kpafoʔo ni mà mi ka mà nyumu kɔrɔple kpe le. 17Pe gâ li jrɛʔɛ mâ li le wa nyumu kɔrɔ kpangbanŋa ni ge kɔ ge, à pe maʔaŋaa kpe mà nyumu kɔrɔ kpangbanŋa pwɔ ge be ki nulala ni le, jango kò gá jaʔabu. Pa pe dáa fyaʔa jango wò nyumu kɔrɔ kò gá no wa Sirite deʔe ki tanyrɛʔɛ dere na de ge, à pe nyumu kɔrɔ kpasyoro tà trigi màʔa yaʔa tiflɛʔɛ ma ge ban. 18Àʔa na syeʔe ni. Ki kpɛntoʔo na tiflɛgbɔʔɔ paʔa dá fɛnri wo na ceŋge ge, à pe na nyumu kɔrɔ tuʔuru tà wa wa nyumu ni me. 19Wlɛrɛ tanriwoʔo na ge, à pe nyumu kɔrɔ ki tunŋu yrɛbɛ pà fara be pee pe kyɛtara nì de mà pi wa wa nyumu ni me. 20À wlɛrɛ tà ma kɔ bonʔoro, yaa nì ŋoŋoo ní ge pi ìn da nyini. Tiflɛgbɔʔɔ fanna àʔa hín na funnu gbanʔa ceŋge fɔ wò dihon wì bɛfu wɔ̀ɔ kon wo na. À wo naʔa nyaʔa nɛɛ wo ìn bi gban bì syɔ adi.

21Ki dá nyiŋi fafaʔa kɔ, áʔa po wo ìn jé li kpɛn ge. Ki nyiŋi na ge, Pɔli wɔ̀ɔ jɛ mà yere be hɛɛn pe nulala ni le mà yo: «Na woolo, nyiŋi ga na wo dá bo wa Krɛti klo ni le ge, ki dá yala ye lòʔó ná ma, jango wò gá jɛ wa ki deʔe na ge, ki cɔlɔʔɔ ní, ní ki acɔʔɔgɔ ga nì ge kɛ̀ ìn dì bi wo ta. 22Di ki tɔ na ge, mí biʔi yo ye ma, ye lama fiʔi me, mɛjɛn yè bɛfu wɛ̀ ìn bi gu. Nyumu kɔrɔ kiì nigbe bi jɔʔɔ. 23Mɛjɛn mí ma klɛn mâ Nyɛʔɛlɛ la kan mâ na li kpɔʔɔ ge, yebliʔi ni ge, 24li mlɛŋɛ wà ma bâ wi tyɛʔɛ ná na, mà yo: ‹Pɔli, mò gáa fyaʔa. Kí ma yala ma ya yèré wa Sesare wi yɛʔɛ̀ na ge wi kiti kon má na. Nyɛʔɛlɛ lí maʔa kân má ma mà yo ma koblɛɛn wɛ̀ ìn bi gu.› 25Ki kala na le, na woolo, ye lama fiʔi me, mɛjɛn mí ma pa Nyɛʔɛlɛ na le mà yo kí bi ba hanri nɛ pa lí maʔa yo ná kan pomo ma na ge. 26Di kí ma yala tiflɛʔɛ ki ya wo can wa klo là ni nyumu nulala ni le.»

27Wò yebliʔi kɛ̂ mà kɛ ticɛrɛwoʔo na ge, ki ní tiflɛʔɛ kí na wo kpin, á wo na Adriyatike nyugbɔmo pari me ná mi kon ge. Ki nyilɛlɛ na le, nyumu kɔrɔ tungɔɔ à pe naʔa honri mà yo wó na nori tra tà na. 28À pe nyumu mi ticuʔumu tonli me màʔa nya mi ticuʔumu mí nyɛ mɛtri nyɛʔɛ fonɛrɛ mà kɛ kɛ̂ mà kɛ nasyɛn. À pe hɛnʔɛrɛ wa yɛʔɛ̀ na ge cɛnri mà nì mà li tonli nɛ màʔa nya mi kó mɛtri nyɛʔɛ fonɛrɛ mà kɛ natanri. 29Pa pe dáa fyaʔa jango wò ga sún ŋglɛnʔɛ kà na ge, à pe nyumu kɔrɔ ayrigiri timoganra ticɛrɛ wa wa ki kruʔu ma ge, jango bìʔi yrigí. Pe dá bo na kpɛnmɛ nyaʔa me tobɛnmɛ. 30Nyumu kɔrɔ tungɔɔ pe dá bo naʔa ca pé bi nyini wa nyumu kɔrɔ ni ge bì fɛ. À pe nyumu kɔrɔple trigi le wa nyumu ni me màʔa krɛʔɛ nɛɛ pé yà nyumu kɔrɔ ayrigiri timoganra tà le wa nɛ nyumu kɔrɔ ki yɛʔɛma deʔe na ge. 31Ki nyiŋi na ge, Pɔli wɔ̀ɔ kí yo sorasiyee pe lagwɔ ma we ní sorasiyee bee ní pe dá bo be mà yo: «Ki hɛɛn bee be nà pe ìn go naʔa nyumu kɔrɔ ni ge, yèé yòo gban bì syɔ.» 32Ki nyiŋi na ge, sorasiyee à pe nyumu kɔrɔple li maʔaŋaa konlo ge mà li yaʔa, à li na sye.

33Kpɛnmɛ mi gáa jɛn mí bi do ge, Pɔli wɔ̀ɔ na hɛɛn pè bɛfu fɛn mà yo pe lì. Wɔ̀ɔ yo: «Alaʔa nyɛ yè wlɛrɛ kɛ̂ mà kɛ ticɛrɛwoʔo, ga yé na hanni, kiì gi ye ìn jé li. 34Ki tɔ na ge, mí na ye fɛn ye yraʔa kà ka. Mɛjɛn ki woʔo ga paʔa ba yè syɔmo kapoʔo klan ge. Ali yèé ni be wà nigbe yujoʔo ìn bi bunŋu.» 35Ki kaʔa ke yomo kruʔu ma ge, wɔ̀ɔ bru kpe mà Nyɛʔɛlɛ syeri le hɛɛn pè bɛfu pe yɛʔɛ̀ na ge mòo konlo màʔa hli noo ka. 36Hɛɛn pè bɛfu à pe dihon ta mà akaba pà ka kpo. 37Wò bɛfu wòó bee wo dá bo wa nyumu kɔrɔ ni ge, wo dá bo hɛɛn saakere ní too tanri ní kprɔʔɔ ní hɛɛn noli. 38Pe gâ ja mâ ka mâ tin kɔ nyiŋi ga na ge, à pe na pe akaba tuʔuru wa de wa nyumu ni me, jango nyumu kɔrɔ ki kò tifaʔaga.

Nyumu kɔrɔ kí ma cɔʔɔ

39Kpɛnmɛ mi gâ do pe dá bo klo la tanla ge, pe ìn li cɛn. Di à pe lɔkluʔu kà nya wa ki deʔe na ge. À tanyrɛʔɛ ma po wa ki yɛʔɛma deʔe na ge. À pe yo, nàʔa po pé bi gban ge, pa pe yà nyumu kɔrɔ yrigí ge wa ki tanyrɛʔɛ na ge. 40À pe nyumu kɔrɔ ayrigiri timoganra ti maʔaŋaa haʔala ge mà ti yaʔa wa nyumu ni me. Nyumu kɔrɔ ki nibiʔi gee ke în naʔa sinni ge, à pe ke haʔala wa ke pwɔhaʔa na ge. Ki kruʔu ma, à pe nyumu kɔrɔ kpasyoʔo jrɛʔɛ ge ga ki dá bo wa nyumu kɔrɔ ki yɛʔɛma deʔe na ge, jango tiflɛʔɛ ki daʔa kpin. À pe na nyumu kɔrɔ sinni ge wa ki tanyrɛʔɛ deʔe ma ge. 41Pe yâ sun nyugbɔmo mi lɔkluru syɛn ti flinhaʔa na ge, pe nyumu kɔrɔ ki yɛʔɛma deʔe àʔa je wa tanyrɛʔɛ ni ge mà gban wa. Di ki kruʔuma deʔe ge, nyumu pa mi gáa ki wa gbanʔa wɛʔɛ ge, àʔa na kabu nyumu mi fanŋa na ge.

42Sorasiyee à pe cori bì kaso fɛɛ kpo be, jango wà wò gá lɔʔɔ kon ge bì fɛ. 43Di sorasiyee lagwɔ pɔɔ dáa ki ca bí Pɔli syɔ we ge, wi ìn ki ta sorasiyee pe pe nadanma kala hanri. Wɔ̀ɔ kí yo hɛɛn pè bɛfu ma mà yo hɛɛn bee pé na gbanni nyumu ní me, ki woo pe klù pe to wa nyumu ni me pe ya nyini wa trawaʔara na de. 44Wɔ̀ɔ yo hɛɛn pe tɔɔ be pèè bi luʔú tingbeʔe na, pèè bi luʔú nyumu kɔrɔ ki tijabubu pà na. Ki pomo na me, hɛɛn pè bɛfu à pe no wa trawaʔara na de mà syɔ.

Currently Selected:

PITUNBEE 27: NLK10

Highlight

Copy