Sélimɛ 46

Zyakɔbi n kári Ezyipiti ma

1A Isirayɛli kólogi láa ni syée ní yáriri myɛ ní ti da pye wi ma lè. A wi ga sáà nan Bɛɛri-Syeba na, a wi sáriga wòlo wi tóow Izaaki Kolocɔlɔw ma. 2A Kolocɔlɔɔ joo ní Isirayɛli ní yanyaaya ni, yébiligi ni. Wi maa wi yeri níì jo: «Zyakɔbi, Zyakɔbi.» A wi jo: «Cooì.» 3A Kolocɔlɔɔ wi pye: «Mii wi nyɛ Kolocɔlɔɔ, wi lè mɔ tóow Kolocɔlɔɔ. Mɔ a kɔ́ fyáa Ezyipiti gàríw na í. Níì cán mii a sa mɔ kpéʔele yaà beè mɔ í pye syɛɛnfele-nɛʔɛgɛ. 4Mii wi a kári yaà Ezyipiti ma ní mɔ ní, mii wi a wɔ́ɔ ba lúru pan ní mɔ ní. Zyozɛfu wi a ba mɔ nyapiigèle tɔ́n.»

5A Zyakɔbi yiri Bɛɛri-Syeba ni, Isirayɛli wi lè Zyakɔbi, a wi jáabèle wi láa n fàra be pìíbèle ní be cébèle na wòtorobèle ni, bele Faraɔnw da tórigo pe sa wi láa lè. 6#Kap 7:15 A be wɔ́ɔ̀ be yaweeri kɔ́ri n fàra yáriri myɛ na, dee be taa yaà lè Kanaan tári ni. A be i syée n sáà nan Ezyipiti tári na. Kánmi bee na Zyakɔbi kári Ezyipiti ma ní wi yòdaʔayi myɛ ní. 7Wi maa kári Ezyipiti ma, woro ní wi pìíbèle, be lè nǎnbèle ní cébèle, n fàra wi pìinyanbiiyi na yi lè nǎnbèle ní cébèle.

Zyakɔbi narigbaagi kéele

8 Isirayɛli wi lè Zyakɔbi, woro ní wi pìíbèle, ní wi pìinyanbiiyi be kári Ezyipiti ma lè, poro mɛ́ɛyi yi nyɛ yee naa: Wurubɛn, wi lè Zyakɔbi pìilɛɛw, 9ní Wurubɛn jáabèle be lè Henɔki, ní Palu, ní Hesurɔn, ní Karimii. 10N fàra Simeyɔn ní wi jáabèle na, be lè Yemuwɛli, ní Yamɛ, ní Ohadi, ní Yakɛn, ní Sohari, ní Sawuli wi lè Kanaan ye céw pyà. 11Ní Levii, ní wi jáabèle be lè Gerisyɔn, ní Kehati, ní Merarii. 12Ní Zyuda, ní wi jáabèle be lè Syela, ní Perɛsi, ní Zera. Zyuda jáabèle bele si be lè Ɛri, ní Onan, poro maa kùu Kanaan tári ni. Perɛsi wóbèle si i nyɛ Hesurɔn ní Hamuli. 13Ní Isakari, ní wi jáabèle be lè Tola, ní Puva, ní Yɔbi, ní Syimurɔn. 14Ní Zabulɔn, ní wi jáabèle be lè Serɛdi, ní Elɔn, ní Yaleyɛli. 15Poro be nyɛ nànbiigèle, gele Leya see Zyakɔbi ma lè Padan-Arami ni, n fàra calipili na pe da ni yiri lè Dina. Mɔ ga pìíbèle bee ní be pìíbèle fàra peyɛɛ na, nǎnbèle ní cébèle, pe myɛ bìnɛw i nyɛ toko ní kpɔrigɔ ní taanri. 16N fàra Gadi, ní wi jáabèle na, be lè Sifiyɔn, ní Hagii, ní Syunii, ní Ɛsibɔn, ní Erii, ní Arodi, ní Areyɛli. 17Ní Azɛɛri, ní wi jáabèle be lè Yimina, ní Yisyiva, ní Yisyivii, ní Beriya, n fàra be senyɛnjew na pe yiri lè Sera. Beriya jáabèle si i nyɛ Hebɛɛri, ní Malikiyɛli.

18Poro be pye Zilipa pìíbèle, woro wee Laban da kaan wi pìíw Leya ma lè. Zyakɔbi má wi da be see, pe myɛ bìnɛw n pye syɛ̀ɛnnɛ kɛɛ ní kɔrɔni.

19Arasyɛli wi lè Zyakɔbi céw, woro pìíbèle be nyɛ Zyozɛfu ní Bɛnzyamɛ. 20#Sél 41:50-52 A Zyozɛfu si Manase ní Efirayimi see n wi yaʔa yaà Ezyipiti tári ni. Wi céw Asinati wi pye lè Ɔn kěgi sáriga-wòloo Poti-Fera pìíw, woro wi pìíbèle bee siin see wi ma. 21Bɛnzyamɛ jáabèle si i nyɛ: Bela, ní Bekɛɛri, ní Asyibɛli, ní Gera, ní Naaman, ní Ehii, ní Worosyi, ní Hupimi, ní Mupimi, ní Aridi. 22Poro be nyɛ Arasyɛli pìíbèle, bele wi see Zyakɔbi ma lè. Pe myɛ bìnɛw n pye syɛ̀ɛnnɛ kɛɛ ní sicɛrɛ. 23Dan jáaw si i nyɛ Husyimi. 24Nɛfitalii jáabèle si i nyɛ Yaseyɛli, ní Gunii, ní Yesɛɛri, ní Syilɛmi.

25Poro be nyɛ Biiliha pìíbèle, bele wi see Zyakɔbi ma lè. Laban wi da Biiliha kaan wi pìíw Arasyɛli ma. A be myɛ bìnɛw pye yòdaʔaya kɔrɔsiin.

26Syɛ́ɛnbèle be pínɛ n kári ní Zyakɔbi ní Ezyipiti ma lè, be pye lè wi yòdaʔayi, pe n pye togoye taanri ní kɔrɔni. Wi pìíbèle càbala ga córo n le yaà í. 27#Yir 1:5; Kap 7:14 Pìíbèle bele si Zyozɛfu see yaà lè Ezyipiti ni, poro n pye syɛ̀ɛnnɛ siin. Zyakɔbi narigbaagi syɛ̀ɛnnɛ be kári Ezyipiti ma lè, pe myɛ nyɔ́ɔ maa pye togoye taanri ní kpɔrigɔ.

Zyakɔbi n sáà tɛ́ɛn Ezyipiti ni

28A Zyakɔbi Zyuda tórigo wiyɛɛ yɛ́ʔɛ ma Zyozɛfu ma wi sa wi pye waa woro fàrá Gosyɛn ma. A be i syée n sáà nan Gosyɛn tári na. 29A Zyozɛfu wi wòtorow sámaga n kári wi tóow Isirayɛli tɛɛfaragi ni Gosyɛn ma. Wi tɛ́nɛ̀ wi nyaa lè a wi wi wáa n mígi yátiigi ni, níì kòro wi na n nyɛni n mɔn. 30A Isirayɛli gi joo Zyozɛfu ma níì jo: «Ki n yɛlɛ mii í kùu tɔ́ɔliw ni àmɛɛ mii tɛ́nɛ baa mɔ yɛ́ɛgi nyaa lè ní wɔ́ɔ̀ gi cán ncan mɔ sèʔé i nyɛ sìi na.»

31A Zyozɛfu gi joo wi senyɛnbèle ma, n fàra syɛɛnsanbèle bele na be pye lè wi tóow kpaʔa wòolo, níì be pye: «Mii a kári sa yele panni kéele joo Faraɔnw ma si wi pye: ‹Mii senyɛnbèle ní syɛ́ɛnbèle bele be nyɛ lè mii tóow kpaʔa wòolo, be pye lè Kanaan tári ni, pe n pan naa mii ma. 32Syɛ́ɛnbèle bee i nyɛ yaweeyiligēle naʔafɔɔlɔ, níì cán yaweegboobéle bɛɛ. Pe n pan ní be yaweeyiligèle, ní be yaweekpologèle ní n fàra be kɔlɔ̀ yáriri myɛ na.› 33Koro na lǎli ni Faraɔnw ga yele yeri lè ní sáà yele yíbe níì jo: ‹Nyàʔá gi nyɛ yele fáliw?› 34Ye wi pye: ‹Mɔ falipyebèle i nyɛ yaweegboobéle, nlaa wolo yìri lè pìibēle fwɔɔ n taa n baa nan níjanʔa na. Fáliwee wolo kpéʔele lè, woro wolo tóobèle da wɔ́ɔ ni kpéʔele.› Kánmi bee na yele a tɛ́ɛn Gosyɛn tɛ́nɛmi ni. Níì cán yaweeyiligèle nàʔafɔɔlɔ myɛ i nyɛ yanɔnʔɔgɔ Ezyipiti ye ma.»

Currently Selected:

Sélimɛ 46: CB10

Highlight

Copy