Sélimɛ 45

Zyozɛfu n wiyɛɛ dɛ̀ɛn

1 # Kap 7:13 Lǎli bee ni Zyozɛfu ga níì pye bi gbǎn gi kpàraco syɛ́ɛnbèle nínge ni be pye wi taana lè í, a wi yákpoli wáa n gi joo níì jo: «Syɛ́ɛnbèle myɛ be nyɛ naa mii taana lè, ye be yirige yaà.»

Lǎli ni Zyozɛfu wiyɛɛ dɛ̀ɛn wi senyɛnbèle na lè, syɔɔnwaa faala da níì kòro yaà ní wi ní í. 2Wi si maa ni nyaan ni yákpoli wáa. A Ezyipiti ye gi lóʔo, a Faraɔnw kpaʔa wòolo wɔ́ɔ̀ gi lóʔo. 3A Zyozɛfu wi senyɛnbèle yari: «Mii wi nyɛ Zyozɛfu. Mii tóow sèʔé i yaà lé sìi na?» Kàjáa wi yɛʔɛfɔbèle ga gbàn n syɛɛnlurugoro kaan wi ma í, níì cán fyáari maa be cò bi gi nyaa poro i nyɛ wi yɛʔɛ̀ ma.

4A Zyozɛfu wi senyɛnbèle pye: «Mii i yele nyɛ́ɛri, ye nùuni naa mii na.» A be nùuni wi na. A Zyozɛfu be pye: «Mii wi nyɛ Zyozɛfu, wi lè yele senyɛnw, wee yele da pára lè Ezyipiti kárifɔbèle ma. 5Tɔ́ɔliw ni, ki ga yɛlɛ yele fúnyi í curugo í. Yele si a wɔ́ɔ kɔ́ gi yaʔa gi pye yele ma fundanʔara í, àmɛɛ yele mii pára lè a be pan ní mii ní nɛɛ naa lè. Níì cán Kolocɔlɔɔ wi mii tórigo naa yele yɛ́ʔɛ na, jàngó yele í kòro sìi na. 6Yɛ̀ʔɛlɛ siin kateegi taa n kwɔ́ɔ gee tári ni. Ki si n níì kòro yɛ̀ʔɛlɛ kagunɔ. Vàlá a pye í. Yaliilaara a pye í. 7Koro na Kolocɔlɔɔ wi mii tórigo naa yele yɛ́ʔɛ na koro ga pye bi pèle yaʔa be kòro naa yele ma tári ni, yele si kòro sìi na syɔɔgbɔɔlɔ báriga ni. 8Koro na yele ban ye mii tórigo nɛɛ naa í, kàjáa Kolocɔlɔɔ wi mii tórigo naa. Wi n mii télege mii í pye Faraɔnw tóo, si pye Faraɔnw kpaʔa myɛ kàfɔlɔ, si wɔ́ɔ pye Ezyipiti tári myɛ nyúngo na. 9#Kap 7:14 Ye tɔlɔyɔ wári yaa syée kelekele mii tóow ma ye sa wi pye: ‹Mɔ piiw Zyozɛfu wi syɛ́ɛnri naa joo níì jo: Kolocɔlɔɔ n mii télege mii í pye Ezyipiti myɛw kàfɔlɔ. Yìri tɔ́ɔliw ni maa maa naa mii ma, mɔ a kɔ́ yére mɔn yaà í. 10Mɔ a ba tɛ́ɛn Gosyɛn tɛ́nɛmi ni bi pye naa mii taana, mɔ ní mɔ piibèle, ní mɔ piinyanbiiyi, n fàra mɔ yaweeyiligèle, ní mɔ yaweekpologèle, ní mɔ kɔ́lɔ yáriri myɛ na. 11Mii a ra mɔ màkow myɛ nyɔɔgi tɛ́ɛgi bee ni, jàngó yarigaa a kɔ́ mɔ, ní mɔ kpáagi, ní mɔ syɔ́ɔnwaa faala fɔ̀n í. Níì cán kateegi yɛ̀ʔɛlɛ n sèʔê kòro kagunɔ.› 12Yele tiimaa n nyaa ní yele nyapiigèle ní, a mii cɔnɔw Bɛnzyamɛ wɔ́ɔ̀ nyaa ní wi nyapiigèle ní, a yele gi cán ncan mii tiimaa wi nyuu ní yele ní. 13Kpɔ́ʔɔree di nyɛ naa mii na Ezyipiti ni lè, ki n yɛlɛ ye sa dee bee kéele joo ye tɛ̀ɛn mii tóow na, bi fàra gee myɛ na yele nyaa lè. Ye tɔlɔyɔ wári ye pan ní mii tóow ní nɛɛ naa.»

14A Zyozɛfu wi cɔnɔw Bɛnzyamɛ wáa n mígi yátiigi ni ní i nyaan. A Bɛnzyamɛ wɔ́ɔ̀ wi mígi ní i nyaan. 15A wi wɔ́ɔ̀ wi yɛʔɛfɔbèle myɛ syɔɔnri syɔɔnri ní i nyaan. Koro kàdoʔo ma a wi yɛʔɛfɔbèle pínɛ n joo ní wi ní.

Faraɔnw n Zyakɔbi yeri waa maa Ezyipiti ma

16A syɛ́ɛnri bee sáà nan Faraɔnw kpaʔa na a gi jo, Zyozɛfu senyɛnbèle n pan beè. A gee bee tɔ̀nɔ n Faraɔnw ní wi syɛɛnkpolobèle dɛ́nɛ. 17A Faraɔnw Zyozɛfu yari: «Ki joo mɔ senyɛnbèle ma mí be pye: ‹Gee yele a kpéʔele lè, koro gi nyɛ, ye yele túgori taʔa yele yaweeyi na, yaa syée Kanaan tári ma, 18ye sa yele tóow, ní yele kpáayi wòolo kɔ́ri yaa maa nɛɛ naa mii ma, mii a ba yele télege Ezyipiti tári tɛɛcànga ni, yele a ra tári yacanra líi.› 19Gee si gi mɔ wógi kwɔ́ɔ lè, koro gi nyɛ mɔ í gi joo gbàn be ma si be pye: ‹Ye wòtorobèle pèle láa nɛɛ naa Ezyipiti tári ni yaa syée ye sa yele cébèle, ní yele pìíbèle, ní yele tóow láa yaa maa nɛɛ naa. 20Yele yáriri kéele ga yɛlɛ bi wári yele na í. Níì cán yacanri di nyɛ Ezyipiti tári tɛ́ɛyɛ myɛ ni lè ti a ba pye yele wóro.› »

21A Isirayɛli pìíbèle wɔ́ɔ̀ gi kpéʔele kánmi bee na. A Zyozɛfu wòtorobèle kaan be ma n yɛlɛ ní syɛ́ɛnri ní Faraɔnw joo n gbàn lè, ní wɔ́ɔ̀ kôdanʔaliile kaan be ma. 22A wi fɛ́tii búroyo kaan pe myɛ nibin nibin ma, kàjáa wi maa wálifiio támabéle sirakele ní dabata kaan Bɛnzyamɛ ma, n fàra fɛ́tii búroyo kagunɔ na. 23Yáriree wi tórigo wi tóow ma lè, toro di nyɛ dee na: yacanri di nyɛ lè Ezyipiti tári ni, wi maa di tàa tugo jòfanibēle kɛɛ na, ní wɔ́ɔ̀ jòfanicaaya kɛɛ tugo bile, ní búru na, n fàra kôdanʔa lìilaa na. 24Koro kàdoʔo ma a wi wi senyɛnbèle yaʔa a be kári nya, níì be pye: «Ye a kɔ́ tún kólogi na í.»

25A be yiri Ezyipiti tári ni n kári Kanaan tári ma n sáà nan pe tóow Zyakɔbi na. 26A be sáà wi pye: «Zyozɛfu sèʔé i nyɛ sìi na. Alí woro wi nyɛ Ezyipiti tári myɛ nyúngo na.» Kàjáa a Zyakɔbi fúngi sèʔê tɔ́n. Níì cán wi da tága be syɛ́ɛnri na í. 27A be si syɛ́ɛnri myɛ joo n tɛ̀ɛn wi na, dee Zyozɛfu da joo be ma lè. A wi wɔ́ɔ̀ wòtorobèle nyaa, bele Zyozɛfu da tórigo pe sa wi láa lè. Lǎli bee ni a be tóow Zyakɔbi pǐli náà jée wi ni. 28A Isirayɛli jo: «Gee bee n nɛʔɛ n yɛlɛ. Mii pìíw Zyozɛfu sèʔé i nyɛ sìi na! Mii a kári sa wi nyaa sáni mii í kùu lè.»

Currently Selected:

Sélimɛ 45: CB10

Highlight

Copy