Sélimɛ 47

1A Zyozɛfu kári n sáà gi joo n tɛ̀ɛn Faraɔnw na níì wi pye: «Mii tóow ní mii senyɛnbèle n yìri Kanaan tári ma n pan ní be yaweeyiligèle, ní be yaweekpologèle ní n fàra be kɔlɔ̀ yáriri myɛ na. Pe i yaà bele Gosyɛn tɛ́nɛmi ni.»

2A wi wi senyɛnbèle pèle kagunɔ kɔ́ri n kári n sáà tɛ̀ɛn Faraɔnw na. 3A Faraɔnw Zyozɛfu yɛʔɛfɔbèle yíbe níì jo: «Nyàʔá gi nyɛ yele fáliw?» A be Faraɔnw yari: «Mɔ falipyebèle i nyɛ yaweeyiligēle naʔafɔɔlɔ àmɛɛ wolo tóobèle da wɔ́ɔ̀ pye lè.» 4A be wɔ́ɔ̀ Faraɔnw pye: «Wolo kapanni li nyɛ bi ba tɛ́ɛn tári naa ni àmɛɛ gi nyɛ lè nyàā ní o nyɛ mɔ falipyebèle yaweeyiligēle ma kaa káa í, níì cán kateegi n tɔ̀nɔ n gbàn yaà Kanaan tári ni. Koro na, tɔ́ɔliw ni mɔ ga fɔ̀lɔ, mi gi yaʔa mɔ falipyebèle í sa tɛ́ɛn Gosyɛn tári ni.» 5A Faraɔnw si joo ní Zyozɛfu ní níì wi pye: «Mɔ tóow, ní mɔ senyɛnbèle n pan mɔ kurugo. 6Ezyipiti tári i nyɛ mɔ kɔ́lɔ na. Mɔ tóow ní mɔ senyɛnbèle télege tári tɛɛcànga ni. Ki n yɛlɛ be tɛ́ɛn Gosyɛn tɛ́nɛmi ni. Mɔ ga pèle cán be ni bele fánʔa be nyɛ keele na lè, mi be cɔɔnri be pye mii yaweeri nyúngo na.»

7A Zyozɛfu pan ní wi tóow Zyakɔbi ní Faraɔnw ma n baa wi tɛ̀ɛn Faraɔnw na. A Zyakɔbi dùba kpéʔele Faraɔnw ma. 8A Faraɔnw Zyakɔbi yíbe níì jo: «Jòorí mɔ sìíw yɛ̀ʔɛlɛ nyɔ́ɔ nyɛ?» 9A Zyakɔbi Faraɔnw yari: «Mii sìíw yɛ̀ʔɛlɛ nyɔ́ɔ i nyɛ togoye kɔrɔni ní kpɔrigɔ n mii yaʔa tɛ́ɛn-mí-màʔaw na. Mii sìíw yɛ̀ʔɛlɛ ga nɛʔɛ í, ke si n tɔ̀nɔ n pye wɔʔɔgɔ yɛ́ɛgéle mii ma. Ke ga nɛʔɛ n mii tóolɛɛbèle wòʔolo kwɔ́ɔ í, poro bele pe da wɔ́ɔ ni tɛ̀ɛ́n ni máari lè.»

10A Zyakɔbi níì dùba kpéʔele Faraɔnw ma níì núngo wi taana n kári.

11A Zyozɛfu sáà wi tóow ní wi yɛʔɛfɔbèle télege Ezyipiti tári tɛɛcànga ni, a gi pye be woʔò, Aramisɛsi tɛ́nɛmi ni. Wi maa gi kpéʔele n yɛlɛ ní gi ní àmɛɛ Faraɔnw da gi joo n gbàn lè. 12A Zyozɛfu i wi tóow ní wi senyɛnbèle màko nyɔ́ɔgi n fàra bele myɛ wóo na be nyɛ wi tóow kpaʔa ni lè n yɛlɛ ní be lìifɔbèle nyɔ́ɔ ní.

Zyozɛfu báaraganmi wáami làla ni

13Yaliire faala ga níì pye tári tɛ́ɛgaa ni í. Níì cán kateegi maa gbàn n sɔ̀lɔ. A Ezyipiti ní Kanaan tári fànʔa tɔ̀nɔ n kwɔ́ɔ kateegi báriga ni. 14A Zyozɛfu Ezyipiti tári wáli ní Kanaan tári wáli myɛ kpóʔoro n taa pe bilew syɔɔlɔ báriga ni. A wi sáà wáliw bee tɛ́ʔɛ Faraɔnw kpaʔa ni. 15Lǎli ni Ezyipiti tári wáli ní Kanaan tári wáli kwɔ́ɔ lè, a Ezyipiti ye myɛw kári Zyozɛfu ma n sáà wi pye: «Yaliire kaan wolo ma. Nyàʔá na mɔ a wolo yaʔa wolo í kùu mɔ taana àmɛɛ gi nyɛ lè wáli ní o nyɛ wolo ma í?» 16A Zyozɛfu be pye: «Yaa yele yaweeri kaangi, mii a ra yaliiri fɛ̀ɛ́ yele ma yele yaweeri na.»

17A be i syée ní be yaweeri ní Zyozɛfu ma, a Zyozɛfu i yaliiri fɛ̀ɛ́ be ma be syɔ́ɔnyi, ní be yaweeyiligèle, ní be yaweekpologèle, ní be jòfanibèle na. Kánmi bee na Zyozɛfu yaliiri kaan be ma yɛ́ɛli bee ni, pe yaweeri myɛ na. 18A yɛ́ɛli bee ga kwɔ́ɔ, a be níì pan wi ma n baa wi pye: «Wo kàfɔw, wolo a tɔ̀nɔ́ yafyɛn làriga mɔ na í, wolo wáliw n tɔ̀nɔ n kwɔ́ɔ, a wolo yaweeri myɛ wɔ́ɔ i nyɛ n kwɔ́ɔ mɔ wóro, wo kàfɔw. Yafyɛn ga níì kòro wolo wàa kɔ́lɔ ni mɔ yɛ́ʔɛ ma í kapye wolo céri ní wolo tálɛɛgèle ban í. 19A gi yɛlɛ lé wolo í kùu mɔ nyɛ́nɛ na ní wolo tári ní? Ki n yɛlɛ mi wolo ní wolo tári syɔɔ yaliire na. Wolo a pye Faraɔnw púlobéle wolo ní wolo tári ní. Mi wɔ́ɔ lùguzíi kaan wolo ma, koro ga pye wolo í kòro sìi na, wolo a kɔ́ kùu bi yiri tári ni tí kòro wogalagira ní í.»

20Kánmi bee na Zyozɛfu Ezyipiti tári myɛ syɔɔ n kaan Faraɔnw ma. Níì cán Ezyipiti syɛ́ɛnbèle myɛ nibin nibin maa be séyi pára àmɛɛ kateegi da tɔ̀nɔ n gbàn be na lè. A tári kàri n pye Faraɔnw wóro. 21A Zyozɛfu syɛ́ɛnbèle lége púlori fáli ni, n séli Ezyipiti tári láʔalee ma n sáà nan lee na. 22Kàjáa wi da sáriga-wòlobèle tára syɔɔ í. Níì cán pe maa ni bele bee yaliire kaangi be ma n yɛlɛ ní làlwaw ní, wee Faraɔnw da sɛ́bɛ lè n kéeli bee tɛ̀ɛn. A be i Faraɔnw yaliikaanra líi. Pe ga be tári pára í.

23A Zyozɛfu gi joo syɛ́ɛnbèle ma níì be pye: «Ye wéle, mii n yele ní yele tári syɔɔ n kaan Faraɔnw ma níjanʔa. Yele lùguzíiw wi wee, ye sa ra di lúru yele tɛɛ̀falayi ni. 24Yaliiri ga láa, yele a di tíla tɛɛyɛ kagunɔ, si tílagaa nibin kaan Faraɔnw ma, si kòro ní tílayee sicɛrɛ ní, yoro í pye séyi lùguro kéele na, ní dee yele a ra líi lè ní bele ní be nyɛ yele kpáayi ni lè, n fàra yele pìíbèle na.» 25A be jo: «Mɔ wi wolo yaʔa a wo kòro beè sìi na. Mɔ n tɔ̀nɔ n nyɔɔ wolo na, wo kàfɔw, wolo a pye Faraɔnw púlobéle.»

26A Zyozɛfu làlwa télege, a làlwaw bee kòro yaà fwɔɔ n baa nan níjanʔa na, a gi jo Ezyipiti yaliiri tílaya kagunɔ o kagunɔ ni, nibin i nyɛ Faraɔnw wóʔo. Táree di lè ti da pye Faraɔnw wóro í, toro di nyɛ sáriga-wòlobèle yagana wóro.

Zyakɔbi nyɛ́nɛ kérigèle wozangèlē

27A Isirayɛli ye tɛ́ɛn Ezyipiti tári ni, Gosyɛn tɛ́nɛmi ni. A be bi fálimi taa, níì see saʔa n pye syɛɛnnɛʔɛmɛ. 28A Zyakɔbi taa yɛ̀ʔɛlɛ kɛɛ ní kɔrɔsiin Ezyipiti tári ni. A Zyakɔbi sìíw yɛ̀ʔɛlɛ myɛ nyɔ́ɔ pye togoye kɔrɔsiin ní kɔrɔsiin.

29 # Sél 49:32; 50:6 Lǎli ni Isirayɛli sìíw canya nan bi kwɔ́ɔ lè, a wi wi jáaw Zyozɛfu yeri ní baa wi pye: «Kapye mii kéeli n kpɔ́ʔɔ mɔ ma, mɔ kɔ́gi le mii céekpɔɔli láara ni, mí kacànna ní kasinnɛ kpéʔele mii ma, mɔ a kɔ́ mii tɔ́n Ezyipiti ni í. 30Lǎli ni mii ga baa ŋúnɔ n fàra mii tóolɛɛbèle na lè, mi mii láa mi yirige Ezyipiti ni mi sa tɔ́n be nyangbaaw ni.» A Zyozɛfu wi yari: «Gee mɔ joo lè, mii a gi kpéʔele.» 31A Zyakɔbi wi yari: «Ki n yɛlɛ mi kàli mii ma.» A Zyozɛfu kàli wi ma. Koro kàdoʔo ma a Isirayɛli tìgi n kpùmɔnɔ wi yasinɛgi na nyǔngi tɛɛtaʔaga na.

Currently Selected:

Sélimɛ 47: CB10

Highlight

Copy