Yirile 7

1A Yawe gi joo Mowizi ma níì jo: «Wéle, mii n mɔ kpéʔele Faraɔnw ma Kolocɔlɔɔ. Mɔ yɛʔɛfɔw Aarɔn si pye mɔ kanyaajoow. 2Gee myɛ mii a joo gbàn mɔ ma lè, mi gi joo, mɔ yɛʔɛfɔw Aarɔn a sa gi joo Faraɔnw ma jàngó wi Isirayɛli pìíbèle yaʔa be yiri wi tári ni. 3#Kap 7:36 Mii si a Faraɔnw fúngo gbàn si mii fɛ̀ɛ́bèle, ní mii kakpoloyi yaʔa yi nɛʔɛ Ezyipiti tári ni. 4Faraɔnw a sèʔé fɔ̀lɔ bi lóʔo yele ma í. Mii si a mii kɔ́gi taʔa Ezyipiti na, bi mii syɛ́ɛnbèle kabiya yirige yaà, be lè Isirayɛli ye. Mii a gee bee kpéʔele ní kútiikpoloyo ní. 5Lǎli ni mii ga mii kɔ́gi sánʔa Ezyipiti ye kánmi na lè, níì Isirayɛli ye yirige be níngi ni lè, lǎli bee ni Ezyipiti ye a gi cán bi cán mii wi nyɛ Yawe.»

6A Mowizi ní Aarɔn gi kpéʔele kélemi n yɛlɛ ní gi ní àmɛɛ Yawe da gi joo n gbàn be ma lè. 7Lǎli ni pe sáà joo ní Faraɔnw ní lè, Mowizi maa taa yɛ̀ʔɛlɛ togoye sicɛrɛ, á Aarɔn taa togoye sicɛrɛ ní taanri.

Faraɔnw ga fɔ̀lɔ n lóʔo Mowizi ní Aarɔn ma í

8A Yawe gi joo Mowizi ní Aarɔn ma níì be pye: 9«Lǎli ni Faraɔnw ga sáà yele pye lè: ‹Ye kakpɔɔgaa kpéʔele,› mi gi joo Aarɔn ma mí wi pye: ‹Mɔ kagbeeli láa mi cáan Faraɔnw yɛ́ʔɛ ma.› Li a kàri wàbiga.»

10A Mowizi ní Aarɔn kári n sáà nan Faraɔnw na ní wɔ́ɔ̀ gi kpéʔele n yɛlɛ ní gi ní àmɛɛ Yawe da gi joo n gbàn lè. A Aarɔn wi kàgbeeli cáan tári na Faraɔnw, ní wi syɛɛnkpolobèle yɛ́ʔɛ ma, a li kàri wàbiga. 11A Faraɔnw Ezyipiti sícilibèle ní sàndoobèle yeri. A Ezyipiti nìnyɔʔɔnɔgi fɔ̀ɔlɔ wɔ́ɔ baa gee bee félege kpéʔele pe kacánmi báriga ni. 12Pe myɛ maa be kàgbeegèle cáan, a ge kàri wàbiya. Kàjáa Aarɔn kàgbeeli maa be kàgbeegèle jɔ́ɔ. 13A Faraɔnw fúngo gbàn, wi ga lóʔo Mowizi ní Aarɔn ma í, n yɛlɛ ní gee ní Yawe da joo lè.

Wɔʔɔzeligi: Lǒgi n kàri sìsyaan

14A Yawe gi joo Mowizi ma níì wi pye: «Faraɔnw fúngo n gbàn. Wi ga fɔ̀lɔ n syɛ́ɛnbèle yaʔa be kári í. 15Ki n yɛlɛ mi sɔ̀li mi kári Faraɔnw ma nyǐngi nyɔ́ɔ na, wi a yiri bi kári Niili cábigi nyɔ́ɔ ma, mi sa wi sige yaà lógbew na. Kàgbeeli li da kàri lè wàbiga, loro si pye mɔ kɔ́gi ni. 16Mi sa gi joo wi ma mí wi pye: ‹Yawe wi lè Heburubèle Kolocɔlɔɔ, woro wi mii tun mɔ ma, níì jo mii í ba mɔ pye woro n jo: Mii syɛ́ɛnbèle yaʔa be kári be sa mii kpɔ̀ʔɔrɔ fìími tára ni. Kàjáa àlí n baa nan lǎli naa na, mɔ ga fɔ̀lɔ n lóʔo í. 17#Tɛ̀ɛn 16:4 Yawe si n jo: Gee naa na mɔ a gi cán bi cán mii wi nyɛ Yawe. Wéle, kàgbeeli li nyɛ mii kɔ́gi ni lè, mii a li tɛ́ʔɛ bi Niili cábigi kpúmɔn, lǒgi a kàri sìsyaan. 18Fábèle be nyɛ Niili cábigi ni lè, pe a kùu. Niili cábigi a kálagi bi pye Ezyipiti ye a gbǎn gi lǒgi gbaa í.› »

19A Yawe gi joo Mowizi ma níì wi pye: «Ki joo Aarɔn ma mí wi pye: ‹Mɔ kagbeeli láa, mí mɔ kɔ́gi yìrige Ezyipiti lóyi ǹjoʔo ni, gee bee n jo be lókoloyi, ní be Niili cábikɔyi, ní be lǒgi wéeye, ní lǒgi tɛɛkɔnyɔ myɛ ǹjoʔo ni. Dee bee myɛ a pye sìsyaan. Sìsyaanw a pye Ezyipiti tári myɛ ni, ní yaleyi myɛ ni, yi lè tíiri wóyo, ní kàdɛnɛri wóyo.› »

20Gee Yawe da joo n gbàn lè, a Mowizi ní Aarɔn gi kpéʔele ànbée. A Aarɔn kɔ́gi yìrige n Niili cábigi lɔ̀ʔɔ kpúmɔn Faraɔn ní wi syɛɛnkpolobèle nyɛ́nɛ na, a cábigi lɔ̀ʔɔ myɛ kàri n pye sìsyaan. 21Fábèle be pye Niili lógi ni lè a be kùu, a Niili lógi kálagi. Ezyipiti ye ga níì gbàn ni Niili lógi gbo í. A sìsyaanw pye Ezyipiti tári myɛ ni.

22A Ezyipiti nìnyɔʔɔnɔgi fɔ̀ɔlɔ wɔ́ɔ̀ gi felege kpéʔele be nìnyɔʔɔnɔgi báriga ni. A Faraɔnw fúngo gbàn. Wi ga fɔ̀lɔ n lóʔo Mowizi ní Aarɔn ma í n yɛlɛ ní gi ní àmɛɛ Yawe da gi joo lè. 23A Faraɔnw lúru n kári wi kpaʔa ma. Wi ga téè kéeli bee yaʔa a li wári wi na wi fúngi ni í. 24A Ezyipiti ye myɛw i weeye túru Niili cábigi nyɔ́ɔ na ni lògbaagi caa. Níì cán pe da pye bi gbǎn Niili lógaa gbaa í.

25A be i gee bee kpéʔele n baa taa canboyo kɔrɔsiin n séli lǎlee na Yawe Niili cábigi kpúmɔn lè.

Wɔʔɔziin wógi: Jàwaliri kéele

26Koro kàdoʔo ma a Yawe gi joo Mowizi ma níì wi pye: «Da syée Faraɔnw ma mi sa wi pye: ‹Yawe n jo: Mii syɛ́ɛnbèle yaʔa be kári be sa mii kpɔ̀ʔɔrɔ. 27Kapye mɔ ga fɔ̀lɔ n be yaʔa í, mii a wósɔɔn-jàwalira tɛ́ʔɛ bi mɔ tásaligi myɛ kálagi. 28Jàwaliri a tɔ̀nɔ́ nɛʔɛ Niili cábigi ni si yiri bi càmi fwɔɔ bi ba ra jǐn mɔ fanʔafɔ-gbaagi ni, bi jée mɔ kpaafun-zínɛgi ni, bi sa ra lúru mɔ yasinɛgi na, bi jée màʔa mɔ syɛɛnkpolobèle kpaaya ni, ní mɔ tári syɛ̀ɛnnɛ kurugo. Ti a ra jǐn mɔ búrufwɔɔ-tɛ́ɛyi, ní mɔ búrumii-bírige-yaleyi ni. 29Jàwaliri a ra lúru mɔ ní mɔ syɛ́ɛnbèle ní mɔ syɛɛnkpolobèle myɛ na.› »

Currently Selected:

Yirile 7: CB10

Highlight

Copy