Yirile 6

1A Yawe gi joo Mowizi ma níì wi pye: «Gee mii a kpéʔele Faraɔnw na lè, mɔ a gi nyaa tɔ́ɔliw ni. Séekpɔɔɔ kɔ́lɔ a ba wi kaan wi be yaʔa be kári, àlí séew bee báriga ni wi a ba be nɛnɛ yirige woro tári ni.»

Kolocɔlɔɔ n nyɔ́ɔgi fàli Mowizi ma n jo woro a Isirayɛli ye syɔɔ

2 # Sél 17:1; 28:3; 35:11; Yir 3:13-15 A Kolocɔlɔɔ níì joo ní Mowizi ní níì wi pye: «Mii wi nyɛ Yawe. 3Mii mɛ́ɛgee ní mii niyɛɛ dɛ̀ɛn Abirahami, ní Izaaki, ní Zyakɔbi na lè, koro gi nyɛ Kolocɔlɔɔ wi nyɛ lè Séew Myɛ Kàfɔlɔ. Kàjáa mii mɛ́ɛgee gi nyɛ lè Yawe, pe da mɛ́ɛgi bee cán mii na í. 4A mii wɔ́ɔ̀ mii joogaanni kpéʔele ní be ní níì jo mii a Kanaan tári kaan be ma, tári bee ni be pye lè wodɛ́ɛnbéle ní, beè be pye lè nibɔndɛ́ɛnbéle. 5Mii tiimaa n Isirayɛli ye káagali sùpiiwáara lóʔo, poro bele na Ezyipiti ye púlori gbàn lè. A mii si sɔ̀ngi mii joogaanni kéele na. 6Koro na ki n yɛlɛ mi gi joo Isirayɛli ye ma, mí be pye: ‹Mii wi nyɛ Yawe, mii a yele syɔɔ faligbanw ma, woro wee Ezyipiti ye taʔa yele na lè. Mii a yele yirige púlori fáli ni woro wee be taʔa yele na lè. Mii a yele syɔɔ mii kɔ́gi fànʔa báriga ni ní kútiiw kakpologéle báriga ni. 7Mii a yele láa yele í pye mii syɛ́ɛnbèle, mii si pye yele Kolocɔlɔw. Yele a gi cán bi cán mii wi nyɛ Yawe yele Kolocɔlɔw, wee wi yele yirigi lè Ezyipiti ye faligbanw ni. 8Táree nyɔ́ɔ mii da fàli Abirahami, ní Izaaki, ní Zyakɔbi ma ní kàliga ní lè, níì jo mii a di kaan be ma, mii a sa yele lége di ni. Mii Yawe a di kaan yele ma di pye yele kɔ́rigɔ.› »

9Kánmi bee na Mowizi wɔ́ɔ sáà gi joo Isirayɛli ye ma. Kàjáa pe funjurugori ní be pulogbanri fáli maa be kaan pe ga lóʔo Mowizi ma í.

10A Yawe gi joo Mowizi ma níì wi pye: 11«Da syée mi sa gi joo Faraɔnw ma wi lè Ezyipiti ye fànʔafɔw mí wi pye, ki n yɛlɛ wi Isirayɛli ye yaʔa be yiri wi tári ni bi kári.» 12A Mowizi gi joo Yawe yɛ́ʔɛ ma níì jo: «Wéle, Isirayɛli ye ga fɔ̀lɔ n lóʔo mii ma í. Mɛ̀ɛ́ si Faraɔnw a sa lóʔo mii ma bi sɛ́ɛ, mii wee wi lè jooli o syée mii ma í?» 13A Yawe joo ní Mowizi, ní Aarɔn ní, níì syɛɛnrɛ joo n gbàn be ma Isirayɛli ye, ní Faraɔnw kéele na, wi lè Ezyipiti ye fànʔafɔw, jàngó bi Isirayɛli ye yirige Ezyipiti tári ni.

Mowizi ní Aarɔn tóolɛɛbèle mɛ́ɛyɛ kéele

14Isirayɛli ye tóolɛɛbèle yòdaʔaya kùndigibèle pèle mɛ́ɛyɛ yi nyɛ yee naa:

Isirayɛli jáalɛɛw wi lè Wurubɛn, woro jáabèle be nyɛ Henɔki, ní Palu, ní Hesurɔn, ní Karimii. Wurubɛn túlugi wòolo be nyɛ bele bee.

15Simeyɔn jáabèle si i nyɛ Yemuwɛli, ní Yamɛ, ní Ohadi, ní Yakɛn, ní Sohari, ní Sawuli wi da pye lè Kanaan ye céw pyà. Poro be pye Simeyɔn túlugi wòolo.

16 # Cór 3:17-20; 26:57-58; 1Cán 6:16-19 Levii jáabèle ní wi yòdaʔayi mɛ́ɛyɛ yi nyɛ yee naa: Gerisyɔmi, ní Kehati, ní Merarii. Levii sìíw yɛ̀ʔɛlɛ myɛ nyɔ́ɔ n pye togoye kɔrɔni ní kpɔrigɔ ní kɔrɔsiin.

17Gerisyɔmi jáabèle si be nyɛ Libinii, ní Syimeyii, n fàra be túlugi wòolo na.

18Kehati jáabèle si i nyɛ Amirami, ní Yisehari, ní Heburɔn, ní Uzyɛli. Kehati sìíw yɛ̀ʔɛlɛ myɛ nyɔ́ɔ n pye togoye kɔrɔni ní kpɔrigɔ ní yɛ̀ʔɛlɛ taanri.

19A Merarii jáabèle si i nyɛ Makilii, ní Musyii.

Yoro yi nyɛ Levii túluyi wòolo, ní wi narigbaayi.

20A Amirami wi tóow senyɛnwaa láa wi cɔɔ̀. Pe maa ni wi yiri Yokebɛdi. A wi nànbiigéle see wi ma ke lè Aarɔn, ní Mowizi. Amirami sìíw yɛ̀ʔɛlɛ myɛ nyɔ́ɔ maa pye togoye kɔrɔni ní kpɔrigɔ ní yɛ̀ʔɛlɛ kɔrɔsiin.

21Yisehari pìíbèle si pe da pye Kore, ní Nefɛgi, ní Zikirii.

22Uzyɛli jáabèle si i nyɛ Misyayɛli, ní Elisafan, ní Sitirii.

23A Aarɔn Elisyeba láa wi cɔɔ̀, wi pye lè Aminadabi pìíw, ní i nyɛ Nakisyɔn senyɛnnɛ̀. A Elisyeba Nadabi, ní Abihu, ní Eleyazari, ní Itamari see Aarɔn ma.

24Kore jáabèle be nyɛ Asiiri, ní Elikana, ní Abyazafi. Poro be nyɛ Kore túlugi wòolo.

25Eleyazari wi lè Aarɔn jáaw, a woro Putyɛli pìiwaa láa wi cɔɔ̀. A wi Fineyasi see Eleyazari ma.

Poro be nyɛ Levii narigbaagi kùndigibéle n yɛlɛ ní be túlugi wòolo ní.

26Aarɔnw bee, ní Mowiziw bee má Yawe gi joo níì jo: «Ye Isirayɛli ye yirige Ezyipiti tári ni, pe pye kabiya kabiya.» 27Mowiziw bee, ní Aarɔnw bee be wɔ́ɔ sáà joo ní Faraɔnw ní, wi lè Ezyipiti ye fànʔafɔw, jàngó bi Isirayɛli ye yirige Ezyipiti ni.

Kolocɔlɔɔ n níì wi nyɔɔfali-níjangi kpéʔele Mowizi ma

28Cángee na Yawe joo ní Mowizi ní Ezyipiti tári ni lè, 29wi maa Mowizi pye: «Mii wi nyɛ Yawe. Gee myɛ mii joo mɔ ma lè, ki n yɛlɛ mi sa gi joo Faraɔnw ma, wi lè Ezyipiti ye fànʔafɔw.» 30A Mowizi yére Yawe yɛ́ʔɛ ma níì wi yari: «Mii nyɔ́ɔgi ga wári í. Mɛ̀ɛ́ Faraɔnw a sa lóʔo mii ma bi sɛ́ɛ?»

Currently Selected:

Yirile 6: CB10

Highlight

Copy