Yirile 5

Mowizi ní Aarɔn kárili kéele Faraɔnw ma

1Gee bee kàdoʔo ma, a Mowizi ní Aarɔn kári Faraɔnw ma n sáà wi pye: «Yawe wi lè Isirayɛli ye Kolocɔlɔw, wi n gi joo níì jo: ‹Mii syɛ́ɛnbèle yaʔa be kári be sa fɛ́tii kpéʔele mii ma fìími tára ni.› » 2#Zyɔb 21:14-15 A Faraɔnw be yari: «Wìí wi nyɛ Yawe, mii si kɔ́ fɔ̀lɔ bi lóʔo wi ma si Isirayɛli ye yaʔa be kári? Mii ga Yawe cán í. Mii a tée Isirayɛli ye yaʔa be kári í.»

3 # Yir 3:18 A be jo: «Heburubèle Kolocɔlɔɔ wi baa wiyɛɛ dɛ̀ɛn wolo na. Ki yaʔa wolo í canya taanri tánʔana kpéʔele bi kári fìími tára ma bi sa sáriga wòlo Yawe wolo Kolocɔlɔw ma, koro ga pye wi a kɔ́ káfalagi yáama wàlá bi ŋɔséew tɛ́ʔɛ bi wolo kpúmɔn í.» 4A Ezyipiti fànʔafɔw be pye: «Mowizi, mɔ ní Aarɔn, nyàʔá na yele syɛ́ɛnbèle láari be fáliw na? Yaa syée yele fáliw kurugo.» 5A Faraɔnw jo: «Tɔ́ɔliw ni syɛ́ɛnmi pi baa nɛʔɛ bee tári ni, yele si be fáliw yérige.»

Faraɔnw n kàa fàra Isirayɛli ye fáliw na

6Cángi bee tiimaa na a Faraɔnw syɛ́ɛnri naa joo n gbàn pɔrɔtɔɔri fáli kùndigibéle, ní syɛ́ɛnbèle kɔ̀rɔsiifɔɔlɔ ma níì jo: 7«Yele a ní kɔ́ ra nyàásigi kaangi syɛ́ɛnbèle ma paa jùfaaw kpúmɔn àmɛɛ yele da séli ni gi kpéʔele lè í. Ye gi yaʔa pe tiimaw í sa ra gi caa. 8Jùfaawee nyɔ́ɔ pe da ni kpúmɔn ni taagi lè, yele a be kɔ́ri pe sèʔé ra wee bee nyɔ́ɔ kpúmɔn da taagi. Yele a kɔ́ yafyɛn fɔ̀n wi ni í. Níì cán sàlagafɔɔlɔ be nyɛ, koro na be kɔ́ɔ̀ fɔ̀lɔ ni gi nyuu níì jo: ‹Ye boo kári wo sa sáriga wòlo wolo Kolocɔlɔw ma.› 9Ye fáliw gbàn syɛ́ɛnbèle naa na, jàngó fali í pye be ma paa kpéʔele, koro ga pye pe a ní kɔ́ yákirii yaʔa jànvaa syɛ́ɛnraa na bàā lúro í.»

10A pɔrɔtɔɔri fáli kùndigibéle, ní syɛ́ɛnbèle kɔ̀rɔsiifɔɔlɔ yiri n kári n sáà gi joo syɛ́ɛnbèle ma níì be pye: «Faraɔnw n jo: ‹Mii a ní da nyàásige kaangi yele ma í. 11Yele tiimaa yaa syée ye sa ra nyàásigi caa beè yele ga sáà gi taa lè. Yafyɛn si a fɔ̀n yele fáliw ni í.› »

12A syɛ́ɛnbèle càri n fala Ezyipiti tári myɛ ni n sa ni nyàáceri caa nyàásigi sìndɛʔɛ ni. 13A pɔrɔtɔɔri fáli kùndigibéle be kɔ́ri níì jo: «Yaa yele canʔa o canʔa fáliw forogi bi yɛlɛ ní lǎli ní, lee ni nyàásigi da ni kaangi yele ma lè.» 14Pɔ́rɔtɔɔri fáli kùndigibéle Faraɔnw da télege lè, poro maa Isirayɛli syɛ́ɛnbèle pèle kpéʔele fáliw kùndigibèle pèle, a pe i bele bee kpúmɔn níì be pye: «Mɛ̀ɛ́ gi nyɛ yele si ga jùfaaw nyɔ́ɔ kpúmɔn n taa cànʔaniw ní níjanʔa í, n yɛlɛ ní nyɔ́ɔgee ní ki da tɛ̀ɛn yele na lè?»

15Isirayɛli wóbèle bele be pye lè kùndigibèle, a poro kári n sáà be funbɛɛnw joo n tɛ̀ɛn Faraɔnw na, níì jo: «Nyàʔá na mɔ mɔ falipyebèle kpéʔele kánmi bee na? 16Pe o nyàásigi kaangi wolo ma í, wo nyɛ lè mɔ falipyebèle, níì wolo pye: ‹Yaa jùfaaw kpúmɔn.› Lǎli bee ni ní i wolo kpúmɔn, wo nyɛ lè mɔ falipyebèle, bi gi taa mɔ syɛ́ɛnbèle be kolo.» 17A Faraɔnw be yari: «Sàlagafɔɔlɔ yele nyɛ, sàlagafɔɔlɔ hàán! Koro na yele kɔ́ɔ̀ jo: ‹Ye boo kári wo sa sáriga wòlo Yawe ma.› 18Ye sɔ̀lɔ tɔ́ɔliw ni yele fáliw ma. Nyàásige a tée kaan yele ma í, koro ní ki myɛ ní, jùfaawee nyɔ́ɔ yele da ni kpúmɔn ni taagi lè, fwɔɔ yele í da wee bee nyɔ́ɔ kpúmɔn bàā taagi.»

19Isirayɛli syɛ́ɛnbèle bele be pye lè kùndigibèle, a pe gi nyaa pe n tɔ̀nɔ n wɔʔɔgi gbàn poro na, àmɛɛ ki joo poro ma lè níì jo: «Jùfaaw nyɔ́ɔ yele yɛlɛ bàā kpúmɔn da taagi lè canʔa o canʔa, yafyɛn ga yɛlɛ bi fɔ̀n wi ni í.» 20A pe ga ni yirigi Faraɔnw tɛ́ʔɛ ni terire, a be Mowizi ní Aarɔn nyaa woyérebéle ní, a pe i be sigi. 21A be gi joo be ma níì jo: «Ki n yɛlɛ Yawe í yele wéle si kútiiw ceri. Níì cán yele n wolo kéeli kaan a li Faraɔnw ní wi syɛɛnkpolobèle bɛɛn. Yele n ŋɔsée le be kɔ́yi ni jàngó be wolo kpóo.»

22A Mowizi lúru n kári Yawe ma n sáà wi pye: «Kàfɔw, nyàʔá na mɔ kapeʔe pye syɛ́ɛnbèle naa na? Nyàʔá na mɔ mii tun? 23Nlaa mii kári Faraɔnw ma lè n sáà joo ní wi ní mɔ mɛ́ɛgi na lè, a wi i kapeʔe kpéʔele syɛ́ɛnbèle naa na. Mɔ si ga tɔ̀nɔ n mɔ syɛ́ɛnbèle syɔɔ nyáana í.»

Currently Selected:

Yirile 5: CB10

Highlight

Copy