Yirile 4

Kolocɔlɔɔ n wi séekpɔɔw tɛ̀ɛn Mowizi na

1A Mowizi wi yari: «Pe a sa tága mii na í, pe a fɔ̀lɔ bi lóʔo mii ma í. Kàjáa pe a gi joo si jo: ‹Yawe ga wiyɛɛ dɛ̀ɛn mɔ na í.› » 2A Yawe wi pye: «Nyàʔá gi gee mɔ kɔ́gi ni?» A wi jo: «Kàgbeele lii.»

3A Yawe jo: «Li cáan tári na.»

A wi li cáan tári na. A li kàri wàbiga. A Mowizi i fé gi na. 4A Yawe Mowizi pye: «Mɔ kɔ́gi sánʔa mi gi cò nángi na.» A wi kɔ́gi sánʔa n gi cò, a gi níì kàri kàgbeele wi kɔ́gi ni. 5A Yawe jo: «Sa koro kpéʔele jàngó pe tága gi na bi cán Yawe wi lè poro tóolɛɛbèle Kolocɔlɔɔ, wi lè Abirahami Kolocɔlɔw, ní Izaaki Kolocɔlɔw, ní Zyakɔbi Kolocɔlɔw, woro wi wiyɛɛ dɛ̀ɛn mɔ na.» 6A Yawe níì wi pye: «Mɔ kɔ́gi lége mi taʔa mɔ ficibigi na.» A wi wi kɔ́gi lége n taʔa wi fìcibigi na. A wi ga gi láʔa, a wi gi nyaa a yaanyɛɛnmi gi tɔ́n, a gi fílige àmɛɛ lànɛɛzyiw nyɛ lè.

7A Yawe wi pye: «Ní mi mɔ kɔ́gi lége mi taʔa mɔ ficibigi na.»

A wi wi kɔ́gi lége n taʔa wi fìcibigi na. A wi ga gi láʔa, a wi gi nyaa a gi lúru n kàri gi kanlɛɛmi na n pye àmɛɛ wi cesanri nyɛ lè. 8A Yawe jo: «Kapye pe ga tága mɔ na í, fɛ̀ɛseliw ga pye wi ga be kaan a be tága í, siin wów a be kaan be tága. 9Pe si ga pye pe ga tága fɛ̀ɛ́bèle bee siin na í, pe ga pye pe ga fɔ̀lɔ n lóʔo mɔ ma í, mi lògaa kóo Niili cábigi ni mi wo táwaari na. Lǒgee mɔ ga kóo Niili cábigi ni lè, ki a kàri sìsyaan táwaari na.»

Yawe n Aarɔn nyɛ́nɛ n wòlo waa Mowizi dɛ̀ɛmɛ́

10A Mowizi gi joo Yawe ma níì jo: «Ee Kàfɔw, jooli o syée mii ma í, n téè láa yaà, àlí n baa nan níjanʔa na mɔ nyuu ní mii ní lè, mii wi lè mɔ fálipyew. Níì cán mii tɔ̀nɔ́ o nyɛ n gbàn ni nyuu kelekele í. Mii nyɔ́ɔgi ní mii nyínni n líbe.» 11A Yawe wi yari: «Wìí wi nyɔ́ɔgi kaan syɔɔn ma? Ba wìí wi syɔɔn kàragí boboo, wàlá dùnɔ̄, koro ga jáa ninyaaɔ, wàlá fúuɔn? Mii Yawe ban ì? 12Mɔ mi tɛ́nɛ maa syée tɔ́ɔliw ni, mii wi a pye ní mɔ nyɔ́ɔgi ní, gee mɔ yɛlɛ bi joo lè, mii a sa mɔ tama gi na.» 13A Mowizi jo: «Ee Kàfɔw, mii tɔ̀nɔ́ i mɔ nyɛ́ɛri, ki n yɛlɛ mi wàa nikwɔɔ tun.»

14Lǎli bee ni a Yawe fúngi tanʔa gbanʔama Mowizi kurugo, a wi wi pye: «Mɔ yɛʔɛfɔw Aarɔn wi lè Levii ye wówaa, woro o yaà ì? Mii n gi cán jooli a sa ra syée woro ma. Woro si wi caa maa yaà wee ba mɔ fàra. Mɔ nyaani kéele a wi dɛ́nɛ wi fúngi ni gbanʔama. 15Mɔ a ba joo ní wi ní si syɛ́ɛnri le wi nyɔ́ɔgi ni. Mii si a pye ní mɔ nyɔ́ɔgi ní, si wɔ́ɔ pye ní wi nyɔ́ɔgi ní, gee yele yɛlɛ bi kpéʔele lè, mii a yele tama gi na. 16Woro wi a ra nyuu syɛ́ɛnmi ma mɔ sindɛɛgi ni. Woro wi a pye mɔ nyɔ́ɔgi, mɔ si pye Kolocɔlɔɔ sìndɛɛgi ni wi ma. 17Kàgbeeli naa cò mɔ kɔ́gi ni, loro lee ní mɔ a sa ra fɛ̀ɛ́bèle kpéʔele lè.»

Mowizi n lúru n kári wi syɛ́ɛnbèle ma

18A Mowizi lúru n pan wi céw tóo ma wi lè Zyeturo, n baa wi pye: «Ki yaʔa mii í lúru kári mii senyɛnbèle ma, pe yaà lè Ezyipiti ni, bi sa gi wéle kapye pe sèʔé i yaà sìi na.» A Zyeturo Mowizi pye: «Da syée yɛɛ̀nyinge na.»

19N Mowizi yaʔa Madyan tári ni, a Yawe gi joo wi ma níì wi pye: «Lúru maa syée Ezyipiti ma, níì cán bele myɛ pe da ni mɔ siikwɔɔri caa lè, pe n kùu n kwɔ́ɔ.»

20A Mowizi wi céw ní wi pìíbèle kɔ́ri n lúrugo jòfanibēle na n lúru ni syée Ezyipiti tári ma. Mowizi maa Kolocɔlɔɔ kàgbeeli cò wi kɔ́gi ni ni syée. 21A Yawe gi joo Mowizi ma níì wi pye: «Mɔ ga lúru ni syée ní sáà nan Ezyipiti na, kakpoloyee myɛ fànʔa mii kaan mɔ ma lè, ki n yɛlɛ mi yi kpéʔele Faraɔnw yɛ́ʔɛ ma. Mii si a wi fúngi gbàn. Wi a fɔ̀lɔ́ syɛ́ɛnbèle yaʔa be kári í. 22Lǎli bee ni mɔ a gi joo Faraɔnw ma si wi pye Yawe n jo: ‹Isirayɛli i nyɛ mii jáa, mii jáaseliw wii. 23#Yir 12:29 Mii n gi joo mɔ ma níì mɔ pye: Mii jáaw yaʔa wi kári wi sa báara mii ma. Mɔ si ga fɔ̀lɔ n wi yaʔa a wi kári í, gee bee na mii a mɔ nanbiiselili kpóo.› »

24Lǎli ni Mowizi pye tánʔani na lè, ní sáà nan tɛɛgaa na bi syɔ́ɔn beè yébiligi ni, a Yawe wi fàra ní i caa bi wi kpóo. 25Lǎli bee ni a Sefora gbèrifɔn kàdɛnɛdanʔa láa n tɛ́ʔɛ n wi pìíw kɛ́nɛ, níì salicerigi wáa Mowizi tɔ́lɔyi na níì jo: «Mɔ i nyɛ mii ma sìsyaan nàɔn.» 26A Yawe wi yaʔa. Kɛ́nɛw kéele na Sefora da gi joo níì jo: «Sìsyaan nàɔn.»

27A Yawe gi joo Aarɔn ma níì wi pye: «Da syée mi sa Mowizi fàra fìími tára ni.» A wi kári n sáà wi fàra Kolocɔlɔɔ nyanbelegi ma níì wi syɔɔnri syɔɔnri. 28Syɛ́ɛnree myɛ ní Yawe da Mowizi tun lè, ní fɛ̀ɛ́bèle myɛ kéele wi da joo n gbàn wi ma níì jo wi be kpéʔele lè, a Mowizi dee bee myɛ joo n tɛ̀ɛn Aarɔn na. 29A Mowizi ní Aarɔn kári n sáà Isirayɛli wolɛɛbèle myɛ kpóʔoro. 30Syɛ́ɛnree myɛ Yawe joo Mowizi ma lè, a Aarɔn ti myɛ joo n tɛ̀ɛn ní wɔ́ɔ̀ fɛ̀ɛ́bèle kpéʔele n tɛ̀ɛn syɛ́ɛnbèle na. 31A syɛ́ɛnbèle bee tága. Pe maa gi cán ncan Yawe n pan n baa poro Isirayɛli ye wéle, níì poro fɔ̀rɔgi nyaa. Lǎli bee ni a be tìgi n kpùmɔnɔ níì too n cíbele n kpɔ̀ʔɔrɔli kpéʔele.

Currently Selected:

Yirile 4: CB10

Highlight

Copy