Yirile 3

1Mowizi maa pye ni wi céw tóo Zyeturo yaweeyiligèle nàʔá, Zyeturo wi pye lè Madyan sáriga-wòlow. A wi yaweeyiligèle kɔ́ri n fala ní ge ní fìími tára maʔama na, Kolocɔlɔɔ nyanbelegi ma ki lè Horebi. 2#Kap 7:30-34 A Yawe nyɛ̀ʔɛni tunduɔn sáà wiyɛɛ dɛ̀ɛn wi na naanyìnge ni, tiipiige ni. A Mowizi gi sámaga n wéle, a wi gi nyaa tiipiigi myɛ i nyɛ naà, ki si o sóori í. 3A Mowizi jo: «Mii a wàli bi kári sa bìngaara kéeli naa wéle, bi gi cán gee gi gi yaʔa lè tiipiigi si o sóori í.» 4A Yawe wi nyaa a wi wàli ni syée bi sa gi wéle, n Kolocɔlɔɔ yaʔa yaà tiipiigi nínge ni, a wi Mowizi yeri níì jo: «Mowizi, Mowizi.» A Mowizi jo: «Cooì.» 5A wi jo: «Mɔ a kɔ́ nùuni nɛɛ naa í. Mɔ taʔalayi wòlo mɔ tɔ́lɔyi na. Níì cán tɛ́ɛgi ni mɔ yére lè gee, ki tári i nyɛ tɛɛcànga.» 6Ní níì jo: «Mii wi nyɛ mɔ tóow Kolocɔlɔɔ, wi lè Abirahami Kolocɔlɔw, ní Izaaki Kolocɔlɔw, ní Zyakɔbi Kolocɔlɔw.»

A Mowizi wi yɛ́ɛgi làriga, níì cán wi maa ni fɛ̀ɛgí bàā Kolocɔlɔɔ wéle. 7A Yawe jo: «Mii syɛ́ɛnbèle bele be nyɛ lè Ezyipiti ni, fɔ̀rɔgee gi nyɛ be na lè, mii n gee bee nyaa, ní àmɛɛ be sùpiigèle wáa be wɔʔɔfɔbèle kɔ́yɔ ni lè, mii n gee bee lóʔo. Níì cán mii n tɔ̀nɔ n be wɔʔɔyi kèlē cán. 8A mii si tìgi n pan ba be yirige Ezyipiti ye kɔ́yi ni, bi be yirige tári bee ni bi kári ní be ní táraa ma, dee di nyɔɔ lè níì kpɔ́ʔɔ. Táraa dii, dee di nyìn nɔ́nɔw, ní sárigi na ni fóo lè. Kanaan ye, ní Hɛti ye, ní Amɔri ye, ní Perezi ye, ní Hɛvi ye, ní Yebusi ye be yaà tári bee ni. 9Tɔ́ɔliw ni Isirayɛli ye sùpiiwáari n lúgu fwɔɔ n nan mii na. Kánmee na Ezyipiti ye be fǎngi gbàn be na lè, mii n gee bee nyaa. 10Tɔ́ɔliw ni mii a mɔ tun Faraɔnw ma. Da syée mi sa mii syɛ́ɛnbèle yirige Ezyipiti ni, pe lè Isirayɛli ye.»

Kolocɔlɔɔ n wi mɛ́ɛgi tɛ̀ɛn Mowizi na

11A Mowizi Kolocɔlɔɔ pye: «Mii wi nyɛ wìí, mii si kɔ́ kári Faraɔnw ma bi sa Isirayɛli ye yirige Ezyipiti ni?» 12A Kolocɔlɔɔ jo: «Mii i nyɛ ní mɔ ní. Wéle, gee ki a pye lè fɛ̀ɛ́w bi gi tɛ̀ɛn mii wi mɔ tun, koro gi nyɛ, mɔ ga sáà syɛ́ɛnbèle yirige Ezyipiti ni, yele a ba Kolocɔlɔɔ kpɔ̀ʔɔrɔ nyanbelegi naa na.» 13#Yir 6:2-3 A Mowizi si Kolocɔlɔɔ pye: «Mii a kári sa Isirayɛli ye pye: ‹Yele tóolɛɛbèle Kolocɔlɔɔ n mii tun yele ma.› Pe ga mii yíbe níì jo: ‹Mɛ̀ɛ́ pe wi mɛ́ɛgi yiri?› Nyàʔá mii a joo be ma?»

14 # Tɛ̀ɛn 1:4,8 A Kolocɔlɔɔ gi joo Mowizi ma níì wi pye: «Mii wi nyɛ Wee wi nyɛ lè. Kánmi naa na mɔ a sa gi joo Isirayɛli ye ma, si be pye: ‹Wee be yiri lè: MII WI NYƐ, woro wi mii tun yele ma.› » 15A Kolocɔlɔɔ níì gi joo Mowizi ma níì wi pye: «Ki n yɛlɛ mɔ í wɔ́ɔ gi joo Isirayɛli ye ma kánmi naa na mí be pye: ‹Yawe wi lè yele tóolɛɛbèle Kolocɔlɔɔ, wi lè Abirahami Kolocɔlɔw, ní Izaaki Kolocɔlɔw, ní Zyakɔbi Kolocɔlɔw, woro wi mii tun yele ma.› Koro gi nyɛ mii mɛ́ɛgi làla o làla. Kánmi bee na làrigèle myɛ syɛ̀ɛnnɛ a ra mii mɛ́ɛgi yiri. 16Da syée mi sa Isirayɛli wolɛɛbèle kpóʔoro mí be pye: ‹Yawe wi lè yele tóolɛɛbèle Kolocɔlɔɔ, woro wi wiyɛɛ dɛ̀ɛn mii na wi lè Abirahami ní Izaaki, ní Zyakɔbi Kolocɔlɔw. Wi n jo: Mii n tɔ̀nɔ n pan n baa yele wéle, gee myɛ gi kpéʔele yele na Ezyipiti ni lè, mii n gi nyaa. 17Mii si n jo: Mii a yele yirige Ezyipiti ni, beè yele nyɛ lè fɔ̀rɔgi ni bi kári ní yele ní Kanaan ye, ní Hɛti ye, ní Amɔri ye, ní Perezi ye, ní Hɛvi ye, ní Yebusi ye tári ma, táraa ma, dee di nyìn nɔ́nɔw, ní sárigi na ni fóo lè.›

18Pe a sa lóʔo mɔ ma. Mɔ ní Isirayɛli wolɛɛbèle si a pínɛ kári Ezyipiti fànʔafɔw ma bi sa wi pye: ‹Yawe wi lè Heburubèle Kolocɔlɔɔ, woro wi baa wiyɛɛ dɛ̀ɛn wolo na. Tɔ́ɔliw ni ki n yɛlɛ mi fɔ̀lɔ gi na mi wolo yaʔa wolo í canya taanri tánʔana kpéʔele bi kári fìími tára ni, koro ga pye bi sa sáriga wòlo Yawe wolo Kolocɔlɔw ma.› 19Mii n gi cán Ezyipiti fànʔafɔw a yele yaʔa yele í kári í, fwɔɔ séekpɔɔɔ kɔ́lɔ ga baa wi kpɛ̀ɛn. 20Mii si a mii kɔ́gi sánʔa bi Ezyipiti kpúmɔn ní kakpoloyi féleye myɛ ní, yee mii a kpéʔele lè Ezyipiti ni. Koro kàdoʔo ma wi a náa yele yaʔa yele í da syée. 21#Yir 12:35-36 Mii a gi yaʔa yele syɛɛnfelegi í kacànna taa Ezyipiti ye ma. Yele làrigárili ga nan, yele a tée kári ní kɔwaaya ní í. 22Cɔlɔɔ o cɔlɔɔ a wálifiio yáriraa, ní tɛɛ̀ yáriraa, ní yalere nyɛ́ɛri wi tɛ́ɛnnyɛnjaa ma, ní wee ma wi nyɛ lè wi kpáagi ni. Yele a ra toro nii yele nànbiigèle ní yele calipiigèle na. Kánmi bee na yele a Ezyipiti ye fuguri.»

Currently Selected:

Yirile 3: CB10

Highlight

Copy