MATHIE 19

Áyí Jezwi lie ájánli phɔ

(Ɔ́n wú Mák 10.1-12)

1Lóka Jezwi tɔ bhwe phu, lómánji ńchan Galile no Jude phɛ́nta abha Judɛn ndubhɛ dúji. 2Ápasá bhróbhrobhé gɛ thá, ló ńtɛ lɔ́phɔmán abha nkɔn hromɛn phɔ jan.

3 Fariziɛnnɛ́n mɔ́nbɛn tigbɛli, wo énɛn wo tɔ bhwe tú nkɛ, ló wo ébhi nkɛ sa:

– Wú lo bidí se mɔ́nsi salé kasé áyí khúnbrɛn tɛɛ bhie tɛ yan mɛ́n ca phɔ, lópán ágɛ sé sɛ mɔ́nsi anjanlí mɛ́n bhia?

4Ló Jezwi tɔ sa:

– Wú ɔ́n ne kan ábhwe abha Yankan hrɔ́ hrómɛn, khɛ́n étɔlé: “Ásithwá cí, Yankan tɛ sɛ le bhie ɔ́nmɔn, 5ló ńtɔ sa: Lóhɛ́nthé, sɛ bha yɔ́ mɛ́n the le mɛ́n man ɔ́nmɔn ká no gɛ mɛ́n bhia, ló wo mɔ́nmɔn wo bhá lí lephan brɛ.” 6Lóyábhɛ nɛn, wo bha lé cu lí néphan mɔn, lókhɛ́n wo bhá jrɛn lephan brɛ. Lóhɛ́nthé, áyí khɛ́n Yankan bhɔha sibrɛ, olépɛ lephan obhuri.

7Lótɛ Fariziɛnnɛ́n bhi nkɛ sa:

– Ló kasé áli nɛn ɔn, bí hɛ́nthé khɛ́n Moyízi ha bidí tre salé kasé sɛ éjanlí mɛ́n bhia, antɛ́ ájánli hrɔ́ sé nkɛ ɛ?

8Ló Jezwi kranman nkɔn sa:

– Hɔ́n thɛ́n ákhɔ́nman hɛ́nthé nɔn achɛ Moyízi se hɔ́n mɔ́nsi salé ɔ́n janlí hɔ́n bhiahɔn, khɛ́n ásithwá cí, léli lóyábhɛ nɛn.

9Mɛɛ́n kranmán hɔ́n gbée salé: kasé áleli ágbakhre yítɛ́ hɛ́nthé khɛ́n sɛ janli mɛ́n bhia khɛ́n ńphɛn bhie nankhɛ, sɛ lókɔn ɔn, átɛsalé bhie nɔn ánche.

10Ló mɛ́n yíchwɛmán krɛnmɛn sa:

– Kasé lóbhwe lókɔn nɔn abha sɛ le bhie ɔ́nmɔn thethé o, ló-ɛ áleyɔn salé lephan ophɛ́n bhie.

11Ló Jezwi kranman nkɔn sa:

– Néphan khúnbrɛn bha lé dɛn do ábhwe lókɔn, lókhɛ́n néphan tɛɛ Yankan se wo lóphɔ mɔ́nsi ɔn, wo nɔn wo bhá dɛn do. 12Ápɛ áyí dɔndɔn achɛ́ khɛ́n néphan fe lé gɛ phɛ́n bhie: fe ékɛ ɔn, áhrómɛn-áan wo chan sranman, fe khɛ́n ali néphan obhɔ, wo ékɛ ɔn, néphan nɔn ahɔn wo jrɛn yábhɛ nɛn, khɛ́n néphan fe ékɛ ɔn, Átho Bhringbi khúbhɛ́ hɛ́nthé nɔn achɛ wo lé gɛ phɛ́n bhie. Ló ábhwetɔ́ lókɔn, lephan kasé ɛdɛn salé ɛ́do ɔn, tɛmɛ ɛdo!

Jezwi bhɔ ńmiɔ́ chɛ́-nchɛ́ ndu

(Ɔ́n wú Mák 10.13-16; Ɔ́n wú Lwik 18.15-17)

13Néphan khwɛn miɔ́ chɛ́-nchɛ́ bha se Jezwi sa anmó mɔ́n tré nkɔn tho, ló anna Yankan sé nkɔn, lókhɛ́n mɛ́n yíchwɛmán égbrɛ nkɔn. 14Ló Jezwi kranman nkɔn sa:

– Tɛmɛ ɔ́n yɔ́ miɔ́ chɛ́-nchɛ́ khwá obhá mɛn yé, khɛ́n ɔ́n ne thú wo thá, átɛsalé néphan khɛ́n atɛsa ńmiɔ́ chɛ́-nchɛ́ lókɔn, wo nɔn Átho Bhringbi khúbhɛ́ li wo ékɛ.

15Lómánji, ńmo mɔ́n tre nkɔn tho, ló ńchan lóne no.

Sɛbhri khɛ́n ali bhringbi

(Ɔ́n wú Mák 10.17-31; Ɔ́n wú Lwik 18.18-30)

16Sɛ bɛn tigbali Jezwi ló ńmi nkɛ sa:

– Yíliéwo, bí nɔn ayɔn se mɛn tɛ́ khɛ́n mɛn gɛ mɛpɔ́bhá álephú ɛ?

17Ló Jezwi kranman nkɛ sa:

– Bí hɛ́nthé khɛ́n ɛ́bhi mɛn áyí ayɔn phɔ bhwe ɛ? Lephan míbrɛ nɔn ali lephan ayɔn. Kasé ɛ́nɛn ɛgɛ ńmɛpɔ́bhá álephú, tɛmɛ ɛji ábidí.

18– Ló ńmi nkɛ sa, lóbidí yábhɛ bɛn nɔn ɛ?

Ló Jezwi tɔ sa:

– Ɛle wɛ́n lephan; ɛle bhɔ́ áphɛ́n, ɛlé si sído, ɛle lí abhla ndalefɛ sé lephan; 19tɛmɛ ɛji hɛ the le hɛ man ɔ́nmɔn; ló ɛpɔ́ hɛ jɔ sa lósi ɛkhɔ pɔ hɛ bɛn nbrɛn.

20Lótɛ sɛbhri kránman Jezwi sa:

– Mɛɛ́n ji ábidí khúnbrɛn lókɔn. Ńthé bí nɔn akha mɛɛ́n cu tɛ́ npɔ ɛ?

21– Ló Jezwi krɛnmɛn sa, kasé ɛ́nɛn ɛlí lephan ayɔn dianthé ɔn, tɛmɛ ɛlo khwɛ́n hɛ yí khúnbrɛn ɛpɛ phɛ́lí, ɛbhó lójɛtɛn pɔ́ gbremán, ló ɛ́bha pɛ ajayí tré átho, lómánji ɛbhá, ló ɛgɛ mɛn thá.

22Lókhɛ́n sɛbhri ka aye ábhwe lókɔn Jezwi tɔ, lótɛ mɛ́n phɔ gbɔn, lósi akhɔ tɛ ɔn, ńni bhringbi óle gɛ tɔ.

23Ló Jezwi kranman mɛ́n yíchwɛmán sa:

– Mímí mɛɛ́n kranmán hɔ́n: ábha khɔnman sé bhringbi khɛ́n ánman ká Átho Bhringbi khúbhɛ́. 24Lókhɛ́n mɛn cu mɛɛ́n kranmán hɔ́n gbée salé: mímí, ábha khɔnman sé frímú khókho-ngbɔwo khɛ́n ánman khɔ́ ákwɛ́ nɔ́n mɛn thándi. Lókhɛ́n lephan ali bhringbi ɔn, mɛ́n-ɛ, ábha khɔnman se kpɛ́ɛ́n khɛ́n ánman ká Yankan Bhringbi khúbhɛ́.

25Lóka yíchwɛmán ye ábhwe lókɔn Jezwi tɔ ɔn, etán wo hɛ́nmɛn kpɛ́ɛ́n, ló wo étɔ sa:

– Ló kasé áli nɛn, álepɛ lephan wo bhá gɛ swa! 26Jezwi nɛn mɛ́n yíchwɛmán, ló ńkránman nkɔn sa:

– Áyí khúnbrɛn lókɔn, ákhɔ́nman se néphanmiɔn, khɛ́n Yankan yé áleli yíɛkɛ bhrií.

27Lótɛ Piɛ bho bhwetɔ́ ló ántɔ sa:

– Wu a, lo-ɛ lo yɔ lo yí khúnbrɛn khwa, ló lo bha lo égɛ hɛ thá. Ńthé lo ékɛ kalósi ábha khɔ́ tɛ́ e?

28Ló Jezwi kranman wo sa:

– Mímí mɛɛ́n kranmán hɔ́n: lóka áyí khúnbrɛn bha jrɛn pɔ́-npɔ́, khɛ́n Lephan Mi bha chré mɛ́n nguhá bhringbi nyákhru tho ɔn, hɔ́n yíchwɛmán áwɔ́-mɔn khɛ́n ɔ́n gɛ mɛn thá, hɔ́n lɔ ɔ́n ma chré mríngbi yákhru tho, ló ɔ́n ma bhɔ́ Izraɛ mándo áwɔ́-mɔn kwa. 29Ló mɛn hɛ́nthé, néphan khɛ́n ábha yɔ́ wo nkhú, wo hɔnsɛ́nhɔn, wo hɔnmiáhɔn, wo the, wo man, wo miɔn, wo bithe khwá ɔn, wo bha gɛ lóyí lókɔn ńdɔn ya bhɔ́tho npɔ, ló lómánji wo bhá gɛ mɛpɔ́bhá álephú. 30Néphan búdúbúdú khɛ́n thénthé athwasi, bha sa phúji, ló néphan búdúbúdú khɛ́n thénthé aphuji, bha sa thwási.

Currently Selected:

MATHIE 19: ENT96

Highlight

Copy