MATHIE 18
18
Lephan khɛ́n ali lephan khó
(Ɔ́n wú Mák 9.33-37; Ɔ́n wú Lwik 9.46-48)
1Lóka lókɔn hromɛn nɔn yíchwɛmán tigbali Jezwi, ló wo ébhi nkɛ sa:
– Abɛn li lephan khó Átho Bhringbi khúbhɛ́ ɛ?
2Lótɛ Jezwi che yípɔ bhri bɛn bha, ńhɔn nkɛ ya wo hɛ́nmɛn 3ló ántɔ sa:
– Mímí mɛɛ́n kranmán hɔ́n: kasé ɔ́n ne jrɛn hɔ́n yítɛ́ khɛ́n ɔ́n tɛ́sa ńmiɔ́ chɛ́-nchɛ́, ɔ́n ma le ká Átho Bhringbi khúbhɛ́. 4Lephan khɛ́n ahɔn mɛ́n nbrɛn bhathé, khɛ́n atɛsa yípɔ bhri lókɔn ɔn, mɛ́n nɔn ńni lephan khó Átho Bhringbi khúbhɛ́. 5Ló mɛn hɛ́nthé, lephan khɛ́n ábha do yípɔ bhri bɛn atɛsa yípɔ lókɔn, átɛsa mɛɛn bɛn nbrɛn nɔn ńdo mɛn.
Ńne li yíléle khrákhrá
(Ɔ́n wú Mák 9.42-48; Ɔ́n wú Lwik 17.1-2)
6– Ńmiɔ́ chɛ́-nchɛ́ lókɔn khɛ́n ebhú mɛn mímí, lephan khɛ́n ábha khrɛ brɛ hálé ńne hrómɛn ɔn, lephan lókɔn, áyɔn salé ohɔ́n ábhú khóo bɛn di mɛ́n bhwa, ló ohɔ́n-ɛn fɔ́nká gwe thé. 7Muswe nɔn! Áthéji lókɔn, ábha pɛ áyí ábha chɛ́ néphan khɔ́ lóphɔ tɛ́ ne! Khankhan mímí, ábha pɛ lóyí yábhɛ lókɔn tɛɛ ákakhúnbrɛn, khɛ́n muswe gɛ lephan a, lóyíhɔn lókɔn bha khɔ́ mɛ́n phɔ bhá!
8Kasé, khɔ hɛ nta o, khɔ hɛ mɔ́n o, khɛ́n echɛ́ hɛ tɛ́ ne, tɛmɛ ɛján yɛn ló ɛkhwɛ́n ló njɛ-áan lo fɔ́nkhwá bu. Áyɔn salé ɛbhó khɔ hɛ mɔ́n khu o, khɔ́ hɛ nta khu o, ɔ́nmɔn ká mɛpɔ́bhá álephú hrómɛn, brɛn ló hɛ mɔ́n mɔ́nmɔn le hɛ nta mɔ́nmɔn bha símɛ́n, khɛ́n ɛ́bha bhá átɛn khóo atre ále nɔ́n hrómɛn. 9Ńthé kasé hɛ mɛbhí nɔn echɛ́ hɛ tɛ́ ne, ɛfi yɛn, ló ɛbhó ló njɛ-áan lo fɔ́nká. Áyɔn salé ɛbhó hɛ mɛbhí brɛ ká mɛpɔ́bhá álephú hrómɛn, brɛn ló hɛ mɛbhí mɔn bha tré khɛ́n wo bhá hɔ́n hɛ fɔ́nká ágbrelí tɛn atre ále nɔ́n hrómɛn.
Gbankhran brɛ alia khɛ́n ogɛ, mɛ́n phɔ yandran obhu
(Ɔ́n wú Lwik 15.3-7)
10– Tɛmɛ ɔ́n hámwanhɛ́n, ló ɔ́n ne sa yípɔ bhri brɛ mɛ. Mímí mɛɛ́n kranmán hɔ́n: ńmiɔ́ chɛ́-nchɛ́ lókɔn, átho lóne, wo Yankan-mranchɛ́mán ya mɛn Nthe abha tho hɛ́nmɛn ákakhúnbrɛn. [ 11Átɛsalé Lephan Mi bha éswa néphan alia.]
12Ló thénthé, bí hɛ́nphe nɔn hɔ́n ebhú ɛ? Kasé lephan bɛn pɛ gbankhran ya brɛ, khɛ́n brɛ lia wo hromɛn ɔn, wú anman nɛ́n yɔ́ krɛnnɛ́n mɔ-bhwelí le áwɔ́-bhrɔ ɔ́nmɔn khwá bhóbhó tho, ló anno nɛn lóbrɛ lókɔn alia má? 13Mímí mɛɛ́n kranmán hɔ́n salé, lóka ánman gɛ gbankhran brɛ lókɔn alia ɔn, ábha tɛ́ áphɔhá khóo se brɛn krɛnnɛ́n mɔ-bhwelí le áwɔ́-bhrɔ lókɔn ɔ́nmɔn khɛ́n ale lia. 14Lóyábhɛ brɛ, hɔ́n The abha tho lɔ le pɔ salé yípɔ bhri brɛ oliá ńmiɔ́ chɛ́-nchɛ́ lókɔn hromɛn.
Lóka hɔnsɛ́n bɛn li pɔn
15– Kasé hɛ hɔnsɛ́n bɛn tɛ yí yan hɛ phɔ, tɛmɛ ɛlo gɛ, ló ɛchɛ anyɛ́n mɛ́n yí ńtɛ yan, khɛ́n olí hɔ́n mɔn thethé nɔn ɔ́n sri lóbhwe. Kasé ńdɛn ye hɛ bhwe ɛtɔ, átɛsalé ɛdo-e ka. 16Kasé ńnɛn pɔ sa anyé hɛ bhwe, tɛmɛ ɛdo khɔ lephan mɔn o, khɔ lephan bhwaliá o, há hɛ phɔ, ochɛ́sé Yankan hrɔ́ bhwe atɔlé: “Kasé ɛbhó bhwe dɔn lephan, áyɔn salé khɔ lephan mɔn o, khɔ lephan bhwaliá o, olí ndalefɛ.” 17Lókhɛ́n kasé ńnɛn dɛn ye nkɔn bhwe, ńthé tɛmɛ ɛhɔ́n lóbhwe sé Yankan-gbemán, ló kasé ńnɛn dɛn ye Yankan-gbemán bhwe lɔ, ɛyɔ́-ɛ ká, ló ɛbhó-e tɛ́sa lephan alepɛ mímíbhú, saji ɛbhó-e tɛ́sa la-nphodówo.
Áyí odibi, saji áyí ose mɔ́nsi
18– Mímí mɛɛ́n kranmán hɔ́n: áyí khúnbrɛn tɛɛ ɔ́n dibi áthéji, átho lɔ wo bhá díbi. Áyí khɛ́n ɔ́n ma sé mɔ́nsi áthéji, átho lɔ wo bhá sé mɔ́nsi.
19Mímí mɛn cu mɛɛ́n kranmán hɔ́n salé, áthéji krɛn, kasé lephan mɔn mɛ́n si, khɛ́n yankanla hromɛn wo ébhi yíbɛn mɛn Nthe abha tho yé, lóyí tɛɛ wo ébhi ɔn, ánman sé nkɔn. 20Átɛsalé mɛn hɛ́n hrómɛn, ási khɛ́n lephan mɔn le bhwaliá ɔ́nmɔn bhúrɛhɛ́n, mɛn ma wo thethé.
Nɛnkhwɛ́nwo khɛ́n álepɛ bhwe yɔ́phɔ́ phɔ yandran obhu
21Lótɛ Piɛ tigbali Jezwi, ló ńmi nkɛ sa:
– Hwánthe, kasé mɛn hɔnsɛ́n bɛn etɛ́ yíléle mɛn phɔ ákakhúnbrɛn ɔn, ńdɔn bhɔbhé nɔn ayɔn sa mɛn yɔ́phɔ́ nkɛ ɛ? Wú ńdɔn khwache pán mɛn yɔ́phɔ́ nkɛ?
22– Ló Jezwi tɔ sa, hóo, mɛn nɛn tɔlé ńdɔn khwache pán ɛyɔ́phɔ́ nkɛ a! Khɛ́n mɛn nkɛé ɛyɔ́phɔ́-ɛ olí ńmɔ bhwaliá le áwɔ́ ńdɔn khwache. 23Lóhɛ́nthé, Átho Bhringbi khúbhɛ́ khɔ sa: Bhringbi bɛn khɛ́n mɛ́n nɛnkhwɛ́nmán bha éyɛnfɛ́n se. 24Lóka wo éyɛnfɛ́n nɔn wo hɔn nɛnkhwɛ́nwo bɛn bha. Mɛ́n lókɔn bhringbi pɛn abha mɛ́n phɔ áli jɛtɛn nzrɔ akpɛn akpɛn. 25Lephan lókɔn ɔn, ńnɛn pɛ yí khɛ́n ángɛ mó sɔ́n mɛ́n phɔ pɛn. Lóhɛ́nthé mɛ́n hwánthe nkɛé mɛ́n man hɔ́n nkɛ phɛ́ní sa gangánwo, nkɛ bhia lɔ, nkɛ miɔn lɔ le nkɛ yí khúnbrɛn nkɛ pɛ, ló mɛ́n man khwɛ́n lójɛtɛn wrɔ mɛ́n jɛtɛn do. 26Khɛ́n nɛnkhwɛ́nwo jran mɔlé mɛ́n hwánthe hɛ́nmɛn, ánna nkɛ ló ántɔ sa: “Hwánthe, tɛmɛ ɛnɔ́nthɛ́n mɛn phɔ kpɛ, ló man sɔ́n hɛ pɛn khúnbrɛn!” 27Lótɛ mɛ́n hwánthe wui nfɛkhu, nkɛ yɔ mɛ́n pɛn phɔ-ɛ, ló nkɛ yɔ-ɛ kalé ńno.
28Lókhɛ́n nɛnkhwɛ́nwo lókɔn ka athandi bhácathé, ńywɛnli mɛ́n jɔ júmánwo bɛn. Mɛ́n jɔ lókɔn, mɛ́n pɛn bha nkɛ phɔ áli fránkhi ya brɛ. Ńkhwa nkɛ tho, ńsɛn nkɛ bhwa gɛ, ló ánkranmán nkɛ sa: “Ɛsɔ́n mɛn pɛn abha hɛ phɔ gbraa!” 29Mɛ́n jɔ jran bhɔlé nkɛ hɛ́nmɛn, ló ánna nkɛ sa: “Mɛn jɔ, tɛmɛ ɛnɔ́nthɛ́n mɛn phɔ kpɛ, ló man sɔ́n hɛ pɛn khúnbrɛn!” 30Khɛ́n ńnɛn dɛn bhrɔ́ɔ́, ló ńhɔn nkɛ ka khúthé sa nkɛ bhá lóne kábrɛ kábrɛ nkɛ sɔ́n mɛ́n pɛn phú khɛ́n. 31Khɛ́n mɛ́n jɔn nɛnkhwɛ́nmán ka awu nkɛ yí nkɛ tɛ, lóbhwe ka wo phɔ kpɛ́ɛ́n, ló wo lo lɛ lómɛ́n se wo hwánthe ye. 32Lóhɛ́nthé, wo hwánthe che nɛnkhwɛ́nwo lókɔn bha ló ńkránman nkɛ sa: “Nɛnkhwɛ́nwo bhúrɛwo! Hɛ lá ɛla mɛn hɛ́nthé, mɛn yɔ hɛ pɛn khúnbrɛn phɔ́ hɛ. 33Hɛ lɔ, áyɔn salé ɛwú hɛ jɔ nfɛkhu sa lósi mɛn khɔ wu hɛ nfɛkhu.” 34Ńthɛ́nyan ka mɛ́n hwánthe hromɛn, ló ńhɔn nɛnkhwɛ́nwo lókɔn ka khúthé sa nkɛ bhá lóne kábrɛ kábrɛ nkɛ sɔ́n mɛ́n pɛn khúnbrɛn phú khɛ́n.
35Ló Jezwi tɔ sa;
– Lephan, kasé ɛlé yɔ́ bhwe phɔ́ hɛ hɔnsɛ́n hɛ thɛ́n khúnbrɛn mɛn, lóyí mɛn Nthe abha tho bha tɛ́ hɔ́n nɔn ali lókɔn.
Currently Selected:
MATHIE 18: ENT96
Highlight
Share
Copy
Want to have your highlights saved across all your devices? Sign up or sign in
Ebrié New Testament © Bible Society of Côte D'Ivoire, 1996.
