MATHIE 20
20
Júmánmán abha divɛn-nyá gɔn hromɛn
1– Átho Bhringbi khúbhɛ́ yí akhɔ nɔn ali: Ábithe nthe bɛn khɛ́n ńjuju fítaan athandi bha bhácathé énɛn júmánmán olo lí júmán mɛ́n divɛn-nyá gɔn hromɛn. 2Mɛ́n le nkɔn ɔ́nmɔn wo tɛ jɛ tre sa ácí brɛ ánman sɔ́n nkɔn fránkhi brɛ, ló ńdo nkɔn no júmán lí mɛ́n divɛn-nyá gɔn hromɛn. 3Ńjuju wáchɛn bhrɔ hromɛn, ńcu thandi bháca, ló ńwu júmánmán dɔnbɛn khɛ́n akhwa bhácathé ále tɛ́ yíɛkɛ, 4ló ńkránman nkɔn sa: “Hɔ́n lɔ, ɔ́n ma hɛ́n lo lí júmán mɛn divɛn-nyá gɔn hromɛn, ló mán sɔ́n hɔ́n pɛn.” 5Ló ńdo nkɔn no. Ńcrɔ́n wáchɛn áwɔ́-mɔn le ńjuka wáchɛn bhwaliá hrómɛn, ńcu thandi, ló ńtɛ lóyábhɛ brɛ. 6Ńthé ńjuka wáchɛn mwannán, ńcu thandi ló ńwu néphan dɔnbɛn akhwa bháca. Ńmi wo sa: “Bítɛ khɛ́n ɔ́n chan njuju-áan khwa yábhɛ nɛn khɛ́n ɔ́n ne tɛ́ yíɛkɛ ɛ?” 7“Ló wo kranman nkɛ sa, álepɛ lephan édo lo lí júmán hɛ́nthé,” ló ńkránman nkɔn sa: “Kasé áli nɛn! hɔ́n lɔ, tɛmɛ ɔ́n ma hɛ́n lo lí júmán mɛn divɛn-nyá gɔn hromɛn.”
8Lóka ácí gu, divɛn-nyá gɔn nthe kranman mɛ́n yíbówo sa: “Tɛmɛ ɛche júmánmán bhá, ló ɛsɔ́n wo pɛn, khɛ́n ɛchán jiphúmán yé sɔ́n ɔ́nmɔn lo di sithwámán yé.” 9Júmánmán khɛ́n ńdo wáchɛn mwannán hrómɛn ka abha, ńsɔn nkɔn fránkhi brɛ brɛ. 10Ńthé lómánji, júmánmán khɛ́n ńthwási do, wo ka wo bha wo ebhó wo pɛnsɔ́n ɔn, wo bhu salé wo ékɛ bha thúbhɔ brɛn jiphúmán ékɛ, lókhɛ́n wo lɔ, ápɛn wo sɔn nkɔn nɔn ali fránkhi brɛ brɛ. 11Ló lóka wo ebhó wo pɛnsɔ́n, wo égbrɛ hrómɛn sé divɛn-nyá gɔn nthe 12ló wo étɔ sa: “Júmánmán khɛ́n aphuji bha ɔn, wáchɛn brɛ nɔn wo li júmán, lókhɛ́n ɛsɔn wo lópɛn brɛ sa lo khɛ́n lo bho ácí brɛn ya li júmán ńcrɔ́n yóka khrákhrá tho le áyíkhúphɔ ɔ́nmɔn hrómɛn.” 13Lókhɛ́n ábithe nthe kranman lóbɛn sa: “Mɛn jɔ, mɛn nɛn khrɛ hɛ a. Wú ɛle tɔlé kasé ɛli júmán ácí brɛ, mɛn sɔ́n hɛ pɛn fránkhi brɛ, léliló? 14Tɛmɛ ɛbhó hɛ pɛnsɔ́n ló ɛthándi lo. Lephan khɛ́n mɛn do phuji ɔn, mɛɛn nbrɛn nɔn mɛn nkɛé man sɔ́n nkɛ lópɛn brɛ sa hɛ a. 15Wú mɛn nɛn pɛ mɔ́nsi mɛn mó mɛn jɛtɛn tɛ́ mɛn yí mɛn pɔ? Lée nka lephan bhwá mɛn ni hɛ́nthé nɔn achɛ hɛ mɛbhí enɔ́n mɛn phɔ?” 16Ló ábhwe Jezwi cu tɔ kane nɔn ali salé, jiphúmán bha sa thwási, ló sithwámán bha sa phúji.
Ńdɔn bhwaliá hrómɛn, Jezwi étɔ mɛ́n khú le mɛ́n khúnɔn mɛn chánfe ɔ́nmɔn bhwe
(Ɔ́n wú Mák 10.32-34; Ɔ́n wú Lwik 18.31-34)
17Jezwi eló Jeruzalɛ́mɛn, ló ńdo mɛ́n yíchwɛmán áwɔ́-mɔn tɛɛ ma mɛ́n phɔ. Lóka wo bha sitó wo élo, lónɔn ánkranmán nkɔn sa:
18– Ɔ́n wu a, lo eló Jeruzalɛ́mɛn, lóne nɔn wo bhá hɔ́n Lephan Mi sé nphahamán-óthemánhɔn le bidíyɛ́nmán ɔ́nmɔn. Wo bhá bhɔ́ nkɛ wɛ́n kwa, 19wo bhá hɔ́n nkɛ sé néphan ale yɛn Yankan, wo lókɔn wo bhá ha nkɛ lia, wo bhá bhra nkɛ mɛ́, ló wo bhá hɔ́n nkɛ chɛ́ há áyábhletre phɔ. Ló ńcíbhí bhwaliá ka ábha sí, ánman chán khúnɔn mɛn fe.
Jakhi le Jan ɔ́nmɔn, wo man yí ébhi
(Ɔ́n wú Mák 10.35-45)
20Lótɛ Zebede miɔn Jakhi le Jan, wo man do wo ɔ́nmɔn tigbali Jezwi, ńmɔ ntráhɛ́nlé nkɛ hɛ́nmɛn, ló ánmi nkɛ sa nkɛ dɔnmɛn mɔ́n.
21– Ló Jezwi ébhi nkɛ lée, yípɔman, bí yábhɛ ɛ́nɛn?
Ló ántɔ sa:
– Tɛmɛ ɛbhɔlí hɛ phɔ tɔ sé mɛn salé, mɛn miɔn mɔn lókɔn aya ɔn, lóka ɛ́bha lí bhringbi, bɛn bha chré hɛ liémɔn si, ló lójɔ bha chré hɛ mránkhu si.
22– Ló Jezwi kranman nkɔn sa, ɔ́n ne yɛ́n áyí khɛ́n hɔ́n ébhi a. Wú ɔ́n ma gɛ nán áyábhɔ́ lókɔn hromɛn yí, ali áyíkhúphɔ khɛ́n atre mɛn mán nán?
– Ló wo nkɛé, lo bhá gɛ nán.
23– Ló Jezwi tɔ sa, khankhan mímí, mɛn yɛn salé ɔ́n ma gɛ nán mɛn yábhɔ́ hrómɛn yíkhúphɔ lókɔn. Khɛ́n ló ali mɛn liémɔn si le mɛn mránkhu si ochré ékɛ ɔn, léli mɛn nɔn mɛn sé lóphɔ mɔ́nsi; lósihɔn lókɔn, néphan khɛ́n ali wo ékɛ ɔn, wo nɔn mɛn Nthe tɛtre wo lé.
24Ló yíchwɛmán áwɔ́ krɛnnɛ́n ka aye lóbhwe, wo édo thɛ́nyan sé hɔnsɛ́n mɔn lókɔn. 25Lóhɛ́nthé Jezwi che wo khúnbrɛn bha ló ánkranmán nkɔn sa:
– Tɛmɛ ɔ́n yɛ́n salé aféchwe-óthemánhɔn mɔ́n tré nkɔn khúnbrɛn tho, ló wo khɛ́n wo li néphan khónkhó ɔn, wo lɔ wo tɛ́ yí dri aféchwe lókɔn phɔ. 26Khɛ́n lóyí yábhɛ lókɔn ole tɛ́ hɔ́n thethé. Hɔ́n hrómɛn, lóyí ágɛ tɛ́ nɔn ali salé, lephan khɛ́n énɛn alí lephan khó, áyɔn salé ankhwɛn hɔ́n khúnbrɛn hɛ́nmɛn nɛn, 27ló saji hɔ́n hrómɛn lephan khɛ́n énɛn athwási, tɛmɛ anní hɔ́n khúnbrɛn gangánwo: 28lóhɛ́nthé nɔn achɛ Lephan Mi bhá lókɔn abha ɔn, ńnɛn ma salé néphan okhwɛn mɛ́n hɛ́nmɛn nɛn, lókhɛ́n ńma salé mɛ́n-ɛ nɔn ankhwɛn néphan hɛ́nmɛn nɛn, ló anmó mɛ́n mɛpɔ́bhá tɛ́sa ápɛnsɔ́n, ló answa néphan búdúbúdú.
Jezwi tɛ mɛphumán mɔn phɔ jan
(Ɔ́n wú Mák 10.46-52; Ɔ́n wú Lwik 18.35-43)
29Lóka Jezwi le mɛ́n yíchwɛmán ɔ́nmɔn chan Jerikho khúbhɛ́ ethándi, ápasá bhróbhrobhé gɛ wo thá. 30Ló ásitó si Jezwi khɔ ehɛ́n, lóne nɔn mɛphumán mɔn chre. Lóka wo wu salé Jezwi nɔn ehɛ́n, ló wo elúkhwɛ́ tɔ sa:
– Hwánthe, Davi Mi, wu lo nfɛkhu kpɛ!
31Khɛ́n ápasá égbrɛ nkɔn, ló ékranmán nkɔn lée nkɔn témélé. Lóka ápasá égbrɛ wo ɔn, lóka lókɔn nɔn wo tɔ́ édri kránmɛn, ló wo étɔ sa:
– Hwánthe, Davi Mi, wu lo nfɛkhu kpɛ!
32Lótɛ Jezwi dɔnya, ńche nkɔn ma, ló ánmi nkɔn sa:
– Ébí yábhɛ hɔ́n énɛn salé mɛn tɛ́ sé hɔ́n ɛ?
33Ló wo tɔ sa:
– Hwánthe, tɛmɛ ɛtɛ́ lo mɛbhí ocu wú yí.
34Jezwi wu nkɔn nfɛkhu, ńpa nkɔn mɛbhí pɛ; lóyámɛ́n, mɛphumán mɔn lókɔn ewú yí, ló wo gɛ Jezwi thá ɔ́nmɔn wo élo.
Currently Selected:
MATHIE 20: ENT96
Highlight
Share
Copy
Want to have your highlights saved across all your devices? Sign up or sign in
Ebrié New Testament © Bible Society of Côte D'Ivoire, 1996.
