LWIKHI 15
15
Gbankhran alia khɛ́n ogɛ, lóphɔ yandran obhu
(Ɔ́n wú Mat 18.12-14)
1 La-nphodómán le néphan phromɛn phromɛn nankhɛhɔn khúnbrɛn tígbali Jezwi, ló wo eyé nkɛ bhwe nkɛ étɔ. 2Fariziɛnnɛ́n le bidíyɛ́nmán ɔ́nmɔn édo thɛ́nyan, ló wo ya wo thethé wo étɔ sa:
– Sɛ lókɔn do néphan phromɛn phromɛn mwámwá, ló ángɛ nkɔn ɔ́nmɔn ní nɛn!
3Lótɛ Jezwi bhu yandran lókɔn se wo sa:
4– Hɔ́n hrómɛn, kasé lephan bɛn pɛ gbankhran ya brɛ, khɛ́n bɛn lia ɔn, ébí nɔn ánman tɛ́ ɛ? Wú anman nɛ́n yɔ́ krɛnnɛ́n mɔ-bhwelí le áwɔ́-bhrɔ ɔ́nmɔn khwá nkɔn nɛnlí gɔn, ló ánno nɛn lóbrɛ lókɔn alia kábrɛ kábrɛ ángɛ nkɛ? 5Lóka ńgɛ nkɛ, átɛ́ áphɔhá se, ló anhɔ́n gbankhran lókɔn ká bhwá 6nó bháthó, ló ánche mɛ́n jɔn le mɛ́n chrégbamán ɔ́nmɔn má, ló ánkranmán nkɔn sa: “Ɔ́n gɛ mɛn ɔ́nmɔn lí phɔhá, átɛsalé mɛn gɛ mɛn gbankhran alia.” 7Mɛɛ́n kranmán hɔ́n salé lóyábhɛ brɛ, átho lóne lɔ, ábha lí áphɔhá khóo, newo brɛ khɛ́n achan mɛ́n neyítɛ́ phɔ féne hɛ́nthé, ábha brɛn néphan mɔ-bhwelí le áwɔ́-bhrɔ ɔ́nmɔn khɛ́n ale nɛn salé ájrɛn wo yítɛ́ phɔhá ékɛ yábhɛ si óbha khɔ́ lí.
Fránkhi alia khɛ́n ogɛ
8– Saji kasé bhie bɛn pɛ fránkhi áwɔ́, khɛ́n bɛn lia lóhrómɛn ɔn, wú anman nɛn tɔ́ khanniɛn pɛ fíyé khúthé, ló anná mɛlé nɛn kábrɛ kábrɛ, ángɛ? 9Lóka ńgɛ, ánche mɛ́n jɔn le mɛ́n chrégbayá ɔ́nmɔn má, ló ántɔ salé: “Ɔ́n ma olí phɔhá, átɛsalé mɛn gɛ mɛn jɛtɛn alia.” 10Mɛɛ́n kranmán hɔ́n salé ábha pɛ lóphɔhá yábhɛ brɛ sé Yankan-mranchɛ́mán, kasé newo bɛn chan mɛ́n neyítɛ́ hrómɛn féne.
Yípɔ alia khɛ́n ogɛ
11Ló Jezwi cu tɔ sa:
– Sɛ bɛn ho miɔ́ mɔn. 12Jiphúwo kranman mɛ́n the lée: “Thethe, lo yí khúnbrɛn khɛ́n lo pɛ ɔn, ɛlwa, ló ɛkhwɛ́n mɛn ékɛ sé mɛn.” Ló wo the lɔ lwa lóyí se wo mɔ́nmɔn. 13Ámɔn kpɛ́bɛn, jiphúwo khwɛn mɛ́n ékɛ phɛli, ńkhwɛn mɛ́n jɛtɛn ɔ́nmɔn no ákhúbhɛ́ bɛn abha thwethwemɛn-áan. Lóne nɔn ńka phromɛn yítɛ́ hrómɛn, ló ńnɔ mɛ́n yí khúnbrɛn phu. 14Lóka ńnɔ lókhúnbrɛn phu, lótɛ áko khóo bɛn édi lóne khúbhɛ́ si khúnbrɛn, áchɛ́se ńnɛn égbɔ. 15Ńno anní júmán lóne khúbhɛ́ sɛ bɛn yé, ló nkɛ chɛ ńno nkɛ bithe ánbo ngbróko. 16Ánnɛn ngbróko nyámí antha, khɛ́n álepɛ lephan ese. 17Mɛ́n yí ńtɛ, ńchre anmú lóphɔ hɛ́nphe, ló ńtɔ mɛ́n hrómɛn mɛn sa: “Mɛn nthe hwan bháthó, júmánmán khúnbrɛn gɛ nɛnlí kábrɛ kábrɛ, ábhɛ́ wo. Lókhɛ́n mɛn-ɛ, áko ewɛ́n mɛn krɛn! 18Lóhɛ́nthé, mán saji nó mɛn nthe yé, ló mán krɛnmɛn lée: Thethe, mɛn tɛ ne Yankan hɛ́nmɛn, saji mɛn tɛ ne hɛ hɛ́nmɛn lɔ, 19ló áleyɔn salé ɛbhó mɛn tɛ́ hɛ bhi npɔhɔ́n, khɛ́n tɛmɛ ɛbhó mɛn tɛ́sa hɛ hwan júmánwo bɛn.” 20Ló ńsáji annó mɛ́n the yé.
Lóka ńma thwethwemɛn-áan anmá, lótɛ mɛ́n the wui: mɛ́n phɔ etɛ́ mɛ́n the nfɛkhu, ló nkɛ bha ywɛnli, nkɛ jui, ló nkɛ dɔn-ɛn mɛ́n. 21Ló yípɔ tɔ sa: “Thethe, mɛn tɛ ne hɛ le Yankan ɔ́nmɔn hɛ́nmɛn, lóhɛ́nthé, ɛlé cu bhó mɛn tɛ́ hɛ bhi npɔhɔ́n.” 22Khɛ́n mɛ́n the kranman mɛ́n nɛnkhwɛ́nmán lée: “Ɔ́n hɔn ntráliɛ́ thótho bhwábhwá bɛn ayɔn bha sɔ́-ɛ gbraa; ɔ́n hɛ ngbathibhá bɛn nkhwɛ, ló ɔ́n hɛ ngbawa lɔ nta. 23Ɔ́n hɔ́n ndwapɔ khóo bɛn áphɔ yɔn bhá, ɔ́n wɛn, ló olí nɛn áphɔhá mɛn. 24Lósi akhɔ tɛ ɔn, mɛn mi lókɔn aya, átɛsalé ńkhu, lókhɛ́n ńcu ma mɛpɔ́, ńnia lókhɛ́n mɛn cu gɛ.” Ló wo elí fɛ́thi áphɔhá mɛn.
25Lóka khúnbrɛn lókɔn, mɛ́n bhi sithwáwo-ɛ bha bithe ntɔ́nyán. Lóka ńchan bithe anmá khɛ́n ńgbali bháthó phu, lótɛ anyé ńsɛ́n le ábhi ɔ́nmɔn tɔ́. 26Ló ńche nɛnkhwɛ́nwo bɛn bha ló ánmi nkɛ lóyí etɛ́. 27Nɛnkhwɛ́nwo lókɔn kranman nkɛ sa: “Nkɛé hɛ hɔnsɛ́n saji bha, ló hɛ the wɛn ndwapɔ khóo bɛn áphɔ yɔn, mɛ́n bhi asáji bha mwámwá mɛn hɛ́nthé.” 28Lópán ńthɛ́nyan ka mɛ́n bhi sithwáwo hromɛn, ńnɛn pɔ sa anká bháthó, ló mɛ́n the thandi bha élɛ. 29Lóso ńtɔ se mɛ́n the sa: “Wu a, lócí-áan mɛn chan mɛn thán nɛn sé hɛ, álepɛ cí mɛn khrɛ hɛ bidí. Lótɛ khɛ́n álepɛ cí ɛhɔn ciɛ mi nwɛ́ bɛn se mɛn wɛn se mɛn jɔn, lókhɛ́n mɛn le wo ɔ́nmɔn lo pia. 30Lókhɛ́n hɛ bhi lókɔn ka asaji bha, mɛ́n lókɔn khɛ́n ńgɛ gbakhreyá ɔ́nmɔn nɔ hɛ yí khúnbrɛn phu ɔn, mɛ́n-ɛ nɔn ɛwɛn ndwapɔ khóo bɛn áphɔ yɔn se!” 31Ló mɛ́n the krɛnmɛn sa: “Mɛn mi, ácí khúnbrɛn ɛbha mɛn phɔ, ló mɛn yí khúnbrɛn mɛn pɛ áli hɛ ékɛ. 32Khɛ́n áyɔn se salé lo lí fɛ́thi áphɔhá le áphɔkhwálé ɔ́nmɔn mɛn, átɛsalé hɛ hɔnsɛ́n lókɔn aya ɔn, ńkhu khɛ́n ńcu ma mɛpɔ́, ńnia khɛ́n mɛn cu gɛ.”
Currently Selected:
LWIKHI 15: ENT96
Highlight
Share
Copy
Want to have your highlights saved across all your devices? Sign up or sign in
Ebrié New Testament © Bible Society of Côte D'Ivoire, 1996.
