LWIKHI 14
14
Jezwi tɛ lɔ́phɔ́wo bɛn phɔ jan
1 Saba cí bɛn, Jezwi lo Fariziɛnnɛ́n-óthe bɛn hwan elí nɛn. Néphan akhwa lóne bho mɛbhí tre éwɛsɛ́ nkɛ. 2Lephan bɛn ahɔn lɔ, priman ya Jezwi hɛ́nmɛn. 3Jezwi bho bhwetɔ́, ló ńmi bidíyɛ́nmán le Fariziɛnnɛ́n ɔ́nmɔn sa:
– Wú lo bidí se mɔ́nsi salé saba ci, otɛ́ lephan phɔ jan, lée nka ále se mɔ́nsi?
4Khɛ́n wo le pɔ sa wo ká nkɛ mɛ́n. Jezwi pa lɔ́phɔ́wo lókɔn pɛ, ńtɛ nkɛ phɔ jan, ló ńchɛ nkɛ bhosi lo. 5Lómánji ńmi nkɔn sa:
– Hɔ́n hrómɛn, kasé saba cí, khɛ́n lephan bɛn, khɔ mɛ́n bhi sɛ o, khɔ mɛ́n ndwa o, ka ńdunɔn mɛn ɔn, wú anman nɛ́n hɔ́n nkɛ yɛn lóhrómɛn gbraa?
6Ló wo le wú lóbhwe wo gɛ tɔ sé nkɛ npɔhɔ́n.
Ńnɛn mɛ́n, lósi okhɔ́ do si, le lósi okhɔ́ che néphan bhá
7Jezwi éwɛsɛ́ lósi néphan odo bha nɛnlí khɔ édo ási mímí chré. Ló ńmu yandran lókɔn se wo khúnbrɛn sa:
8– Kasé lephan bɛn do hɛ lo mɛ́n khúchremɛ́n nɛnlí, ɛlé lo chré ási abha hɛ́nmɛn, kpɛnɛn khɛ́n néphan odo, wo hromɛn opɛ lephan bɛn aha ngu brɛn hɛ bháne. 9Kasé ɛle tɛ nɛn khɛ́n lephan ado hɔ́n bha ékranmán hɛ lée: “Féne se lephan lókɔn si.” Hɛ ka ɛbhá ló mánji-áan lo chré, hɛ́ndɛ bha ká hɛ mɛ. 10Lóhɛ́nthé lóka wo do hɛ bha nɛn mɛ́n, ɛlo chré ási abha mánji-áan, ochɛ́sé lephan khɛ́n ado hɛ, lóka ánman kranmán hɛ lée: “Mɛn jɔ, ti bha hɛ́nmɛn, bha chré ási mímí lókɔn.” Lótɛ néphan khúnbrɛn khɛ́n hɛ le wo ɔ́nmɔn ɔ́n khwa nɛn mɛ́n, wo hɛ́nmɛn ábha lí nguhá khóo sé hɛ. 11Átɛsalé, lephan tɛɛ ɛhɔ́n mɛ́n nbrɛn jetho ɔn, óbha sɛ́n nkɛ bha thé, ló lephan khɛ́n ehɔ́n mɛ́n nbrɛn bhá thé, óbha hɔ́n-ɛn jetho.
12Lómánji, Jezwi kranman sɛ khɛ́n ado-e lo nɛnlí lée:
– Kasé ɛsé néphan nɛn, khɔ ńcrɔ́n o, khɔ ńjuka o, ɛlé do hɛ jɔn bhwá, hɛ hɔnsɛ́nmánhɔn, hɛ mándonɛ́n le hɛ chrégbamán ɔ́nmɔn khɛ́n ali mringbilímán lɔ. Átɛsalé wo lɔ wo gɛ do hɛ lo sé nɛnlí, ló ábha tɛ́sa hɛ yí nɔn wo wrɔ se hɛ. 13Khɛ́n lóka ɛsé néphan nɛn fɛ́thi hromɛn ɔn, ɛdo gbremán, nɛnɛ-phɔmán, ntabhumán le mɛphumán ɔ́nmɔn. 14Lósi akhɔ tɛ ɔn, wo, wo bha lé gɛ tɛ́ lóyí yábhɛ lókɔn sé hɛ, lótɛ áphɔ bha khwá hɛ lé. Átɛsalé lóka néphan atɛ yíbhwá bha chán khúnɔn mɛn fe ɔn, óbha tɛ́ lóyí yábhɛ brɛ lókɔn sé hɛ.
Ńnɛn khóo ose néphan lóphɔ yandran obhu
(Ɔ́n wú Mat 22.1-10)
15Néphan akhwa nɛn mɛ́n ka aye ábhwe lókɔn, lótɛ wo hromɛn lephan bɛn kranman Jezwi sa:
– Lephan khɛ́n ábha lí nɛn Yankan Bhringbi khúbhɛ́, lephan lókɔn áphɔ khwɛ lé!
16Ló Jezwi tɔ yandran bhwe lókɔn se nkɛ sa:
– Lephan bɛn se néphan nɛn khóo bɛn, ló ńdo néphan búdúbúdú. 17Lóka áya nɛnlí ka, ńchɛ mɛ́n nɛnkhwɛ́nwo olo kranmán néphan ńdo salé: “Ńthé wo tɛ nɛn phu, wo éche hɔ́n.” 18Wo khúnbrɛn wo éla nkɛ brɛ brɛ mɛn salé wo bha lé gɛ bhá. Sithwáwo kranman nɛnkhwɛ́nwo sa: “Mɛn phɛ bithe bɛn, énɛn salé mɛn no wú lóhrómɛn, lóhɛ́nthé mɛɛ́n na hɛ salé ɛsé mɛn mɔ́nsi kpɛ.” 19Lójɔ kranman nkɛ sa: “Mɛn phɛ ndwa mɔ́nmɔn ɔɔ, ńdɔn mwannán, mɛɛ́n no sé wo lí júmán sé mɛn wú, lóhɛ́nthé mɛɛ́n na hɛ salé ɛsé mɛn mɔ́nsi kpɛ.” 20Lójɔ bɛn cu kranman nkɛ sa: “Npi tɛɛ nɔn mɛn phɛn bhie, lóhɛ́nthé mɛn man nɛ́n gɛ má.” 21Nɛnkhwɛ́nwo saji lo lɛ lóbhwe mɛ́n khúnbrɛn lókɔn se mɛ́n hwánthe ye. Lótɛ ábháthó-óthe thɛ́nyan ka hromɛn, ló ńkránman mɛ́n nɛnkhwɛ́nwo sa: “Wa lo bhácathé lo do gbremán, nɛnɛ-phɔmán, mɛphumán le ntabhumán ɔ́nmɔn bhá krɛn gbraa.” 22Ámɔn kpɛ́bɛn, lótɛ nɛnkhwɛ́nwo saji bha étɔ sa: “Hwánthe, hɛ yí ɛchɛ mɛn ɔn, mɛn tɛ lóyí phu, lókhɛ́n ási cu ka npɔ tɛɛ.” 23Ló hwánthe kranman mɛ́n nɛnkhwɛ́nwo sa: “Ɛló ábithe sitó hrómɛn dɔndɔn, ɛkhɔ́ nphá jɛ́ njɛ lɔ, ló néphan tɛɛ ɛgɛ, ɛtɛ́ khékhremɛn do wo ɔ́nmɔn bhá, ló mɛn bháthó khúnbrɛn osí. 24Mɛɛ́n kranmán hɔ́n lée: néphan khúnbrɛn lókɔn tɛɛ khɛ́n ophrɛ che ɔn, wo hromɛn álepɛ brɛ ábha lá mɛn nɛn lɛ́!”
Áyí otɛ́ khɛ́n olí yíchwɛ́wo
(Ɔ́n wú Mat 10.37-38)
25Ápasá bhróbhrobhé gɛ Jezwi ɔ́nmɔn bho sitó pɛ élo. Jezwi saya, ló ńkránman nkɔn sa:
26– Kasé lephan ebhá mɛn yé, khɛ́n ńnɛn yɔ mɛ́n the, mɛ́n man, mɛ́n bhia, mɛ́n miɔn le mɛ́n hɔnsɛ́nhɔn ɔ́nmɔn khwa, kasé ńnɛn yɔ mɛ́n bɛn nbrɛn lɔ, anman nɛ́n gɛ ní mɛn yíchwɛ́wo. 27Ló saji lephan khɛ́n abha le hɔ́n mɛ́n yábhletre gɛ mɛn thá, lephan lókɔn, mɛ́n lɔ, anman nɛ́n ní mɛn yíchwɛ́wo. 28Hɔ́n hrómɛn, kasé lephan bɛn énɛn athán nkhú, nkɛé ché anchéthé, anyɛ́n lójɛ ábha lí, kasé mɛ́n jɛtɛn ńpɛ ágɛ thán ńkhú lókɔn phú lɔ anwú. 29Kasé ńnɛn tɛ nɛn, ńdi nkhú lé lókhɛ́n ńnɛn than phu, néphan khɛ́n ábha wú nkhú lókɔn, wo hɛ́nmɛn, ábha jrɛn áliaha. 30Ló wo bhá tɔ sa: “Nɛn lephan bɛn ale di nkhú thán lɔ khɛ́n abha nkhú thán.” 31Lóyábhɛ brɛ, kasé ákhúbhɛ́-óthe khóo bɛn énɛn agɛ ákhúbhɛ́-óthe khóo lójɔ nankhɛ ɔ́nmɔn kútha, anchéthé, ánwɛsɛ wú kasé mɛ́n le mɛ́n ngbumán akpɛn-wɔ́ ɔ́nmɔn wo bhá gɛ́ gɛ ákhúbhɛ́-óthe ali mɛ́n mɛsawo khɛ́n ado ngbumán akpɛn akpɛn ɔ́nmɔn ebhá tha lɔ anwú. 32Kasé anman nɛ́n gɛ kú lótha lókɔn, anchɛ́ néphan ló ákhúbhɛ́-óthe lójɔ abha hɛ́nmɛn-áan ebhá nta tho, sa nkɔn bhi nkɛ, lóyí nkɛ pɔ sa mɛ́n tɛ́ khɛ́n wo le kútha lókɔn. 33Lóhɛ́nthé nɔn Jezwi cu tɔ sa, hɔ́n hrómɛn, lephan ale yɔ mɛ́n yí khúnbrɛn ńpɛ khwalé, anman nɛ́n gɛ ní mɛn yíchwɛ́wo.
Ńniɛ khɛ́n ale yɔn se yíɛkɛ
(Ɔ́n wú Mat 5.13; Ɔ́n wú Mák 9.50)
34– Ńniɛ li yíbhwá. Khɛ́n kasé áyí ániman abha lóhrómɛn ásɛ khwa, ébí óbha tɛ́ háne khɛ́n ábha cu niman npɔ ɛ? 35Óle gɛ bhó tɛ́ yíɛkɛ, áyíta lɔ ńnɛn yɔn se, ábhɔ lɔ ńnɛn yɔn se, ohɔ́n fɔ́nká ngbophro pán. Kasé ɔ́n pɛ njɛ áyé bhwe, tɛmɛ ɔ́n yé mwámwá!
Currently Selected:
LWIKHI 14: ENT96
Highlight
Share
Copy
Want to have your highlights saved across all your devices? Sign up or sign in
Ebrié New Testament © Bible Society of Côte D'Ivoire, 1996.
