LWIKHI 13
13
Ɔ́n jrɛn hɔ́n yítɛ́ ló ɔ́n má mɛpɔ́
1Lóka hromɛn nɔn, néphan dɔnbɛn bha élɛ mɛ́n sé Jezwi yé salé, Galile khúbhɛ́nɛ́n dɔnbɛn lo éha npha sé Yankan, lókhɛ́n Piláthi chɛ wo wɛn nkɔn, nkɔn nphaha tho. 2Ló Jezwi bhi nkɔn sa:
– Wú hɔ́n ebhú salé Galile khúbhɛ́nɛ́n lókɔn owɛn ɔn, wo nɔn wo tɛ ne thúbhɔ brɛn Galile khúbhɛ́nɛ́n nánkhɛ khúnbrɛn, lónɔn achɛ wo khu npasá mɛn yábhɛ nɛn? 3Mɛɛ́n kranmán hɔ́n, léliló; lókhɛ́n kasé ɔ́n ne jrɛn hɔ́n yítɛ́, hɔ́n khúnbrɛn lɔ, ɔ́n ma khú sa wo a. 4Wú hɔ́n ebhú salé néphan hɛ́n áwɔ́-bhia khɛ́n Siloe nkhú thótho khóo bhú srɛn wɛn ɔn, wo nɔn wo tɛ ne thúbhɔ brɛn Jeruzalɛ́mɛn khúbhɛ́nɛ́n, lónɔn achɛ wo khu ákhú yábhɛ lókɔn? 5Mɛɛ́n kranmán hɔ́n salé, léliló; lókhɛ́n kasé ɔ́n ne jrɛn hɔ́n yítɛ́, hɔ́n khúnbrɛn lɔ, ɔ́n ma khú sa wo a.
Fígeyá khɛ́n ále sómí, mɛ́n phɔ yandran obhu
6Lómánji Jezwi bhu yandran lókɔn se wo sa:
– Sɛ bɛn ha fígeyá tre mɛ́n divɛn-nyá gɔn hromɛn. Ńma ánbwan fíge mí, khɛ́n álepɛ brɛ ńgɛ lótho. 7Ló ńkránman divɛn-nyá gɔn júmánwo salé: “Wu a: ncɛ́n etɛ́ npá bɛn nbrɛn bhwaliá nɔn mɛn ma mɛɛ́n bwan fíge mí, lókhɛ́n mɛn nɛn gɛ ńmí brɛ fígeyá lókɔn tho bhrɔ́ɔ́. Tɛmɛ ɛkɔ́ halé! Fígeyá lókɔn do si ya wɛ́-nwɛ́ pán.” 8Khɛ́n divɛn-nyá gɔn júmánwo tɔ sa: “Hwánthe, yɔ otré ápá bɛn npɔ se owú khɛ́n, mán mɔ lójɛ́ njɛ, mán cɔ tɛ́, ló man há ábhɔ lóhɛ́n. 9Ápá lójɔ khɔ osómí o, khɛ́n kasé ále so, ló ɛ́bha chɛ́ okɔ́ há.”
Jezwi tɛ lɛnɛ-phɔ́ya bɛn phɔ jan, saba cí
10 Saba cí bɛn, Jezwi élie yí hɛ́nbhúrɛ sibɛn. 11Bhie bɛn álɔ́ bha phɔ lɔ bha lóne: bhie lókɔn, nánnánmi phromɛn bɛn bha mɛ́n phɔ, nkɛ tɛ ńkhráman, ló ánnɛn gɛ nyali bhrɔ́ɔ́, etɛ́ ńpá áwɔ́-bhia nbrɛn-áan nɔn ali lókɔn. 12Jezwi ka awu nkɛ, ńche nkɛ, ló ńtɔ sa:
– Bhie bhwá, wo swa hɛ yɛn hɛ lɔ́ hrómɛn.
13Ńmo mɔ́n tre nkɛ tho, lóyámɛ́n, mɛ́n phɔ jan, ló ánnri Yankan hwa. 14Lephan phɔ khɛ́n Jezwi tɛ jan saba cí hɛ́nthé, ńthɛ́nyan ka hɛ́nbhúrɛ si bhrɔ́khó hrómɛn, ló ánkranmán ápasá salé:
– Ose hɔ́n ncíbhí brɛ brɛ ákhwá ɔ́n mó lí júmán, lóka nɔn ayɔn se sa ɔ́n ma sé otɛ́ hɔ́n phɔ jan, lókhɛ́n ɔ́n ne bo saba cí khɛ́n ɔ́n má!
15Ló Hwánthe kranman nkɛ sa:
– Ńmɛ́n mɔ́nmɔnmán! Hɔ́n hrómɛn, khɔ́ saba cí, néphan bháne áló kɔ mɛn lo hrwɛn wo bran, khɔ ndwa o, khɔ frímú o, ló wo khwɛ́n nkɔn lo sé wo ndu wo nán, léliló? 16Ákha bhie lókɔn achan Ábrahámɛn mándo hromɛn, khɛ́n Abhɔsɛ́mɔ́n gɛ mɛ́ tre ńpá áwɔ́-bhia nbrɛn-áan, wú áleyɔn salé saba cí, oswa nkɛ yɛn ńmɛ́ lókɔn hromɛn?
17Jezwi ka atɔ bhwe lókɔn tɛɛ, hɛ́ndɛ ka mɛ́n mɛsamán khúnbrɛn mɛ, khɛ́n ápasá khúnbrɛn-ɛ elí phɔhá, mɛ́n yí mwámwá antɛ́ hɛ́nthé.
Mutáde mí phɔ yandran obhu
(Ɔ́n wú Mat 13.31-32; Ɔ́n wú Mák 4.30-32)
18Lómánji Jezwi tɔ sa:
– Ébí nɔn Yankan Bhringbi khúbhɛ́ khɔ ɛ? Ébí nɔn mán gɛ mó thweli ɛ? 19Átɛsa ńyámí bɛn óche mutáde, khɛ́n lephan bɛn bho ha mɛ́n gɔn: ále, ájrɛn áyá khóo, ló ńkɔ́cran bha than wo nkhú tré lóncɛn tho.
Mányan phɔ yandran obhu
(Ɔ́n wú Mat 13.33)
20Ló ńcu tɔ sa:
– Ébí nɔn mán gɛ mó Yankan Bhringbi khúbhɛ́ thweli npɔ ɛ? 21Yankan Bhringbi khúbhɛ́ khɔ mányan khɛ́n bhie bɛn khwɛn khrɛ mɛ́n nbɛdɛ khilo áphɛn le mwannán ɔ́nmɔn hrómɛn, átré ɔɔ, ló áchɛ́ nbɛdɛ khúnbrɛn yán phú.
Ákhúmɛ́n phíphi bhri
(Ɔ́n wú Mat 7.13-14,21-23)
22Jezwi sa hɛ́nmɛn tre eló Jeruzalɛ́mɛn, ńmúrikhɔ ákhúbhɛ́ khónkhó le ákhúbhɛ́ chɛ́-nchɛ́ ɔ́nmɔn hrómɛn ánnie yí ɔ́nmɔn no. 23Lephan bɛn bhi nkɛ sa:
– Hwánthe, wú néphan kpɛ́bɛn pán nɔn wo bhá swa?
Ló Jezwi kranman nkɔn sa:
24– Ɔ́n tɛ́ khékhremɛn khɔ́ ákhúmɛ́n bhri, mɛɛ́n kranmán hɔ́n, néphan búdúbúdú bha nɛn salé wo khɔ́ ákhúmɛ́n lókɔn, khɛ́n wo bha lé gɛ lóphɔ mɔ́nsi.
25– Lóka ábháthó-óthe bha chánfe hɔ́n si tɔ́n, ɔ́n ma ya ngbophro, ɔ́n ma há gbo, ló ɔ́n ma lúkhwɛ́ tɔ sa: “Hwánthe, Hwánthe, phwan lo si.” Khɛ́n ánman tɔlé: “Mɛn nɛn yɛn hɔ́n si ɔ́n chan!” 26Lótɛ ɔ́n ma tɔ sa: “Nkɛé lo le hɛ ɔ́nmɔn oli nɛn, onan ndu, nkɛé lo khúbhɛ́ bháca ɛya lie yí.” 27Mɛ́n bhwe ánman cu kranmán hɔ́n nɔn ali salé: “Mɛn nɛn yɛn hɔ́n si ɔ́n chan. Hɔ́n, yíléletɛ́mán khúnbrɛn lókɔn, ɔ́n féne mɛn hɛ́nmɛn!” 28Lóka hɔ́n ma wú hɔ́n jisɛmánhɔn ali Ábrahámɛn, Izakhi, Jakɔ́phu le bhwetɔ́trémán ɔ́nmɔn chre Yankan Bhringbi khúbhɛ́, khɛ́n hɔ́n-ɛ óbha tranmán hɔ́n khwá ngbophro ɔn, lóne nɔn ɔ́n ma thɔ́n hɛ́ndu, ló ɔ́n ma chrui nɔ́thá! 29Néphan bha chán áliémɔn, ámránkhu le mánji ɔ́nmɔn bhá, ló wo bhá khwá Yankan Bhringbi khúbhɛ nɛn mɛ́n. 30Élie salé, néphan fe khɛ́n thénthé aphuji ɔn, wo nɔn wo bhá sa thwási, ló wo khɛ́n thénthé wo li sithwámán ɔn, wo nɔn wo bhá sa phúji.
Jezwi le Jeruzalɛ́mɛn
(Ɔ́n wú Mat 23.37-39)
31Lóka lókɔn nɔn Fariziɛnnɛ́n mɔ́nbɛn tigbali Jezwi, ló wo ékranmán nkɛ sa:
– Chan krɛn fe, ló ɛló si nankhɛ, átɛsalé Erɔde énɛn hɛ wɛ́n si.
32Lótɛ Jezwi kranman nkɔn sa:
– Ɔ́n no kranmán ákrɛ́ lókɔn salé: “Ncɛ́n le npi ɔ́nmɔn, mɛɛ́n tranmán nánnánmi phromɛn phromɛnhɔn, mɛn tɛ́ néphan phɔ jan, ló ńcíbhí bhwaliá hrómɛn, mɛn júmán bha phú.” 33Khɛ́n áyɔn se mɛn hɔ́n mɛn júmán pɛ ní ɔ́nmɔn no, ncɛ́n npi le ácíhɔn abha hɛ́nmɛn hromɛn lɔ. Átɛsalé bhwetɔ́tréwo le gɛ yɔ́ Jeruzalɛ́mɛn ká ló ási nankhɛ lo khú.
34“Jeruzalɛ́mɛn, Jeruzalɛ́mɛn, hɛ khɛ́n ɛwɛ́n bhwetɔ́trémán, ló néphan khɛ́n Yankan chɛ bha hɛ yé, ɛkúmú dia wo wɛ́n. Mɛn pɔ salé mɛɛ́n gba hɛ khúbhɛ́nɛ́n murɛhɛ́n mɛn phɔ, sa lósi kɔsɔ bhie khɔ́ bhurɛ mɛ́n miɔn hɛ́n mɛ́n nphrɛ́mɔn thé. Mɛn tɛ lóyí lókɔn ńdɔn búdúbúdú, lótɛ khɛ́n ɔ́n ne dɛn bhrɔ́ɔ́! 35Lóhɛ́nthé! óbha yɔ́ hɔ́n bháthó ká. Mɛɛ́n kranmán hɔ́n gbée salé: ɔ́n ma lé cu wú mɛn npɔhɔ́n kábrɛ kábrɛ ábha di lóka ɔ́n ma tɔ salé: ‘Tɛmɛ Yankan obhɔ́ lephan ebhá Hwánthe hɛ́n hrómɛn ndu!’ ”
Currently Selected:
LWIKHI 13: ENT96
Highlight
Share
Copy
Want to have your highlights saved across all your devices? Sign up or sign in
Ebrié New Testament © Bible Society of Côte D'Ivoire, 1996.
