LWIKHI 12
12
Ńmɛ́n mɔ́nmɔn ópɛ, ohá lóphɔ mwanhɛ́n
(Ɔ́n wú Mat 10.26-27)
1Lóka yábhɛ lókɔn, néphan akpɛn akpɛn gba bhurɛhɛ́n, wo phigɛ kpɛ́ɛ́n, áchɛ́se wo énɛn wo cha wo bɛn nbrɛn há yítathé. Jezwi phrɛ kranman mɛ́n yíchwɛmán sa:
– Ɔ́n há Fariziɛnnɛ́n mányan phɔ mwanhɛ́n, ali wo mɛ́n mɔ́nmɔn wo pɛ. 2Cíbɛn, áyí khɛ́n ahrɔman tre bha phwanká nphrámɛn, ló néphan bha yɛ́n áyí khúnbrɛn abha kpɔ́thé tre. 3Lóhɛ́nthé, ábhwe khúnbrɛn khɛ́n ɔ́n ma tɔ dubhlékhu hromɛn ɔn, néphan bha yé lóbhwe ńcrɔ́n cí, ló saji ábhwe khúnbrɛn khɛ́n ɔ́n ma lá lɛ́thé tɔ ákhúthé hrómɛn há lephan nankhɛ njɛ mɛn, ábhwe lókɔn ɔn, ńkhú tho nɔn wo bhá ya lúkhwɛ́ tɔ.
Lephan khɛ́n ayɔn se osó
(Ɔ́n wú Mat 10.28-31)
4– Hɔ́n khɛ́n ɔ́n ni mɛn jɔn bhwá, mɛɛ́n kranmán hɔ́n salé: ɔ́n ne só néphan awɛ́n lephan nánmí, khɛ́n lómánji ále gɛ tɛ́ yíɛkɛ npɔhɔ́n. 5Ńthé mɛn mán nie hɔ́n lephan ayɔn se salé ɔ́n só: ɔ́n só Yankan, átɛsalé mɛ́n kasé ńwɛn lephan, ńpɛ mɔ́nsi anhɔ́n nkɛ ká ágbrelí si. Ee, Yankan nɔn mɛɛ́n kranmán hɔ́n lée ɔ́n só!
6“Ńkɔ́cran khɛ́n óche ngbi ɔn, wú léli kɔphrɛchí mɔn tɛɛ obhó phɛ́ wo hɛ́n mwannán? Lótɛ khɛ́n brɛ bhwe lé lialí Yankan bhrɔ́ɔ́. 7Hɔ́n hɛ́nyro nwɛ́ abha hɔ́n hɛ́nthé lɔ, Yankan yɛn lómɛ́n. Ɔ́n ne sókhú a, hɔ́n jɛ khɔnman brɛn ngbi jɛ!”
Jezwi-Krisi si okhɔ́ yɛ́n le lósi okhɔ́ samɛ́n lée ole yɛn
(Ɔ́n wú Mat 10.32-33; 12.32; 10.19-20)
8– Mɛɛ́n kranmán hɔ́n salé: lephan khɛ́n ábha ya ápasá hɛ́nmɛn tɔ gbée salé mɛn ni mɛ́n lephan ɔn, lephan lókɔn, Lephan Mi lɔ bha ya Yankan-mranchɛ́mán hɛ́nmɛn tɔ gbée salé, mɛ́n lɔ ńni mɛn lephan. 9Khɛ́n lephan ábha ya ápasá hɛ́nmɛn tɔ mɛ́n khrákhrá mɛn salé mɛ́n nɛ́n yɛn mɛn, hɛ lephan lókɔn, Lephan Mi lɔ bha ya Yankan-mranchɛ́mán hɛ́nmɛn tɔ mɛ́n khrákhrá mɛn salé mɛ́n nɛ́n yɛn nkɛ.
10Lephan khɛ́n ábha tɔ bhwe phromɛn sé Lephan Mi, wo bhá yɔ́phɔ-ɛ, khɛ́n lephan ábha tɔ bhwe phromɛn sé Nánnánmi Créncré, mɛ́n wo bha lé yɔ́phɔ́ nkɛ bhrɔ́ɔ́.
11– Kasé wo khwɛn hɔ́n lo ákwabhɔ́ mɛ́n, khɔ hɛ́nbhúrɛ si o, khɔ ákhúbhɛ́-óthemánhɔn hɛ́nmɛn o, khɔ athemánhɔn hɛ́nmɛn o, lósi ɔ́n ma khɔ́ tɔ bhwe do hɔ́n nbrɛn ká, ɔ́n ne bhu lóphɔ mwanhɛ́n, saji ɔ́n ne nɛn hɔ́n bhwe khɛ́n ɔ́n ma tɔ lɔ tré, 12átɛsalé lóka yábhɛ brɛ nɔn, Nánnánmi Créncré bha lie hɔ́n ábhwe ayɔn se salé ɔ́n tɔ.
Bhringbi gbwɛwo bɛn phɔ yandran obhu
13Ló lephan bɛn ya ápasá hrómɛn kranman Jezwi sa:
– Yíliéwo, tɛmɛ ɛchɛ́ mɛn hɔnsɛ́n okhwɛ́n lo the jayí ayɔ khwa lo lé bhá olwa.
14Ló Jezwi kranman nkɛ sa:
– Sɛ bhwá, abɛn san mɛn tre salé mɛn mɔ́ hɔ́n thethé kwa, ló mɛn nwa hɔ́n jayí sé hɔ́n ɛ?
15Lómánji ńtɔ se néphan khúnbrɛn sa:
– Ɔ́n bo hɔ́n bɛn nbrɛn, ló ɔ́n há bhringbilí ánimán lephan bánban phɔ mwanhɛ́n, lée lephan, kasé bhringbi khóo ɛli lɔ, hɛ mɛpɔ́bhá mímí le bha hɛ yí khóo ɛpɛ hromɛn.
16Ló ńya lótho mu yandran lókɔn se nkɔn sa:
– Bhringbi bɛn pɛ gɔn bɛn, áyí yɔ́n lóhrómɛn kábrɛ. 17Ńmu hɛ́nphe, ló ńtɔ mɛ́n hrómɛn mɛn sa: “Bíyí nɔn mán tɛ́ ɛ? Khɔ́ mɛn nɛn pɛ si man tré mɛn nyámí khúnbrɛn lé a.” 18Ló ńcu tɔ sa: “Thénthé mɛn yɛn lóyí mán tɛ́: mán ca mɛn nɛnlí kɔ khwá, mán thán lókhónkhó nánkhɛ, mán khwɛ́n mɛn ble le mɛn yí nánkhɛ khúnbrɛn ɔ́nmɔn há lóhrómɛn. 19Lómánji, mɛn mán kranmán mɛn hɛ́nfan lée: Mɛn hɛ́nfan, hɛ nɛn khɛ́n atre ɛbhá lí ɔn, áthúbhɔ, ábha tré sé ápá búdúbúdú. Tɛmɛ ɛfikhwá, ɛlí, ɛnán, ló áphɔ ohá hɛ.” 20Khɛ́n Yankan krɛnmɛn sa: “Gbwɛwo! Ncɛ́n mréci brɛ, hɛ mɛpɔ́bhá bha phú. Ńthé hɛ yí khúnbrɛn lókɔn ɛgba tre hɛ nbrɛn lé ɔn, abɛn nɔn ábha khwɛ́n ɛ?”
21Ló Jezwi cu tɔ sa:
– Lephan khɛ́n ábha gba ajayí sé mɛ́n bɛn nbrɛn, khɛ́n abha lé lí bhringbi sé Yankan ɔn, mɛ́n yí óbha tɛ́ nɔn ali lókɔn.
Tɛmɛ opɛ mwasrui bhá Yankan tho
(Ɔ́n wú Mat 6.25-34)
22Lómánji Jezwi kranman mɛ́n yíchwɛmán sa:
– Lóhɛ́nthé nɔn achɛ mɛɛ́n kranmán hɔ́n salé: Hɔ́n nɛn ɔ́n ma gɛ lí khɛ́n ɔ́n ma bhá mɛpɔ́, le hɔ́n dɛgɔn ɔ́n ma gɛ mrwɛn hɔ́n phɔ nánmí, lóhɛ́nthé ɔ́n ne tɛ́ dandan. 23Átɛsalé ńmɛpɔ́bhá bhwe banbrɛn ńnɛn olí, ló áphɔ nánmí bhwe lɔ yɔn brɛn ádɛgɔn ókhwa. 24Ɔ́n gbɛnɛn wu ńkákájɔnmánkɛ a: wo lé ha nyámí lɔ, saji wo lé bhú nyámí lɔ, wo le pɛ ńgɔn nkhú lɔ, ákɔ lɔ wo le pɛ, lótɛ khɛ́n Yankan sé wo nɛn wo lí! Hɔ́n jɛ khɔ́nman brɛn ńkɔ́cran jɛ! 25Hɔ́n hrómɛn, abɛn nɔn ábha khɔ́ mɛ́n mwanhɛ́nbhu dɔndɔn hromɛn chɛ́ mɛ́n mɛpɔ́bhá cí bhɔ́tho háne npɔ ɛ? 26Khɔ́ áyí phɛ́phrɛ bhrií hrómɛn-ɛ nɔn ɔ́n ne gɛ tɛ́ yíɛkɛ o, ló bítɛ khɛ́n áyí nánkhɛ akha hɛ́nthé, hɔ́n etɛ́ dandan ɛ? 27Ɔ́n gbɛnɛn wu ńbi nánnan abha gɔn a: wo le lí júmán, saji wo le thán dɛgɔn lɔ, lótɛ khɛ́n mɛɛ́n kranmán hɔ́n salé, Salomɔn bhwá nbrɛn lɔ, mɛ́n bhringbilí khúnbrɛn hrómɛn, ńnɛn pɛ dɛgɔn ayɔn brɛn ńbi nánnan brɛ lókɔn bhrɔ́ɔ́. 28Ńbi wɛ́-nwɛ́ abha bithe tre ncɛ́n, khɛ́n npi óbha jan fɔ́nká tɛn hromɛn: kasé Yankan khwa nkɛ dɛgɔn, wú hɔ́n-ɛ nɔn anman nɛ́n khwa hɔ́n dɛgɔn bánbrɛn nɛn! Ɔ́n wu lósi hɔ́n mímíbhú khɔ cha! 29Ɔ́n ne chré lí gbre ákakhúnbrɛn nɛn hɔ́n yí ɔ́n ma lí le hɔ́n yí ɔ́n ma nán. 30Áthéjinɛ́n lókɔn khɛ́n ale yɛn Yankan ɔn, wo nɔn ákakhúnbrɛn wo ya wo énɛn lóyí lókɔnhɔn. Khɛ́n hɔ́n The ɔ́n pɛ, mɛ́n-ɛ ńyɛn salé hɔ́n énɛn áyí khúnbrɛn lókɔn. 31Tɛmɛ Yankan Bhringbi khúbhɛ́ bhwe olí hɔ́n thɛ́n, khɛ́n lómánji Yankan bha bhó áyí khúnbrɛn akha bhɔ́tho sé hɔ́n.
Áyɔn sa opɛ ajayí tré átho
(Ɔ́n wú Mat 6.19-21)
32– Ɛle sókhú, hɛ ɔn, ɛtɛsa ńgbankhran go bhri bɛn a! Áníman hɔ́n The salé anmó Yankan-Bhringbi khúbhɛ́ sé hɔ́n. 33Ɔ́n khwɛ́n hɔ́n yí ɔ́n pɛ phɛ́lí, ló ɔ́n khwɛ́n lójɛtɛn ɔ́n gɛ pɔ́ gbremán. Tɛmɛ ɔ́n fɛ́n khwɛbhí khɛ́n ále gɛ lɔ; tɛmɛ ɔ́n gba hɔ́n jayí tré átho. Lóne ɔn, hɔ́n jayí bha le liá, saji sídomán lɔ bha lé gɛ gbisi phwan khwɛ́n sído, ló ńdrwan bha lé gɛ tha. 34Átɛsalé lósi khɛ́n hɔ́n jayí tre ɔn, lóne nɔn hɔ́n thɛ́n lɔ tré.
Áyɔn sa nɛnkhwɛ́nmán oká mɛlé bosi
35– Tɛmɛ ɔ́n tí hɔ́n kpakpa mɔ́n thé kpɛ́ɛ́n, hɔ́n khanniɛn lɔ otɔ́ tré, ló ɔ́n mraya ɔ́n ma lí júmán. 36Ɔ́n tɛ́sa nɛnkhwɛ́nmán khɛ́n ébo wo Hwánthe ka ábha chán ákhúchre gɔn bhá, khɛ́n wo bhá phwan nkɛ si, lóka nkɛ há gbo. 37Nɛnkhwɛ́nmán lókɔn, kasé wo hwánthe bha, khɛ́n ńgɛ nkɔn kamɛlé chre, áphɔ khwa wo lé! Mímí mɛɛ́n kranmán hɔ́n: ánman tí mɛ́n kpakpa mɔ́n thé, ánman chɛ́ nkɔn khwá tábrɛ mɛ́n, ló ánman khwɛn nɛn sé nkɔn lí. 38Kasé ácí bhúri mɔn, kasé ácí bhúri mɔn bhɔ́tho khɛ́n ńma gɛ nkɔn kamɛlé chre, nɛnkhwɛ́nmán lókɔn ɔn, áphɔ khwa wo lé! 39Kasé ábháthó-óthe yɛ́n lówáchɛn mɛ́n khɛ́n sídowo bha bhó bhá mɛ́n hwan, anman nɛ́n dɛn nkɛ ká bháthó. 40Hɔ́n lɔ, tɛmɛ ɔ́n haphɔ chré, átɛsalé Lephan Mi bha bhó áka yábhɛ khɛ́n ɔ́n ma lé hámwanhɛ́n bhá.
Nɛnkhwɛ́nwo alí mɛ́nbrɛ le nɛnkhwɛ́nwo álelí mɛ́nbrɛ
(Ɔ́n wú Mat 24.45-51)
41Ló Piɛ bhi Jezwi lée:
– Hwánthe, wú lo pán nɔn ɛbhú yandran lókɔn sé lo, lée nka ɛbhú sé néphan nankhɛ lɔ?
42Ló Hwánthe tɔ sa:
– Nɛnkhwɛ́nwo alí mɛ́nbrɛ, khɛ́n apɛ bhweyɛ́n nɔn ali lóbɛn ɛ? Nɛnkhwɛ́nwo lókɔn ɔn, mɛ́n nɔn ńni lephan khɛ́n mɛ́n hwánthe khwɛn mɛ́n bháthó yí khúnbrɛn ha nkɛ mɔ́n mɛn, ló lóka ádi nɛnlí ka, nkɛ lwa nɛn sé nkɛ jɔn nɛnkhwɛ́nmán nánkhɛ khúnbrɛn. 43Kasé hwánthe ka asaji bha mɛ́n hwan, khɛ́n ńgɛ nkɛ ya nkɛ júmán tho, nɛnkhwɛ́nwo lókɔn ɔn, áphɔ khwɛ lé ! 44Mímí mɛɛ́n kranmán hɔ́n: hwánthe bha khwɛ́n mɛ́n bháthó yí khúnbrɛn há nkɛ mɔ́n mɛn. 45Khɛ́n kasé nɛnkhwɛ́nwo lókɔn étɔ mɛ́n hrómɛn mɛn sa: “Mɛn hwánthe ebhá mɔ́n”, ló ńdɛn ka nɛnkhwɛ́nmán le nɛnkhwɛ́nyá ɔ́nmɔn phɔ ánchrwa, kasé ankhwɛ́n nɛn ní, khɛ́n annán ndɛ kui ɔn, 46ácí khɛ́n anman nɛ́n hámwanhɛ́n bhrɔ́ɔ́ le wáchɛn mɛ́n khɛ́n ńnɛn yɛn, lóka nɔn mɛ́n hwánthe bha bhó nkɛ tho. Ló nkɛ bhá tɛ́ yí dri phɔ kpɛ́ɛ́n, ábha tɛ́sa ló otɛ́ néphan ále ji Yankan a.
47Nɛnkhwɛ́nwo ayɛn mɛ́n hwánthe yí énɛn, khɛ́n ánnɛn tɛ́, saji nɛnkhwɛ́nwo ále tɛ́ mɛ́n hwánthe yí apɔ ɔn, mɛ́n lókɔn wo bhá bhrɛ mɛ́ búdúbúdú. 48Lókhɛ́n nɛnkhwɛ́nwo ale yɛn mɛ́n hwánthe yí apɔ, khɛ́n atɛ áyí adi chrwá, mɛ́n lókɔn, wo bhá bhrɛ mɛ́ kpɛɛ́. Lephan khɛ́n ose yí bhrobhrobhé ɔn, mɛ́n yé nɔn óbhi yí búdúbúdú, khɛ́n mɛ́n okhwɛn yí búdúbúdú ha mɛ́n mɔ́n mɛn ɔn, mɛ́n yé óbha bhi yí bhɔ́tho.
Jezwi hɛ́nthé, néphan bhuriya dɔndɔn
(Ɔ́n wú Mat 10.34-36)
49– Mɛn mán mó átɛn sɔ́ áyítathé, ló mɛɛ́n nɛn salé othɔ́n gbraa! 50Áyɔn salé ohá mɛn nduhɛ́n. Kasé ále ka tɛ, mɛn phɔ bha le khwá! 51Ka hɔ́n ebhú salé mɛn ma mɛn chɛ́ ńthɛ́nkhwálé ká áthéji? Léliló, khɛ́n mɛɛ́n kranmán hɔ́n salé ábhúríya nɔn mɛn sranman. 52Achan ncɛ́n élo, néphan mwannán khɛ́n abha bháthó brɛ, wo bhá ya wo thethé bhuri. Bhwaliá bha sa mɔn mɛ, ló mɔn lɔ bha sa bhwaliá mɛ. 53Nthe bha sa mɛ́n bhi sɛ mɛ, ló nmi sɛ lɔ bha sa mɛ́n the mɛ, nman bha sa mɛ́n bhi bhie mɛ, ló nmi bhie lɔ bha sa mɛ́n man mɛ, sɛ man bha sa mɛ́n bhi mia mɛ, ló sɛ mia lɔ bha sa mɛ́n ca man mɛ.
Tɛmɛ ɔ́n yɛ́n ácíhɔn phɔ bhwe thé
(Ɔ́n wú Mat 16.2-3)
54Ló Jezwi cu tɔ se ápasá sa:
– Lóka ɔ́n wu átho bhie tre, lóyámɛ́n tɛɛ ɔ́n tɔlé: “Átho ndu ebhá khwálé”, ló ápriman khwálé tɛɛ. 55Lóka áwá phɛ́phrɛ ehɛ́n hɔ́n phɔ, ɔ́n yɛ́n salé: “Áyé ebhá wɛ́”, ló ápriman tɛ́ nɛn tɛɛ. 56Ńmɛ́n mɔ́nmɔnmán! Khɔ́ ɔ́n priman yɛ́n áthé le átho ɔ́nmɔn si okhɔ́ wɛsɛ, ló bítɛ khɛ́n ɔ́n ne yɛ́n áyí ebhá tɛ́ thénthé ka ɛ?
Tɛmɛ hɛ le hɛ mɛsawo ɔ́nmɔn mɛ́n osí
(Ɔ́n wú Mat 5.25-26)
57– Bítɛ khɛ́n hɔ́n bɛn nbrɛn ɔ́n ne yɛ́n áyí ayɔn se salé otɛ́ ɛ? 58Kasé lephan bɛn bhɔlikɔn se hɛ, khɛ́n hɔ́n mɔ́nmɔn ɔ́n thobhɛ́ hɔ́n eló ákwabhɔ́ gɔn, hɔ́n ka ɔ́n ma sitó hɔ́n élo ɔn, ɛtɛ́ khékhremɛn ɛgɛ ɔ́nmɔn nrwɛn. Kasé ɛle tɛ nɛn, ángɛ hɔ́n hɛ sé kwabhɔ́mán, kwabhɔ́mán lɔ gɛ hɔ́n hɛ sé ngbumán, ló ngbumán lɔ bha hɔ́n hɛ ká khúthé. 59Mɛɛ́n kranmán hɛ gbée salé, chán ɔɔ ɛchán lóne thándi, ɛ́bha sɔ́n hɛ pɛn khúnbrɛn phú, ló abha lé khá kɔphrɛchí brɛ tré mánji.
Currently Selected:
LWIKHI 12: ENT96
Highlight
Share
Copy
Want to have your highlights saved across all your devices? Sign up or sign in
Ebrié New Testament © Bible Society of Côte D'Ivoire, 1996.