LWIKHI 11
11
Jezwi le yankanla bhwetɔ́
(Ɔ́n wú Mat 6.9-13; 7.7-11)
1Cíbɛn, Jezwi éla Yankan ásibɛn. Lóka ńna Yankan phu, lótɛ mɛ́n yíchwɛ́wo bɛn ékranmán nkɛ sa:
– Hwánthe, tɛmɛ ɛlie lo lósi okhɔ́ la Yankan, sa lósi Jan khɔ lie mɛ́n yíchwɛmán.
2Ló Jezwi kranman nkɔn sa:
– Lóka hɔ́n éla Yankan, ɔ́n tɔlé:
“Nthe,
tɛmɛ oyɛ́n salé
hɛ hɛ́n li yíbɛn atɛ Créncré,
hɛ Bhringbilí obhá.
3Tɛmɛ ɛsé lo ácí brɛ brɛ nɛnlí.
4Tɛmɛ ɛyɔ́ lo ne phɔ́ lo,
átɛsalé lo nbrɛn lɔ,
lo yɔ́phɔ́ néphan atɛ́ lo yíléle.
Ló ɛle yɔ́ lo kálé sé ásúwú.”
5Jezwi cu kranman yíchwɛmán sa:
– Ábhwetɔ́ do bhwe bhá: kasé hɔ́n hrómɛn, lephan bɛn pɛ mɛ́n jɔ, khɛ́n lóka áka bhuri mɔn, ńno nkɛ hwan ánkranmán nkɛ lée: “Mɛn jɔ, se mɛn kpánhɔn nyá bhwaliá mɛn pɛ́n. 6Lósi akhɔ tɛ ɔn, mɛn jɔ bɛn chan áhu bha gɛ mɛn thénthé tɛɛ, khɛ́n ábháthó le pɛ yíɛkɛ bhrií mɛn se anní.” 7Lókhɛ́n kasé mɛ́n jɔ ya khúthé hrómɛn ékrɛnmɛn lée: “Ɛyɔ́ mɛn kalé jɛɛn! Mɛn tɔn si, mɛn le mɛn miɔn ɔ́nmɔn olalé phu; mɛn nɛ́n gɛ fe khɛ́n mɛn sé hɛ kpánhɔn.” 8Lókhɛ́n mɛɛ́n kranmán hɔ́n salé, ánman chánfe, ló ánman sé nkɛ kpánhɔn nkɛ énɛn. Áleli mɛ́n jɔ nkɛ li hɛ́nthé, lókhɛ́n nkɛ gbre nkɛ ya nkɛ élri, lóhɛ́nthé, ánman fe, ló áyí khúnbrɛn tɛɛ khɛ́n nkɛ énɛn, ánman sé nkɛ. 9Lóhɛ́nthé nɔn mɛn lɔ mɛɛ́n kranmán hɔ́n lée: tɛmɛ ɔ́n sá yí, ló wo bhá sé hɔ́n, ɔ́n nɛn, ló ɔ́n ma gɛ, hɔ́n há gbo, ló wo bhá phwan hɔ́n si. 10Átɛsalé lephan tɛɛ esá yí, ose; mɛ́n ánnɛn, ángɛ, ló lephan ehá gbo, mɛ́n lɔ óphwɛn si. 11Hɔ́n hrómɛn, ló nthe bɛn nɔn mɛ́n bhi bha sɛ cɔn, lókhɛ́n ánman yɔ́ cɔn ká hɔ́n du sé nkɛ ɛ? 12Ló nthe bɛn nɔn mɛ́n bhi bha sɛ kɔsɔ́mwe, lókhɛ́n ánman yɔ́ kɔsɔ́mwe ká hɔ́n manhɛ́ sé nkɛ ɛ? 13Kasé néphan phromɛn phromɛn bhwá nbrɛn ɔ́n ni lɔ, ɔ́n yɛn áyí ayɔn ɔ́n mó sé hɔ́n miɔn. Ńthé ákha Nthe abha tho, wú mɛ́n-ɛ nɔn anman nɛ́n mó Nánnánmi Créncré sé néphan khɛ́n esɛ Nánnánmi Créncré?
Néphan ephɛ́ bhwe há Jezwi tho, ló ántɔ lóbhwe
(Ɔ́n wú Mat 12.22-30; Ɔ́n wú Mák 3.22-27)
14Nánnánmi phromɛn bha sɛ bɛn phɔ, áchɛ ánnɛn gɛ tɔ bhwe, ló Jezwi étranmán nánnánmi phromɛn lókɔn. Lóka nánnánmi phromɛn chan sɛ lókɔn phɔ thandi, lótɛ mɛ́n mɛ́n phwan, ántɔ bhwe, ló lóbhwe etán ápasá khúnbrɛn hɛ́nmɛn, 15ló néphan fe étɔlé:
– Bɛzebu ali nánnánmi phromɛn phromɛnhɔn óthe ɔn, mɛ́n sɛ́npɛ́ nɔn Jezwi bho étranmán nánnánmihɔn lókɔn!
16Néphan fe énɛn atɔ bhwe tú nkɛ: ló wo ékranmán nkɛ lée nkɛ tɛ́ hɛ́nmɛntányí bɛn olie néphan salé nkɛ sɛ́npɛ́ lókɔn áchan Yankan yé. 17Lónian mɛn khɛ́n Jezwi yɛn wo hɛ́nphe wo ebhú, lóso ńkránman nkɔn sa:
– Kasé bhringbi khúbhɛ́ brɛ, khɛ́n néphan ya wo hromɛn ekútha, ákhúbhɛ́ lókɔn le mɔ́n khɛ́n ábhɔ́, ló lónkhú khúnbrɛn ca khwá. 18Ló kasé Abhɔsɛ́mɔ́n saya égɛ mɛ́n bɛn nbrɛn ɔ́nmɔn kútha, kalósi mɛ́n khúbhɛ́ bha khɔ́ gɛlé tré e? Mímí hɔ́n étɔlé Bɛzebu sɛ́npɛ́ nɔn mɛn mo mɛɛ́n tranmán nánnánmi phromɛn phromɛnhɔn. 19Ló kasé áli nɛn ɔn, ńthé hɔ́n gbemán-ɛ, abɛn sé wo sɛ́npɛ́ wo bhó tranmán nkɔn ɛ? Hɔ́n gbemán nbrɛn lɔ ebhɔ́ hɔ́n pɔn! 20Mímí Yankan sɛ́npɛ́ nɔn mɛn mo mɛɛ́n tranmán nánnánmi phromɛn phromɛnhɔn, lónɔn élie salé Yankan Bhringbi khúbhɛ́ gbali hɔ́n phɔ.
21– Lephan apɛ sɛ́npɛ́, kasé ńkhwɛn mɛ́n tha yí khúnbrɛn mra ya ánbo mɛ́n bháthó, mɛ́n yí khúnbrɛn símɛ́n cɛ́ɛ́. 22Khɛ́n kasé lephan nankhɛ apɛ sɛ́npɛ́ brɛn, ábhu kɛ tho ɔn, nkɛ hɔ́n-ɛn, ló mɛ́n tha yí khúnbrɛn khɛ́n ńsruimwa, nkɛ khwɛ́n yɛn, ló nkɛ khwɛ́n mɛ́n yí khúnbrɛn lwa néphan.
23– Lephan ale bha mɛn phɔ, ńni mɛn mɛsawo, ló lephan khɛ́n ále dɔnmán mɛn mɔ́n mɛɛ́n murɛ néphan hɛ́n, lephan lókɔn, átɛsa ánchranmán nkɔn lé.
Nánnánmi phromɛn ka asaji bha
(Ɔ́n wú Mat 12.43-45)
24– Lóka nánnánmi phromɛn bɛn chan lephan phɔ thandi, ánkhali nɛn ási awɛ, ló anchré fikhwá. Kasé ńnɛn gɛ bhrɔ́ɔ́, ántɔ mɛ́n hrómɛn mɛn sa: “Mɛn mán sáji nó mɛn nkhú hrómɛn si mɛn chan thandi.” 25Lóka ńsáji ma, ángɛ mɛ́n nkhú ofi lóhrómɛn mwámwá, khɛ́n ocɔ lóhrómɛn tɛ. 26Lótɛ, ánsáji no do nánnánmi phromɛn phromɛn khwache nankhɛ khɛ́n ayan brɛn mɛ́n nbrɛn há phɔ ɔ́nmɔn má; ló wo khúnbrɛn wo bha hɛ́n lephan lókɔn hromɛn chré. Áchɛ́se lephan lókɔn cu lí lephanle brɛn ásithwá lephan yábhɛ ńni.
Áphɔkhwálé ali mímí
27Lóka Jezwi étɔ bhwe yábhɛ nɛn, lótɛ bhie bɛn ya ápasá hrómɛn ékrɛnmɛn sa:
– Bhie athi hɛ lábhɛ, khɛ́n ase hɛ yɛn ɛyɛn ɔn, bhie lókɔn, áphɔ khwɛ lé kábrɛ!
28Khɛ́n Jezwi tɔ sa:
– Néphan eyé Yankan bhwe, khɛ́n éji Yankan, wo-ɛ nɔn áphɔ khwa wo lé mímí nbrɛn o!
Néphan énɛn hɛ́nmɛntányí bɛn awú
(Ɔ́n wú Mat 12.38-42)
29Ápasá bhróbhrobhé ka abhurɛhɛ́n jekhali Jezwi, lóka yábhɛ nɔn ánkranmán nkɔn sa:
– Thénthé khúbhɛ́nɛ́n phromɛn néphan lókɔn lɔ énɛn hɛ́nmɛntányí bɛn awú, khɛ́n álepɛ hɛ́nmɛntányí brɛ óbha tɛ́ sé wo wú, kasé áleli Jonasi phɔ hɛ́nmɛntányí brɛ lókɔn khɛ́n wo wu. 30Átɛsalé lósi bhwetɔ́tréwo Jonasi khɔ li áyíbɛn obho trɛ Ninive khúbhɛ́nɛ́n tre ɔn, lóyábhɛ brɛ, Lephan Mi lɔ bha lí áyíbɛn obho trɛ thénthé khúbhɛ́nɛ́n lɔ tre é. 31Ákwabhɔ́ cí, bhringbi bhie achan Seba khúbhɛ́ bha ya thénthé khúbhɛ́nɛ́n hɛ́nmɛn, ló ánman phɛ́ bhwe há nkɔn tho, átɛsalé Salomɔn cí tho, bhringbi bhie lókɔn chan thwethwemɛn-áan bha, ló ńman ye Salomɔn bhweyɛ́n bhwe atɔ. Khɛ́n lephan ncɛ́n aya ɔn, khɔ́ ńbanbrɛn Salomɔn! 32Ákwabhɔ́ cí, Ninive khúbhɛ́nɛ́n bha ya thénthé khúbhɛ́nɛ́n hɛ́nmɛn, ló wo bhá phɛ́ bhwe há nkɔn tho, átɛsalé Ninive khúbhɛ́nɛ́n jrɛn wo yítɛ́, lóka Jonasi tɔ Yankan bhwe se wo ye. Khɛ́n lephan ncɛ́n aya ɔn, khɔ́ ńbanbrɛn Jonasi!
Áyéfí abha lephan phɔ
(Ɔ́n wú Mat 5.15; 6.22-23)
33– Álepɛ lephan átɔ́ khanniɛn khɛ́n áhɔn hrɔman tré kpɔ́thé, saji álepɛ lephan átɔ́ khanniɛn khɛ́n áhɔn tré segbeyí thé, khɛ́n khanniɛnyá tho nɔn otɔ́ khanniɛn tré, ló áfí sé néphan khɛ́n ehɛ́n khúthé. 34Hɛ mɛbhí nɔn ali hɛ phɔ khanniɛn: kasé hɛ mɛbhí yɔn mwámwá, hɛ phɔ khúnbrɛn bhá áyéfí hrómɛn, khɛ́n kasé hɛ mɛbhí le yɔ́n, hɛ phɔ khúnbrɛn bhá dubhlékhu hromɛn. 35Lóhɛ́nthé, ɛhá áyéfí abha hɛ phɔ mwanhɛ́n, ló olé jrɛn dubhlékhu. 36Kasé áyé efí hɛ phɔ si khúnbrɛn, khɛ́n álepɛ lóphɛ́nta bhrií abha dubhlékhu hromɛn, hɛ phɔ khúnbrɛn nɔn ábha bhá áyéfí hrómɛn, sa lóka khanniɛn yéfí efí ká hɛ phɔ.
Jezwi ephɛ́ bhwe há Fariziɛnnɛ́n le bidíyɛ́nmán ɔ́nmɔn tho
(Ɔ́n wú Mat 23.1-36; Ɔ́n wú Mák 12.38-40)
37Lóka Jezwi mɛ́n ka, lótɛ Fariziɛn sɛ bɛn do Jezwi sa nkɛ bhá mɛ́n hwan bha lí nɛn. Jezwi lo nkɛ hwan, ló ńchre tábrɛ mɛ́n. 38Fariziɛn sɛ wu sa nkɛ le cho mɔ́n, sa Jwifunɛ́n bháne átɛ́, lókhɛ́n nkɛ elí nɛn, ló etɛn hɛ́nmɛn. 39Lótɛ Hwánthe kranman nkɛ sa:
– Hɔ́n Fariziɛnnɛ́n, khɔ́ hɔ́n nɛn tɛɛ ɔ́n than é, ɔ́n chó ńyábhɔ́ le ngbán ɔ́nmɔn phɔ, khɛ́n ásído le abhúrɛ yítɛ́ ɔ́nmɔn-ɛ si hɔ́n hrómɛn. 40Gbwɛmán! Yankan khɛ́n atɛ áyí lókɔn phɔ wo ewú ɔn, wú léli mɛ́n brɛ nɔn ńtɛ áyí hrómɛn lɔ? 41Ɔ́n mó áyí abha hɔ́n nyábhɔ́ le hɔ́n gbán ɔ́nmɔn hrómɛn, ali hɔ́n thɛ́n hrómɛn yí sé gbremán, lótɛ lómánji, áyí khúnbrɛn bha chán sé hɔ́n.
42– Fariziɛnnɛ́n, muswe gɛ hɔ́n! Ɔ́n muri hɔ́n bithe nyámí ndɔn áwɔ́, ló ɔ́n mó lóphɛ́nta sé Yankan. Ńyámí nánkhɛ phɔ lɔ, lóyí yábhɛ tɛɛ ɔ́n tɛ́ é. Khɛ́n ɔ́n ne pɛ ápɔ́ se Yankan, ló saji ɔ́n ne tɛ́ áyí apriman lɔ se, lótɛ khɛ́n ló-ɛ nɔn ali áyí ayɔn se salé ɔ́n tɛ́, khɛ́n ɔ́n ne ká lónánkhɛhɔn lɔ phɔ mwanhɛ́n bu.
43– Fariziɛnnɛ́n, muswe gɛ hɔ́n! Ɔ́n pɔ ási mímí ali hɛ́nmɛn si ochré hɛ́nbhúrɛ si, ló hɔ́n énɛn salé ábhácathé lɔ, néphan obhɔ́ hɔ́n yí ájí hrómɛn. 44Muswe gɛ hɔ́n! Ɔ́n tɛsa álínɔn agbakhrɛ khɛ́n néphan le wú lóbrɛ ánɛnsi khɔ́ lótho!
45Ló Bidíyɛ́nwo bɛn kranman Jezwi sa:
– Yíliéwo, hɛ ncan yábhɛ lókɔn ɛ́lɛ ɔn, nkɛé tá nɔn ɛtá lo lɔ!
46Ló Jezwi krɛnmɛn sa:
– Bidíyɛ́nmán, hɔ́n lɔ muswe gɛ hɔ́n! Ńnɔnkwá lwálwa khɛ́n óle gɛ hɔ́n, lónɔn hɔ́n éha sé néphan the. Khɛ́n ɔ́n ne bhó hɔ́n nkhwɛ brɛ wɛ́-nwɛ́ lɔ pápɛ, khɛ́n wo lɔ wo hɔ́n. 47Muswe gɛ hɔ́n! Hɔ́n ethán línɔn mwámwá sé bhwetɔ́trémán lókɔn khɛ́n hɔ́n jisɛmánhɔn wɛn! 48Ɔ́n khɔ lóhrómɛn hɔ́n élie salé, hɔ́n jisɛmánhɔn yí atɛ ɔn, ákhwa hɔ́n hɛ́nmɛn lé, ló hɔ́n elí lóphɔ ndalefɛ. Átɛsalé wo wɛn bhwetɔ́trémán, ló hɔ́n lɔ, hɔ́n ethán wo línɔn! 49Lóhɛ́nthé nɔn Yankan étɔ gbée mɛ́n bhweyɛ́n hrómɛn salé: “Mɛn mán chɛ́ bhwetɔ́trémán le Krisi-mranchɛ́mán ɔ́nmɔn lo gɛ wo; wo bhá wɛ́n nkɔn hromɛn néphan fe, ló wo bhá lri dɔnbɛn-ɛ gbre.” 50Lóhɛ́nthé nɔn ncɛ́n néphan, áthéji ka wo tɛ abha di ncɛ́n, bhwetɔ́trémán khúnbrɛn lókɔn khɛ́n wo wɛn hɛ́nthé, óbha tɛ́ yí dri wo phɔ, 51achan Abɛ cí wo wɛn kábrɛ kábrɛ ádi Zakari cí wo wɛn, Zakari lókɔn khɛ́n wo wɛn ńphaha túprán le ási atɛ créncré ɔ́nmɔn thethé. Mímí mɛɛ́n kranmán hɔ́n salé, óbha tɛ́ yí dri ncɛ́n néphan khúnbrɛn phɔ, bhwetɔ́trémán khúnbrɛn lókɔn khɛ́n wo wɛn hɛ́nthé!
52Bidíyɛ́nmán, muswe gɛ hɔ́n! Átɛsalé ɔ́n mo ábhweyɛ́n khúmɛ́n sánfɛ pɛ. Hɔ́n nbrɛn lɔ ɔ́n ne gɛ ká ábhweyɛ́n khúthé, ló saji néphan nankhɛ khɛ́n énɛn akáne lɔ, hɔ́n ephú wo si.
53Jezwi ka achan lóne lo, mɛ́n phɔ etɛ́ Fariziɛnnɛ́n le bidíyɛ́nmán ɔ́nmɔn thɛ́nyan kpɛ́ɛ́n, ló wo ébhi nkɛ bhwe chɛ́-nchɛ́ áyí dɔndɔn phɔ: 54sa wo khɔ́ lóphɔ tɔ bhwe tú nkɛ, nkɛ bhwe bɛn khɛ́n nkɛ bhá khrɛ phɔ tɔ hromɛn.
Currently Selected:
LWIKHI 11: ENT96
Highlight
Share
Copy
Want to have your highlights saved across all your devices? Sign up or sign in
Ebrié New Testament © Bible Society of Côte D'Ivoire, 1996.