LWIKHI 10
10
Jezwi chɛ yíchwɛmán mɔ-bhwaliá le áwɔ́-mɔn yí
1Lómánji, Hwánthe san néphan mɔ-bhwaliá le áwɔ́-mɔn, ló ńchɛ nkɔn yí mɔ́nmɔn mɛn salé ákhúbhɛ́ le ási khúnbrɛn khɛ́n mɛ́n nbrɛn mɛ́n man hɛ́n no, nkɔn thwási ló lóne. 2Ló ńkránman nkɔn sa:
– Ńyámí bháne thúbhɔ, khɛ́n júmánmán ábha khwɛ́n bhá-ɛ nɔn ale thubhɔ. Lóhɛ́nthé tɛmɛ ɔ́n na ábithe nthe ochɛ́ júmánmán búdúbúdú bha khwɛ́n mɛ́n nyámí lo se. 3Mɛn chɛ hɔ́n élo! Ɔ́n tɛ́sa ńgbankhran miɔn khɛ́n eló nphópho thethé. 4Ɔ́n ne sranmán jɛtɛn, nzrɔ, le ngbawa ɔ́nmɔn. Ɔ́n ne dɔ́nya ásitó bhɔ́ néphan yí. 5Ábháthó si tɛɛ ɔ́n nɛ, ɔ́n phrɛ tɔlé: “Ńthɛ́nkhwálé ogɛ hɔ́n.” 6Kasé ábháthó lókɔn hromɛn, ápɛ ńthɛ́nkhwálé lephan bɛn bháne, hɔ́n thɛ́nkhwálé yí ɔ́n mɔ bha gɛ, khɛ́n kasé álepɛ ńthɛ́nkhwálé lephan bháne, hɔ́n thɛ́nkhwálé yí ɔ́n mɔ bha sáji bha gɛ hɔ́n. 7Tɛmɛ ɔ́n chré ábháthó lókɔn hromɛn, ɔ́n ní lónɛn, ló ɔ́n nán lóndu wo se hɔ́n, áyɔn salé júmánlíwo ogɛ mɛ́n júmán pɛnsɔ́n, ló ɔ́n ne lɛ́di khúmɛ́n khúmɛ́n. 8Ákhúbhɛ́ si tɛɛ ɔ́n nɛ khɛ́n néphan do hɔ́n, ɔ́n ní wo nɛn wo se hɔ́n. 9Ɔ́n tɛ́ lɔ́phɔmán abha ákhúbhɛ́ lókɔn hromɛn phɔ jan, ló ɔ́n kranmán ákhúbhɛ́nɛ́n lée: “Yankan Bhringbi khúbhɛ́ gbali hɔ́n phɔ.” 10Lókhɛ́n kasé ákhúbhɛ́ si tɛɛ ɔ́n nɛ khɛ́n néphan le do hɔ́n, ɔ́n thándi bhácathé, ló ɔ́n tɔ sa: 11“Lo éphan hɔ́n khúbhɛ́ núlu ahɛn lo nta khwá hɔ́n lé. Lókhɛ́n tɛmɛ ɔ́n yɛ́n salé Yankan Bhringbi khúbhɛ́ gbali hɔ́n phɔ.” 12Ncɛ́n mɛɛ́n kranmán hɔ́n: Ákwabhɔ́ cí, áyí wo bhá tɛ́ dri ákhúbhɛ́ lókɔn phɔ, ábha bánbrɛn ló wo bhá tɛ́ dri Sodɔmɛn khúbhɛ́ phɔ.
Ákhúbhɛ́hɔn khɛ́n ale dɛn bhu mímí
(Ɔ́n wú Mat 11.20-24)
13Khorazɛn khúbhɛ́, muswe gɛ hɛ! Bɛsayida khúbhɛ́ muswe gɛ hɛ! Átɛsalé hɛ́nmɛntányí lókɔn otɛ hɔ́n khúbhɛ́, kasé otɛ́ lóhɛ́nmɛntányí yábhɛ brɛ Thire le Sidɔn ɔ́nmɔn khúbhɛ́, ka lócí-áan wo khúbhɛ́nɛ́n khwɛn wo nzrɔ dɛgɔn khwa chre, wo bhá sa ntɛ́nthu, ló olie néphan salé, wo énɛn wo jrɛn wo yítɛ́. 14Lóhɛ́nthé, ákwabhɔ́ cí, áyí wo bhá tɛ́ dri hɔ́n phɔ, ábha bánbrɛn ló wo bhá tɛ́ dri Thire le Sidɔn ɔ́nmɔn khúbhɛ́ phɔ. 15Ló hɛ, Kapɛnaúmɛn khúbhɛ́, wú ɛbhú salé ɛ́bha lo di Yankan hwan? Óbha sɛ́n hɛ bháthé-áan lo di mɔngumán khúbhɛ́.
16Ló ńcu kranman mɛ́n yíchwɛmán sa:
– Lephan khɛ́n adɛn eyé hɔ́n bhwe, átɛsalé mɛn bhwe nɔn anyé, ló lephan khɛ́n atranman hɔ́n, átɛsalé mɛn nɔn ńtránman mɛn, ló lephan khɛ́n atranman mɛn, átɛsalé lephan achɛ mɛn ma nɔn ńtránman.
Yíchwɛmán mɔ-bhwaliá le áwɔ́-mɔn ka asaji bha
17 Yíchwɛmán mɔ-bhwaliá le áwɔ́-mɔn ka asaji bha, áphɔhá si wo thɛ́n hrómɛn, ló wo étɔ sa:
– Hwánthe, hɛ hɛ́n hrómɛn, lóka lo tɔ bhwe se nánnánmi phromɛn phromɛnhɔn ɔn, wo ji lo!
18Ló Jezwi kranman nkɔn sa:
– Mɛn wu Abhɔsɛ́mɔ́n chantho fɔ bha halé yítathé sa ágbánkhran tɛn akpɛ. 19Khɛ́n hɔ́n eye: mɛn se hɔ́n mɔ́nsi salé ɔ́n nɛnsi khɔ́ ńdumán le manhɛ́hɔn ɔ́nmɔn tho, ɔ́n cha mɛsawo sɛ́npɛ́ khúnbrɛn wɔyɔ, lókhɛ́n áyíɛkɛ bha lé tɛ́ hɔ́n bhrɔ́ɔ́. 20Khɛ́n nánnánmi phromɛn phromɛnhɔn jí aji hɔ́n, lóhɛ́nthé ɔ́n ne lí phɔhá, khɛ́n hɔ́n hɛ́n wo lrɛ tre átho ɔn, lóhɛ́nthé-ɛ nɔn ɔ́n ní phɔhá.
Áphɔ ehá Jezwi
(Ɔ́n wú Mat 11.25-27; 13.16-17)
21Lóka lókɔn brɛ hromɛn nɔn Nánnánmi Créncré chɛ áphɔhá khóo ka Jezwi thɛ́n hrómɛn, ló ántɔ sa:
– O Nthe, átho le áyítathé ɔ́nmɔn Hwánthe, mɛn ná hɛ nansi. Lósi akhɔ tɛ ɔn, áyí ahrɔman bhweyɛ́nmán le yíyɛ́nmán ɔ́nmɔn hɛ́nmɛn ɔn, ɛhɔn phwanka tho se ńmiɔ́ chɛ́-nchɛ́-ɛ wu. Nthe, mímí nbrɛn ɛpɔ salé okhɔ́ nɛn tɛ́, lónɔn akhɔ nɛn tɛ.
22– Mɛn Nthe khwɛn yí khúnbrɛn ha mɛn mɔ́n mɛn. Álepɛ lephan ayɛn Nmi, kasé áleli Nthe brɛ, saji álepɛ lephan ayɛn Nthe kasé áleli Nmi brɛ. Ló néphan khɛ́n Nmi pɔ salé wo yɛ́n Nthe ɔn, wo pán nɔn ńmo nkɛ nie wo.
23Lóka ákha yíchwɛmán nchán, Jezwi sa hɛ́nmɛn tre nɛn wo ɔɔ, ló ńkránman nkɔn sa:
– Áyí khɛ́n hɔ́n ewú hɔ́n mɛbhí mɛn hɛ́nthé, hɔ́n-ɛ, áphɔ khwa hɔ́n lé! 24Khɛ́n mɛɛ́n kranmán hɔ́n gbée salé, bhwetɔ́trémán le ńmringbilímán búdúbúdú ɔ́nmɔn lɔ pɔ salé wo wú, áyí khɛ́n ncɛ́n hɔ́n ewú, lókhɛ́n wo-ɛ wo le wu, wo pɔ salé wo yé ábhwe khɛ́n ncɛ́n hɔ́n eyé, lókhɛ́n wo-ɛ wo le ye.
Samari sɛ bhwá bɛn phɔ yandran obhu
25 Bidíyɛ́nwo bɛn chanfe bha esú Jezwi wú, ló ánmi nkɛ sa:
– Yíliéwo, ébí nɔn ayɔn se sa mɛn tɛ́, khɛ́n mɛn gɛ mɛpɔ́bhá álephú ɛ?
26Ló Jezwi bhi nkɛ sa:
– Lóka ɛkán áyí wo lrɛ ha lo bidí hrɔ́ hrómɛn ɔn, ka lósi ɛkhɔ ye lóthé e?
27Ló sɛ lókɔn tɔ sa:
– “Áyɔn sa ɛpɔ́ hɛ Hwánthe Yankan, hɛ thɛ́n khúnbrɛn mɛn, hɛ hɛ́nfan khúnbrɛn mɛn, hɛ sɛ́npɛ́ khúnbrɛn mɛn le hɛ nánnánmi khúnbrɛn mɛn.” Ló saji: “Áyɔn salé ɛpɔ́ hɛ jɔ sa lósi ɛkhɔ pɔ hɛ bɛn nbrɛn.”
28Lótɛ Jezwi kranman nkɛ sa:
– Lótɛ nɔn ɛtɔ o. Tɛmɛ ɛtɛ́ lóyí, ló ɛbhá gɛ mɛpɔ́bhá álephú.
29Bidíyɛ́nwo énɛn alie salé mɛ́n bhwe li hɛ́n, lótɛ ńcu mi Jezwi sa:
– Yán abɛn li mɛn jɔ ɛ?
30Ló Jezwi krɛnmɛn sa:
– Cíbɛn, sɛ bɛn chan Jeruzalɛ́mɛn eló Jerikho, ńka khokhrohamán mɛ́n, wo khwɛn mɛ́n ntráliɛ́ khúnbrɛn yɛn mɛ́n phɔ, wo chrwa nkɛ, ákhakpɛɛ́ ankhú, ló wo yɔ nkɛ ka bhósi lo. 31Lóka lókɔn, nphaháwo bɛn lɔ khɔ lóne sitó ebhá. Mɛ́n ka ńwu sɛ lókɔn lá ala ɔn, lótɛ ńkpa khɔ si nankhɛ, ló ńmósi no. 32Lóyábhɛ brɛ, levite sɛ bɛn ka adi lóne, ńti kpɛɛ́ no nkɛ phɔ, lótɛ mɛ́n lɔ ńkpa khɔ si nankhɛ, ló ńmósi no. 33Lókhɛ́n Samari khúbhɛ́ sɛ bɛn eló hu, ńkhɔ lósitó brɛ bha ɔɔ ńdi nkɛ phɔ phu. Mɛ́n ka ńwu nkɛ, nkɛ phɔ etɛ nfɛkhu. 34Lótɛ ńtigbali nkɛ, ńsɛn nkɛ yremɛ́n, ńhɔn ńnɔ́n le divɛn ɔ́nmɔn ha lómɛ́n, ló ńmo yí gɛ. Lómánji, ńhɔn nkɛ ka mɛɛ́n nbrɛn bran anphá tho. Ńhɔn nkɛ no ńthékhunɛ́n-nkhú hrómɛn no ha néphan mɔ́n mɛn sa wo tɛ́ nkɛ phɔ. 35Lóka áyé lɛ, ńkhwɛn fránkhi mɔn dɔn ńthékhunɛ́n-nkhú-óthe mɔ́nji, ló ńkránman nkɛ sa: “Tɛmɛ ɛtɛ́ sɛ lókɔn phɔ, ló lóka mɛn cu saji ma ɔn, lóyí abhɔtho, mɛɛ́n nbrɛn mán wrɔ sé hɛ.”
36Ló Jezwi cu kranman bidíyɛ́nwo sa:
– Néphan bhwaliá lókɔn hromɛn, sɛ khɛ́n khokhrohamán tɛ yí, lóbɛn nɔn ɛbhú salé ali mɛ́n jɔ ɛ?
37Ló bidíyɛ́nwo kranman Jezwi sa:
– Lephan khɛ́n atɛ yíbhwá se.
Ló Jezwi krɛnmɛn sa:
– Tɛmɛ ɛlo, ló hɛ lɔ, ɛtɛ́ lóyábhɛ brɛ.
Mata le Mari ɔ́nmɔn édo Jezwi
38Lóka Jezwi le mɛ́n yíchwɛmán ɔ́nmɔn ka sitó élo, wo lɛ ákhúbhɛ́ bɛn, lóne bhie bɛn bháne óche Mata. Bhie lókɔn, ńdo Jezwi no mɛ́n hwan. 39Mɛ́n hɔnmia bɛn óche Mari lɔ bháne, mɛ́n-ɛ ńman chre Hwánthe ntakhú anyé nkɛ bhwe nkɛ étɔ. 40Ábháthó júmán búdúbúdú etú Mata mɔ́nsi, ló ńma ántɔ sa:
– Hwánthe, mɛn hɔnmia yɔ́ ayɔ mɛn brɛ ka mɛn ní júmán ɔn, wú lóbhwe le tɛ́ hɛ yíɛkɛ? Chɛ anman dɔnmán mɛn mɔ́n kpɛ.
41Khɛ́n Hwánthe krɛnmɛn sa:
– Mata, Mata, ɛlí thɛ́n, ló ɛtɛ́ dandan áyí búdúbúdú phɔ, 42khɛ́n áyí brɛ khókhó nɔn ali áyí ayɔn se sa otɛ́. Lóyí lókɔn, lónɔn Mari san bho, ló álepɛ lephan ábha ló mɛ́n mɔ́n mɛn bhó yɛn.
Currently Selected:
LWIKHI 10: ENT96
Highlight
Share
Copy
Want to have your highlights saved across all your devices? Sign up or sign in
Ebrié New Testament © Bible Society of Côte D'Ivoire, 1996.