LWIKHI 9
9
Jezwi chɛ yíchwɛmán áwɔ́-mɔn yí
(Ɔ́n wú Mat 10.5-15; Ɔ́n wú Mák 6.7-13)
1Cíbɛn, Jezwi bhurɛ yíchwɛmán áwɔ́-mɔn hɛ́n. Ńse wo sɛ́npɛ́ salé wo mɔ́n oká nánnánmi phromɛn phromɛnhɔn tho, wo tranmán nkɔn, ló wo tɛ́ lɔ́phɔmán phɔ jan. 2Lómánji, ńchɛ nkɔn lée nkɔn lo tɔ Yankan Bhringbi khúbhɛ́ phɔ bhwe, ló wo tɛ́ lɔ́phɔmán phɔ ojan, 3ló ńkránman nkɔn sa:
– Hɔ́n ló hɔ́n élo ɔn, ɔ́n ne sranmán yíɛkɛ khɛ́n alí: áyágrɛ, ńgbɔhrɔ́, ńnɛnlí le jɛtɛn lɔ, ló lephan brɛ olé sranmán ádɛgɔn mɔn. 4Ábháthó si wo do hɔ́n, ɔ́n chré lóne sibrɛ, kábrɛ kábrɛ odi lóka ɔ́n ma chán lóne lo. 5Ási khɛ́n néphan le dɛn do hɔ́n, ɔ́n chán wo khúbhɛ́ féne, ɔ́n phan wo khúbhɛ́ núlu abha hɔ́n ntathé khwá wo lé: lónɔn ábha lí wo phɔ ndalefɛ.
6Yíchwɛmán khɔ khúbhɛ́ khúbhɛ́ khúnbrɛn hrómɛn tɔ Ábhwe Bhwábhwá se néphan ye, ló ási khúnbrɛn, wo tɛ lɔ́phɔmán phɔ jan.
Erɔde thɛ́n elí
(Ɔ́n wú Mat 14.1-12; Ɔ́n wú Mák 6.14-29)
7Wo tɔ áyí khúnbrɛn lókɔn atɛ phɔ bhwe se guvɛnɛ Erɔde ye, lótɛ khɛ́n lóbhwe khúnbrɛn ékhrɛ phɔ. Lósi akhɔ tɛ ɔn, néphan fe étɔlé:
– Jan-Nduhɛ́nháwo tɛɛ nɔn achan khúnɔn mɛn fe nɔn etɛ́ yábhɛ nɛn.
8Dɔnbɛn étɔlé:
– Eli tɛɛ nɔn asaji bha.
Fe lɔ nkɛé:
– Ka bhwetɔ́trémán nɔ́nɔ́ hrómɛn lephan bɛn nɔn achan khúnɔn mɛn fe o.
9Khɛ́n Erɔde étɔ sa:
– Khɔ́ nɛn chɛ ojan Jan hɛ́nphe. Ńthé lólephan bɛn li lókɔn khɛ́n mɛn cu mɛn yé mɛ́n phɔ bhwe yábhɛ nɛn ɛ?
Ló ánnɛn anwú Jezwi.
Jezwi se ńsɛ akpɛn mwannán nɛn li
(Ɔ́n wú Mat 14.13-21; Ɔ́n wú Mák 6.30-44; Ɔ́n wú Jan 6.1-14)
10 Krisi-mranchɛ́mán sáji bha gɛ Jezwi, wo tɔ wo yí khúnbrɛn wo tɛ phɔ bhwe se nkɛ ye. Jezwi do nkɔn ɔ́nmɔn lo ákhúbhɛ́ bɛn óche Bɛsayida njɛ, mɛ́n le nkɔn ɔ́nmɔn tɛɛ. 11Khɛ́n ápasá yɛn sa nkɔn lo, ló wo bho nkɔn mánji pɛ lo. Jezwi do ápasá, ńtɔ Yankan Bhringbi khúbhɛ́ bhwe se wo, ló ńtɛ wo hromɛn lɔ́phɔmán phɔ jan.
12Ácí ka égu, yíchwɛmán áwɔ́-mɔn lo gɛ Jezwi, ló wo ékranmán nkɛ sa:
– Chɛ ápasá olo nɛn nɛn lí, ákhúbhɛ́ le nanmwe ɔ́nmɔn hrómɛn, ló wo gɛ si lá; lo janbu ká njɛ, krɛn le pɛ si.
13Khɛ́n Jezwi kranman nkɔn sa:
– Hɔ́n nbrɛn ɔ́n sé wo nɛn wo lí!
Ló wo nkɛé:
– Kpánhɔn mwannán le ácɔn mɔn tɛɛ nɔn abháne o. Wú ɛ́nɛn salé lo lo phɛ́ nɛn bha sé néphan gbɛngbɛn lókɔn?
14Khankhan mímí, (néphan aya lóne, wo bhá lí ńsɛ akpɛn mwannán nbrɛn-áan.) Lótɛ Jezwi kranman mɛ́n yíchwɛmán salé:
– Ɔ́n chɛ́ wo khwáthé ágbemɛn gbemɛn, ágbe brɛ hromɛn, néphan olí ágrebhɛ le áwɔ́.
15Yíchwɛmán ji Jezwi bhwe atɔ, ló wo chɛ nkɔn khúnbrɛn nkɔn khwathé. 16Jezwi khwɛn kpánhɔn mwannán le ácɔn mɔn lókɔn pɛ, ńje mɛ tho annɛ́n tho, ló ńna Yankan nansi. Ńmuri, ló ńkhwɛn se yíchwɛmán sa wo khwɛ́n lwa ápasá. 17Wo tha, ló ási wo khúnbrɛn mɛn. Wo khwɛn lókhúnkhu akha si ńkrwɛ áwɔ́-mɔn.
Piɛ étɔ gbée salé Jezwi li Mesi
(Ɔ́n wú Mat 16.13-19; Ɔ́n wú Mák 8.27-29)
18Cíbɛn, Jezwi brɛ lo njɛ éla Yankan, mɛ́n yíchwɛmán lo gɛ, ló ánmi nkɔn sa:
– Bí bhwe nɔn ápasá khúnbrɛn étɔ mɛn phɔ ɛ?
19Ló wo kranman nkɛ lée:
– Néphan khúnbrɛn étɔlé Jan-Nduhɛ́nháwo le hɛ, fe-ɛ nkɛé hɛ nɔn ɛli Eli, dɔnbɛn étɔlé, ɛli bhwetɔ́trémán nɔ́nɔ́ hrómɛn lephan bɛn achan khúnɔn mɛn fe.
20– Ńthé Jezwi cu bhi wo sa: yán hɔ́n-ɛ, bí lephan hɔ́n ebhú salé mɛn ni ɛ?
Lótɛ Piɛ tɔ sa:
– Hɛ nɔn ɛli Mesi khɛ́n Yankan chɛ bha.
Jezwi étɔ mɛ́n khú le mɛ́n khúnɔn mɛn chánfe ɔ́nmɔn bhwe
(Ɔ́n wú Mat 16.20-28; Ɔ́n wú Mák 8.30—9.1)
21Jezwi dibi sa wo le tɔ lóbhwe sé lephan brɛ oyé bhrɔ́ɔ́, 22ló ńcu tɔ sa:
– Áyɔn salé Lephan Mi olí gbre khóo, mrɔ́khómán, nphahamán-óthemánhɔn le bidíyɛ́nmán ɔ́nmɔn oyɔ́-ɛ, wo wɛn, ló ńcíbhí bhwaliá, anchán khúnɔn mɛn fe.
23Lómánji, ńcu tɔ se néphan khúnbrɛn aya salé:
– Lephan ɛ́nɛn ɛbha gɛ mɛn ɔn, ɛle thɔ́n hɛ bɛn nbrɛn, khɛ́n ɛhɔ́n hɛ yábhletre, ló ɛgɛ mɛn thá. 24Lephan khɛ́n énɛn abo mɛ́n mɛpɔ́bhá, lephan lókɔn mɛ́n mɛpɔ́bhá bha liá. Ló lephan khɛ́n mɛn hɛ́nthé ánnɛn anyɔ́ mɛ́n mɛpɔ́bhá ká oliá, lephan lókɔn ánman gɛ mɛ́n mɛpɔ́bhá. 25Kasé lephan gɛ áthéji yí khúnbrɛn phu khɛ́n mɛ́n nbrɛn ńnia ɔn, ébí nɔn ábha tɛ́ se ɛ? 26Lephan, kasé mɛn Lephan Mi phɔ etɛ́ hɛ hɛ́ndɛ, saji kasé mɛn phɔ bhwetɔ́ lɔ etɛ́ hɛ hɛ́ndɛ ɔn, hɛ lephan lókɔn, mɛn lɔ hɛ phɔ bha tɛ́ mɛn hɛ́ndɛ, lóka man khɔ́ mɛn nguhá hrómɛn má le lóka mán khɔ́ mɛn Nthe le Yankan-mranchɛ́mán créncré ɔ́nmɔn nguhá hrómɛn má. 27Mímí mɛɛ́n kranmán hɔ́n: néphan fe khɛ́n aya krɛn ncɛ́n, wo khúnbrɛn wo bha lé khú phú, lókhɛ́n wo bhá wú Yankan Bhringbi khúbhɛ́.
Jezwi hɛ́nmɛn jrɛn
(Ɔ́n wú Mat 17.1-8; Ɔ́n wú Mák 9.2-8)
28Jezwi ka atɔ bhwe lókɔn phu, ácído nbrɛn bha hɛn, lómánji nɔn ńdo Piɛ, Jan le Jakhi ɔ́nmɔn ha phɔ, ló ńno ábhóbhó bɛn tho ánna Yankan. 29Lóka ánna Yankan, lótɛ mɛ́n hɛ́nmɛn jrɛn, mɛ́n ntráliɛ́ phwa phúnphú, ló égɛ mɛ. 30Lóyámɛ́n néphan mɔn thándi, ló wo gɛ Jezwi ɔ́nmɔn ya wo ékan hwan: wo nɔn wo li Moyízi le Eli. 31Yankan nguhá jekhali wo, ló wo gɛ Jezwi ɔ́nmɔn ya wo étɔ lósi, nkɛ bhá khɔ́ lí nkɛ júmán obho ha nkɛ mɔ́n mɛn, kábrɛ kábrɛ ábha di lóka nkɛ bhá ló Jeruzalɛ́mɛn, khɛ́n nkɛ bhá khú lóne. 32Lóka lókɔn, Piɛ le mɛ́n jɔn ɔ́nmɔn eláná kpɛ́ɛ́n. Lóka wo chan ná mɛn fe, ló wo wu Jezwi nguhá le néphan mɔn khɛ́n agɛ ɔ́nmɔn ya. 33Néphan lókɔn ka élo, lótɛ Piɛ kranman Jezwi sa:
– Yíliéwo, ńmwá lo bha krɛn. Lo bhá bhú ádɛgɔn-nkhú bhwaliá, hɛ kɛ bɛn, Moyízi kɛ bɛn le Eli kɛ bɛn. (Khɛ́n ánnɛn yɛ́n lóbhwe brɛ ántɔ.)
34Lóka wo étɔ lóbhwe, lótɛ mɔngú mɔngú bɛn bha mrwɛn wo khúnbrɛn. Mɔngú mɔngú ka amrwɛn wo, ló yíchwɛmán esókhú. 35Ló átɔ́ bɛn chan mɔngú mɔngú hrómɛn édɛn tɔ sa:
– Mɛ́n lókɔn nɔn ńni mɛn Mi mɛn san, tɛmɛ ɔ́n yé mɛ́n bhwe!
36Lóka átɔ́ mɛ́n jan, lómánji Jezwi brɛ khókhó nɔn wo wu aya. Yíchwɛmán hɔn lóbhwe hrɔman, ló lócí lókɔn, wo yí wo wu, wo le tɔ lóbhwe se lephan brɛ ye bhrɔ́ɔ́.
Jezwi tɛ yípɔ khɛ́n nánnánmi phromɛn bɛn bha phɔ, phɔ jan
(Ɔ́n wú Mat 17.14-18; Ɔ́n wú Mák 9.14-27)
37Lóka áyé lɛ, Jezwi le mɛ́n yíchwɛmán ɔ́nmɔn chan ábhóbhó tho diathé, ló ápasá bhróbhrobhé bha éywɛnlí Jezwi. 38Lótɛ lephan bɛn bha ápasá hrómɛn elúkhwɛ́ tɔ sa:
– Yíliéwo, mɛɛ́n na hɛ kpɛ, tɛmɛ ɛgbɛnɛ́n wú mɛn mi, ali mɛn mi sɛ logro brɛ! 39Yípɔ lókɔn, nánnánmi bɛn bha mɛ́n phɔ, nkɛ chɛ ándɛ́nga núkhwɛ́, nkɛ hɔ́n-ɛn jika kranmɛn, ló mísɛ́-ndu dɔn mɛ́n mɛ́n, nkɛ tɛ́ yí dri phɔ, khekhremɛn khɛ́n nkɛ yɔ́-ɛ ká. 40Mɛn na hɛ yíchwɛmán sa wo tranmán nánnánmi lókɔn, khɛ́n wo le gɛ tɛ.
41Ló Jezwi lukhwɛ́ tɔ sa:
– O, thénthé khúbhɛ́nɛ́n phromɛn phromɛn alepɛ mímíbhú! Mán gɛ hɔ́n ɔ́nmɔn chré kábrɛ kábrɛ ábha di cíbɛn-áan khɛ́n ɛ? Mán do hɔ́n pɛ ábha di cíbɛn-áan khɛ́n ɛ? Hɔn hɛ bhi bha sé mɛn krɛn.
42Lóka yípɔ ebhá Jezwi yé, lótɛ nánnánmi hɔn nkɛ fɔn janlé yítathé, ló ánjiká nkɛ kranmɛn. Lókhɛ́n Jezwi khan nánnánmi phromɛn lé, ńtɛ yípɔ phɔ jan, ló ńhɔn nkɛ se nkɛ the. 43Lóka wo wu Yankan sɛ́npɛ́ khóo lókɔn ɔn, ló lóbhwe etán wo khúnbrɛn hɛ́nmɛn kpɛ́ɛ́n.
Jezwi cu étɔ mɛ́n khú phɔ bhwe
(Ɔ́n wú Mat 17.22-23; Ɔ́n wú Mák 9.30-32)
Jezwi yí atɛ, lóbhwe etán néphan khúnbrɛn hɛ́nmɛn ntɔ́nyán tɛɛ, ló ńkránman mɛ́n yíchwɛmán sa:
44– Ábhwe khɛ́n thénthé mɛɛ́n tɔ sé hɔ́n, tɛmɛ ɔ́ndi njɛlé yé mwámwá, lónɔn ali salé: wo bhá hɔ́n Lephan Mi phɛ́lí néphanmiɔn mɔ́n mɛn.
45Lótɛ khɛ́n yíchwɛmán le yé ábhwe lókɔn thé bhrɔ́ɔ́: lóthé hrɔman wo hɛ́nmɛn, ochɛ́sé wo le yé lóthé. Wo esókhú, áchɛ́se wo lé wúsi khɔ́ bhi Jezwi lóthé.
Lephan khɛ́n abanbrɛn mɛ́n jɔn
(Ɔ́n wú Mat 18.1-5; Ɔ́n wú Mák 9.33-37)
46 Yíchwɛmán ya wo thethé étalí bhwe, ló wo hromɛn, wo énɛn wo yɛ́n lephan abanbrɛn mɛ́n jɔn. 47Lónian mɛn khɛ́n Jezwi yɛn wo hɛ́nphe wo ebhú, lótɛ ńhɔn yípɔ bɛn ya mɛ́n njɛ, 48ló ńkránman nkɔn sa:
– Mɛn hɛ́n hrómɛn, lephan khɛ́n ábha do yípɔ lókɔn, átɛsa mɛɛ́n bɛn nbrɛn nɔn ńdo mɛn. Ló lephan ado mɛn, átɛsa lephan achɛ mɛn ma nɔn ńdo. Ló hɔ́n khúnbrɛn hrómɛn, lephan khɛ́n atɛ mri ɔn, mɛ́n nɔn ńbanbrɛn mɛ́n jɔn.
Lephan khɛ́n aleli hɔ́n mɛsawo, ńni hɔ́n lephan bhwá
(Ɔ́n wú Mák 9.38-40)
49Jan bho bhwetɔ́, ló ńtɔ sa:
– Yíliéwo, hɛ hɛ́n hrómɛn, lephan bɛn bháne étranmán nánnánmi phromɛn phromɛnhɔn, hɛ thá ánnɛn gɛ hɛ́nthé, lo bha lo thuithá.
50Khɛ́n Jezwi kranman nkɛ sa:
– Ɔ́n ne thuithá a, lephan khɛ́n aleli hɔ́n mɛsawo ɔn, ńni hɔ́n jɔ bhwá.
Samari khúbhɛ́ bɛn le dɛn do Jezwi
51Lóka wo bhá do Jezwi ló átho, lócíhɔn ka agbali phɔ, Jezwi khɔnman hromɛn eló Jeruzalɛ́mɛn. 52Ńchɛ mranchɛ́mán thwási lo. Wo ka wo lo, wo ka Samari khúbhɛ́ bɛn, sa wo cɔ áchrési bɛn tɛ́tré Jezwi lé. 53Lónian mɛn khɛ́n ńsa hɛ́nmɛn tre ánno Jeruzalɛ́mɛn hɛ́nthé, Samari khúbhɛ́nɛ́n le dɛn do-e. 54Jakhi le Jan ɔ́nmɔn ali yíchwɛmán, wo ka wo ye ábhwe lókɔn, ló wo bhi Jezwi sa:
– Hwánthe, wú ɛpɔ salé lo tɛ́ átɛn ochántho bha bhɔ́ wo khúnbrɛn phú?
55Jezwi sa hɛ́nmɛn tre nɛ́n wo ɔɔ, ńgbrɛ wo, 56ló wo lo ákhúbhɛ́ nánkhɛ bɛn.
Néphan khɛ́n énɛn agɛ Jezwi thá
(Ɔ́n wú Mat 8.19-22)
57Lóka wo bha ásitó wo élo, lótɛ lephan bɛn kranman Jezwi sa:
– Hɛ si khúnbrɛn tɛɛ ɛ́lo ɔn, mán gɛ hɛ ɔ́nmɔn no.
58Ló Jezwi kranman nkɛ sa:
– Ńkrɛ́ lɔ pɛ wo nɔn, ló ńkɔ́cran lɔ pɛ wo nkhú, khɛ́n Lephan Mi-ɛ le pɛ si atré mɛ́n hɛ́nphe lé, khɛ́n áfikhwá.
59Ló ńkránman lephan lójɔ sa:
– Bha gɛ mɛn thá!
Khɛ́n lephan lókɔn krɛnmɛn sa:
– Hwánthe, tɛmɛ ɛsé mɛn mɔ́nsi mɛn no mrwɛn mɛn nthe phú khɛ́n.
60Ló Jezwi kranman nkɛ sa:
– Tɛmɛ ɛyɔ́ khúmán khwa omrwɛn wo néphan akhu; khɛ́n hɛ ɔn, tɛmɛ ɛlo tɔ Yankan Bhringbi khúbhɛ́ phɔ bhwe.
61Ló lephan nankhɛ bɛn cu tɔ sa:
– Hwánthe, mɛn mán gɛ hɛ thá tɛɛ, lókhɛ́n tɛmɛ ɛyɔ́ mɛn no kranmán mɛn bháthónɛ́n khɛ́n.
62Ló Jezwi krɛnmɛn gbée salé:
– Lephan abho dúgba pɛ elí júmán, khɛ́n ábha cu gbɛnɛ́n wú mánji ɔn, lephan lókɔn, Yankan Bhringbi khúbhɛ́, óle gɛ bhó nkɛ tɛ́ yíɛkɛ.
Currently Selected:
LWIKHI 9: ENT96
Highlight
Share
Copy
Want to have your highlights saved across all your devices? Sign up or sign in
Ebrié New Testament © Bible Society of Côte D'Ivoire, 1996.
