LWIKHI 16
16
Yíbówo bhwá
1Ló Jezwi kranman mɛ́n yíchwɛmán sa:
– Bhringbi bɛn do yíbówo bɛn mɛ́n júmán hrómɛn, ló wo bha kranman nkɛ lée yíbówo lókɔn élɔ mɛ́n yí phú. 2Lóhɛ́nthé mɛ́n hwánthe che bha ló ńmi nkɛ sa: “Ébí bhwe yábhɛ nɔn mɛn yé hɛ phɔ ɛ? Hɛ yí ɛ́bo, ɛbha kán sé mɛn wú, lósi akhɔ tɛ ɔn, ɛbha lé cu bo mɛn yí npɔhɔ́n.” 3Lótɛ yíbówo étɔ mɛ́n hrómɛn mɛn sa: “Khɔ́ mɛn hwánthe ebhá tranmán mɛn, ńthé ébí man tɛ́ ɛ? Áphɔ lɔ mɛn nɛn pɛ khɛ́n mán gɛ ní ábithe júmán, saji áyísá lɔ bha tɛ́ mɛn hɛ́ndɛ. 4Mɛn yɛn lóyí mán tɛ́ khɛ́n lóka wo bhá tranmán mɛn, néphan bha do mɛn ló wo hwan!” 5Lóhɛ́nthé, ńche néphan khúnbrɛn khɛ́n mɛ́n hwánthe pɛn bha wo phɔ bha brɛ brɛ mɛn, ló ńmi ló athwasi sa: “Mɛn hwánthe pɛn abha hɛ phɔ ɔn, bhɔbhé?” 6Ló ńtɔ sa: “Olive-nɔ́n bhólu aya.” Ló yíbówo kranman nkɛ sa: “Nɛn hɛ pɛn hrɔ́ o, chethé gbraa, ló ɛlrɛ ágrebhɛ le áwɔ́.” 7Ńmi lójɔ sa: “Ńthé hɛ-ɛ, hɛ pɛn ékɛ bhɔbhé?” Ló mɛ́n nkɛé: “Ble nzrɔ ya-mwannán.” Yíbówo krɛnmɛn sa: “Nɛn hɛ pɛn hrɔ́ o, ɛlrɛ ya bhwelí.” 8Yíbówo phromɛn lókɔn ɔn, mɛ́n hwánthe saya élri hwa, nkɛ kɔ́nda si nkɛ khɔ li hɛ́nthé. Átɛsalé thénthé khúbhɛ́nɛ́n-ɛ yɛ́n kɔ́nda lí wo nbrɛn thethé brɛn néphan abha áyéfí hrómɛn.
9Ló Jezwi cu tɔ sa:
– Mɛn-ɛ, mɛɛ́n kranmán hɔ́n lée: ɔ́n khɔ́ áthéji khwɛbhí phɔ lí néphan jɔn bhwá, ochɛ́sé lóka áphu hɔ́n mɔ́n mɛn ɔn, wo do hɔ́n ló bháthó atre godo. 10Lephan khɛ́n alí mɛ́nbrɛ áyí chɛ́-nchɛ́ hrómɛn, áyí khónkhó hrómɛn lɔ anní mɛ́nbrɛ. Lephan khɛ́n ńmɔ́n phɛ́ áyí chɛ́-nchɛ́ hrómɛn, áyí khónkhó hrómɛn lɔ mɛ́n mɔ́n phɛ́. 11Kasé ɔ́n ne lí mɛ́nbrɛ hɔ́n théji jayítɛ́ hrómɛn, obha lé gɛ khwɛ́n ajayí ali ajayí mímí há hɔ́n mɔ́n mɛn. 12Kasé ɔ́n ne lí mɛ́nbrɛ áyí ali lephan nankhɛ yí phɔ, obha lé gɛ khwɛ́n áyí ali hɔ́n nbrɛn yí há hɔ́n mɔ́n mɛn.
13Nɛnkhwɛ́nwo brɛ lé gɛ pɛ hwánthe mɔn, ánman sa bɛn mɛ, khɛ́n ánman pɔ́ lójɔ, ánman ní mɛ́nbrɛ bɛn phɔ, khɛ́n anman nɛ́n wú lójɔ mɛ. Ɔ́n ma lé gɛ khwɛn Yankan hɛ́nmɛn nɛn, lókhɛ́n ɔ́n khwɛn jɛtɛn lɔ hɛ́nmɛn nɛn.
Jezwi bhwe dɔndɔn atɔ
(Ɔ́n wú Mat 11.12-13; 5.31-32; Ɔ́n wú Mák 10.11-12)
14 Fariziɛnnɛ́n ye lóbhwe khúnbrɛn lókɔn, ló wo éha Jezwi lia, jɛtɛn álimán wo bánban hɛ́nthé. 15Ló Jezwi kranman nkɔn sa:
– Néphan hɛ́nmɛn, ɔ́n mó hɔ́n nbrɛn tɛ́sa néphan apriman, lókhɛ́n Yankan-ɛ yɛn hɔ́n thɛ́n bhwe ebhú. Áyí khɛ́n néphan ebhú salé ali yí khó, Yankan hɛ́nmɛn áli yí wrɛ́.
16– Moyízi ka aha bidí le bhwetɔ́trémán bhwetɔ́ ɔ́nmɔn chan bháne kábrɛ kábrɛ, ádi Jan-Nduhɛ́nháwo cí tho. Achan lóka élo nɔn wo tɔ Ábhwe Bhwábhwá, ali Yankan Bhringbi khúbhɛ́ bhwe, ló lephan brɛ brɛ khúnbrɛn ebhó sɛ́npɛ́ mɛn ká Yankan Bhringbi khúbhɛ́. 17Átho le áyítathé ɔ́nmɔn bhwe gɛ phú thénthé tɛɛ, lókhɛ́n ábidí phɛ́n bhrií bhwe-ɛ bha lé gɛ phú yábhɛ nɛn.
18– Sɛ tɛɛ awrɔ mɛ́n bhia, khɛ́n aphɛn bhie nankhɛ, mɛ́n lókɔn, bhie nɔn ánche. Sɛ khɛ́n aphɛn bhie owrɔ, mɛ́n lɔ, bhie nɔn ánche.
Bhringbi bɛn le Laza ɔ́nmɔn phɔ bhwe
19– Lócí, bhringbi bɛn bháne, ánkhwa dɛgɔn mímí ájɛ khɔnman, ácí khúnbrɛn ánmra mwámwá, ló anní nɛn mímí. 20Sɛ gbrewo bɛn óche Laza lɔ bháne. Áyremɛ́n gra mɛ́n phɔ khúnbrɛn, ló anná bhringbi lókɔn khúmɛ́n. 21Ńnɛn nbie echán bhringbi lókɔn tábrɛ tho fɔ́khwálé, ánnɛn ankhwɛ́n ntha, lókhɛ́n ánnɛn gɛ. Ló abhɔtho banban nɔn ali salé, ńgbamán áphɔ sɛ wɛ́-nwɛ́ lɔ bha lia mɛ́n yremɛ́n. 22Lómánji gbrewo lókɔn khu, ló Yankan-mranchɛ́mán bha do-e ɔ́nmɔn lo chre Ábrahámɛn ntakhú, átho lóne. Bhringbi lɔ khu, ló wo hɔn-ɛn lo bho. 23Bhringbi bha mɔngu elí gbre kpɛ́ɛ́n. Mɛ́n ka ńje mɛ tho, ńwu Ábrahámɛn hɛ́nmɛn-áan, ló Laza chre nkɛ njɛ. 24Lótɛ ńnukhwɛ́ tɔ sa: “Nthe Ábrahámɛn, tɛmɛ ɛwú mɛn phɔ nfɛkhu, lée mɛn tɛn hromɛn lókɔn mɛn ma ɔn, áyí ekhú mɛn phɔ bánban. Tɛmɛ ɛchɛ́ Laza obhó mɛ́n khwɛ sɔ́ ndu nrwɛ́n nrwɛn mɛn bha di mɛn lɛ́ tho kpɛ.” 25Khɛ́n Ábrahámɛn tɔ sa: “Mɛn mi, odi hɛ mwanhɛ́n salé hɛ ka ɛbha théji, ɛgɛ yí búdúbúdú, lóka lókɔn nɔn Laza-ɛ bha ábhwephé khóo hrómɛn. Thénthé krɛn, ńgɛ thɛ́nkhwálé, lókhɛ́n hɛ-ɛ, ɛlí gbre. 26Ló akhɔnman npɔ nɔn ali salé, ńnɔn jwan khóo bɛn ka lo le hɔ́n ɔ́nmɔn thethé, áchɛ́se néphan khɛ́n énɛn achán lo si lo bha ló hɔ́n yé, wo le gɛ lo, saji wo khɛ́n wo énɛn wo chán hɛ si ɛbha bhá lo yé, wo lɔ wo lé gɛ bhá.” 27Lótɛ bhringbi tɔ sa: “Nthe, mɛɛ́n na hɛ, tɛmɛ ɛchɛ́ Laza oló mɛn nthe hwan; 28mɛn hɔnsɛ́nhɔn mwannán bha lóne. Anno ha nkɔn, ochɛ́sé wo lɔ, wo le bhá ágbrelí si lókɔn mɛn ma.” 29Ló Ábrahámɛn tɔ sa: “Moyízi le bhwetɔ́trémán ɔ́nmɔn bha hɛ hɔnsɛ́nhɔn thethé éha nkɔn, wó gɛ yé nkɔn bhwe!” 30Ló bhringbi tɔ sa: “Nthe Ábrahámɛn, hɛ bhwe lókɔn ɛtɔ ɔn, áyɔn, lókhɛ́n ále thubhɔ. Kasé lephan bɛn chan mɔngumán thethé lo gɛ wo, lónɔn wo bhá jrɛn wo yítɛ́.” 31Khɛ́n Ábrahámɛn krɛnmɛn sa: “Kasé wo lé dɛn yé Moyízi le bhwetɔ́trémán ɔ́nmɔn bhwe, khɛ́n lephan bhwá nbrɛn chan mɔngumán thethé lo gɛ wo lɔ, wo bha le dɛn yé nkɛ bhwe.”
Currently Selected:
LWIKHI 16: ENT96
Highlight
Share
Copy
Want to have your highlights saved across all your devices? Sign up or sign in
Ebrié New Testament © Bible Society of Côte D'Ivoire, 1996.
