JAN 9
9
Jezwi tɛ lephan bɛn ńmɛbhí phu áhrómɛn-áan phɔ jan
1Lóka Jezwi bha ásitó élo, ńwu lephan bɛn ńmɛbhí phu áhrómɛn-áan. 2Ló mɛ́n yíchwɛmán ébhi lée:
– Yíliéwo, bítɛ khɛ́n lephan lókɔn mɛbhí phu áhrómɛn-áan: Wú mɛɛ́n nbrɛn ne ńtɛ nɔn achɛ mɛ́n mɛbhí phu lée nka mɛ́n the le mɛ́n man ɔ́nmɔn nɔn atɛ ne, nɔn achɛ mɛ́n mɛbhí phu?
3Jezwi kranman wo lée:
– Mɛ́n mɛbhí lɔ́ lókɔn ńgɛ, ále chan mɛ́n neyítɛ́ hrómɛn, saji ále chan mɛ́n the le mɛ́n man ɔ́nmɔn neyítɛ́ hrómɛn. Mɛ́n mɛbhí lɔ́ lókɔn ńgɛ, énɛn salé Yankan sɛ́npɛ́ okhɔ́ mɛ́n phɔ thándi. 4Lóka ácí bháne, áyɔn salé mɛn ní júmán sé lephan achɛ mɛn ma. Ácí ebhá gu, lóka lókɔn álepɛ lephan ábha gɛ lí júmán. 5Lóka khɛ́n mɛn ma áthéji, mɛn nɔn mɛn ni áthéjinɛ́n yéfí.
6Lóka ńtɔ bhwe lókɔn, ńpiɛn mísɛ́-ndu ka áyítathé, ńkhrɛ ájrɛn npabhí, ńmo ánchui mɛphuwo lókɔn mɛ tho, 7ló ńkránman nkɛ lée:
– Tɛmɛ ɛlo chó hɛ́nmɛn Siloe ndu hrómɛn (Siloe, lóthé nɔn ali “Lephan wo chɛ yí”.)
Mɛphuwo lókɔn lo lóne, ńcho mɛ́n hɛ́nmɛn, lóka ńsáji anmá ló anwú yí.
8Mɛphuwo lókɔn, mɛ́n chrégbamán le néphan lócí aphrɛ wui ansá yí, ébhi wo bɛn nbrɛn sa:
– Lephan lókɔn lócí áchré sá yí, wú léli mɛ́n li lókɔn?
9Néphan fe étɔlé:
– Mɛɛ́n nbrɛn.
Lókhɛ́n dɔnbɛn étɔlé:
– Hóo, áleli mɛ́n, khɔ́ pán ńkhɔ nkɛ.
Lókhɛ́n lephan lókɔn mɛ́n nbrɛn ántɔlé:
– Mɛɛ́n bɛn nbrɛn nɔn mɛn ni lókɔn.
10Ló wo ébhi nkɛ sa:
– Kalósi akhɔ tɛ khɛ́n hɛ mɛbhí phwan e?
11Ló ánkranmán wo lée:
– Lephan khɛ́n óche Jezwi, ńtɛ ńpabhí, ńmo chui mɛn mɛ tho, ló ńkránman mɛn lée: “Tɛmɛ ɛlo chó hɛ́nmɛn Siloe ndu hrómɛn.” Mɛn no, lóka mɛn cho hɛ́nmɛn phu, lópán mɛn wú yí.
12Ló wo ébhi mɛphuwo sa:
– Lephan lókɔn bánne ńma ɛ?
– Ló mɛphuwo kranman wo lée, mɛn nɛn yɛn lósi ńma.
Fariziɛnnɛ́n ébhi mɛphuwo áphɔ jan bhwe
13Lómánji, wo hɔn mɛphuwo lo se Fariziɛnnɛ́n. 14Átɛsalé ácí khɛ́n Jezwi tɛ ńpabhí, lókhɛ́n ńmo tɛ mɛphuwo phɔ jan, ácí lókɔn, áli saba. 15Lóhɛ́nthé nɔn Fariziɛnnɛ́n cu ébhi mɛphuwo, lósi akhɔ tɛ khɛ́n mɛ́n mɛbhí phwan. Ló ánkranmán nkɔn lée:
– Ńmo ńpabhí phia mɛn mɛ tho, mɛn cho hɛ́nmɛn, ló thénthé mɛn wú yí.
16Fariziɛnnɛ́n fe étɔlé:
– Lephan khɛ́n atɛ yí yábhɛ lókɔn, ánnɛ́n gɛ chán Yankan yé, átɛsalé ńnɛn ji saba bidí.
Lókhɛ́n dɔnbɛn étɔlé:
– Kalósi lephan ali newo, bha gɛ tɛ́ hɛ́nmɛntányí ban tɛ́ nɛn e?
Ló ágbo ka wo hromɛn.
17Fariziɛnnɛ́n cu ébhi mɛphuwo áphɔ jan lée:
– Lephan lókɔn khɛ́n atɛ hɛ phɔ jan ɔn, bí bhwe nɔn ɛ́tɔ mɛ́n phɔ ɛ?
– Ló mɛphuwo ékranmán nkɔn lée, lephan lókɔn, ńni bhwetɔ́tréwo.
18Lótɛ khɛ́n Jwifunɛ́n-óthemánhɔn le pɔ sa ábhú mímí salé lephan lókɔn, lócí mɛ́n mɛbhí phu, lókhɛ́n thénthé anwú yí, lóhɛ́nthé wo che mɛphuwo néphan bha, 19ló wo ébhi nkɔn sa:
– Lephan lókɔn ɔn, wú mímí nbrɛn ńni hɔ́n bhi? Wú mímí nbrɛn mɛ́n mɛbhí phu áhrómɛn-áan? Ló kalósi akhɔ tɛ khɛ́n thénthé anwú yí e?
20Ló mɛ́n the le mɛ́n man ɔ́nmɔn étɔ sa:
– Lo yɛn salé ńni lo bhi, lo yɛn salé mɛ́n mɛbhí phu áhrómɛn-áan. 21Lókhɛ́n lósi akhɔ tɛ khɛ́n thénthé anwú yí, lo le gɛ yɛ́n, saji lo le gɛ yɛ́n lephan atɛ mɛ́n mɛbhí phwan, ɔ́n mi mɛ́n nbrɛn, mɛ́n lɔ lephan khóo le, ángɛ tɔ mɛ́n nbrɛn phɔ bhwe!
22Lósi akhɔ tɛ khɛ́n mɛ́n the le mɛ́n man ɔ́nmɔn étɔ bhwe yábhɛ nɛn ɔn, wo esó Jwifunɛ́n-óthemánhɔn. Átɛsalé wo lókɔn, wo hamɛ́n si salé lephan kasé ɛtɔlé Jezwi li Mesi, wo bhá tranmán hɛ yɛn wo hɛ́nbhúrɛ si. 23Lóhɛ́nthé nɔn mɛ́n the le mɛ́n man ɔ́nmɔn étɔlé: “Lephan khóo le, ɔ́n mi mɛ́n nbrɛn!”
24Ńdɔn mɔn hrómɛn, Fariziɛnnɛ́n cu che lephan lókɔn khɛ́n ńmɛbhí phrɛ phu, ló wo ékranmán nkɛ lée:
– Yankan hɛ́nmɛn, tɛmɛ ɛtɔ bhwe mɛ́nbrɛ. Tɛmɛ ɛbhó nguhá sé Yankan, lo yɛn salé lephan lókɔn li newo.
25Ló mɛphuwo ékranmán nkɔn lée:
– Lephan lókɔn, khɔ ńni newo, khɔ ńnɛn ni newo, mɛn nɛn yɛn, lókhɛ́n mɛn bhwe míbrɛ mɛn yɛn nɔn ali salé: lócí mɛn ni mɛphuwo, lókhɛ́n thénthé mɛn wú yí.
26Wo bhi mɛphuwo lée:
– Lephan lókɔn bí ńtɛ hɛ? Kalósi ńkhɔ phwan hɛ mɛbhí e?
27– Ló mɛphuwo ékranmán wo lée, mɛn phrɛ kranman hɔ́n, lókhɛ́n ɔ́n ne dɛn ye mɛn bhwe. Ló bítɛ khɛ́n ɔ́n cu hɔ́n ébhi mɛn lóbhwe yábhɛ brɛ npɔ ɛ? Wú hɔ́n lɔ, hɔ́n énɛn ɔ́n ní mɛ́n yíchwɛmán?
28Ló wo étɔ bhwe phromɛn phromɛn sé mɛphuwo, ló wo ékranmán nkɛ lée:
– Hɛ nɔn ɛli lephan lókɔn yíchwɛ́wo, lo-ɛ Moyízi yíchwɛmán le lo. 29Lo yɛn salé Yankan tɔ bhwe se Moyízi, lókhɛ́n lephan lókɔn, lo le yɛn lósi yábhɛ ńchan!
30Ló mɛphuwo ékranmán wo lée:
– Hɔ́n bhwe lókɔn etán mɛn hɛ́nmɛn: lephan lókɔn ɔ́n ne yɛn mɛ́n si ńchan, lótɛ khɛ́n mɛn ńphwan mɛn mɛbhí. 31Lo yɛn salé Yankan le yé nemán bhwe, lókhɛ́n kasé néphan éji Yankan, khɛ́n wo etɛ́ mɛ́n thɛ́n yí apɔ, anyé wo tɔ́. 32Néphan khɛ́n ńmɛbhí phu áhrómɛn-áan, cíbɛn oka ye salé wo tɛ bɛn mɛbhí phwan. 33Kasé lephan lókɔn le chan Yankan yé, anman nɛ́n gɛ tɛ́ yíɛkɛ.
34Wo kranman mɛphuwo lée:
– Wo ho hɛ ne hrómɛn, wo gbɛ hɛ ne hrómɛn, wú hɛ nɔn ɛbhá lie lo bhwe?
Ló wo trɛnmɛn chan hɛ́nbhúrɛ si thandi.
Nánnánmi hromɛn mɛbhí áphu lephan
35Jezwi yɛn salé Fariziɛnnɛ́n tránman mɛphuwo, ló lóka ńgɛ nkɛ, ánmi nkɛ sa:
– Wú ɛbhú Lephan Mi mímí?
36– Ló mɛphuwo ékranmán Jezwi lée:
– Yíliéwo, yán lephan lókɔn bí lephan yábhɛ ńni, lókhɛ́n mɛn mán mui mímí ɛ?
37Ló Jezwi ékrɛnmɛn lée:
– Ɛphrɛ wui, ló mɛ́n nbrɛn nɔn ńya ántɔ bhwe sé hɛ yé.
38– Ló mɛphuwo étɔ sa:
Mɛn mú mímí, ló ńmɔ ntráhɛ́nlé Jezwi hɛ́nmɛn.
39Ló Jezwi étɔlé:
– Mɛn ma mɛn mɔ́ kwa áthéji, ochɛ́sé mɛphumán owú yí, ló néphan khɛ́n ewú yí, wo jrɛn mɛphumán.
40Fariziɛnnɛ́n fe abha lóne, lóka wo ye ábhwe lókɔn Jezwi tɔ, ló wo ébhi mɛphuwo sa:
– Wú mímí ɛbhú salé lo lɔ lo li mɛphumán?
41Ló Jezwi ékranmán wo lée:
– Kasé ɔ́n ní mɛphumán ka ɔ́n ma le lí pɔn, lónian mɛn khɛ́n hɔ́n étɔlé: “Lo ewú yí”, élie salé ɔ́n ma ápɔnlí hrómɛn.
Currently Selected:
JAN 9: ENT96
Highlight
Share
Copy
Want to have your highlights saved across all your devices? Sign up or sign in
Ebrié New Testament © Bible Society of Côte D'Ivoire, 1996.
