JAN 8
8
Wo hɔn bhie bɛn khúthé
1Lóka néphan khúnbrɛn sáji lo bháthó, Jezwi lo Olive-nyá bhóbhó tho. 2Lóka áyé lɛ, ńjuju fítaan, Jezwi saji lo Yankan-khúthé, ló néphan khúnbrɛn jekhɛli, ńchethé ló annie nkɔn yí. 3Bidíyɛ́nmán le Fariziɛnnɛ́n ɔ́nmɔn hɔn bhie bɛn bha se. Bhie lókɔn, ńni bhie bɛn wo hɔn khúthé, wo hɔn-ɛn ya ápasá khúnbrɛn hɛ́nmɛn, 4ló wo ékranmán Jezwi lée:
– Yíliéwo, bhie lókɔn, wo hɔn mɛ́n le sɛ bɛn ɔ́nmɔn khúthé. 5Lo bidí hrómɛn, Moyízi kranman lo lée bhie yábhɛ lókɔn, áyɔn salé okúmú diɛ wɛ́n. Ló hɛ bí bhwe ɛ́tɔ ɛ?
6Ábhwe lókɔn wo tɔ, átɛsa ńmɛ́ nɔn wo khu tre Jezwi lé, ló wo khɔ́ lóphɔ sé nkɛ bhwe. Lókhɛ́n Jezwi bhulé ya, ló ńmo mɛ́n khwɛ ánnrɛ áyítathé. 7Lóka wo ya lóne wo ébhi Jezwi bhwe búdúbúdú, ló ńchánfe tho ánkranmán nkɔn lée:
– Hɔ́n hrómɛn, lephan khɛ́n aka tɛ ne bhrɔ́ɔ́, tɛmɛ anphrɛ mó ábhú kú di bhie lókɔn.
8Ló ńcu mulé ánnrɛ áyítathé. 9Lóka wo ye bhwe lókɔn, wo khúnbrɛn wo sa féne brɛ brɛ mɛn, achan mrɔ́khómán yé alo di miɔ́ yé. Wo yɔ Jezwi brɛ kalé lóne, mɛ́n le bhie lókɔn aya mɛ́n hɛ́nmɛn. 10Jezwi chanfe tho, ló ánmi bhie sa:
– Yán néphan aya ɛ, ka wo e? Wú álepɛ lephan abhɔ hɛ pɔn?
11– Ló bhie étɔlé, ee, Hwánthe, álepɛ lephan abhɔ mɛn pɔn.
– Ló Jezwi kranman bhie sa áyɔn, mɛn lɔ, mɛn nɛn mɔ hɛ pɔn. Tɛmɛ ɛlo, lókhɛ́n ɛle cu tɛ́ ne npɔhɔ́n.]
Jezwi nɔn ali áthéjinɛ́n yéfí
12Ló Jezwi cu ékranmán ápasá lée:
– Mɛn nɔn mɛn ni áthéjinɛ́n yéfí. Lephan kasé ɛ́gɛ mɛn thá, ɛ́bha gɛ mɛpɔ́bhá yéfí, ló ɛbha lé nɛnsi khɔ́ dubhlékhu hromɛn.
13Ló Fariziɛnnɛ́n ékranmán Jezwi lée:
– Ɛlí ndalefɛ sé hɛ bɛn nbrɛn, ló hɛ bhwe lókɔn ɛ́tɔ, álepɛ thé.
14Ló Jezwi ékranmán wo lée:
– Kasé khɛ́n mɛn ní mɛɛ́n nbrɛn phɔ ndalefɛ lɔ, mɛn bhwe mɛɛ́n tɔ, áli ábhwe mímí, átɛsalé mɛn yɛn lósi mɛn chan ma, ló saji mɛn yɛn lósi mɛɛ́n no. Lókhɛ́n hɔ́n, ɔ́n ne yɛn lósi mɛɛ́n no. 15Hɔ́n ebhɔ́ kwa sa néphanmiɔn si ákhɔ́ bhɔ́ kwa, lókhɛ́n mɛn, mɛn nɛ́n mɔ́ lephan kwa. 16Lókhɛ́n kasé mɛn mɔ́ lephan kwa, mɛn kwa mɛn mɔ́, áli ákwa mímí, átɛsalé áleli mɛn míbrɛ pán mɛn mɔ́ kwa, lókhɛ́n mɛn Nthe achɛ mɛn ma, ńma mɛn phɔ. 17Wo lrɛ ha hɔ́n bidí hrómɛn salé, kasé lephan mɔn elí ndalefɛ lókhɛ́n wo mɛ́n librɛ, wo bhwe wo étɔ áli ábhwe mímí. 18Mɛn ní ndalefɛ sé mɛn bɛn nbrɛn, lókhɛ́n mɛn Nthe achɛ mɛn ma, mɛ́n lɔ anní ndalefɛ sé mɛn.
19Ló wo ébhi Jezwi sa:
– Bánne hɛ The bha?
Jezwi kranman wo lée:
– Ɔ́n ne yɛn mɛn, saji ɔ́n ne yɛn mɛn Nthe lɔ, kasé ɔ́n yɛ́n mɛn, ka ɔ́n ma yɛ́n mɛn Nthe lɔ.
20Lóka Jezwi élie yí Yankan-khúthé, lósi wo hɔn ńphaha láka tre, lóne nɔn ńtɔ ábhwe khúnbrɛn lókɔn. Lókhɛ́n álepɛ lephan brɛ abho mɔ́n lo mɛ́n phɔ, átɛsalé mɛ́n cí ka si.
“Ɔ́n ma le gɛ ló lósi mɛɛ́n no”
21Ló Jezwi cu ékranmán wo lée:
– Mɛn mán no, ɔ́n ma nɛn mɛn, ló ɔ́n ma khú hɔ́n ne hrómɛn. Ɔ́n ma lé gɛ ló lósi mɛɛ́n no.
22Ló Jwifunɛ́n étɔlé:
– Ɔ́n wu mɛ́n bhwe bɛn ńya ántɔ a: “Ɔ́n ma le gɛ ló lósi mɛɛ́n no, wú wɛ́n ánman wɛ́n mɛ́n bɛn nbrɛn”?
23Jezwi kranman wo lée:
– Hɔ́n, ɔ́n ma áthéji, lókhɛ́n mɛn, mɛn chan átho. Hɔ́n, ɔ́n ni áthéjinɛ́n, lókhɛ́n mɛn, mɛn nɛn ni áthéji lephan. 24Lóhɛ́nthé nɔn mɛɛ́n kranmán hɔ́n lée, ɔ́n ma khú hɔ́n ne hrómɛn. Ɔ́n ma khú hɔ́n ne hrómɛn, “kasé mɛn lephan yábhɛ mɛn ni”, ɔ́n ne bhu mímí.
25– Ló wo bhi Jezwi sa: hɛ, ébí lephan le hɛ?
Ló Jezwi kranman wo lée:
– Lóbhwe tɛɛ nɔn mɛn chan ásithwá cí-áan mɛɛ́n tɔ sé hɔ́n. 26Hɔ́n phɔ, ápɛ ábhwe búdúbúdú bháne mɛn mán tɔ, le ákwa búdúbúdú bháne mɛn mán mɔ́. Lephan achɛ mɛn ma, ńni lephan átɔ bhwe mímí, ló mɛ́n bhwe míbrɛ tɛɛ ńtɔ se mɛn ye, lónɔn mɛn mó tɔ sé áthéjinɛ́n.
27Wo le yɛn salé lo The Yankan phɔ bhwe nɔn Jezwi étɔ sé wo yé. 28Ló ánkranmán nkɔn lée:
– Lóka ɔ́n ma hɔ́n Lephan Mi yroman tré tho, lónɔn “ɔ́n ma yɛ́n mɛn lephan yábhɛ mɛn ni”; ló ɔ́n ma yɛ́n salé mɛn nɛ́n tɛ́ mɛn bɛn nbrɛn thɛ́n yí mɛn pɔ: lókhɛ́n ábhwe míbrɛ mɛn Nthe lie mɛn, lónɔn mɛn lɔ mɛɛ́n tɔ. 29Lephan achɛ mɛn ma, ńma mɛn phɔ, ńnɛn yɔ mɛn míbrɛ kalé, átɛsalé ácí khúnbrɛn, mɛn tɛ́ mɛ́n thɛ́n yí apɔ.
30Néphan búdúbúdú khɛ́n aye ábhwe lókɔn Jezwi étɔ, wo bhui mímí.
Líhɛ le gangánmán
31Ló Jezwi ékranmán Jwifunɛ́n abhui mímí lée:
– Kasé ɔ́n gɛlé mɛn bhwetɔ́ hrómɛn, ɔ́n ma lí mɛn yíchwɛmán mímí nbrɛn; 32ɔ́n ma yɛ́n ábhwe mímí, ló ábhwe mímí bha swa hɔ́n.
33Ló wo kranman nkɛ lée:
– Lo li Ábrahámɛn jímiɔn, lo le li lephan bɛn gangánmán. Ló kalósi ɛkhɔ ɛ́kranmán lo lée: Ábhwe mímí bha swa hɔ́n e?
34Ló Jezwi ékranmán wo lée:
– Mímí mɛɛ́n kranmán hɔ́n: lephan kasé ɛtɛ́ ne, ɛli ńne gangánwo. 35Gangánwo lé gɛ bhá ámándo hromɛn ákakhúnbrɛn, lókhɛ́n lephan ali nmi mɛ́n, anmá ámándo hromɛn ákakhúnbrɛn. 36Lókhɛ́n kasé Nmi éswa hɔ́n, ɔ́n ma ká hɔ́n bɛn nbrɛn lé mímí nbrɛn. 37Mɛn yɛn salé ɔ́n ni Ábrahámɛn jímiɔn, lókhɛ́n mɛn bhwetɔ́ ɔ́n ne dɛn do hɛ́nthé, hɔ́n énɛn mɛn ɔ́n wɛ́n. 38Mɛn Nthe bhwe alie mɛn, lónɔn mɛɛ́n tɔ, lókhɛ́n hɔ́n lɔ, hɔ́n the bhwe atɔ se hɔ́n, lóyí nɔn hɔ́n etɛ́.
39Ló wo ékranmán Jezwi lée:
– Lo the nɔn ali Ábrahámɛn.
– Ló Jezwi ékranmán wo lée, kasé mímí nbrɛn ɔ́n ní Ábrahámɛn miɔn, ka hɔ́n etɛ́ mɛ́n yí ńtɛ. 40Lókhɛ́n thénthé ábhwe mímí ali Yankan phɔ bhwe mɛɛ́n tɔ sé hɔ́n yé, lóhɛ́nthé hɔ́n énɛn mɛn ɔ́n wɛ́n. Áyí yábhɛ lókɔn, Ábrahámɛn le tɛ! 41Lókhɛ́n hɔ́n the yí yábhɛ atɛ, lónɔn hɔ́n etɛ́.
Ló wo kranman Jezwi lée:
– Lo le li ńmiɔ́ wo ho ábhácathé, Yankan míbrɛ li lo The.
42Ló Jezwi kranman wo lée:
– Kasé mímí nbrɛn Yankan lí hɔ́n The, ka ɔ́n ma pɔ́ mɛn, átɛsalé Yankan yé mɛn chan ma, mɛ́n hɛ́n hrómɛn nɔn mɛn ma, léli mɛn nbrɛn hɛ́n hrómɛn, lókhɛ́n mɛ́n nɔn ńchɛ mɛn ma. 43Ló bítɛ khɛ́n mɛn bhwe mɛɛ́n tɔ, ɔ́n ne yé lóthé ɛ? Lóthé nɔn ali salé, ɔ́n ne gɛ yé mɛn bhwe mɛɛ́n tɔ. 44Hɔ́n the nɔn óche logbo, ló hɔ́n énɛn ɔ́n tɛ́ hɔ́n the thɛ́n yí apɔ. Achan ásithwá cí-áan, ńni lephan áwɛ́n lephan. Ńnɛn ma ábhwe mímí hrómɛn, átɛsalé álepɛ ábhwe mímí mɛ́n hrómɛn. Kasé annítan, mɛ́n yéne áli ábhwe mímí, átɛsalé ńni kpakpráwo, ló mɛ́n nɔn ńni nkpakprá khúnbrɛn ló the. 45Lókhɛ́n ábhwe mímí mɛɛ́n tɔ, lóhɛ́nthé ɔ́n ne bhú mɛn mímí. 46Hɔ́n hrómɛn, abɛn nɔn ábha gɛ tɔlé mɛn tɛ ne? Lókhɛ́n kasé mɛɛ́n tɔ bhwe mímí, ló bítɛ khɛ́n ɔ́n ne bhú mɛn mímí ɛ? 47Lephan khɛ́n achan Yankan yé, tɛmɛ andi njɛlé yé Yankan bhwe. Lókhɛ́n kasé ɔ́n ne yé mɛn bhwe, lóthé nɔn ali salé ɔ́n ne chan Yankan yé.
Jezwi le Ábrahámɛn ɔ́nmɔn
48Ló Jwifunɛ́n ékranmán Jezwi lée:
– Wú lo le phrɛ kranman hɛ lée ɛli Samari khúbhɛ́ lephan, ló nánnánmi phromɛn bha hɛ phɔ?
49– Ló Jezwi kranman wo lée:
– Nánnánmi phromɛn le bha mɛn phɔ. Mɛn ni lephan mɛɛ́n ji mɛn Nthe, lókhɛ́n hɔ́n, ɔ́n ne ji mɛn. 50Mɛn nɛ́n nɛn ńguhá sé mɛɛ́n nbrɛn. Lókhɛ́n ápɛ lephan nbrɛn bháne énɛn ńguhá sé mɛn, khɛ́n ebhɔ́ kwa sé mɛn. 51Mímí mɛɛ́n kranmán hɔ́n: lephan kasé ɛji mɛn bhwetɔ́, ɛbha le khú bhrɔ́ɔ́.
52Ló Jwifunɛ́n ékranmán Jezwi lée:
– Thénthé lo yɛn mímí nbrɛn salé nánnánmi phromɛn bha hɛ phɔ! Ábrahámɛn khu, bhwetɔ́trémán lɔ khu, lótɛ khɛ́n ɛ́tɔlé: “Lephan kasé ɛji mɛn bhwetɔ́, ɛbha le khú bhrɔ́ɔ́.” 53Wú ɛbhú salé ɛbanbrɛn lo the Ábrahámɛn akhu? Bhwetɔ́trémán lɔ khu. Ló hɛ ɔn, bí lephan ɛbhú hɛ nbrɛn ɛ?
54Jezwi kranman wo lée:
– Kasé mɛn mó nguhá sé mɛɛ́n nbrɛn, lónguhá yábhɛ lókɔn, áli áyí wrɛ́. Mɛn Nthe nɔn ali lephan ebhó nguhá sé mɛn, mɛ́n nɔn ńni lephan hɔ́n étɔlé: “Ńni lo Yankan”, 55lókhɛ́n ɔ́n ne yɛn mɛn Nthe. Mɛn-ɛ mɛn yɛn. Kasé mɛɛ́n tɔlé mɛn nɛn yɛn mɛn Nthe, mɛn mán ní kpakpráwo sa hɔ́n a. Lókhɛ́n mɛn yɛn mɛn Nthe, ló mɛɛ́n ji mɛ́n bhwetɔ́. 56Ábrahámɛn ali hɔ́n the, ńpɔ salé anwú mɛn cí wo bhá hó mɛn, ńwu ácí lókɔn, ló áli áphɔhá se.
57Ló Jwifunɛ́n ékranmán Jezwi lée:
– Ɛka li ńpá grebhɛ le áwɔ́, ló ɛwu Ábrahámɛn?
58Ló Jezwi kranman nkɔn sa:
Mímí mɛɛ́n kranmán hɔ́n: lóka wo ka ho Ábrahámɛn ɔn, mɛn máne.
59Wo khwɛn mú wo élo kú dia Jezwi, lókhɛ́n ńno hrɔman, lo ńchan Yankan-khúthé thándi.
Currently Selected:
JAN 8: ENT96
Highlight
Share
Copy
Want to have your highlights saved across all your devices? Sign up or sign in
Ebrié New Testament © Bible Society of Côte D'Ivoire, 1996.
