JAN 7
7
Jezwi mɛ́n hɔnsɛ́nhɔn le bhui mímí
1Lómánji Jezwi ékhali Galile gotho, lókhɛ́n ńnɛn pɔ sa anchré Jude gotho, átɛsalé Jwifunɛ́n-óthemánhɔn abha lóne énɛn mɛ́n wɛ́n si. 2Jwifunɛ́n fɛ́thi bɛn óche ádɛgɔn-nkhú fɛ́thi ágbali phɔ, 3ló Jezwi mɛ́n hɔnsɛ́nhɔn ékrɛnmɛn lée:
– Chan krɛn féne, ló tɛmɛ ɛló Jude gotho ochɛ́sé hɛ yíchwɛmán owú hɛ yí ɛtɛ́. 4Lephan kasé ɛ́nɛn salé néphan khúnbrɛn oyɛ́n hɛ lephan yábhɛ ɛli, áleyɔn sa ɛtɛ́ yí hrɔman. Hɛ yí lókɔn si ɛtɛ di, áyɔn salé ɛhɔ́n hɛ nbrɛn thándi sé néphan khúnbrɛn owú.
5(Átɛsalé Jezwi mɛ́n hɔnsɛ́nhɔn nbrɛn lɔ le bhui mímí.) 6Ló Jezwi kranman nkɔn lée:
– Mɛn ka mɛn mó tɛ́ yí, áka bha. Hɔ́n ékɛ, ákakhúnbrɛn yɔn se hɔ́n. 7Hɔ́n, áthéjinɛ́n le gɛ sa hɔ́n mɛ. Lókhɛ́n mɛn, wo ésa mɛn mɛ, átɛsalé ákakhúnbrɛn mɛɛ́n kranmán wo lée wo yítɛ́ le yɔn. 8Tɛmɛ ɔ́n nó fɛ́thi gɔn, lókhɛ́n mɛn mɛn nɛn no, átɛsalé mɛn ékɛ áka di lóka.
9Lóka ńtɔ bhwe lókɔn, ló ńjran chre Galile gotho.
Jezwi lo elí ádɛgɔn-nkhú fɛ́thi
10Lómánji, lóka mɛ́n hɔnsɛ́nhɔn lo fɛ́thi gɔn, ló Jezwi lɔ lo lóne lókhɛ́n ńnɛn dɛn néphan wui, ńhrɔ́man no. 11Fɛ́thi gɔn lóne, Jwifunɛ́n-óthemánhɔn énɛn Jezwi ló wo ébhi néphan sa:
– Yán bánne ńma?
12Ló ápasá hrómɛn, néphan khúnbrɛn étɔ mɛ́n phɔ bhwe. Lephan fe étɔlé lephan lókɔn ńni lephan bhwá, saji fe étɔlé léliló, lephan lókɔn, ńni lephan bɛn ékhrɛ néphan. 13Ló álepɛ lephan brɛ étɔ bhwe mímí sé Jezwi, wo esó Jwifunɛ́n-óthemánhɔn hɛ́nthé.
14Lóka wo li fɛ́thi ábhúri thethé, Jezwi lo Yankan-khúthé élie yí, 15etán Jwifunɛ́n-óthemánhɔn hɛ́nmɛn, ló wo étɔlé:
– Kalósi lephan lókɔn khɔ yɛn bhwe ban tɛ nɛn e? Ńni lephan bɛn álepɛ lephan álie bhwe.
16Ló Jezwi kranman nkɔn lée:
– Mɛn yí mɛɛ́n nie néphan, ále chan mɛn nbrɛn yé, lókhɛ́n áchan Yankan achɛ mɛn ma yé. 17Lephan apɔ salé atɛ́ Yankan thɛ́n yí apɔ, lephan lókɔn, ángɛ yɛ́n kasé mɛn yí mɛɛ́n nie néphan, áchan Yankan yé, saji ángɛ yɛ́n kasé áli mɛɛ́n bɛn nbrɛn thɛ́n hrómɛn bhwe. 18Lephan khɛ́n étɔ mɛ́n bɛn nbrɛn thɛ́n hrómɛn bhwe, ńni lephan énɛn nguhá sé mɛ́n bɛn nbrɛn. Lókhɛ́n kasé lephan énɛn nguhá sé lephan achɛ ńma, lephan lókɔn, ńni lephan étɔ bhwe mímí, ló álepɛ ńkpakprá mɛ́n hrómɛn. 19Wú Moyízi le se hɔ́n bidí? Lótɛ khɛ́n hɔ́n hrómɛn, álepɛ lephan brɛ éji ábidí. Ló bítɛ khɛ́n hɔ́n énɛn mɛn wɛ́n si ɛ?
20Ló ápasá ékrɛnmɛn lée:
– Nánnánmi phromɛn bha hɛ phɔ!
Abɛn nɔn énɛn hɛ awɛ́n ɛ?
21Ló Jezwi kranman nkɔn lée:
– Mɛn tɛ yíbɛn, ló lóyí lókɔn etán hɔ́n khúnbrɛn hɛ́nmɛn! 22Moyízi chɛ hɔ́n lée ɔ́n jan hɔ́n miɔn khɛn (lókhɛ́n ále chan Moyízi nbrɛn yé, hɔ́n jisɛmánhɔn nɔn aphrɛ tɛ yí lókɔn) ló saba cí lɔ ɔ́n jan ńmiɔ́ khɛn! 23Kasé ójan ńmiɔ́ khɛn saba cí, lókhɛ́n ló-ɛ áleli ábidí khrɛ, ló bítɛ khɛ́n lephan mɛn tɛ phɔ jan saba cí hɛ́nthé, hɔ́n édo thɛ́nyan sé mɛn ɛ? 24Ɔ́n ne bhɔ́ mɛsó kwa, lókhɛ́n tɛmɛ ɔ́n mɔ́ kwa ábhwe mímí hrómɛn.
Wú Jezwi li Mesi?
25Jeruzalɛ́mɛn khúbhɛ́nɛ́n fe étɔ sa:
– Lephan khɛ́n athemánhɔn énɛn awɛ́n ɔn, wú léli mɛ́n nɔn ńni lókɔn? 26Nɛn mɛ́n nɔn ńya ápasá hrómɛn ántɔ bhwe, lókhɛ́n álepɛ lephan brɛ áphwan mɛ́n tɔ bhwe. Wú mímí nbrɛn athemánhɔn yɛn salé ńni Mesi? 27Lókhɛ́n Mesi ɔn, lóka ánman má, álepɛ lephan ábha yɛ́n mɛ́n si ńchan, lókhɛ́n lephan lókɔn, lo khúnbrɛn lo yɛn mɛ́n si ńchan.
28Lóka Jezwi élie yí Yankan-khúthé, ńnukhwɛ́ salé:
– Wú mímí nbrɛn ɔ́n yɛn mɛn lephan yábhɛ mɛn ni, ló ɔ́n yɛn mɛn si mɛn chan? Mɛn nɛn ma mɛn nbrɛn hɛ́n hrómɛn, lókhɛ́n lephan achɛ mɛn ma, ńni lephan bɛn ógɛ bhú mímí. Lephan lókɔn, ɔ́n ne yɛn, 29lókhɛ́n mɛn mɛn yɛn, átɛsalé mɛ́n yé nɔn mɛn chan ma, ló mɛ́n nɔn ńchɛ mɛn ma.
30Ló wo énɛn wo hɔ́n Jezwi, lókhɛ́n álepɛ lephan brɛ abho mɔ́n pɛpɛ, átɛsalé mɛ́n cí ka si. 31Lókhɛ́n ápasá hrómɛn néphan búdúbúdú bhui mímí ló wo étɔlé: “Lóka Mesi bha bhá, wú ánman tɛ́ hɛ́nmɛntányí bánbrɛn lephan lókɔn?”
Wo chɛ ngbumán lo ehɔ́n Jezwi
32 Fariziɛnnɛ́n ye ábhwe ápasá étɔ Jezwi phɔ, ló wo le nphahamán-óthemánhɔn ɔ́nmɔn wo chɛ ngbumán lo ehɔ́n Jezwi. 33Ló Jezwi ékranmán nkɔn lée:
– Mɛn mán gɛ hɔ́n ɔ́nmɔn chré kpɛ́bɛn, lómánji mɛn mán sáji no gɛ lephan achɛ mɛn ma. 34Ɔ́n ma nɛn mɛn, lókhɛ́n ɔ́n ma lé gɛ mɛn, átɛsalé ɔ́n ma lé gɛ ló mɛn si mɛn man má.
35Ló Jwifunɛ́n ya wo hromɛn ébhi wo bɛn nbrɛn sa:
– Bánne ánman hɛ́n no lókhɛ́n lo bha lé gɛ? Wú ánman no gɛ Jwifunɛ́n achranmanlé bha Grɛ́si khúbhɛ́nɛ́n hrómɛn, ló ánman nie nkɔn yí? 36Ló bí bhwe li lókɔn ántɔlé ɔ́n ma nɛn mɛn, lókhɛ́n ɔ́n ma lé gɛ mɛn, átɛsalé ɔ́n ma lé gɛ ló mɛn si man má.
Ńdubhɛ ali ńmɛpɔ́bhá ndu
37Fɛ́thi cí míbrɛ aphuji, áli ácí khóo, Jezwi chanfe ya ápasá hɛ́nmɛn, ló annúkhwɛ́ tɔ sa:
– Lephan kasé ńdukro ehɔ́n hɛ, tɛmɛ ɛbhá mɛn yé bha nán ndu. 38Yankan hrɔ́ étɔlé: “Lephan kasé ɛbhu mɛn mímí, ádubhɛ ali ńmɛpɔ́bhá ndu, bha chán hɛ thɛ́n hrómɛn bie thándi”.
39(Néphan abhu Jezwi mímí, wo bhá gɛ Nánnánmi, lóhɛ́nthé nɔn Jezwi tɔ bhwe lókɔn. Lóka lókɔn, wo ka bho Nánnánmi se néphan, átɛsalé Jezwi ka gɛ nguhá).
Jezwi hɛ́nthé ágbo ka ápasá hrómɛn
40Néphan abha ápasá hrómɛn, lóka wo ye ábhwe lókɔn, ló wo étɔ sa:
– Lephan lókɔn mímí nbrɛn ńni Bhwetɔ́tréwo!
41Néphan dɔnbɛn étɔlé:
– Mɛ́n nɔn ńni Mesi!
– Lókhɛ́n fe étɔlé: wú Mesi gɛ chán Galile gotho? 42Yankan hrɔ́ étɔlé Mesi bha lí Davi njibhi, ló wo bhá ho-e Bɛtelɛ́mɛn ali ákhúbhɛ́ si Davi phrɛ chre.
43Jezwi hɛ́nthé ágbo ka ápasá hrómɛn. 44Néphan fe énɛn ahɔ́n Jezwi, lókhɛ́n álepɛ lephan brɛ abho mɔ́n pɛpɛ.
Jwifunɛ́n-óthemánhɔn le bhu Jezwi mímí
45Lóka ngbumán saji lo, nphahamán-óthemánhɔn le Fariziɛnnɛ́n ɔ́nmɔn ébhi nkɔn sa:
– Bítɛ khɛ́n ɔ́n ne hɔn-ɛn ɔ́nmɔn bha ɛ?
46Ló ngbumán ékranmán nkɔn lée:
– Álepɛ lephan ágɛ tɔ bhwe brɛn lephan lókɔn.
47– Ló Fariziɛnnɛ́n ékranmán nkɔn lée, wú hɔ́n lɔ, wo lɔ hɔ́n hɛ́nphe phu? 48Wú athemánhɔn le Fariziɛnnɛ́n ɔ́nmɔn hrómɛn ɔn, ápɛ lephan brɛ abhu lephan lókɔn mímí? 49Ápasá lókɔn, wo le yɛn Moyízi bidí, lóhɛ́nthé Yankan phiamɔ́n sé wo.
50Fariziɛnnɛ́n hrómɛn ápɛ lephan bɛn óche Nikhodɛmɛn, lephan lókɔn, lócí ńphrɛ no wu Jezwi, ló ánkranmán mɛ́n jɔn lée:
51– Kasé lo éya lo bidí tho, lo bhá le gɛ bhɔ́ lephanmi kwa phú, lómánji ánnɛ mɛ́n sé lo yé, lókhɛ́n lo yɛ́n mɛ́n yí ńtɛ.
52Ló wo ékranmán Nikhodɛmɛn lée:
– Wú hɛ lɔ Galile ɛchan? Tɛmɛ ɛkán Yankan hrɔ́, ló ɛ́bha yɛ́n salé álepɛ bhwetɔ́tréwo brɛ achan Galile.
[ 53Lómánji, wo khúnbrɛn wo saji lo wo bháthó.
Currently Selected:
JAN 7: ENT96
Highlight
Share
Copy
Want to have your highlights saved across all your devices? Sign up or sign in
Ebrié New Testament © Bible Society of Côte D'Ivoire, 1996.
