JAN 10
10
Gbankhran-bówo le ńgbankhran phɔ yandran obhu
1– Mímí mɛɛ́n kranmán hɔ́n: lephan khɛ́n abha lé khɔ́ ákhúmɛ́n ká ńgbankhran kɔ mɛn, lókhɛ́n ábha khɔ́ si nankhɛ káne, lephan lókɔn ńni sídowo le khokhroháwo. 2Lókhɛ́n lephan ábha khɔ́ ákhúmɛ́n ká kɔ́ mɛn, lephan lókɔn, mɛ́n nɔn ńni gbankhran-bówo. 3Sibówo phwan nkɛ si, ló ńgbankhran yé mɛ́n tɔ́. Lóka ánche mɛ́n gbankhran brɛ brɛ khúnbrɛn hɛ́n ali, wo yé mɛ́n tɔ́, ló ándo nkɔn thándi. 4Lóka ńdo nkɔn thandi ngbophro, anthwási nya wo hɛ́nmɛn, ló wo nɛnsi gɛ nkɛ thá, átɛsalé wo yɛn mɛ́n tɔ́ si akhɔ édɛn. 5Wo bha lé gɛ lephan nankhɛ thá, lókhɛ́n wo bhá chán lephan nankhɛ phɔ wá féne, átɛsalé wo le yɛ́n lótɔ́ yábhɛ édɛn che wo.
6Jezwi bhu yandran lókɔn se wo, lókhɛ́n wo le yé lóthé.
Jezwi nɔn ali gbankhran-bówo bhwá
7Ló Jezwi cu étɔlé:
– Mímí mɛɛ́n kranmán hɔ́n: ńgbankhran kɔ lókɔn wo ditre, mɛn nɔn mɛn ni lókhúmɛ́n. 8Néphan khúnbrɛn athwasi bha mɛn hɛ́nmɛn, wo li sídomán le khokhrohamán, ló ńgbankhran lé dɛn yé wo bhwe. 9Mɛn nɔn mɛn ni ákhúmɛ́n, kasé lephan ɛkhɔ mɛn phɔ ka kɔ mɛn, wo bhá swa hɛ. Hɛ lephan lókɔn ɛ́bha ká khúthé, ɛ́bha chán khúthé thándi, ló ɛ́bha gɛ hɛ nɛnlí. 10Lókhɛ́n kasé sídowo ebhá, mɛ́n ékɛ áli sídosí, lephan wɛ́n, le áyí lɔ hɛ́nthé nɔn anmá. Lókhɛ́n mɛn-ɛ mɛn ma, ochɛ́sé ńgbankhran obhá mɛpɔ́, ló wo gɛ mɛpɔ́bhá othúbhɔ.
11Mɛn nɔn mɛn ni gbankhran-bówo bhwá. Lephan ali gbankhran-bówo bhwá, anmó mɛ́n mɛpɔ́bhá sé mɛ́n gbankhran. 12Júmánwo aleli gbankhran-bówo, lókhɛ́n ńgbankhran le li mɛ́n ékɛ, lóka ńwu phópho ebhá, anyɔ́ ńgbankhran khwá wá féne, phópho wáká wo hromɛn, ló ánchranmán nkɔn lé. 13Kasé júmánwo ewá féne, átɛsalé mɛ́n-ɛ, júmánwo pán ńní, ló ńgbankhran bhwe le li mɛ́n bhwe. 14-15Mɛn nɔn mɛn ni gbankhran-bówo bhwá. Lósi yábhɛ brɛ mɛn Nthe khɔ yɛn mɛn, lókhɛ́n mɛn lɔ mɛn yɛn mɛn Nthe, lósi yábhɛ brɛ nɔn mɛn khɔ yɛn mɛn gbankhran, ló mɛn gbankhran lɔ yɛn mɛn. Ló mɛn pɔ salé mɛn mó mɛn mɛpɔ́bhá sé mɛn gbankhran. 16Mɛn pɛ ńgbankhran dɔnbɛn ale bha ákɔ lókɔn hromɛn. Áyɔn salé wo lɔ mɛn khwɛ́n wo má, wo yé mɛn tɔ́, ló opɛ ńgbankhran gbe míbrɛ le ńgbankhran-bówo míbrɛ.
Gbankhran-bówo bhwá (10.11)
17Mɛn Nthe pɔ mɛn, átɛsalé mɛn ni lephan bɛn abhó mɛ́n mɛpɔ́bhá sé néphan, lókhɛ́n ácu bhó yɛn. 18Álepɛ lephan ábha gɛ bhó mɛn mɛpɔ́bhá yɛn. Mɛɛ́n nbrɛn thɛ́npɔ́ hrómɛn nɔn mɛn mó mɛn mɛpɔ́bhá sé néphan. Mɛn gɛ mɔ́nsi mɛn mó mɛn mɛpɔ́bhá sé néphan, ló saji mɛn gɛ mɔ́nsi mɛn mó yɛn. Mɛn Nthe yí achɛ mɛn lée mɛn tɛ́, lónɔn ali lókɔn.
19Jezwi bhwe lókɔn atɔ hɛ́nthé, ágbo ka Jwifunɛ́n hrómɛn. 20Ló wo hromɛn néphan búdúbúdú étɔlé:
– Nánnánmi phromɛn bha mɛ́n phɔ! Ńfan etɛ! Bítɛ khɛ́n hɔ́n eyé mɛ́n bhwe?
21Lókhɛ́n dɔnbɛn étɔlé:
– Lephan khɛ́n nánnánmi phromɛn bha mɛ́n phɔ, ánnɛn gɛ tɔ bhwe yábhɛ nɛn. Lephan khɛ́n nánnánmi phromɛn bha mɛ́n phɔ, wú ángɛ phwan mɛphumán mɛbhí?
Jwifunɛ́n le dɛn do Jezwi
22Wo elí Yankan-nkhú fɛ́thi Jeruzalɛ́mɛn khúbhɛ́. Lóka lókɔn, áli áka bɛn ágba di khrákhrá. 23Yankan-khúthé ápɛ ási bɛn óche Salomɔn sitó, ló Jezwi ya lóne ésɔdwan. 24Lóka lókɔn nɔn Jwifunɛ́n jekhali Jezwi, ló wo ébhi nkɛ sa:
– Bítɛ khɛ́n ɛchɛ́ thɛ́n lí lo bánban nɛn?
– Tɔ bhwe mímí bɛn se lo yé a! Kasé hɛ nɔn ɛli Mesi, tɛmɛ ɛphwan hɛ́nmɛn tɔ gbée.
25Jezwi ékranmán wo lée:
– Mɛn phrɛ tɔ se hɔ́n, lókhɛ́n ɔ́n ne bhu mɛn mímí. Áyí khɛ́n mɛn tɛ́ mɛn Nthe hɛ́n hrómɛn, ló nbrɛn elí mɛn phɔ ndalefɛ. 26Lókhɛ́n ɔ́n ne bhú mímí, átɛsalé ɔ́n ne bha mɛn gbankhran hromɛn. 27Mɛn gbankhran yé mɛn tɔ́. Mɛn yɛn wo, ló wo gɛ mɛn thá. 28Mɛn se wo ńmɛpɔ́bhá álephú, wo bha le khú bhrɔ́ɔ́, ló álepɛ lephan ábha ló mɛn mɔ́n mɛn khwɛ́n wo yɛn. 29Mɛn Nthe yí ase mɛn, ábanbrɛn áyí khúnbrɛn, ló álepɛ lephan ábha ló mɛn Nthe mɔ́n mɛn bhó yíbɛn yɛn. 30Mɛn le Nthe ɔ́nmɔn oli lephan brɛ.
31Ncɛ́n lɔ Jwifunɛ́n cu khwɛn mú lo ekú dia Jezwi. 32Ló Jezwi ékranmán wo lée:
– Mɛn Nthe hɛ́n hrómɛn, mɛn tɛ yíbhwá búdúbúdú hɔ́n hɛ́nmɛn. Ló mɛɛ́n mi hɔ́n, lóyí khúnbrɛn lókɔn mɛn tɛ ɔn, lóbɛn hɛ́nthé nɔn hɔ́n énɛn ɔ́n kúmú dia mɛn wɛ́n ɛ?
33Ló wo ékranmán Jezwi lée:
– Léli áyíbhwá ɛtɛ hɛ́nthé nɔn lo énɛn lo kúmú dia hɛ wɛ́n, lókhɛ́n hɛ bhwe phromɛn phromɛn ɛ́tɔ sé Yankan hɛ́nthé: hɛ lɔ lephanmi tɛɛ le hɛ, lókhɛ́n ɛ́nɛn ɛhɔ́n hɛ nbrɛn jrɛn Yankan!
34Jezwi ékranmán wo lée:
– Wú hɔ́n bidí hrómɛn Yankan le phrɛ tɔlé: “Ɔ́n ni yankan?” 35Mímí olé gɛ hɔ́n Yankan hrɔ́ bhwe atɔ fɔ́nká bu. Ló kasé néphan aye Yankan bhwe, lókhɛ́n ábidí éche wo lɔ Yankan ɔn, 36ló bítɛ khɛ́n mɛn lókɔn Yankan san mɛn, ńchɛ mɛn ma áthéji, mɛn bhwe lókɔn mɛn tɔlé, mɛn ni Yankan Mi, lóhɛ́nthé ɔ́n khɔ lóhrómɛn hɔ́n esé mɛn bhwe lée mɛɛ́n tɔ bhwe phromɛn phromɛn sé Yankan ɛ? 37Kasé mɛn nɛ́n tɛ́ mɛn Nthe yí apɔ, ɔ́n ne bhú mɛn mímí. 38Lókhɛ́n kasé mɛn tɛ́ mɛn Nthe yí apɔ, kasé ɔ́n ne pɔ sa ɔ́n mú mɛn mímí lɔ, áyɔn salé mɛn yí mɛn tɛ́, ló-ɛ tɛmɛ ɔ́n mú mímí, ochɛ́sé ɔ́n yɛ́n salé mɛn Nthe bha mɛn phɔ, ló mɛn lɔ mɛn ma mɛn Nthe phɔ.
39Ncɛ́n lɔ wo cu lo wo ehɔ́n Jezwi, lókhɛ́n ńsa féne.
40Jezwi cu bhurika Judɛn dúji, lósi Jan bha ehá néphan nduhɛ́n, ló ńjran chre lóne. 41Néphan búdúbúdú bha gɛ, ló wo étɔlé:
– Jan le tɛ hɛ́nmɛntányí míbrɛ, lókhɛ́n lephan lókɔn phɔ bhwe khúnbrɛn ńtɔ, ló-ɛ áli mímí.
42Lóne, néphan búdúbúdú bhu Jezwi mímí.
Currently Selected:
JAN 10: ENT96
Highlight
Share
Copy
Want to have your highlights saved across all your devices? Sign up or sign in
Ebrié New Testament © Bible Society of Côte D'Ivoire, 1996.
