JAN 11
11
Lóka Laza khu
1Lɔ́phɔwo bɛn bháne óche Laza. Laza lókɔn, ńchan Betani khúbhɛ́, ali ási Mari le mɛ́n hɔnmia Máta ɔ́nmɔn chan. 2(Mari lókɔn, mɛ́n nɔn ńni bhie ahɔn nɔ́ndu saha Jezwi nta phɔ, lókhɛ́n abho mɛ́n hɛ́nyro éphu yɛn. Mɛ́n hɔnsɛ́n Laza nɔn álɔ́ ehɔ́n.) 3Mari le mɛ́n hɔnmia Máta ɔ́nmɔn chɛ lephan lo ékranmán Jezwi lée:
– Hwánthe, hɛ jɔ lɔ́ ehɔ́n.
4Lóka Jezwi ye bhwe lókɔn ló ántɔlé:
– Laza lɔ́ lókɔn, áleli ákhú lɔ́. Álɔ́ lókɔn, lóphɔ nɔn néphan bha khɔ́ bhó nguhá sé Yankan, saji lóphɔ nɔn Yankan Mi nguhá bha khɔ́ thándi.
5Jezwi pɔ Máta le mɛ́n hɔnmia, ńpɔ Laza lɔ. 6Lótɛ khɛ́n lóka ńye salé Laza lɔ́ ehɔ́n, ńjran chre lósi ńma áli ńcíbhí mɔn, 7lómánji ńkránman mɛ́n yíchwɛmán lée:
– Ocu sáji ló Jude gotho.
8Ló mɛ́n yíchwɛmán ékrɛnmɛn lée:
– Yíliéwo, npijɔn tɛɛ lóne wo lo wo kúmú dia hɛ wɛ́n, ló ɛcu ɛ́nɛn ɛló lóne npɔ?
9Ló Jezwi kranman wo lée:
– Wú léli wáchɛn áwɔ́-mɔn bha ácí hrómɛn? Lóhɛ́nthé lephan kasé ɛ́nɛnsi ńcrɔ́n mɛn, áyí bha le dɔn hɛ nta, átɛsalé ɛwú áyéfí abha théji. 10Lókhɛ́n kasé lephan ɛ́nɛnsi mréci mɛn, áyí bha dɔn hɛ nta, átɛsalé ɛle bha áyéfí hrómɛn.
11Lóka Jezwi tɔ bhwe lókɔn, ló ńcu ánkranmán mɛ́n yíchwɛmán lée:
– Lo jɔ Laza eláná, lókhɛ́n mɛn mán no fre.
12Ló mɛ́n yíchwɛmán étɔlé:
– Hwánthe, kasé áli ńná pán anná, mɛ́n phɔ bha jan.
13Jezwi bhwe énɛn atɔ nɔn ali salé, Laza khu, lókhɛ́n mɛ́n yíchwɛmán-ɛ ebhú salé ńná áka lephan bhwe nɔn Jezwi étɔ. 14Ló Jezwi phwan gbée kránman wo lée:
– Laza khu. 15Lókhɛ́n hɔ́n hɛ́nthé áphɔ ehá mɛn salé mɛn nɛn ma mɛ́n phɔ, ochɛ́sé ɔ́n bhú mɛn mímí. Tɛmɛ olo gɛ.
16Ló Toma (óche Ńjrwan) ákránman mɛ́n jɔn yíchwɛmán salé:
– Lo lɔ, tɛmɛ ogɛ lo Yíliéwo ɔ́nmɔn lo khú!
Jezwi nɔn ali ákhúnɔn mɛn chánfe le ńmɛpɔ́bhá
17Lóka Jezwi di lóne, ńye salé wo mrwɛn Laza áli ńcíbhí bhwelí. 18Betani le Jeruzalɛ́mɛn ɔ́nmɔn thethé ákhakpɛɛ́ álí khilomɛ́trɛn bhwaliá, 19ló Jwifunɛ́n búdúbúdú bha ewú Máta le Mari ɔ́nmɔn, wo hɔnsɛ́n akhu hɛ́nthé.
20Lóka Máta ye salé Jezwi ebhá, ńthándi no ánywɛnlí nkɛ, lókhɛ́n Mari-ɛ jran chre khúthé. 21Ló Máta ékranmán Jezwi lée:
– Hwánthe, kasé ɛbháne ka mɛn hɔnsɛ́n bha lé khu. 22Lókhɛ́n mɛn yɛn salé thénthé nbrɛn lɔ, lóyí khúnbrɛn ɛ́bhá bhi Yankan, ánman tɛ́ sé hɛ.
23Ló Jezwi ékranmán Máta lée:
– Hɛ hɔnsɛ́n bha chán khúnɔn mɛn fe.
24Ló Máta kranman Jezwi lée:
– Mɛn yɛn salé ácí ábha phúji, ánman chán khúnɔn mɛn fe, lóka mɔngumán bha chán khúnɔn mɛn fe.
25Ló Jezwi ékranmán Máta lée:
– Mɛn nɔn mɛn ni ákhúnɔn mɛn chánfe le ńmɛpɔ́bhá, lephan kasé ɛbhu mɛn mímí, khú nbrɛn ɛkhu lɔ, ɛbha bhá mɛpɔ́. 26Lókhɛ́n lephan kasé ɛbha mɛpɔ́, khɛ́n ɛbhu mɛn mímí, ɛbha le khú bhrɔ́ɔ́, ábhwe lókɔn wú ɛbhú mímí?
27– Ló Máta étɔ sa:
– Ee, Hwánthe, mɛn mú mímí salé ɛli Mesi, ɛli Yankan Mi, lephan khɛ́n wo tɔlé ábha bhá théji.
Jezwi ethɔ́n hɛ́ndu
28Lóka Máta tɔ bhwe lókɔn, ńsáji ma mánji, ńhrɔ́man che mɛ́n hɔnmia Mari ló ánkranmán nkɛ lée:
– Yíliéwo nɔn aya krɛn éche hɛ.
29Lóka Mari ye bhwe lókɔn, ńchánfe tho, ló ńwa thandi no ánywɛnlí Jezwi. 30Lóka lókɔn, Jezwi ka di bháthó, ńya lósi brɛ khɛ́n Máta bha gɛ. 31Ló Jwifunɛ́n khɛ́n abha ebhɔ́ Mari yí, lókhɛ́n mɛ́n le nkɔn ɔ́nmɔn wo bha khúthé, wo ka wo wu Mari chanfe tho wa élo, wo lɔ wo gɛ nkɛ thá. Wo bhu salé Mari eló álínɔn tho lo thɔ́n hɛ́ndu.
32Lóka Mari di Jezwi njɛ, lókhɛ́n ńwu nkɛ, ńhalé nkɛ nta mɛn ló ántɔlé:
– Hwánthe, kasé ɛbháne ka mɛn hɔnsɛ́n bha lé khu.
33Lóka Jezwi wu Mari ethɔ́n hɛ́ndu, lókhɛ́n Jwifunɛ́n abha mɛ́n phɔ lɔ ethɔ́n hɛ́ndu, ńthɛ́n jɛn, ádri phɔ, 34ló ánmi wo lée:
– Bánne ɔ́n mrwɛn Laza?
Ló wo kranman Jezwi lée:
– Hwánthe, bha wú a.
35Jezwi ethɔ́n hɛ́ndu. 36Ló Jwifunɛ́n étɔlé:
– Ɔ́n wu lósi ńkhɔ pɔ Laza.
37Ló wo hromɛn, néphan fe étɔlé:
– Wú léli mɛ́n ńphwan mɛphuwo mɛbhí? Wú ánnɛn gɛ tɔlé Laza ole khú?
Laza chan khúnɔn mɛn fe
38Ábhwe lókɔn ekhú Jezwi phɔ, ló ńno álínɔn tho. Lósi wo bɔn álínɔn ɔn ńmú hrómɛn, ló wo hɔn ábhú bɛn mrwɛn lómɛ́n.
39– Ló Jezwi kranman wo lée, ɔ́n hɔn ábhú yɛn nɔn mɛ́n.
Máta ali kɔnthewo hɔnmia étɔlé:
– Hwánthe, mɛ́n phán bha ká, átɛsalé wo mrwɛn elí ńcíbhí bhwelí.
40Ló Jezwi ékranmán Máta lée:
– Wú mɛn nɛn kranman hɛ lée kasé ɛbhú mímí, ɛ́bha wú Yankan nguhá?
41Wo hɔn ábhú yɛn nɔn mɛ́n. Jezwi gbɛnɛn tho ló ántɔ sa:
– Mɛn Nthe, mɛn ná hɛ nansi salé ɛyé mɛn tɔ́. 42Mɛn yɛn salé ɛyé mɛn bhwe ákakhúnbrɛn, lókhɛ́n néphan lókɔn aya, wo hɛ́nthé nɔn mɛɛ́n tɔ ábhwe lókɔn, ochɛ́sé wo bhú mímí salé hɛ nɔn ɛchɛ mɛn ma.
43Lóka ńtɔ bhwe mɛ́n mɛ́n ka, lótɛ ńnukhwɛ́ kránmɛn lée:
– Laza, chan lóne thándi!
44Laza thandi, ló ákhú dɛgɔn kra mɛ́n mɔ́n le mɛ́n nta, ámrwɛn mɛ́n hɛ́nmɛn khúnbrɛn, Jezwi kranman wo lée:
– Ɔ́n hrwɛn dɛgɔn yɛn mɛ́n phɔ, ló ɔ́n yɔ-ɛ ká anno.
Néphan ebhɔ́ Jezwi wɛ́n kwa
(Ɔ́n wú Mat 26.1-5; Ɔ́n wú Mák 14.1-2; Ɔ́n wú Lwik 22.1-2)
45Jwifunɛ́n khúnbrɛn abha ebhɔ́ Mari yí khɛ́n awu Jezwi yí atɛ, wo hromɛn néphan búdúbúdú bhu Jezwi mímí. 46Lókhɛ́n wo hromɛn néphan fe saji lo gɛ Fariziɛnnɛ́n, ló Jezwi yí atɛ, wo lɛ lómɛ́n se nkɔn ye. 47Ló Fariziɛnnɛ́n le nphahamán-óthemánhɔn bhurɛ Kwabhɔ́mán khónkhó hɛ́n, ló wo étɔlé:
– Yán bí yábhɛ óbha tɛ́? Lephan lókɔn etɛ́ hɛ́nmɛntányí bánban! 48Kasé oyɔ-ɛ kalé antɛ́ ɔ́nmɔn no, néphan khúnbrɛn bha bhui mímí, ló ábha chɛ́sé cíbɛn Rɔ́mɛn khúbhɛ́nɛ́n bha fe, wo bhá ca lo Yankan-nkhú lókɔn khwálé, ló wo bhá wɛ́n lo khúbhɛ́nɛ́n khúnbrɛn phú!
49Wo hromɛn ápɛ lephan bɛn oche Kayífu, lópá tho lókɔn, mɛ́n nɔn ńni nphaháwo bhrɔ́khó, ló ánkranmán Jwifunɛ́n lée:
– Ábhwe khúnbrɛn lókɔn, álepɛ brɛ hɔ́n eyé! 50Wú ɔ́n ne bhú hɛ́nphe salé áyɔn sa lephan míbrɛ okhú sé ápasá, ochɛ́sé wo lé lɔ aféchwe khúnbrɛn phú? 51(Ábhwe lókɔn Kayífu tɔ, ále chan mɛ́n nbrɛn thɛ́n hrómɛn, lónian mɛn khɛ́n ńni nphaháwo bhrɔ́khó lópá lókɔn tho ɔn, lóhɛ́nthé nɔn ánkranmán néphan lée Jezwi bha khú sé Jwifunɛ́n khúnbrɛn. 52Lókhɛ́n áleli Jwifunɛ́n míbrɛ pán, énɛn salé Yankan miɔn lókɔn achranmanlé, Yankan ogba wo khúnbrɛn bhurɛhɛ́n ágbe míbrɛ hromɛn.)
53Achan lóka lókɔn élo, Jwifunɛ́n-óthemánhɔn hamɛ́n si salé wo bhá wɛ́n Jezwi. 54Lóhɛ́nthé nɔn Jezwi lé dɛn hɔ́n mɛ́n nbrɛn ká nphrámɛn Jwifunɛ́n hrómɛn, lókhɛ́n ńno ási bɛn agbali ánánkhuthé, ákhúbhɛ́ bɛn óche Efrayímɛn, ló mɛ́n le mɛ́n yíchwɛmán ɔ́nmɔn wo chre lóne.
55Jwifunɛ́n fɛ́thi óche Phákhe ágbali phɔ, ló néphan búdúbúdú abha lóne gotho élo Jeruzalɛ́mɛn. Wo phrɛ thwasi wo eló lóne lo chó phɔ khɛ́n odi lóka wo bhá lí fɛ́thi. 56Lóne Jwifunɛ́n énɛn Jezwi. Lóka wo khúnbrɛn wo bhurɛhɛ́n Yankan-khúthé, ló wo ya wo hromɛn wo ébhi wo bɛn nbrɛn sa:
– Bí mwanhɛ́n hɔ́n ebhú? Wú Jezwi lókɔn, ánman má fɛ́thi gɔn, lée nka anman nɛ́n má?
57Nphahamán-óthemánhɔn le Fariziɛnnɛ́n abha lóne, wo kranman néphan khúnbrɛn lée, kasé lephan ɛwu Jezwi si abha, ɛbha tɔ, ló wo ló lóne lo hɔ́n-ɛn.
Currently Selected:
JAN 11: ENT96
Highlight
Share
Copy
Want to have your highlights saved across all your devices? Sign up or sign in
Ebrié New Testament © Bible Society of Côte D'Ivoire, 1996.
