JAN 12

Mari hɔn nɔ́ndu saha Jezwi nta phɔ

(Ɔ́n wú Mat 26.6-13; Ɔ́n wú Mák 14.3-9)

1Ákha ńcíbhí khwá wo bhá lí Phákhe, Jezwi lo Betani ali Laza khúbhɛ́. Laza lókɔn, mɛ́n nɔn ńni lephan Jezwi chɛ chan khúnɔn mɛn fe. 2Lóne wo se Jezwi nɛn, ló Máta nɔn elí lóphɔ júmán. Néphan akhwa tábrɛ mɛ́n, Laza lɔ bha wo hromɛn. 3Mari hɔn nɔ́ndu jɛ khrákhrá bɛn aya lítre thethé obho nari bhwá nbrɛn tɛ saha Jezwi nta phɔ, ńmo mɛ́n hɛ́nyro ánphu nkɛ nta, ló lóphán do ákhúthé khúnbrɛn. 4Jezwi yíchwɛmán hrómɛn ápɛ lephan bɛn óche Judasi Iskariɔthi – khɛ́n ali lephan ebhá phɛ́ Jezwi lí – étɔlé:

5– Bítɛ khɛ́n olé hɔ́n nɔ́ndu kran lókɔn phɛ́lí do fránkhi ya-bhwaliá, ló okhwɛ́n sé gbremán ɛ?

6Lósi akhɔ tɛ khɛ́n ńkhɔ nɛn ántɔ bhwe ɔn, léli salé ńpɔ gbremán, lókhɛ́n ńni sídowo: lóhɛ́nthé nɔn ántɔ bhwe yábhɛ nɛn. Mɛ́n nɔn jɛtɛn láka bha mɛ́n yé, ló anmó lóyí wo bhó ká lóhrómɛn. 7Ló Jezwi étɔlé:

– Tɛmɛ ɔ́n yɔ́ yípɔman lókɔn kalé jɛɛn! Ló mɛ́n yí ńpɛ, anmó bo lócí wo bhá bhó mɛn ha. 8Gbremán bha hɔ́n thethé ákakhúnbrɛn, lókhɛ́n mɛn, mɛn man nɛ́n má hɔ́n thethé ákakhúnbrɛn.

Néphan ebhɔ́ Laza wɛ́n kwa

9Jwifunɛ́n búdúbúdú ye salé Jezwi lo Betani, ló wo lo lóne. Lókhɛ́n áleli Jezwi brɛ hɛ́nthé wo lo, wo lo wo ewú Laza khɛ́n Jezwi chɛ chan khúnɔn mɛn fe. 10Nphahamán-óthemánhɔn bhurɛhɛ́n ló wo étɔlé wo bhá wɛ́n Laza, 11átɛsalé mɛ́n hɛ́nthé, Jwifunɛ́n búdúbúdú le dɛn yé wo bhwe, lókhɛ́n wo ebhú Jezwi-ɛ mímí.

Jezwi ka Jeruzalɛ́mɛn

(Ɔ́n wú Mat 21.1-11; Ɔ́n wú Mák 11.1-11; Ɔ́n wú Lwik 19.28-40)

12Lóka áyé lɛ, ápasá khúnbrɛn alo Phákhe fɛ́thi gɔn, wo ye salé Jezwi ebhá Jeruzalɛ́mɛn. 13Wo jan ádɛ nbi pɛ, wo chan khúbhɛ́ hrómɛn thandi wo élo ywɛnlí Jezwi, ló wo elúkhwɛ́ tɔ sa:

– Ńguhá ogɛ Yankan! Tɛmɛ Yankan obhɔ́ lephan khɛ́n ebhá Hwánthe hɛ́n hrómɛn ndu! Tɛmɛ Yankan obhɔ́ Izraɛ bhringbi ndu!

14Wo hɔn frímú mi bha se Jezwi, ló ńpha chre nkɛ tho sa lósi Yankan hrɔ́ khɔ étɔlé:

15“Ziɔn khúbhɛ́nɛ́n, ɔ́n ne sókhú!

Nɛn hɔ́n bhringbi nɔn ebhá,

ńchre frímú mi tho.”

16Ábhwe lókɔn ɔn, lóyámɛ́n mɛ́n yíchwɛmán le ye lóthé; lókhɛ́n lóka Jezwi ka mɛ́n nguhá hrómɛn, ló ádi wo mwanhɛ́n salé Yankan hrɔ́ phrɛ tɔ ábhwe lókɔn mɛ́n phɔ, ló ábhwe Yankan hrɔ́ phrɛ tɔ, thénthé wo tɛ lóyí simɛ́n se.

17Néphan khɛ́n abha Jezwi phɔ lóka ńchɛ Laza chan álínɔn hromɛn thandi, lókhɛ́n ńchɛ nkɛ chan khúnɔn mɛn fe, wo yí wo wu, wo lo lɛ lómɛ́n se néphan ye. 18Lóhɛ́nthé nɔn ápasá wa lo éywɛnlí Jezwi. Lósi akhɔ tɛ ɔn, néphan ye salé mímí nbrɛn ńtɛ hɛ́nmɛntányí lókɔn. 19Ló Fariziɛnnɛ́n ya wo nbrɛn hrómɛn étɔlé:

– Ɔ́n wu, ɔ́n ma le gɛ tɛ́ yíɛkɛ, néphan khúnbrɛn wa eló mɛ́n yé.

Grɛ́si khúbhɛ́nɛ́n mɔ́nbɛn énɛn Jezwi

20Néphan khɛ́n alo Jeruzalɛ́mɛn éla Yankan fɛ́thi cí, ápɛ Grɛ́si khúbhɛ́nɛ́n fe abha wo hromɛn. 21Wo Grɛ́si khúbhɛ́nɛ́n lókɔn wo bha gɛ Filíphu (achan Bɛsayida abha Galile gotho) ló wo ékranmán nkɛ lée:

– Hwánthe, lo énɛn lo wú Jezwi.

22Filíphu lo kranman Andre, ló wo mɔ́nmɔn wo lo kranman Jezwi. 23Ló Jezwi ékranmán wo lée:

– Thénthé ácí si, ló áyɔn salé Lephan Mi ogɛ nguhá. 24Mímí mɛɛ́n kranmán hɔ́n: kasé ble mí lókɔn, ole bho ka nɔn mɛn khɛ́n ábɔn, lómí lókɔn átré lóne, lókhɛ́n kasé obho ka nɔn mɛn khɛ́n ábɔn, ácu sómí búdúbúdú. 25Lephan kasé ɛpɔ hɛ nbrɛn mɛpɔ́bhá, ábha ya hɛ mɔ́n mɛn liá, lókhɛ́n lephan kasé ɛle pɔ hɛ mɛpɔ́bhá áthéji lókɔn, ɛ́bha bo ábha ká ńmɛpɔ́bhá álephú hrómɛn. 26Lephan kasé ɛ́nɛn ɛkhwɛn mɛn hɛ́nmɛn nɛn, tɛmɛ ɛgɛ mɛn thá, ochɛ́sé mɛn si mɛn ma, mɛn nɛnkhwɛ́nwo lɔ obhá lóne. Lephan kasé ɛ́khwɛn mɛn hɛ́nmɛn nɛn, mɛn Nthe bha ha hɛ ngu.

Jezwi étɔ mɛ́n khú phɔ bhwe

27– Thénthé ńthɛ́n éjan mɛn, ló bí bhwe mɛn mán tɔ? Wú mɛn mán tɔlé: Mɛn Nthe, hɔn mɛn yɛn ábhwe ábha gɛ mɛn ácí lókɔn hromɛn? Lókhɛ́n ácí lókɔn lóhɛ́nthé nɔn mɛn ma. Mɛn ma salé mɛn sakhɔ́ áyíkhúphɔ khrákhrá abha ácí lókɔn hromɛn thándi. 28Mɛn Nthe, tɛmɛ ɛbhó nguhá sé hɛ hɛ́n!

Ló átɔ bɛn chantho édɛn sa:

– Mɛn phrɛ mo nguhá se mɛ́n hɛ́n, ló mɛn mán cu mó nguhá sé mɛ́n hɛ́n npɔ.

29Ápasá khɛ́n abha lóne, wo ye átɔ́ lókɔn adɛn, ló néphan fe étɔlé:

– Ágbánkhran nɔn adɛn!

Dɔnbɛn étɔlé:

– Yankan-mranchɛ́wo bɛn nɔn agɛ lephan lókɔn ɔ́nmɔn étɔ bhwe!

30Lókhɛ́n Jezwi ékranmán wo lée:

– Áleli mɛn hɛ́nthé nɔn átɔ́ lókɔn édɛn, lókhɛ́n hɔ́n hɛ́nthé. 31Thénthé áthéji lókɔn, mɛ́n cí wo bhá bhɔ́ mɛ́n kwa ási. Thénthé bhringbi apɛ áthéji lókɔn, wo bhá trɛnmɛn yɛn. 32Lókhɛ́n lóka wo bhá chán áyítathé hɔ́n mɛn yroman tré tho, mɛn mán do néphan khúnbrɛn bhá mɛn yé.

33(Ábhwe lókɔn ńtɔ, élie lókhú yábhɛ ebhá wɛn.) 34Ló ápasá ékranmán nkɛ lée:

– Lo bidí étɔ sé lo lée, Mesi bha bhá mɛpɔ́ godo. Ló kalósi ɛkhɔ ɛ́tɔlé, wo bhá hɔ́n Lephan Mi yroman tré tho e? Abɛn óche Lephan Mi?

35Ló Jezwi ékranmán wo lée:

– Thénthé áyéfí bha hɔ́n thethé, lókhɛ́n abha le mɔ́n. Lóka ɔ́n ma áyéfí hrómɛn, tɛmɛ ɔ́n nɛnsi ló hɛ́nmɛn, ochɛ́sé dubhlékhu olé gɛ hɔ́n. Lephan khɛ́n énɛnsi dubhlékhu hromɛn, ánnɛn gɛ yɛ́n mɛ́n si ánno. 36Lóka ɔ́n gɛ áyéfí, tɛmɛ ɔn mui mímí, ochɛ́sé ɔ́n ní áyéfí hrómɛn néphan.

Jwifunɛ́n le bhú Jezwi mímí

Lóka Jezwi tɔ bhwe lókɔn, ńno hrɔman sibɛn. 37Hɛ́nmɛntányí khúnbrɛn lókɔn Jezwi tɛ Jwifunɛ́n hɛ́nmɛn, lótɛ khɛ́n wo le bhú nkɛ mímí. 38Lóhɛ́nthé, bhwetɔ́tréwo Ezayi bhwe atɔ, lóyí otɛ́ símɛ́n, ábhwe lókɔn, lónɔn ali sa:

“Hwánthe, abɛn nɔn abhu lo bhwe mímí?

Abɛn nɔn lo Hwánthe bho mɛ́n sɛ́npɛ́ thándi se áwu?”

39Wo le gɛ bhú mímí, átɛsalé

Ezayi phrɛ tɔlé:

40“Yankan phu wo mɛbhí,

ńmo yí mrwɛn wo bhweyɛ́n,

ochɛ́sé wo mɛbhí ole wú yí,

ló wo hɛ́nphe ole bhú bhwe,

ló wo le sáji bha gɛ mɛn,

lókhɛ́n mɛn tɛ́ wo phɔ jan.”

41Ezayi bhwe lókɔn atɔ élie salé ńwu Jezwi nguhá ló ńtɔ nkɛ phɔ bhwe.

42Lótɛ khɛ́n Jwifunɛ́n-óthemánhɔn, wo bɛn nbrɛn hrómɛn néphan búdúbúdú bhu Jezwi mímí. Lókhɛ́n Fariziɛnnɛ́n hɛ́nthé wo le gɛ tɔ Jezwi phɔ bhwe thándi. Átɛsalé wo esó Jwifunɛ́n trán ábha tranmán wo yɛn hɛ́nbhúrɛ si. 43Wo pɔ néphanmiɔn hwalri brɛn Yankan hwalri.

Jezwi bhwetɔ́ ebhɔ́ néphan kwa

44Jezwi lukhwɛ́ ló ántɔlé:

– Lephan kasé ɛbhu mɛn mímí, áleli mɛn míbrɛ pán ɛbhu mɛn mímí, lókhɛ́n lephan achɛ mɛn ma, mɛ́n lɔ ɛbhui mímí. 45Lephan kasé ɛwu mɛn, lephan achɛ mɛn ma nɔn ɛwu kábrɛ. 46Mɛn ni áyéfí bha áthéji, ochɛ́sé lephan kasé ɛbhu mɛn mímí, ɛ́le jran dubhlékhu hromɛn. 47Lephan kasé ɛye mɛn bhwe, lókhɛ́n ɛle ji lóbhwe lókɔn, léli mɛn nɔn mɛn mán mɔ́ hɛ kwa. Mɛn nɛn ma salé mɛn mɔ́ áthéji kwa, lókhɛ́n mɛn ma mɛɛ́n do áthéji ká. 48Lephan kasé ɛle dɛn do mɛn, ɛle dɛn do mɛn bhwetɔ́, ápɛ lephan ábha bhɔ́ hɛ kwa: hɛ lephan lókɔn, ácí ábha phúji, ábhwe mɛn tɔ, lónɔn ábha bhɔ́ hɛ kwa. 49Átɛsalé áleli mɛɛ́n nbrɛn thɛ́n hrómɛn bhwe nɔn mɛɛ́n tɔ, lókhɛ́n mɛn Nthe achɛ mɛn ma, ábhwe mɛn mán tɔ, mɛ́n nɔn anchɛ́ mɛn tɔ, áyí mɛn mán nie, mɛ́n nɔn anchɛ́ mɛn nie. 50Mɛn yɛn salé mɛ́n bhwetɔ́ sé lephan mɛpɔ́bhá álephú. Ló mɛn bhwe mɛɛ́n tɔ, lósi mɛn Nthe khɔ lie mɛn lónɔn mɛn khɔ mɛɛ́n tɔ.

Currently Selected:

JAN 12: ENT96

Highlight

Copy