JÚMÁN HRƆ́ 9

Sɔ́lu jrɛ́n ajrɛn

(Ɔ́n wú Júm 22.6-16; 26.12-18)

1Lótɛ khɛ́n Sɔ́lu bháne énɛn Hwánthe yíchwɛmán wɛ́n si tɛɛ. Lóhɛ́nthé ńno gɛ nphaháwo bhrɔ́khó, 2ńdo hrɔ́ pɛ ɔ́nmɔn annó hɛ́nbhúrɛ si abha Damási khúbhɛ́, ló kasé lóne ápɛ néphan, ńsɛ le ńmie ɔ́nmɔn khɛ́n égɛ Hwánthe thá, ankhwɛ́n nkɔn ɔ́nmɔn má Jeruzalɛ́mɛn.

3Ńmo sitó pɛ annó Damási, ńgbali lókhúbhɛ́ phɔ phu, lótɛ áyéfí bɛn chantho jangba jekhɛli. 4Ńhalé, ló anyé átɔ bɛn édɛn krɛnmɛn sa:

– Sɔ́lu, Sɔ́lu, bítɛ khɛ́n ɛ́lri mɛn gbre ɛ?

5Ló ánmi sa:

– Hwánthe, lólephan bɛn le hɛ ɛ? Ló átɔ́ ékranmán nkɛ sa:

– Mɛn nɔn mɛn ni Jezwi khɛ́n ɛ́lri gbre. 6Khɛ́n tɛmɛ ɛchánfe, ló ɛló ákhúbhɛ́ hrómɛn, lóne nɔn wo bhá lie hɛ áyí ayɔn se salé ɛtɛ́.

7Néphan khɛ́n agɛ Sɔ́lu thá élo ɔn, wo dɔnya, wo lé gɛ tɔ bhwe brɛ, wo eyé átɔ́ dɛ́n édɛn, khɛ́n wo le wú lephan étɔ bhwe. 8Sɔ́lu chanthé fe, ńphwan mɛ, khɛ́n ánnɛn wú yí. Wo hɔn mɛ́n mɔ́n pɛ khɛ́n wo do nkɛ ɔ́nmɔn lo Damási. 9Ńcíbhí bhwaliá nbrɛn, áyí lɔ ánnɛn gɛ wú, ńnɛn lɔ ánnɛn gɛ ní, saji ńdu lɔ ánnɛn gɛ nán.

10Yíchwɛ́wo bɛn óche Ananiási bha Damási khúbhɛ́. Hwánthe lɛ nkɛ mɛ, ló ńkránman nkɛ sa:

– Ananiási!

Ló ńdɛn sa:

– Hwánthe, nɛn mɛn o.

11Ló Hwánthe kranman nkɛ sa:

– Fe gbraa, ɛkhɔ́ ásitó óche Áliémɔn, ɛló Judasi hwan bháthó, ló ɛbhi sɛ bɛn abha lóne óche Sɔ́lu, achan Tási khúbhɛ́. Sɛ lókɔn ɔn, ńmáne ánna Yankan áka yábhɛ lókɔn. 12Ńmɛlrɛ hromɛn, ńwu sɛ bɛn óche Ananiási lɛ bháthó, ló nkɛ bho mɔ́n tre mɛ́n tho, sa ancu wú yí.

13Ló Ananiási tɔ sa:

– Hwánthe, néphan búdúbúdú tɔ lephan lókɔn phɔ bhwe se mɛn ye, wo tɔ mɛ́n yíléle antɛ́ hɛ néphan abha Jeruzalɛ́mɛn khúbhɛ́ phɔ. 14Nphahamán-óthemánhɔn se mɔ́nsi, sa anmá krɛn man khwɛ́n néphan élu hɛ hɛ́n tɔ bhwe.

15Khɛ́n Hwánthe kranman nkɛ sa:

– Tɛmɛ ɛlo, lée mɛɛ́n nbrɛn nɔn mɛn san lephan lókɔn, sa anchɛ́ néphan aleli Jwifunɛ́n oyɛ́n mɛn hɛ́n mɛn ni, wo le wo mringbilímán le Izraɛ khúbhɛ́nɛ́n khúnbrɛn ɔ́nmɔn. 16Mɛn hɛ́nthé, mɛ́n gbre ánman ní, mɛɛ́n nbrɛn mɛn mán chɛ anyɛ́n lókhúnbrɛn.

17Ló Ananiási lo, ńdi lóne bháthó, ńkhwɛn mɛ́n mɔ́n tre Sɔ́lu tho, ló ńtɔ sa:

– Mɛn hɔnsɛ́n Sɔ́lu, Hwánthe Jezwi khɛ́n alɛ hɛ mɛ ásitó si ɛkhɔ bha ɔn, mɛ́n nɔn ńchɛ mɛn ma salé, mɛn chɛ́ hɛ cu wú yí npɔ, ló ɛgɛ Nánnánmi Créncré.

18Lóyámɛ́n, áyíbɛn atɛsa ácɔn nphrɔ chan Sɔ́lu mɛbhí hrómɛn fɔ khwalé, ló ńcu anwú yí. Ńchanthé fe, ló wo hɛ nduhɛ́n. 19Ńni nɛn, ló ńcu gɛ sɛ́npɛ́.

Sɔ́lu étɔ Yankan bhwe Damási khúbhɛ́

Sɔ́lu gɛ yíchwɛmán abha Damási khúbhɛ́ ɔ́nmɔn chre ńcíbhí mɔ́nbɛn. 20Lóyámɛ́n, ántɔ Yankan bhwe hɛ́nbhúrɛ si, ló ántɔlé Jezwi li Yankan Mi. 21Mɛ́n bhwe ántɔ, etán néphan khúnbrɛn hɛ́nmɛn, ló wo étɔ sa:

– Néphan abha Jeruzalɛ́mɛn elú Jezwi hɛ́n, lephan lókɔn ɔn, wú léli mɛ́n nɔn ńma lóne man nri nkɔn gbre? Wú ńnɛn ma krɛn lɔ man khwɛn nkɔn gɛ mɛ́ no se nphahamán-óthemánhɔn?

22Khɛ́n ácí khúnbrɛn, Sɔ́lu étɔ Yankan bhwe sɛ́npɛ́ mɛn. Jwifunɛ́n abha Damási khúbhɛ́, lóka anchɛ́ nkɔn yɛ́n salé Jezwi li Mesi ɔn, wo le wú lóbhwe wo gɛ tɔ sé nkɛ.

23Ámɔn kpɛ́bɛn, Jwifunɛ́n sri bhwe tre salé wo bhá wɛ́n Sɔ́lu, 24ló wo ébo nkɛ ákhúbhɛ́ gbanhɛ́n, ńcrɔ́n le mréci, khɛ́n ńye lóbhwe. 25Ló ńmréci mɛn, mɛ́n yíchwɛmán hɔn nkɛ ka ákrwɛbhɛ́ hrómɛn khɔ ńphá tho diathé, ló wo kaman nkɛ bu.

Sɔ́lu bha Jeruzalɛ́mɛn khúbhɛ́

26Lóka Sɔ́lu di Jeruzalɛ́mɛn, ánnɛn anká yíchwɛmán hrómɛn, khɛ́n wo khúnbrɛn wo esó nkɛ. Lósi akhɔ tɛ ɔn, wo lé bhú salé mímí nbrɛn nkɛ li yíchwɛ́wo. 27Ló Banabási do nkɛ ka phɔ lo Krisi-mranchɛ́mán yé. Sɔ́lu si akhɔ wu Hwánthe ásitó hrómɛn le lósi Hwánthe khɔ tɔ bhwe se nkɛ ɔn, ńnɛ lómɛ́n se nkɔn. Jezwi hɛ́n hrómɛn, Sɔ́lu si akhɔ tɔ Yankan bhwe sɛ́npɛ́ mɛn Damási khúbhɛ́, ńtɔ lóbhwe lɔ se nkɔn. 28Achan lóka lókɔn élo nɔn, Sɔ́lu gɛ nkɔn ɔ́nmɔn ethóbhɛ́. Ánkhali Jeruzalɛ́mɛn khúbhɛ́ hrómɛn, ánno, anmá, ló ántɔ Yankan bhwe Hwánthe sɛ́npɛ́ hrómɛn. 29Sɔ́lu tɔ bhwe se Jwifunɛ́n khɛ́n álɛ grɛkhi ncan, mɛ́n le nkɔn ɔ́nmɔn wo talí bhwe lɔ, lókhɛ́n nkɔn énɛn mɛ́n wɛ́n si tɛɛ. 30Lóka khɛ́n hɔnsɛ́nhɔn ye lóbhwe, lótɛ wo do Sɔ́lu ɔ́nmɔn lo Sezare khúbhɛ́, ló wo chɛ nkɛ bhosi lo Tási.

31Lóka yábhɛ lókɔn ɔn, Yankan-gbemán gɛ thɛ́nkhwálé Jude gotho, Galile le Samari ɔ́nmɔn gotho khúnbrɛn. Wo égɛ sɛ́npɛ́, wo éji Hwánthe wo mɛpɔ́bhá khúnbrɛn hrómɛn, ló Nánnánmi Créncré mɔ́ndɔ́nman hromɛn, wo ethúbhɔ háne.

Wo tɛ Ene phɔ jan

32Piɛ khali lóne gotho khúnbrɛn, ló ńno gɛ krethiɛnmán abha Lida khúbhɛ́. 33Lóne nɔn ńgɛ sɛ bɛn óche Ene abhu kathé, khɛ́n ala ntɛ́trɛ tho etɛ́ npá bhia. 34Ló Piɛ kranman nkɛ sa:

– Ene, Jezwi-Krisi tɛ hɛ phɔ jan! Tɛmɛ ɛchánfe, ló ɛhɔ́n hɛ ntɛ́trɛ.

Lóyámɛ́n, Ene chanthé fe. 35Lida khúbhɛ́nɛ́n le néphan abha Sarɔn bhóbhó jɛ́ njɛ khúnbrɛn ɔ́nmɔn wú nkɛ, ló wo ésa hɛ́nmɛn nrwɛn Hwánthe.

Dɔkási chan khú hrómɛn fe

36Jope khúbhɛ́, krethiɛn bhie bɛn bháne. Mɛ́n hɛ́n li Tabita (Grɛ́khi ncan mɛn óche “Dɔkási”, lóthé nɔn ali “Di bhie”.) Bhie lókɔn ɔn, ákakhúnbrɛn antɛ́ néphan mwá, ló ándɔnmán gbremán mɔ́n. 37Lóka lókɔn, álɔ́ ehɔ́n-ɛn, ló ńkhu. Wo go nkɛ ndu, ló wo hɔn-ɛn la ákhúthé bɛn abha átho nkhú tho. 38Yíchwɛmán abha Jope khúbhɛ́ ye salé Piɛ bha Lida khúbhɛ́ agbali Jope, ló wo chɛ néphan mɔn lo nkɛ yé. Ńmwethú wo bho se nkɔn ɔ́nmɔn lo nɔn ali sa: “Piɛ, lo éla hɛ kpɛ, tɛmɛ ɛbhá gbraa, ló ole mɔ́n.” 39Lóyámɛ́n tɛɛ, Piɛ gɛ nkɔn ɔ́nmɔn lo. Lóka ńdi lóne, ló wo do nkɛ lo nkhú tho. Grwanyá khúnbrɛn tigbali nkɛ, wo ethɔ́n hɛ́ndu, ló ntráliɛ́ le khókhóthu ɔ́nmɔn khɛ́n Dɔkási grɛ lóka ńma mɛpɔ́, wo khwɛn lókhúnbrɛn lie nkɛ. 40Lótɛ Piɛ chɛ néphan khúnbrɛn thándi ngbophro, ló ńmɔ ntráhɛ́nlé ánna Yankan. Lómánji ńsa hɛ́nmɛn tre annɛ́n kɔntheya, ló ántɔ sa:

– Tabita, chanfe tho!

Lóka ńphwan mɛ khɛ́n ńwu Piɛ, lótɛ ńchethé. 41Piɛ hɔn nkɛ mɔ́n, ló ńdɔnman nkɛ mɔ́n nkɛ chánfe tho. Ńche krethiɛnmán le grwanyá ɔ́nmɔn ma, ló ńhɔn nkɛ nie nkɔn wu salé nkɛ bha mɛpɔ́. 42Néphan ye lóbhwe Jope khúbhɛ́ khúnbrɛn, ló búdúbúdú bhu Hwánthe mímí. 43Piɛ lɛ Simɔn ali nánhrɔ́ júmánlíwo hwan, ló ńgɛ nkɔn ɔ́nmɔn chre Jope mɔn kpɔɔ́ nɛn.

Currently Selected:

JÚMÁN HRƆ́ 9: ENT96

Highlight

Copy