JÚMÁN HRƆ́ 8

1Ló Ethiɛ́nɛn wɛ́n wo wɛn ɔn, ápɔ Sɔ́lu mɛ.

Sɔ́lu élri Yankan-gbemán gbre

Lócí brɛ tɛɛ, Yankan-gbemán khɛ́n abha Jeruzalɛ́mɛn ɔn, wo bhɔhɛ́n wo élri nkɔn gbre. Krisi-mranchɛ́mán-ɛ le bha wo hromɛn, khɛ́n krethiɛnmán khúnbrɛn chranmanlé, ló wo lo Jude le Samari ɔ́nmɔn gotho. 2Néphan átɛ́ Yankan yí, áhɔn Ethiɛ́nɛn lo bho, ló nkɛ khú nkɛ khu ɔn, wo thɔn lóphɔ hɛ́ndu.

3Khɛ́n Sɔ́lu-ɛ etɛ́ khékhremɛn lri Yankan-gbemán gbre, ló ankhɔ́ bháthó bháthó khwɛ́n krethiɛnmán, ńsɛ le ńmie ɔ́nmɔn no há khúthé.

Filíphu étɔ Ábhwe Bhwábhwá Samari khúbhɛ́

4Krethiɛnmán khúnbrɛn khɛ́n achranmanlé, wo khɔ khúbhɛ́ khúbhɛ́ wo étɔ Ábhwe Bhwábhwá sé néphan oyé. 5Filíphu lo Samari, ló ńtɔ Mesi phɔ bhwe se lóne khúbhɛ́nɛ́n. 6Ápasá khúnbrɛn di njɛlé eyé Filíphu bhwe étɔ, ló wo ewú nkɛ hɛ́nmɛntányí nkɛ etɛ́. 7Khankhan mímí, nánnánmi phromɛn phromɛnhɔn lúkhwɛ́ khrákhrá, wo chán lɔ́phɔmán búdúbúdú phɔ thándi, ló néphan búdúbúdú khɛ́n abhu khwathé le nta khumán ɔ́nmɔn lɔ phɔ jan. 8Ló átɛ áphɔhá khóo ka ákhúbhɛ́ lókɔn hromɛn.

9Sɛ bɛn óche Simɔn phrɛ thwasi bha lóne. Anmɔ́n go, átán Samari khúbhɛ́nɛ́n hɛ́nmɛn, ló anmú mɛɛ́n nbrɛn lephan khóo. 10Mɛ́n bhwe khwá wo khúnbrɛn hɛ́nmɛnlé, achan miɔ́ chɛ́-nchɛ́ yé, kábrɛ kábrɛ ádi mrɔ́khómán yé, ló wo étɔ sa:

– Lephan lókɔn ńni Yankan sɛ́npɛ́, ńsɛ́npɛ́ khɛ́n óche “ńsɛ́npɛ́ khóo”.

11Nkɛ bhwe khwá wo hɛ́nmɛnlé, lósi akhɔ tɛ ɔn, mɛ́n cí ńchan ma wo thethé anmɔ́n go tɛ́ hɛ́nmɛntányí, ámɔn. 12Khɛ́n ńsɛ le ńmie ɔ́nmɔn ka Filíphu tɔ Ábhwe Bhwábhwá ali Yankan Bhringbi khúbhɛ́ phɔ bhwe se wo ye, khɛ́n wo bhu mímí, Jezwi hɛ́n hrómɛn, wo chɛ nkɛ ha wo nduhɛ́n. 13Simɔn nbrɛn lɔ bhu mímí, ló ńchɛ nkɛ hɛ nduhɛ́n. Ńma Filíphu phɔ, ló hɛ́nmɛntányí khónkhó le áphɔgóyí ɔ́nmɔn etɛ́ khɛ́n anwú, lóbhwe etɛn hɛ́nmɛn.

14 Krisi-mranchɛ́mán abha Jeruzalɛ́mɛn khúbhɛ́ ye salé Samari khúbhɛ́nɛ́n do Yankan bhwetɔ́, ló wo chɛ Piɛ le Jan ɔ́nmɔn lo nkɔn yé. 15Wo ka wo di Samari gotho wo la Yankan se krethiɛnmán sa nkɔn gɛ Nánnánmi Créncré. 16Átɛsalé wo hromɛn, Nánnánmi Créncré le ka ka lephan brɛ phɔ. Hwánthe Jezwi hɛ́n hrómɛn pán nɔn okhɔ ha wo nduhɛ́n. 17Ló Piɛ le Jan ɔ́nmɔn bho mɔ́n tre nkɔn tho, ló wo gɛ Nánnánmi Créncré.

18Lóka Simɔn wu salé Krisi-mranchɛ́mán mɔ́n abho tre krethiɛnmán tho nɔn achɛ nkɔn gɛ Nánnánmi Créncré, lótɛ ńmo jɛtɛn ansé Piɛ le Jan ɔ́nmɔn, 19ló ántɔ sa:

– Ɔ́n sé mɛn lɔ lósɛ́npɛ́ lókɔn, ló kasé lephan tɛɛ mɛn mo mɔ́n tre mɛ́n tho, mɛ́n lɔ angɛ Nánnánmi Créncré.

20Khɛ́n Piɛ kranman nkɛ sa:

– Muswe ogɛ hɛ le hɛ jɛtɛn ɔ́nmɔn, Yankan yí asé lephan ɔn, ɛbhú salé jɛtɛn mɛn nɔn ophɛ́! 21Ɛbha le gɛ yíɛkɛ lóyí lókɔn hromɛn, ɛle pɛ lóphɔ mɔ́nsi, átɛsalé hɛ thɛ́n le priman Yankan hɛ́nmɛn. 22Tɛmɛ ɛchán hɛ mwanhɛ́nbhu phromɛn lókɔn hromɛn féne, ló ɛla Hwánthe salé, kasé ápɛ mɔ́nsi o, anyɔ́ hɛ mwanhɛ́nbhu yábhɛ lókɔn phɔ́ hɛ. 23Mɛn wú salé áyíléle bhro bribri bɛn bha hɛ hromɛn, ló ɛbha ńne khúthéká hrómɛn.

24Ló Simɔn kranman Piɛ le Jan ɔ́nmɔn sa:

– Tɛmɛ hɔ́n nbrɛn ɔ́n na Hwánthe sé mɛn, ochɛ́sé hɔn bhwe khúnbrɛn ɔ́n tɔ, lóyí ole tɛ́ mɛn.

25Krisi-mranchɛ́mán mɔn lókɔn ka ali ndalefɛ phu, khɛ́n atɔ Hwánthe bhwe phu, wo saji lo Jeruzalɛ́mɛn. Lóka wo bha sitó wo élo, wo khɔ Samari khúbhɛ́ búdúbúdú hrómɛn tɔ Ábhwe Bhwábhwá se néphan ye.

Filíphu le Ethiopi khúbhɛ́ júmánwo ɔ́nmɔn

26 Hwánthe-mranchɛ́wo kranman Filíphu sa:

– Chanfe tho, ló ɛsa hɛ́nmɛn tré ló áthé mɛn. Ɛkhɔ́ ásitó achan Jeruzalɛ́mɛn élo Gaza. Ásitó lókɔn ka nwrɛ́.

27Filíphu chanfe, ló ńno. Ńwu Ethiopi sɛ bɛn ali lephan obhɔ khɛ́n ali bhringbi bhie mɛ́n júmánwo khóo lóne sitó. Sɛ lókɔn ɔn, mɛ́n nɔn ánbo Ethiopi bhringbi bhie lókɔn khɛ́n mɛ́n pasá hɛ́n li Kandasi jayí khúnbrɛn lɔ. Ńchan Jeruzalɛ́mɛn yankanla, 28ló ńsáji annó bháthó. Ńchre mɛ́n ngbugbru hran hromɛn ankán bhwetɔ́tréwo Ezayi hrɔ́. 29Nánnánmi Créncré kranman Filíphu sa:

– Tibha hɛ́nmɛn, ló ɛya ngbugbru hran phɔ.

30Filíphu wa gbali ahran, anyé Ethiopi sɛ yí ekán bhwetɔ́tréwo Ezayi hrɔ́ hrómɛn, ló ánmi nkɛ sa:

– Hɛ yí ɛkán ɔn, wú ɛyé lóthé?

31Ló sɛ lókɔn tɔ sa:

– Kasé álepɛ lephan élɛ lóthé sé mɛn ɔn, kalósi mán khɔ́ yɛ́n e?

Ńdo Filíphu ka ngbugbru hran mɛn, ló nkɛ chre mɛ́n njɛ. 32Yankan hrɔ́ phɛ́nta si ankán nɔn ali:

“Ńtɛsa gbankhran khɛ́n wo hɔn wo eló áwɛ́n si,

ńtɛsa gbankhran mi khɛ́n ale thíí ya

lephan éjan mɛ́n yɔ́nmrɛ hɛ́nmɛn,

khɛ́n ńnɛn tɔ bhwe brɛ ka.

33Wo ha nkɛ nchɔ́chɔ, ló wo le dɛn nkɛ bhwe líhɛ́n.

Abɛn nɔn ábha lú mɛ́n jímiɔn hɛ́n ɛ?

Ló wo jan nkɛ théji mɛpɔ́bhá khu khwa.”

34Lótɛ bhringbi bhie júmánwo bhi Filíphu sa:

– Abɛn bhwe nɔn bhwetɔ́tréwo étɔ ɛ? Mɛɛ́n na hɛ, tɔ se mɛn yé kpɛ. Wú mɛɛ́n nbrɛn bhwe nɔn ántɔ, lée nka lephan nankhɛ bɛn bhwe ántɔ?

35Filíphu bho bhwetɔ́, ló ńkhɔ Yankan hrɔ́ lókɔn hromɛn ántɔ Ábhwe Bhwábhwá ali Jezwi phɔ bhwe sé nkɛ yé. 36Wo bho sitó pɛ wo élo, lóka wo di ńdu bɛn mɛ́n, lótɛ bhringbi bhie júmánwo tɔ sa:

– Filíphu, nɛn ńdu o, ńthé ébí nɔn etú hɛ mɔ́nsi khɛ́n ɛbha lé gɛ há mɛn nduhɛ́n ɛ?

[ 37Ló Filíphu kranman nkɛ sa:

– Kasé ɛbhú mímí hɛ thɛ́n khúnbrɛn hrómɛn ɔn, ló-ɛ, ógɛ há hɛ nduhɛ́n.

Ló sɛ lókɔn tɔ sa:

– Mɛn mú mímí salé Jezwi Krisi li Yankan Mi.]

38Ló ńtɛ ngbugbru hran dɔnya, Filíphu le bhringbi bhie júmánwo ɔ́nmɔn diathé, wo hɛn ndu hrómɛn, ló Filíphu hɛ nduhɛ́n. 39Lóka wo chan ńdu hrómɛn thandi, lótɛ Hwánthe Nánnánmi hɔn Filíphu yɛn. Bhringbi bhie júmánwo lé cu wú nkɛ npɔhɔ́n, khɛ́n ńmo mɛ́n sitó pɛ ánno áphɔhá mɛn. 40Filíphu saji lo Azɔthi, ló ńkhɔ khúbhɛ́ khúbhɛ́ ántɔ Ábhwe Bhwábhwá, kábrɛ kábrɛ ńdi Sezare khúbhɛ́.

Currently Selected:

JÚMÁN HRƆ́ 8: ENT96

Highlight

Copy