Zacarías 1

Xanllon llayaxhe yell ke'en

111 Be'o xon, na iz chop kan llnebia be'nnen le Darío, Xanllon be'e di'll ni Zacariazen, be'nnen llayixjwe lloa xtillen, xhi'nn Berequías xhasoa Idó. Gulle'e le'e:

2-3Nada', Xanle napa doxhente yelwaken, llebraz guklla xustaw re' kaꞌ. Kelen'na, gullgall nada' yellen: Ki ne Xanllon, le wadaren nada', na nada' wazerena re'. Nada', Xanle, ba bnia kaꞌ. 4Bi gunle kan ben xustaw re' kaꞌ, kan batna, be'nn ka' llayixjwen gull ake' le ake' kin ne Xanllon, le wsanlall daxhinj kaꞌ llunren, na le aken, bi wen akre wzenay ake' kia, na kaze ben ake' di'llen bzen akren. Kan ne Xanllon. 5¿Bixha na' ganxha xustaw re' ka' cha? ¿Llakere ke chnaren gat yelnban ke be'nn kaꞌ llayixjwen? 6Axha ke nake lloa xtilla dan gulla be'nn wenllin kia kaꞌ llayixjwen, bllinen lo yichj raxhdao xustaw re' kaꞌ, na bayat akre, na bazak akre ke nada' naka Xan ake' napa doxhente yelwaken, na ba bsakzia le ake' yel kan llun ke ake' na.

Bredawra be'nn kaꞌ llbia kabay

7Nada' Zacarías, xhi'nn Berequías xhasoa Idó, di'll nin bxhia ke Xanllon, lla tapalloa be'o chnej, iz chop kan llnebia Darío. 8To lle bredawra: Na brera to be'nn llia kull kabay xna. Na zeba ga nak rach, ga sjalla yay ake', na kullba'na zajze ye txhonj kabay ake', balba sjanak ba xna, balba sjanak ba gach, na ye balba sjanak ba llich. 9Na bnabra: Xanllon, ¿Noxha be'nn ki sjallia kull kabay ki cha? Na anklen llweren nada' diꞌllen gulle nada': Nada' wruera rwe' noxha be'nn kaꞌ. 10Na be'nnen ze gan sjalla yay kaꞌ bne: Be'nn kin ba bsel Xanllon nench'na llajta ake' sjachechj ake' raw doxhente yell-li'on.

11Natell be'nn kaꞌ sjallia kull kabay kaꞌ, gull ake' ankl ke Xanllon ze gan sjalla yay kaꞌ: Ba jachechjto doxhente raw yell-li'on, na ba breto ke naken lliteze, na be'nn ka' sjalla rawen nbaraz kwis sjalla ake'. 12Na ankl ke Xanllon bne: Xana nap doxhente yelwak, baguk wyon chi iz llakllao Jerusalén'na, na rente yell kaꞌ sjanbanle Judán. ¿Arke ne' yallj nench'na wayachrallo le ake' dayubre?

13Na Xanllon ballie'e diꞌll da llazua wen, nench'na bayak xhenle anklen llweren nada' di'llen, 14natell gull anklen nada' ke chixjoera: Kin ne Xanllon nap doxhente yelwaken: Nada' llebraz nlliera Jerusalén'na, rente ya' Sión'na. 15Kelen'na llebraz bagolnin yel llruk kian konen latj yell-liw kaꞌ llunxhen kwine, ratzen nak yel llaklla kian, axha le aken baslliw ake' yel llruk kian. 16Kelen'na, nada', Xanle nia: Wayachralla Jerusalén'na, na guna nench'na wayun ake' yoda'on dayubre, na doxhente raw yell xhen'na wayakcha'on.

17Na anklen gulle'e nada': Bdixjwe rente dani: Xanllon nap doxhente yelwaken ne: Guna nench'na yell kia kaꞌ wayaklay aken dayubre, na yeyak aken yell wnia, na wayoa yelnban ke yell Sión'na, na chixjoera dayubre ke Jerusalén'na naken to yell xhen da biazralla.

Bredawra lus bayix na wallekw ake'

18 18 (2.1) Bredawra dayubre, na brera tap lus bayix ake'. 19 19 (2.2) Na bnabra anklen ze llweren nada' diꞌllen ¿bi zejen'na zajzu lus bayix kaꞌ? Na ballie'e xtillan: Lus bayix ki llroen yelwak ke yell kaꞌ, kanake beslas ake' be'nn Judá ka', Israel na Jerusalén.

20 20 (2.3) Natell Xanllon broere nada' ye tap wallekw. 21 21 (2.4) Na bnaba: ¿Bixha ken ba bed be'nn wallekw kaꞌ? Na le'e ballie'e xtillan: Kanake lus bayix kaꞌ zen rawraz be'nn kaꞌ beslas be'nn Judá kaꞌ, na nutno llakse walis yichj, na be'nn wallekw ki ba bra ake' nench'na wcheb ake' yell ki, na wchuy ake' luze latj yell-liw ka' yela, kanake god ake' konen lus aken Judán, na beslas ake' be'nn yell ka'.

Currently Selected:

Zacarías 1: ZPUPAT

Highlight

Copy