Habacuc 1
1
Di'll dan be Xanllon ren beꞌnnen llayixjwe xtille'en
1Di'll nin bdixjwe Xanllon be'nnen llayixjwe xtillen, be'nnen nzi Habacuc.
2Xana ¿batxha zeraw gusia wnaba gakreno nada',
na rwe' bikse llzenayo kia?
¿Bat zeraw wnaba nench'na kwexh wdilen nechj neton
na rwe' bikse lledo wasrao neto'?
3¿Bixhchen llweo latj wia
yel llalleyraon, na ke daxhinj ka' llaken?
Gateze nechja be'nn llakdilren loellj ake', na llut loellj ake',
gateze llak wachach, na gateze de wdil.
4Bi llap ake' baran di'll dan ba bdichjbiaon,
llrajchekw ake' da lixhejen,
be'nn maren nawlloe be'nn wen da lixhejen
na llchuchj ake' yel korchisen.
5Lewia latj yell-liw ka' nechj ren,
le wia aken, na le lleb.
Ba zu nez guna
da wabanere, da bi chajlekzre lakse cha nu ye re' kan gaken.
6Wkoyela be'nn caldeos ka', nench'na gakdilren ake' re',
le be'nn ki nak ake' gazerawze be'nn mar kwis, ba nchoyrall ake' ke chnare
chechj ake' doxhente yell-li'on,
nench'na wlan ake' latj ga bi nak ke ake'.
7Nak ake' gazerawze be'nn zban kwis,
na bi llayumbie akre di'll dan ba bdichjbia be'nn yubre, tuze ke ake'na llazak akre.
8Kabay ke ake' ka', llxhonj akllba ka' bell yix ka',
nak akllba ba snialle ke bekw yiw ka' sjalla latj yu dachen,
to zaknin be'nn ka' sjallia kull kabay ka',
to llaz ake', zak ake' zit kwis,
llaz ake' ka' to bsia ba llajzap ba gawba.
9Na llchochj ll-lan ake' kon da sjade gan llde aken,
to llcheb'chach ake' be'nn ka' gan llde aken,
na nianll be'nn ka' llox aken
kerke yuxhen sjanit lloa nista'on.
10Lltitj akre be'nn wnebia ka'
na be'nn braw ka',
xhill akze ke ze ka' nkoej yellen,
le llkwis ake' da ll-lep le ake' rawen,
na llajlan aken.
11Llde ake' kakse to yejw be zban,
bi llazak akre cha zu to Dios, llak ake' war kone dan ndiprall ake' na.
12Xana, ¿Kere rwen zuw ke chnare,
Dios Xhirall kia na beꞌnn zu ke chnare?
Xana be'nn llkoej nada',
rwen ba broltipo be'nn caldeos ka'
nench'na gun ake' yelkorchis ko'on.
13Rwe' nako xhirall kwis, na bi llrebo da maren,
bi llawero llwiao daxhinjen,
¿Akxha cha, se'zo lliteze llwiao be'nn wen daxhinj kaꞌ,
na lliteze zuw kanake llarale be'nn wednay ka'
dlleyi ake' be'nn wen ka'?
14¿Bixhchen llunlo be'nn nach ka'
ke belya ka' sjalla lo nista'on,
ke bayix ba nono zu yago le akba nez?
15Be'nn caldeos ka' ba blan ake' latj yell-liw yub akre
kan llun be'nn wxhen belyan llajxene'e belya ka':
na llajxeneba kone yiech rew, na kone yixhj ka',
na llayull'na llrere yoy akteba, na llawere kwis.
16Ke len'na be'nn wxhen belyan nlliere yixhj ke'e kaꞌ, na yiech rew ke'e kaꞌ,
na llute'e nu bayix, na dllie'e yaren nench'na lloerawen,
le kone yelgukre ke le aken'na de yajlaw dawen gaw ake'.
17¿Naull be'nn caldeos ka' sen ake' neto' kone yixj ke ake' ka' cha?
¿Nau aklle wlleyi ake', na bi wayachrall ake' be'nn nach ka' cha?
Currently Selected:
Habacuc 1: ZPUPAT
Highlight
Share
Copy
Want to have your highlights saved across all your devices? Sign up or sign in
