Habacuc 2
2
1Seteza sia xnid na wia
kan llun be'nn waka yan, llape'e gan zie'en,
nench'na rera bixhan llenle Xanllo ye'e nada'
na akre wallie'e ke da ka' ba bdawa xhian.
2Xanllon ballie'e xtillan:
Bzoj le bsu ka' kan wruera rwen
nench'na gak wrab aken tuchize.
3Bine' llin lla
wararaw kedan ba bredawron,
axha bi te braon kaze, dekse gaken.
Rwe' brexh, lakse cha dllieren,
wllinkse lla keten aken'na.
Kan llayull lla ke ben mar ka'
4Bzoj ke be'nn mar ka' nak ake' be'nn yarall,
zan be'nn wen dalixhej ka' gat yelnban ke ake' dan nak ake' be'nn lixhej konen Dios.
5Be'nn yarall ka', zerall ake' yelwaken,
bi lljachie aksre llayirj aken, na llenteze llen akren,
lakse yelwaken naken da llayechj le ake'.
Llxa lloa aken, kan nak ba ke be'nn wat,
nak ake' ka' yel guten, bi llerj akre,
na kelen'na llaz ake' llakdilren ake'
latj yell-liw ka' yela.
6Axha latj yell-liw ka' ba blan aken,
wtitj akre be'nn ka' ba blan le aken, na gul ake' ke ake':
Niachraz ko rwe' llniao
kone da bi nak ko'o
¿Batxha zeraw nawo wzuyao
yelwnia dan binak ko'o?
7Katen bibi llbexhon, ra'a be'nn ka' ba llbayo ke'en,
yeban be'nn ka' llsakzi rwen
na waze akte galyidzo.
8Yoyte latj yell-liw ka' wadup ake', wayechj ake' rwe'
na kwan ake' rwe' kan beno rwe' bran akoe.
Na wachixhj ake' rwe' ke xhia ka' ba benon,
na llen'na ba brarjo raw latj yell-li'on,
kone yell ke ake' ka' na be'nn ke ake' ka'.
9Niachraz ko rwe' ke naken ba basllao lo yo' ko'on
kone da ka' ba jalanon,
na llakro dani wasran rwe' raw biteze da nxhull.
10Kone ka' ba bwasjo yo' ko'on kone yel sdo,
na kone kaꞌ kwinzon ba blleyi kwino,
kanake ba jalleyiw dazan latj yell-liw ka'.
11Rentekaze yaj ka' sjalla le ze ka'
na yay ka' sjankoa yichjen,
nes akren ke da maren ba benon.
12Niachraz ko rwe' kanake ba bencha'o yell ko'o ka'
kone llen'nan ba brarjon, na kone da bi nak da lixheje.
13Xanllon nap doxhente yelwaken
gune nench'na bi sak llin ko'on, na dan bxhakzion,
le yoyte llin ka' ba benon dokenaken chey aken kone yi'.
14Na yel sin ke Xanllon
wasllan doxhente yell-li'on
kan llun nisen llasllan lo nista'on.
15Niachraz ko rwe', llsullro be'nn wrill ko'o ka'
llwe akoe zu ke uva da banchixo da llzechj yichj raxhdao ake',
nench'na llun akoe kaze, na llrero yel galyid ke ake' ka'.
16Loraz dasiw yel baranen, wasj kwino yel sdon
le Xanllon kone yelwak ke'en
wruere bi nako sen dan nzi circuncisión,
na yel yarall ko'on wayaken yel'sdo ko'o.
17Xhia ka' beno le ya' ke Líbanon
wayechjen rwe',
na wcheben rwe' kanake dan basoto bayix ka'.
Dani aken ko'o rwe' kanake dan ba beno xhia ka',
na xhia ka' ba beno raw latj yell-li'on,
na be'nn raw yell ka'.
18¿Bixha zak loe lsaken
keten ba bayollen'na?
¿Bixha zak bxen'na
le da wxhiyezen nsan?
Loe lsak ka' bi llak llne'e aken,
¿Akre gunze'e be'nn nachen wxenlalle'e da ka'
le kwinksen ba benchawen?
19Niachraz ko'o rwe',
llew to loe lsak dan nak de yayen wabanen,
na to yaj da bi llak llne'e, na yerizon bzella,
¿Wak wruewseden na chixhjoen to di'll cha?
Ka', bi gak le bide yelnban ke da ki,
lakse nasj aken ya cha'on nzi oro na ya plat.
20Axha Xanllon zoe'e lo yodao xhirall ke'en:
Lese lliteze raw Xanllon re' sjalla doxhente raw yell-li'on.
Currently Selected:
Habacuc 2: ZPUPAT
Highlight
Share
Copy
Want to have your highlights saved across all your devices? Sign up or sign in
