Mateo̱ 12

Ja xi kjibakuyáre̱ Jesuu̱ enꞌen trigo̱ inchafane̱

(Mr 2.23-28; Lk 6.1-5)

1Ngu ni̱tjin xubato, Jesuu̱ kju̱ ja xi kjibakuyáre̱, ngu ngande jma tjián ngu jnuꞌen trigo̱ tjima. Kubajóre ja xi kjibakuyáre̱ ku tsaꞌangíre̱ nga jané enꞌen ku skiné tuꞌe.

2Nga kube xu̱ta̱ fariseo̱ nga xka̱ꞌe tuꞌe sku̱a̱n ni̱ñu̱ inchafane̱, tsichjajo̱ Jesuu̱:

—¡Chaseiri najmi xi inchatsiꞌin ja xi tjibakuyéiri! ¡Majín ku̱a̱cha ñaꞌan nga ni̱tjin nikjaya!

3Ku kiskengi Jesuu̱:

—A kje ꞌbexkiyajíjnu Xu̱ju̱n Enꞌen Namiña Diuu̱, kúcha kitsiꞌin Xta̱xá Ndabi nga kui ku ja xi jña tjima kubajóre. 4Tsasꞌen niꞌyaꞌe̱ Namiña Diuu̱ ku kiskiné nipaa̱n xi kuchakun. Kui ni̱pan tsubajíre̱ nga skiné Ndabi kju̱ ja xi jña tjima. Tujma ja Chanaꞌmitsje xi ma kjine. 5A tekuácha kje ꞌbexkiyajíjnu xu̱ju̱n kju̱a̱kixiꞌe Moise. A yajíjnu nga ja chanaꞌmi ma tsixá ngaya ni̱ngu̱xi̱ nga ni̱tjin nikjaya, ku najmí xi ma batejené. 6Tsjuájnu énꞌna nga kꞌui tjin najmi xi ꞌñu chjiꞌe ngisa nga ni̱ngu̱xi̱. 7Jún, makjinjínjnu nga ku̱i̱cha kitsú Namiña Diuu̱: “Nga tu̱ chují nikjesúnjnu, najmi xi mejénna nga nitjáojnu ku minchajo̱jnu xu̱ta̱”. Tsa makjínjnu jandara xu̱ta̱ xi najmí jejíre̱ tjibatejenéjnu. 8Nga̱tꞌa án Kjindiꞌe xu̱ta̱ nga̱sunde, án xi xinꞌan mí xi ma ñaꞌán ku mí xi majín ñaꞌan nga ni̱tjin nikjaya.

Nga ni̱tjin xubato̱ kitsindaya Jesuu̱ ngu xta̱

(Mr 3.1-6; Lk 6.6-11)

9Kijí Jesuu̱ ku ni̱ngu̱xi̱ xi chja̱ kui ngande kikasꞌén. 10Ku kꞌi̱a̱ kjitjián ngu xta̱ xi kixí tsja. Ta̱nga nga̱tꞌa ja fariseo̱ inchamangitsjai kúcha mangire jee Jesuu̱, tsinengiyáre̱:

—A tsjuá kju̱a̱ kju̱a̱kixiña nga nindaya xu̱ta̱ nga ni̱tjin nikjaya.

11Skéngíre Jesuu̱:

—Tsanga ngu xu̱ta̱jnu xi ngaya ngu pusu meya ngu chu̱tsa̱ngaꞌe nga ni̱tjin nikjaya, a ꞌbatsjé kꞌiaku̱a̱. ¡Kju̱a̱ꞌñu tjínre nga ꞌbatsjé! 12ꞌÑu chjiꞌe ngisa ngu xu̱ta̱ tukꞌuajíre̱ nga ngu chu̱tsa̱nga! Kui kju̱a̱ nga ma ñaꞌan kju̱a̱ndá nga ni̱tjin nikjaya.

13Kui nga ku̱i̱cha kitsúre̱ Jesuu̱ xta̱ xi majín tsikjaniya tsja: «Tjentei ndsaji.» Yente tsja xta̱, ku kundaya tsja xukúcha ndá tsja xi ngingua̱. 14Kui nga ja fariseo̱ itju ngaya ni̱ngu̱xi̱ꞌe judio̱ ku tsaꞌangíre̱ nga ꞌyendá nga mejénre nga tsikꞌen Jesuu̱.

Jesuu̱, xi tjitsiꞌin xki̱ Namiña Diuu̱

15Nga je kube Jesuu̱ najmi xi inchaꞌbendá ja fariseo̱, kijí ku kjín xu̱ta̱ kijitjengíre̱. Kitsindaya Jesuu̱ ngieje xi ndáji sindúre 16ku tuxi ꞌñu yejénre̱ nga ngují xi ngatsuyáre̱ nga̱tꞌaꞌe. 17Ku̱a̱cha kumá nga itjusún én xi kitsú Namiña Diuu̱, xukúcha kitsikꞌatiuya xi tsuya Enꞌen, Isaia̱:

18«¡Chaséjnu xu̱ta̱ xi jajínꞌan,

xi tsichjana nga án tsiꞌínna xki̱!

Tuxi ꞌñu tjaona,

ku kui xi tjitsjuána kju̱a̱tsjua.

Kui xi tsjuána Ngaya asenꞌná,

ku kui xi tsuya kúcha tsitsjeꞌan kju̱a̱

ngaya ngieje na̱xi̱nanda.

19Ngují xi kuichjasiju,

ku te̱ kjidiajojí xu̱ta̱.

¡Ngují xi ndaꞌe kuitꞌére

ngaya ndiyaté!

20Ngují najmi xi ón tsiꞌínña

tsꞌijún xi je ónre̱,

kútsa tusa kui tsikꞌien

xi je inchafesún.

Tusáni, tsjuáre ngaꞌñu xi najmíre̱

ku tsjuáre̱ ngaꞌñu nga cha̱n ꞌbendajin kju̱a̱.

21¡Ngieje xu̱ta̱ xi tjin nga̱sunde

sꞌejínre nga̱tꞌaꞌe!»

Jesuu̱ ku xi sián ngitku̱ xindajin

(Mr 3.20-30; Lk 11.14-23; 12.10)

22Kjínma xu̱ta̱ xi jichujúre̱ Jesuu̱ ngu xta̱ xi mejénre nga nindaya̱. Tka̱ ku teyá kui xta̱ nga̱tꞌa ngu xindajin tsuꞌbajin yajo̱ꞌe. Ta̱nga kitsindaya Jesuu̱, ku kutsejénnire̱ ku tsichjani kui xta̱. 23Tuxi se̱n kumáre xu̱ta̱ najmi xi kitsiꞌin Jesuu̱ ku inchatsikjao tsubáre̱ yajo̱ꞌe: «Jesuu̱, a kui xi jajín Namiña Diuu̱ xi kitsú nga ꞌbatsjengiña.»

24Ta̱nga yajín ja fariseo̱ xi tsitꞌe nga inchachja̱ xu̱ta̱ ku kitsikjao: «Jesuu̱ mare̱ tsixánre̱ xindajin xi tjimajín yajo̱ꞌe, nga̱tꞌa Belsebu̱, xi ngitku xindajin kjitjenjún, ku kui xi tsjuáre ngaꞌñu nga ku̱a̱cha tsiꞌin.» 25Kubéni Jesuu̱ najmi xi inchatsikjao ku ku̱i̱cha kitsúre̱:

«Tsanga xu̱ta̱ xi chja̱ ngu na̱xi̱nanda teyá tekuini kjanjun xikjin, kjuachajá kui na̱xi̱nanda teyá. Tsa xu̱ta̱ xi chja̱ ngu na̱xi̱nanda ꞌñu kjanjun xikjin, tekuácha tu xubaꞌetsé sꞌejña. Kutsa xu̱ta̱ xi ngu nganiꞌya kjaju̱n xikjin, tekuácha tsichajá yajo̱ꞌe. 26Tsa xindajin tekuini yajo̱ꞌe kjajún, tsichajá nga̱nde jma batexuma. 27Tjibixújnu nga Xindajin tjitsjuána ngaꞌñu kui kju̱a̱ nga mana ꞌbatsjejínꞌan xindajin yajo̱ꞌe xu̱ta̱. Tsa kjain kui kju̱a̱kitakun, ku ꞌya xi tsjuáre ngaꞌñu ja xi tjibakuyajnu nga tekuácha ꞌbatsjé xindajin. Tsanga bixujnu nga Namiña Diuu̱ tsjuáre ngaꞌñu, kꞌi̱a̱ yáre̱ nga kꞌiajíre̱ én xi tjibixújnu. 28Kutsa án mangatjengina xindajin nga̱tꞌa Ngaya asenꞌen Namiña Diuu̱, kꞌi̱a̱ janda tebakújnu nga je jiꞌi kꞌui kju̱a̱texumaꞌe̱n Namiña Diuu̱. 29»Tsa tjin xi mejénre tsiꞌín cheje niꞌyaꞌe̱ ngu xta̱ xi tjínre ngaꞌñu, tjún tsubáre nga bataꞌñu, ku kjiátse nga ma kjabechejére ngieje najmi xi tjínre.

30»Xi anjín tjejúnna ku kontra̱re̱ꞌan. Xi minchajujína nga ndibajúna kjaꞌi xu̱ta̱ tuxi án ꞌbematjengina, xi mejénre tsú nga inchatsikjíntsere̱ án.

31-32»Kju̱a̱xikjainni nga tsichatꞌájnu ngieje tku̱ya jee Namiña Diuu̱ kju̱ ngieje najmi xi ndáji nukju̱a̱jnu. Ndatsa án chꞌao bixujnu, xi Kjindiꞌe xu̱ta̱ Nga̱sundeꞌa̱n, tsichtꞌájnu Namiña Diuu̱. Ta̱nga najmi xi tsichatꞌajíjnu tsanga chꞌao nukju̱a̱jnu nga̱tꞌaꞌe Ngaya asen xi Tsje. ¡Kuítse xi tsichatꞌajíjnu, kjatꞌei ku ngieje ni̱tjin!

Tu xi ndá ku tu xi ndáji

(Lk 6.43-45)

33»Ngu ya xi ndá tu xi ndá bajare̱, ku ya xi ndáji tu xi ndáji bajare̱. Tsa mejénña nga yáña tsa ndá kútsa ndáji ngu ya, tuꞌétse chasére. Tekuácha ma nga xu̱ta̱: tsa mejénña yáña tsa ndá kútsa ndáji, kꞌi̱a̱tse chasére tsa ndá kútsa ndáji najmi xi inchatsiꞌin. 34-35Najmi xi tjibakújnu xu̱ta̱ tuxi ndáji xukútse xánꞌen ye̱. ¡Kjainni! Kucha kuma nga najmi xi ndá sinukju̱a̱jnu, nga ndajíjnu xu̱ta̱. Nga̱tꞌa tsa ngu xi ndá xu̱ta̱, tutsjai nga najmi xi ndá tjiꞌa tsꞌua, ku xi ndáji xu̱ta̱, tutsjai nga najmi xi xaba tjichjaa̱. 36Kju̱a̱xikjáinni nga fichú ni̱tjin nga matsje kju̱etꞌa kju̱a̱, ngieje xu̱ta̱ nga tsubáre kuitsuya, mí xá nga chꞌao tsichja ku nga̱tꞌaꞌe enꞌen ndáji kumataꞌin kjaꞌi xu̱ta̱. 37En xi kitjúre nga ngu ngu kuixi kusúnre̱ Namiña Diuu̱: tsa én xi ndá kitjúre bitjungi, ta̱nga tsa én xi ndáji tsichja ku majere.»

Ngu chuba̱ xi tkun ku makjinjínña

(Mr 8.11-12; Lk 11.29-32)

38Kui nga tjin fariseo̱ kju̱ chjine Kju̱a̱kixiꞌe Namiña Diuu̱, kitsúre̱ Jesuu̱:

—Jí kua Chji̱ne, tiꞌin ngu najmi xi ngatakújni, nga kjain nga Namiña Diuu̱ kitsingiyari.

39Ku ku̱i̱cha kiskengíre Jesuu̱:

—Jún xi ndajíjnu xu̱ta̱ ku sꞌejinjínjnu nga̱tꞌaꞌe Namiña Diuu̱, ku tjichjínengijnu nga tsjuájnu ngu chuba̱ tsanga kjain. Ta̱nga tujma chuba xi beꞌéjnu kuitse xi kitsiꞌin xi tsuya Enꞌen Namiña Diuu̱ xi ꞌmí Jona: 40Xukúcha jan ni̱tjin ku jan ni̱tje̱n kisꞌeya ngatsꞌua ngu tjiao̱ xi jéma, tekuácha Kjindiꞌe xu̱ta̱ nga̱sunde, jan ni̱tjin ku jan ni̱tje̱n kumana ngaya ti̱xa̱. 41Nga matsje kju̱etꞌa kju̱a̱, xu̱ta̱ xi chja̱ na̱xi̱nanda Nini̱be̱ tsikisitjén yajo̱ꞌe nga batejetjaijnu tuxi manga tsijejnu Namiña Diuu̱. Nga̱tꞌa kui xu̱ta̱ isenkajó yajo̱ꞌe kúcha tjima nga tsitꞌe én xi kitsuyáre̱ Jona̱. Ta̱nga jún nuꞌyájnu enꞌna ta̱nga basenkajojíjnu yajojnu, ndatsa ꞌñu chjiꞌeꞌan ngisa tukꞌuajíre̱ Jona̱.

42»Chjun xá xi chja̱ Nginde, tekuácha tsikisitjén yajo̱ꞌe nga fichu ni̱tjin nga matsje kju̱a̱, ku kontra̱jnu kuichja kjiaku̱a̱. Nga̱tꞌa kjin jíndiba kui nga jiꞌitꞌére najmi xi ikuyáre̱ xu̱ta̱ xta̱xá Salomo̱. Ta̱nga jún mejínjnu nga tjinuꞌyájnu kju̱a̱kitakun xi tebakuyájnu, ndatsa ꞌñu chjiꞌeꞌan ngisa nga Salomo̱.

Ngaya asen xaba xi tsꞌuꞌbéni

(Lk 11.24-26)

43»Nga ngu ngaya asen xi xaba bitju ngajin yajo̱ꞌe ngu xu̱ta̱, kꞌi̱a̱ nangi kixí fabixí nga mangitsjai jma tsikjaya. 44Ku nga ngují ngande sakúre, ku̱i̱cha tsú: “Ngisa ndá nga fatjiniꞌa̱n nganiꞌya jma tejñamaꞌa̱n, ku kꞌi̱a̱ te̱ batejña ña”. Nga fichúni, kjitiya nga sakúre, kjiꞌitsje ku ngieje nga ngandeꞌe sindu najmi xi tjin. 45Ku fai nga faikjaꞌa ngi yatu ngaya asen xi ꞌñu xaba nga kui, ku ngieje nga ngaya yajo̱ꞌe kui xu̱ta̱ basꞌenjín ku kꞌi̱a̱ ꞌbendu. ¡Ku xꞌánxu kui xu̱ta̱ tusamá chꞌao fetꞌa tukꞌuajíre̱ nga ngútse ngaya asen xaba tsuꞌbajínma yajo̱ꞌe! Ku ku̱a̱cha kumataꞌinjnu jún, nga̱tꞌa ndajíjnu xu̱ta̱.

Naꞌe̱n ku jatsꞌe Jesuu̱

(Mr 3.31-35; Lk 8.19-21)

46Nga ku̱a̱cha tjichja Jesuu̱, naꞌe̱n kju̱ jatse jichú jma kjitjián ku kiskuyáre̱ kjindetsín, nga̱tꞌa mejénre nga kui chja̱jo. 47Kui nga tjin xi kitsuyáre̱ Jesuu̱:

—Nári kju̱ jatsꞌejí sindu kjindetsín, ku jí mejénre chjajori.

48Ta̱nga tusátse ku̱i̱cha tsinengiya Jesuu̱:

—ꞌYáni nga xi kju̱a̱xikjain náꞌna̱ kju̱ ja tsꞌeꞌan.

49Kui nga kitsikjaꞌa tsja ku ikú ja xi kjibakuyáre̱ ku kitsúre̱:

50—Kuixi náꞌna̱ ku jatsꞌeꞌan xikꞌui. Nga̱tꞌa tuꞌyáni xi tꞌeꞌénre̱ manda xi tjitsjuá Namiꞌna xi kjitjián ndiu̱jmi, kui xi kju̱a̱xikjain nga náꞌna̱, nga tsꞌeꞌan ku ndichjaꞌa̱n.

Currently Selected:

Mateo̱ 12: MZI

Highlight

Copy