Mateo̱ 13

Nga yeꞌechuba̱ju tutje Jesuu̱ kúcha ma nga nisꞌejín Enꞌen Namiña Diuu̱

(Mr 4.1-9; Lk 8.4-8)

1Tuku kui ni̱tjin, itju Jesuu̱ nganiꞌya jma kjitjián, ku tsꞌua chincha Ngalilea̱ kijí, ku kisꞌejña nga ikuyáre̱ xu̱ta̱. 2Nga̱tꞌa tuxi kjín xu̱ta̱ jichú nga kitꞌére, janda nga ngaya ngu tsutsu je tsijín ku kꞌi̱a̱ kisꞌejña nga ikuya. Ku xu̱ta̱ kixincha kixi tsꞌua na̱ndá.

3Tuxi tse najmi xi ikuyáre Jesuu̱ nga yeꞌe chu̱bare ku inchandsijin kju̱a̱kitakun. Ku̱i̱cha inchandsijin kju̱a̱kitakun:

4«Ngu xta̱ nga̱jnu itju nga kikeꞌe tuꞌe trigo̱ . Ku nga kjibeꞌe, tjin tutje xi ngaya ndiya ixú. Ngutjútse jichú nise xi kiskine.

5»Kjaꞌi tutje xi ixú ngajín ndi̱a̱jo̱ jma nga chubatse ninde tjin. Kꞌi̱a̱ ku̱a̱ tuxi tjeꞌñu kisá tuꞌe trigo̱, nga̱tꞌa tu kjisún tjiabétse ninde. 6Ta̱nga kutsejíre̱ xka̱ xixi nga̱tꞌa ndáji jamatsꞌenꞌen, ku Kichjanre nga itju tsuꞌbi.

7»Kjaꞌi tutje xi ngajín naꞌya ixú. Nga kukꞌa̱ yanaꞌya, kixinchajínꞌñu natinꞌen tuꞌe trigo̱ ku kitsjuajíre̱ nga̱nde nga kukꞌa.

8»Ta̱nga kjaꞌi tutje xi nangi ndá ixú ku kisꞌere̱ tu. Tjín jma nga ngu én janda uchan tu tsajáre̱, kjaꞌi xi ichate kju̱ te̱ tu tsajare̱, ku kjaꞌi xi kate tu tsajáre̱.

9»¡Ku jún, tsanga kju̱a̱xikjain nga tjin ꞌñujun, ndá tiaꞌánjnu xki̱!»

Mi kju̱a̱ nga chu̱ba̱ a tsichjen Jesuu̱ nga bakuyare xu̱ta̱

(Mr 4.10-12; Lk 8.9-10)

10Ja xi kjibakuyáre̱ Jesuu̱ kitsitiñáre yajoꞌe jma nga tjián ku tsinengiyáre̱:

—Mi kju̱a̱ nga chu̱ba̱ nichjein nga bakuyéiri xu̱ta̱.

11Ku̱i̱cha skengi Jesuu̱:

«Jún, tsjuájnu kju̱a̱ nga yájnu kju̱a̱kitakun xi tjiꞌmá tjin jma batexuma Namiña Diuu̱, ta̱nga kjují xu̱ta̱ xi ngisa. 12Nga̱tꞌa xi bé najmi xi tjima ngaya jma batexuma Namiña Diuu̱, baꞌíre̱ kju̱a̱ nga tusa ꞌñu tse bé ngisa. Ta̱nga xi tsejí bé najmi xi tjin ngaya jma kjibatexuma Namiña Diuu̱, tusa tsiꞌin Namiña Diuu̱ nga ngachayáre̱ xi nguxtin bé. 13Tuxá beꞌechubana najmi xu̱ta̱ nga bakuyana; tuxi ndatsa inchabase, ku ngují najmi kutsejénre, ku ndatsa tꞌe, tekui xi ngují najmi kukjinre. 14Ku̱a̱cha tsiꞌin bitjusún xukúcha kitsú Namiña Diuu̱ xi kitsuya xi tsuya enꞌen xi ꞌmí Isaia̱:

“Kui xu̱ta̱,

ndatsa ndá ngatꞌe,

najmí ni̱tjin nga kukjínre̱;

ku tukúra̱ ndá ngatase,

najmí ni̱tjin nga skue.

15Nga̱tꞌa basꞌenjínre̱ ku tsikjojí,

nga̱tꞌa ꞌbechja xku̱n tuxi ngují najmi bé,

ku ꞌbechja ñajun tuxi ngují najmi tꞌe.

Tsanga tsiꞌinna xki̱,

kukjínre̱ énꞌna,

ku basenkajó kúcha tsiꞌin tsuꞌba,

¡ku án ꞌbatsjengiraꞌan!”

16»Ta̱nga jún xi án tebakuyájnu, Namiña Diuu̱ xi je kitsichakunnéjnu nga̱tꞌa chaséjnu ku nuꞌyájnu én xi tsuꞌbaju̱ꞌan. 17Kjín xi tsuya Enꞌen Namiña Diuu̱ xi kumejénra̱re̱ tsikáin nga kube najmi xi tjichasejnu ku tjinuyájnu, ta̱nga sakujíre̱ nga̱nde.

Nga kitsuya Jesuu̱ mí xi mejénre tsú chu̱ba̱ xi yeꞌe nga kitsichjen tutje

(Mr 4.13-20; Lk 8.11-15)

18»Ku kjatꞌei, ndá nuꞌyájnu, xiyamájnu mí xi mejénre tsú kui én xi yeꞌechuba̱jnu xá xi kitsiꞌin xta̱ ngajnu. 19Tjín xi tꞌe én xi chja̱ jma kjibatexuma Namiña Diuu̱, ta̱nga nga makjinjínre̱, ndiba xindajin ku tsichayánire̱. Kui tku̱ya xu̱ta̱, xukútse kui tutje xi ixú tsꞌua ndiya.

20»Tutje xi ixú ngajín ndi̱a̱jo̱, xukútse kui xu̱ta̱ xi tꞌe én xi chja̱ jma kjibatexuma Namiña Diuu̱, ku tuxi tjeꞌñu tsitsjua nga je tse̱ꞌe kju̱a̱tsiꞌin, 21ta̱nga nga cha̱njín makjínre̱, ngutjútse ku féni kju̱a̱tsjuáꞌe̱. Nga sakúre ngu kju̱a̱ti kútsa tjin xi ón tsikjeyáre̱ nga̱tꞌa tjitꞌeꞌénre Namiña Diuu̱, trátse tsichayáni én xi je kitsijaꞌoma.

22»Jaxín kjitjián tutje xi ixú ngajin naꞌya. Kui tutje xi xuku xi tꞌe Enꞌen Namiña Diuu̱, ta̱nga basenkajojí kúcha nga tjima. Tujma najmi xi machjéntsere̱ inchatsikjao kju̱ kúcha ndá tsiꞌin nga sakúre ton.

23»Ku xi kjuetꞌa, kui tutje xi ndá nangi jma ixú xuku kui xu̱ta̱ xi tꞌe Enꞌen Namiña Diuu̱ ku makjínre̱. Kui xu̱ta̱ xi basenkajó kúcha tjima ku tsiꞌin najmi xi ndá. Xuku kui tutje xi tsajáre̱ én xi kisꞌere uchan tu, xi kisꞌere ichate kju̱ te, kju̱ xi kisꞌere kate tu.»

Xka̱ xi ndáji ku tuꞌe sku̱a̱n ni̱ñu̱

24Jesuu̱ te yeꞌénire̱ ngi ngu tku̱ya chu̱ba̱:

«Jma kjibatexuma Namiña Diuu̱ tekuácha ma xukúcha kumataꞌín xi yeꞌe nangiꞌe̱ tuꞌe sku̱a̱n ni̱ñu̱ xi ndá. 25Kꞌiamáre̱ nga tsuba̱fé ngieje jichú xi tao̱nre, ku ngajin tutjeꞌe trigo̱ yeꞌejín tutjeꞌe xka̱ xaba xi ꞌmí sisaña̱, ku nga je kua kitsiꞌin kijíni.

26»Nga je kisꞌe tutjeꞌe tuꞌe sku̱a̱n ni̱ñu̱ ku nga je tsakjan natín, ja xi inchatsixa kube nga tekuácha inchasá xka̱ꞌe̱ sisaña̱. 27Kui nga kijí jma kjitjián xi ndia̱ꞌe nangi, ku kitsuyáre̱: “Ndi̱a̱jni̱, nga ndá tutjeꞌe sku̱a̱n ni̱ñu̱ xi kikꞌei ku mí xá kꞌi̱a̱ kisajín sisaña̱”

28»Ku ku̱i̱cha kitsú xi ndia̱ꞌe nangi: “Xi chꞌaore̱ an xi ku̱a̱cha kitsiꞌin”.

»Kui nga skengi jaxi inchatsixa: “A mejénri nga faichjanéjni̱ xka̱ xi ndáji”

29»Kitsú xi ndia̱ꞌe nangi: “¡Jun jín! Xka̱ꞌe̱ tuꞌe sku̱a̱n ni̱ñu̱ ku sisáña tumején ngundsiji̱n, ku mare̱ tsanga maskájnu ku jña chjanéjnu ngiajó. 30Tusá titjuájnu kjua nga ngiajó xka̱ nga sá. Nga fichú nitjinꞌen nga chjangá, kjia nga chan yáre̱ ma xi xka̱ꞌe tuꞌe sku̱a̱n ni̱ñu̱. Ku kjia tsingiyáꞌa̱n jatsixá ku tjún sisaña̱ ngatjáne ku xín ngatꞌendu ku ngatꞌetí. Jaskan nga ngatjayá tuꞌe sku̱a̱n ni̱ñu̱ ku niꞌya jma fayaꞌan kꞌi̱a̱ ngatjaiju̱.”»

Tuꞌe tujma

(Mr 4.30-32; Lk 13.18-19)

31-32Ku te̱ ku̱i̱cha jña inchakujínre Jesuu̱ kui kju̱a̱kitakun:

«Ngande jma kjibatexuma Namiña Diuu̱ tekuácha ma xukúcha ma tuꞌe tujma. Ndatsa chubachí ma, nga tjin xi beꞌe nangiꞌe̱, macha ku makꞌa tukꞌuajíre̱ nga ngieje ya xi tjin ngandeꞌe ya tu. Xuku ngu yajé uya, jmanga sakúre ngande ni̱sé nga tsindá nda̱ba̱ ngaꞌa tjiaꞌe̱.»

Nga̱tꞌaꞌe sku̱a̱n xi tsixungitja̱o̱ na̱ꞌyu̱ꞌe̱ ni̱pan

(Lk 13.20-21)

33Ku tuku ku̱a̱cha isenchu̱ba̱re̱ kju̱a̱kitakun Jesuu̱:

«Xukúcha ma sku̱a̱nꞌe̱n ni̱pan, tekuácha ma ngande jma batexuma Namiña Diuu̱. Nga ngu chjun mincháre̱ nguxtin sku̱a̱n xi tsixungitjo, ku kui xi nguxtin xi tsixungitja̱o̱ na̱ꞌyu̱.»

Kitsikitjusún Jesuu̱ najmi xi kitsú ngu xi tsuya Enꞌen Namiña Diuu̱

(Mr 4.33-34)

34Jesuu̱ tuxi yeꞌechu̱bare̱ xu̱ta̱ nga ikuyáre̱ ngieje kui kju̱a̱kitakun, ku ku̱a̱cha ngáre̱ nga bakuya. 35Ku ku̱a̱cha tsiꞌin kitsikitjusún Jesuu̱ én xi kitsú Namiña Diuu̱ nga kitsikichja̱ chjíne enꞌen:

«Chu̱ba̱ tsichjenꞌan

nga chjaju̱ꞌan xu̱ta̱,

ku ꞌbenijmina én

xi tjiꞌmáre̱ Namiña Diuu̱

janda nga kitsindá nga̱sunde.»

Nga kitsuya Jesuu̱ nga yeꞌechu̱ba̱ nga̱tꞌaꞌe sisaña̱

36Kꞌi̱a̱ ꞌyendu Jesuu̱ ngieje xu̱ta̱ ku kijí ngaya niꞌya. Ku kjia te̱ jichutjengínire̱ ja xi kjibakuyáre̱, nga kikinengiyáre̱:

—Tixuyéijni mí xi mejénre tsú én xi kibixíjni nga̱tꞌaꞌe xka̱ xi ndáji ngasún nangi.

37Kitsú Jesuu̱:

«Án xi nga Kjindiꞌe xu̱ta̱ nga̱sunde án, xi beꞌeꞌan tutjeꞌe trigo̱. 38Nga ngieje nangi xi chja̱ nga̱sunde, tuꞌe sku̱a̱n ni̱pan xi ndá kui xu̱ta̱ xi tꞌeꞌénre̱ kju̱a̱kixiꞌe Namiña Diuu̱. Ku tuꞌe sisaña̱ kui xi xindajin tsiꞌinre xki̱, 39nga̱tꞌa kui xi yeꞌe kju̱a̱xaba kui nga̱sunde. Nga tjichjanga kju̱a̱nima kui xi mejénre tsú nga matsje kjuetꞌa kju̱a̱, ku xu̱ta̱ xi inchafangá tuꞌe trigo̱, kui xi incha tsixatꞌare Namiña Diuu̱. 40Nga kusúnre̱ Namiña Diuu̱ ngieje najmi xi inchatsiꞌin xu̱ta̱, xukútse nga chjane xka̱ xaba ku ꞌbetí. 41Án xi Kjindiꞌe xu̱ta̱ nga̱sundeꞌan, tsingiyaꞌa̱n kjinditsjeꞌna ku ngandiukꞌatsje ngaya jma tebatexumaꞌa̱n ngieje xi xaba ku tsiꞌinre̱ kju̱a̱ꞌñu xi ngisa. 42Ku kui xu̱ta̱, xi tsixajo tsikjaꞌaya ngakꞌen, ku kꞌi̱a̱ skue xi ꞌmíre̱ tkun ku kji̱ndá ku janda xi sꞌai sꞌai kju̱a̱ne na̱ꞌñu̱. 43Ta̱nga xi tꞌeꞌénre̱ Nami xuku tsuꞌbi kju̱a̱tꞌai. ¡Ku jún, tsa kjáin nga tjin ꞌñujún, ndá nuꞌyájnu!

Ku̱i̱cha kitsuya Jesuu̱ nga̱tꞌaꞌe tijí tao̱n xi tjiꞌma

44»Ngande jma kjibatexuma Namiña Diuu̱ tekuácha mataꞌin xukúcha mataꞌin tijiꞌe tao̱n xi tjianꞌma ngajín nangi. Nga tjin xi sakúre, te̱ beꞌeꞌmáni; ku faikateña ngieje najmi xi tjínre ku ꞌbatse ngieje nangi ku tse̱ꞌe kjuatsiꞌínni kui tao̱n.

Ku̱i̱cha kitsuya Jesuu̱ nga̱tꞌaꞌe tijiꞌe tao̱n xi tjianꞌma

45»Nga̱nde jma kjibatexuma Namiña Diuu̱, xukútse ngu xu̱ta̱ xi ꞌbatse ndi̱a̱jo̱ tsjuakún xi ꞌñu chji. 46Nga sakúre ngu ndi̱a̱jo̱ tsjuatjin xi ꞌñu chji, bateña ngieje najmi xi tjínre, ku kjia faikꞌatse.

Ku̱i̱cha kitsuya Jesuu̱ nga̱tꞌaꞌe naꞌya xi chjuꞌenjinju̱n

47»Nga̱nde jma kjibatexuma Namiña Diuu̱ xukútse ngu naꞌya xi chjuꞌenjinjun. Xu̱ta̱ kjeꞌijín nga tsikjaꞌa naꞌyaꞌe̱, ngieje tku̱ya tjiao̱ sakúre. 48Nga je kitse naꞌya ꞌbatsjé tꞌande ku kꞌi̱a̱ fajín tjiao̱ xi ndá ku xi ndáji. Ngaya ngu nisin faya ti̱ xi ndá, ku tsikꞌaꞌa xi ndáji. 49Tekuácha kuma nga fe nga̱sunde: Xi inchatsixatꞌáre Namiña Diuu̱ fajín xu̱ta̱ xi ndá ku xi ndáji. 50Xu̱ta̱ xi ndáji ku ngakꞌen tsikjaꞌaya, ku kꞌi̱a̱kua tuxi ndá xinchatkún ku xi sꞌai sꞌai kuma na̱ꞌñu̱.»

Najmi xi changa ku najmi xi tjatse

51Jesuu̱ tsinengiyáre̱ ja xi kjibakuyáre̱:

—Jun, a makjínjni ngieje kui kju̱a̱kitakun xi tebakuyána xu̱ta̱.

Ku ku̱i̱cha skengi:

Jún, makjínjni.

52Kitsúre Jesuu̱:

—Ngieje chjine Kju̱a̱kixiꞌe Namiña Diuu̱ xi xu̱ta̱ nda̱xu̱nju̱nꞌen jma batexuma Namiña Diuu̱ uya, xuku xi fué niꞌya jma faya najmi, ku kꞌi̱a̱ ꞌbatsjé najmi xi tjatse ku najmi xi changa.

Nga kijí Jesuu̱ nga̱nde xi ꞌmí Nasare

(Mr 6.1-6; Lk 4.16-30)

53Nga je kumá nga ikuyáre̱ xu̱ta̱ Jesuu̱ nga yeꞌe chu̱bare kui kju̱a̱kitakun, kijí kui nga̱nde. 54Nga jichú ngandeꞌe̱ kijí ni̱ngu̱xi̱ ku kꞌi̱a̱ ikuyáre̱ xu̱ta̱. Janda inchasꞌejinjínre̱ xu̱ta̱ ku tsaꞌangíre̱ nga tsichja: «Jmá kumáre̱ kui xta̱ ngieje kui najmi. Kúcha mare̱ ñaꞌan kui najmi tki̱u̱n xi janda makjinjínña.»

Kjaꞌi xi tsú: 55«Ta̱nga, Jesuu̱ nikua, tiꞌe̱ Kuse, xta̱ chjineyá! Maria̱ naꞌe̱n, ku ja tsꞌe̱ Santia, Kuse̱, Ximo̱ ku Juda̱. 56Tuku kꞌi̱a̱ sindu ndichja. Kúcha nga tuxi mare̱ Jesuu̱ ku mare̱ ñaꞌan ngieje kui najmi tkun xi janda makjinjínña.»

57Ta̱nga ngují xi sindu kui ngande xi kuyúre̱ kitsisꞌejín kju̱a̱kitakun xi kjibakuya Jesuu̱. Kui nga ku̱i̱cha kitsú nga tsichja Jesuu̱: «Ngu xi tsuya Enꞌen Namiña Diuu̱ tsubáre nga yakja tujmáni nga fichú, tujma ngandeꞌe̱tse ku kju̱ tse jma sindu xu̱ta̱ xi ngu nganiꞌya, nga najmí xi tsisꞌejínre.»

58Nga̱tꞌa kui nga̱nde kisꞌejinjínre nga̱tꞌaꞌe Jesuu̱ kui nga kjínjín kju̱a̱tkún xi sꞌejinjínña kitsiꞌin kꞌiakua.

Currently Selected:

Mateo̱ 13: MZI

Highlight

Copy