Mateo̱ 11

Jua xi Batenda

(Lk 7.18-35)

1Nga je kuma nga kitsuyáre̱ Jesuu̱ xi tejó ja xi kjibakuyáre̱ kúcha tsubáre tsiꞌin, xín ngande kijíni nga kikakú ku kitsuyáre̱ xu̱ta̱ xi kjaꞌi na̱xi̱nanda én tjatse xi tjínre kju̱a̱ndá.

2Jua xi Batenda, xi nduya kjisián, tsitꞌe ngieje én najmi xi tjitsiꞌin Jesuu̱ ku kitsingiyá yakaꞌa ja xi kjibakuyáre̱, nga ngatjaikinengiyáre̱ Jesuu̱:

3—A jí xi Kjuaꞌiꞌnatsjengiji xu̱ta̱ nga̱sunde xi kitsingiyá Namiña Diuu̱, a xu kjaꞌi xi chuyajni.

4Kiskengi Jesuu̱:

— Tanginijnu ku tixuyajnu Jua ngieje najmi xi tjinuꞌyájnu ku tjichasejnu:

5»Kjatꞌei jé tsejénre xi tka

ku jé tjima xi kijó.

Xi inchafindu tjiuxinꞌen jé kundayá,

ku jé tꞌe xi teya.

Xi jé jesún

jé te̱ tjimakúnni,

ku xi ni̱ma̱ tjima je tjiꞌmiyáre̱

kju̱a̱ndá tjatse xi ꞌbatsjengiña.

6»Namiña Diuu̱ tsichakunné xi inchabasena nga tetsiꞌinꞌan ngieje kui najmi ku tsikjaꞌa basenjínna.»

7Nga kijíni ja xi kjibakuyáre̱ Jua, kjia tsaꞌangíre̱ Jesuu̱ nga kitsuyáre̱ xu̱ta̱ ꞌyáni Jua, ku ku̱i̱cha kitsúre̱:

«Jún, nga tsangíjnu nangi kixí, ꞌyá xi kuyájnu kꞌiaku̱a̱. A kuyájnu ngu xiꞌin xi kitsꞌaoya, xukúcha ꞌbendu yanaxu̱ xi kjetꞌaoya tjao̱. 8A najñu xi chajá tsjuátjin yaja xi kuyájnu. Tikjaitsjénjnu nga xi ku̱a̱cha kún najñu xi chajá xi baja, kui xi sindu ndabaxá tsjuakun, xuku jaxá tetjun. 9ꞌYá tkuya xu̱ta̱ xi kuya̱jnu. A xi tsuya Enꞌen Namiña Diuu̱ kuyájnu. ¡Ta̱nga kjáin nga kui xi kuyájnu! Nga̱tꞌa Jua kꞌa ngisa xáꞌe tukꞌuajíre̱ nga ngu xi tsuya Enꞌen Namiña Diuu̱; 10kui xi tsuꞌbajo én xi kitsuya Namiña Diuu̱ nga ku̱i̱cha kitsú:

“Án tsingiyaꞌa̱n xi tsikaꞌaꞌa̱n énꞌna

xi tjún fai nga ji,

xi tjen faikꞌendá ngieje

tuxi je tjindá nga fichi.”

11»Xiyájnu nga kju̱a̱xikjain nga kje tjukjají ngu xiꞌin xi ꞌñu chjiꞌe ngisa nga Jua xi Batenda. Ta̱nga ngaya jma batexuma Namiña Diuu̱, xu̱ta̱ xi ꞌñu ni̱ma̱kju̱a̱ kui xi kꞌa kjitje̱n ngisa tukꞌuajíre̱ nga Jua.

12»Janda nga Jua xi Batenda tsaꞌangíre̱ nga tjitsuya Enꞌen Namiña Diuu̱, kjimesún kju̱a̱texumaꞌen Namiña Diuu̱, ndatsa tjin xi tao̱nre. Tujma xu̱ta̱ xi ꞌñu sindúre̱ ku xi tsakjúnjin kjabe kui ndiya. 13Namiña Diuu̱ je kitsuya ngaya Xu̱ju̱n Enꞌen ngieje najmi xi ku̱ma, janda ni̱tjin nga kju̱a̱ꞌí Jua xi Batenda. 14Tsa sꞌejínjnu kutsá sꞌejinjínjnu, nga kitsú Namiña Diuu̱ nga tsingiyá Elía̱ xi kitsuya enꞌen, Jua xi Batenda xi tjitsúre. 15Tsa kjain nga tjin ñajunjun, ¡nuꞌyájnu!

16»Jún, xi tjimájnu kui ni̱tjin, xuku niskindi xi tsitón jmanga tjin ndetsi̱n, ku kjindiare kjaꞌi niskindi:

17“Kinikjanéjni flauta̱,

ta̱nga jún kichajíjnu.

Kindajni sun xi ngí,

ta̱nga jún kichikjindajíjnu.”

18»Nga tsikjaꞌa kjindiá yajo̱ꞌe Jua xi Batenda, jún tjibixúnijnu nga xindajin tjijín yajo̱ꞌe. 19Ku jaskan jiꞌiñaꞌa̱n, Kjindiꞌe Xu̱ta̱ Nga̱sunde, nga̱tꞌa ꞌbiꞌan ku kji̱e̱nꞌa̱n, ku jún je tjibixúnijnu nga xkiꞌaꞌa̱n ku nga xu̱ta̱ chꞌiꞌan, nga ndá yaꞌaꞌan xu̱ta̱ xi ndáji basére na̱xi̱nanda kju̱ xi tꞌeꞌenjínre̱ Namiña Diuu̱. Ta̱nga tikjaitsjénjnu nga kju̱a̱chjine xi tjínre Namiña Diuu̱, kju̱a̱ndá xi tsjuá kui xi chusúnre̱.»

Xu̱ta̱ xi sꞌejinjínre

(Lk 10.13-15)

20Tuxi tire Jesuu̱ nga̱tꞌaꞌe ngande jma je kitsiꞌin kju̱a̱tkun xi makjinjínña, nga̱tꞌa xu̱ta̱ xi chja̱ kui ngande inchabasenkajojí kúcha tjima ku inchatꞌeꞌenjínre̱ Namiña Diuu̱. Kui kju̱a̱ ku̱i̱cha kitsúre̱:

21«Xu̱ta̱ xi chja̱ Korasin, ¡Yajíjnu kúcha niꞌin kju̱e̱yájnu! ¡Tekuácha tuxi ndáji kju̱e̱yájnu jún, xi tijñájnu Betsaida̱! Tsa na̱xi̱nanda Tiro̱ ku Sido̱n je kitsiꞌinꞌan kju̱a̱tkiún xi makjinjínña xi je kitsiꞌinꞌan ngandejnu, jére tse isenkajó yajoꞌe xu̱ta̱ xi kꞌi̱a̱ sindu. Jére najñu xi chajá xi tkue tsaja ku incháre̱ ndesu ta̱nga̱ꞌí tku̱, nga inchabakú yajo̱ꞌe nga kua inchamáre̱. 22Kju̱a̱xikjain najmi xi xinjnu nga fichú ni̱tjin nga matsje kju̱etꞌa nga̱sunde, tuxi tse jee xi sakujnu tu̱kꞌu̱a̱jíre̱ nga kui xu̱ta̱.

23»Ku jún xu̱ta̱ xi nukju̱a̱jnu na̱xi̱nanda Kafarnau̱m, xi tjisꞌejínjnu nga je ndi̱u̱jmi tijñanjnu, ta̱nga xiyamájnu ngu najmi nga janda ngaya ngakꞌie̱n ningiyájnu. Tsa kui kju̱a̱tkun xi makjinjínña xi je kumá jma tijñanjnu, kútsa ngajínꞌen xu̱ta̱ xi chja̱ Sodoma̱ ku̱a̱cha kumá, ngisára̱ isenkajó yajo̱ꞌe ku tukú kjitjiánra̱ kui na̱xi̱nanda. 24Kju̱a̱xikjain najmi xi xinjnu nga sꞌendajin kju̱etꞌa kju̱a̱, tukꞌuajíre̱ nga kui xu̱ta̱, ꞌñu tse ngisa jee xi sakujnu.»

Kucha kitsiꞌin nga kubetkun Namiña Diuu̱ Jesuu̱

(Lk 10.21-22)

25Kuima chu̱ba̱, Jesuu̱ tsichjatáre Namiña Diuu̱:

«¡Nami, jí xi tjibatexumái ndi̱u̱jmi ku nangi! Nikꞌuechji̱ri nga kikakijíri ngieje kui kju̱a̱kitakun xu̱ta̱ xi chjine ku tsé najmi bé, ku niskindi kikakiri. 26Ku ngieje, Nami, nga̱tꞌa jí xi ku̱a̱cha kumejénri.»

27Ku ku̱i̱cha kitsúre̱ xi kꞌi̱a̱ sindu:

«Ngieje najmi nga Namiꞌna kitsjuána, ku kuitse xi béna, nga̱tꞌa Kjindiꞌe mare̱ án. Najmí xi kuácha ndá be Namiꞌna, xukúcha ndá beꞌan. Kui kju̱a̱ nga mejénna ꞌbenijmina kjaꞌi xu̱ta̱ ꞌyáni Namiꞌna, tuxi manga ngatubé ndatsa kui.

28»Jún tutsjai nga ngí tjimájnu ku tjinindusínjnu yajo̱jnu. Jabújnu jma tejñaꞌan, Ku tsjuájnu kju̱a̱nikjaya. 29Nuꞌyaꞌénjnu mandaꞌna ku ngatumajnu kju̱a̱kitakunꞌna̱. Tse takunꞌan ku nimakju̱a̱ꞌan, xi kju̱a̱xikjain. Tsa án ndibakúnjnu ku sakujnu kju̱a̱nikjaya. 30Najmi xi tetsjuájnu nga ñaꞌánjnu, niꞌinjín nikitjusun, ku te̱ áiji chꞌa xi tetsikaꞌájnu.»

Currently Selected:

Mateo̱ 11: MZI

Highlight

Copy