Luka̱ 5

Ngu kju̱a̱chjuꞌejin xi makjinjínña

(Mt 4.18-22; Mr 1.16-20)

1Ngu ndiya tsuꞌba Jesuu̱ tsꞌua Chincha Ngalilea̱, ku kutkundáire̱ xu̱ta̱ nga̱tꞌa mejénre nga tꞌere Enꞌen Namiña Diuu̱. 2Jó tsutsu yiꞌi kube Jesuu̱ tsꞌua tꞌande. Yajá tiya nga̱tꞌa naꞌyaꞌe̱ inchamane ja xi kjeꞌijín. 3Tseꞌe Ximo̱ Pe ngu kui tsutsu. Tsijín Jesuu̱ ngaya tsutsujeꞌe̱ Pe ku tsinengíre̱ nga ngatsikjínre tꞌande. Xú kisꞌejña ngaya tsutsuje, ku kꞌi̱a̱ tsaꞌangíre̱ nga ikuyare̱ xu̱ta̱.

4Nga je kumá nga ikuyáre̱ xu̱ta̱, tsichaju̱ Pe ku ku̱i̱cha kitsúre̱:

—Tꞌainji̱n tsutsuje jmanga na̱nga̱re chincha, ku tikjaꞌi naꞌya xi chjuꞌenjinju̱n.

5Ta̱nga kuítsecha kiskengi Pe:

—Jí kua Chji̱ne, ngu ni̱tje̱n kinixájni ta̱nga ngují tjiao̱ sakújni. Ta̱nga tsa ji xi niꞌin manda, tsikjaꞌaꞌa̱n naꞌya.

6Kitsiꞌín Pe najmi xi kitsúre̱ Jesuu̱, ku tuxi kjín tjiao̱ sakúre, janda xi je kju̱a̱tjiya naꞌyaꞌe̱. 7Kui nga kitsikjaꞌare̱ tsja ja kjeꞌijín xi kjaꞌi tsutsuje tjimaya, tuxi ma nga fuekinchaju̱. Tuxi kjín kumá tjia̱o̱ꞌe̱, ku yejun xikjin nga kitsikitse ngiajó tsutsu yiꞌi. Ku xi je inchafué nginda ngiajó tsutsu yiꞌi.

8Nga kube Pe kúcha kuma, isentꞌare tkuꞌe Jesuu̱ ku ku̱i̱cha kitsúre̱:

—¡Ndia̱ꞌna, tisubaꞌitꞌáina kꞌui, nga̱tꞌa xu̱ta̱ jeñaꞌan!

9-10Santia ku Jua, nistiꞌe Sebedeo̱, Pe kju̱ ngieje xi ngisa, tuxi se̱n inchamáre̱ nga kjín tjiao̱ sakúre. Ta̱nga ku̱i̱cha kitsú Jesuu̱ nga tsichaju̱ Pe:

—Nga tu̱ minchatkinjínri yajori. Janda kjatꞌe, ngite tjia̱o̱ji chjunꞌenjínri, án bakuyára kúcha minchitsjáiji xu̱ta̱ xi sꞌejínre nga̱tꞌaꞌna.

11Ja kjeꞌinjín kiju tꞌande tsutsu yiꞌi, kꞌi̱a̱ ꞌyendu ngieje najmi xi tjimaju̱n, ku jña kijí Jesuu̱.

Kúcha kitsindaya Jesuu̱ ngu xta̱ xi chiꞌin findujun tjiuxinña tjínre

(Mt 8.1-4; Mr 1.40-45)

12Ngu ni̱tjin, nga kjisuꞌba Jesuu̱ ngu nga̱nde. Kꞌi̱a̱ jichú ngu xta̱ xi chiꞌin xi findujun tjiuxinña tjínre, yeten ngakjáin jma sian Jesuu̱, janda nga jichutꞌáre tjen nangi, ku tsinengi kju̱a̱ndá:

—Ndia̱ꞌna, beñaꞌan nga mári nindayéina. A niꞌínna kui kju̱a̱ndá.

13Yente Jesuu̱, kitsikꞌajúre̱ tsja xi ndáji tjínre ku ku̱i̱cha kitsúre̱:

—¡Mejénna nga! ¡Ngatundayei!

Trátse kundayá tsjetsje kui xta̱. 14Ku te̱ tsichjani Jesuu̱, ku̱i̱cha kitsú:

—Nga tu̱ ngují xu̱ta̱ Bixuyéri najmi xi kumá. Tjáichaséiri chanaꞌmi ku chꞌe̱i chje xi tsubáre nga baꞌi xukúcha kitsú Moise; ku̱a̱cha kuma nga sku̱e̱ ja chanaꞌmi nga ngite najmíri chiꞌin.

15Nga kjifaꞌa ni̱tjin tusama ndá tjiyajín Jesuu̱. Tuxi kjín xu̱ta̱ matkure nga tꞌere én xi basenijmi, ku tjin xi fichutꞌare nga̱tꞌa mejénre nga tsindaya. 16Ta̱nga Jesuu̱ tutsjai nga mangitsjai ngu nga̱nde jma nga ꞌbejñasuba nga minengire kju̱a̱ndá Namiña Diuu̱.

Kúcha kitsindaya Jesuu̱ ngu xta̱ xi majín fue

(Mt 9.1-8; Mr 2.1-12)

17Ngu ndiya ngu nganiꞌya kjibakú Jesuu̱. Kjínma xu̱ta̱ fariseo̱ xi sindute kju̱ xi chjine Kju̱a̱kixiꞌe̱ Namiña Diuu̱. Kjín na̱xi̱nanda xi chja̱ nangi Ngalilea̱, xi chja̱ Judea̱ kju̱ xi chja̱ na̱xi̱nanda Jerusalen, xi ndiutꞌere Jesuu̱.

Ku nga tjínre Jesuu̱ ngaꞌñuꞌen Namiña Diuu̱ nga tsindaya xi ndáji sindure, 18jichú xu̱ta̱ xi yaꞌa ngu nachan ya, jma kjisúnre̱ ngu xta̱ xi majín fue. Mejénre̱ nga ngixku̱n Jesuu̱ bakúre xi ndáji tjínre, 19ta̱nga majín inchabasꞌen niꞌya nga̱tꞌa tjeꞌñu kjín xu̱ta̱ tjin. Kui nga ngatsjá niꞌya tsijín ku kꞌi̱a̱ kitsindá ngu ti̱xa̱. Ku jma sián kui ti̱xa̱ kitsikasꞌen nachan jma kjisún xi ndáji tjínre, janda nga kikajá ngajinꞌen xu̱ta̱, ngakjáin Jesuu̱.

20Nga kube Jesuu̱ nga tuxi sꞌejínre nga̱tꞌaꞌe ngieje kui xu̱ta̱ xi jichú, kitsúre̱ xi ndáji tjínre: «¡Amingo, tsichatꞌara jee xi tjínri!»

21Fariseo̱ kju̱ chjine Kju̱a̱kixiꞌe̱ Namiña Diuu̱ ku̱i̱cha kitsikjao: «Ku ꞌyá kjimáre̱ yajo̱ꞌe kui xta̱. ¡Mí tu̱ tsú én xi kjiꞌbeꞌa tsꞌua nga̱tꞌaꞌe Namiña Diuu̱! ¡Tujma Diuu̱tse xi ma tsichatꞌa xi ꞌmí je.»

22Kui nga kube Jesuu̱ najmi xi inchatsikjao, ku tsinengiyáre̱: «Mí xá ku̱a̱cha nikjojnu. 23Tixuyájnu: Mí xi niꞌinjin. A nga nichatꞌáre kui xta̱ xi chiꞌinre a xu nga nindayá. 24Ku bakumájnu án kjatꞌei, nga Kjindiꞌe xu̱ta̱ ngasundeꞌan, tjínna ngaꞌñu nga tsichatꞌana jee xi tjínre xu̱ta̱.»

Ku kitsúre̱ xta̱ xi majín fue: «Tisitjéin, chjabi nachanri ku tꞌáin niꞌyari.»

25Ku tekuíni chu̱ba̱, ngixku̱n ngieje xu̱ta̱, isitjén xta̱, skabe nachanꞌen ku kijí niꞌyaꞌe, kjibetkun Namiña Diuu̱ nga kijí.

26Ngieje nga se̱n kumáre̱ ku kitsakjún, ku kitsitsjua ku kubetkun Namiña Diuu̱, ku ku̱i̱cha inchatsú: «¡Mí tu̱ najmi xi tsjuatjín kuya̱ña kui ni̱tjin!»

Jesuu̱ tsichjáre̱ Mateo̱

(Mt 9.9-13; Mr 2.13-17)

27Nga kuma ngieje kui najmi, xín kijíni Jesuu̱. Nga kjuaꞌa ndiya kube xta̱ xi ꞌmí Mateo̱, xi kjifaꞌachji tón xi machjitjái xá xi tjiñaꞌan xi minengi Roma̱. Tsichja Jesuu̱, ku̱i̱cha kitsúre̱: «Ndibitjengína».

28Isitjén Mateo̱, yeꞌe ngieje najmi xi tjínre, ku kjitjengíre̱.

29Te kuí ni̱tjin, sꞌui kitsiꞌin niꞌyaꞌe Mateo̱, ku tuxi cha̱n isenñajúnre Jesuu̱. Kꞌi̱a̱ tsakjien kjín xu̱ta̱ xi faꞌachji̱ tón xi machjitjai xá xi tsiꞌin ngieje tkuya xu̱ta̱. 30Tjín xu̱ta̱ fariseo̱ kju̱ chjine Kju̱a̱kixiꞌe̱ Namiña Diuu̱ xi tsaꞌangire nga tsichja ku chꞌo inchatsúre̱ ja xi kjibakuyáre̱ Jesuu̱, ku̱i̱cha kitsúre̱:

—Mi xá jún jña tjibichíjnu xu̱ta̱ xi inchafaꞌachji tón xi machjitjai xá xi ñaꞌan kju̱ ngieje xu̱ta̱ xi xaba.

31Tsichja Jesuu̱, ku̱i̱cha kitsú:

— Xu̱ta̱ xi ndáji sindúre kui xi machjénre chji̱ne̱tki, mítsa xi ndá sindúre. 32Xu̱ta̱ xi tjínre jee kju̱a̱ꞌitsikitꞌeꞌan tuxi ngatjatjíni tseꞌe Namiña Diuu̱, mítsa xi inchatsú nga xu̱ta̱ ndá.

Nga ikú Jesuu̱ kúcha tjin tseꞌe̱ nga kjindiá nikꞌatiu yajo̱ña

(Mt 9.14-17; Mr 2.18-22)

33Yakaꞌa xu̱ta̱ xi ku̱i̱cha kitsúre̱ Jesuu̱:

—Ja xi kjibakuyáre̱ Jua xi Batenda kju̱ ja xi tjimatje̱ngire̱ fariseo̱, tutsjai nga kjabe ngu ni̱tjin nga kjindiá tsikꞌatiu yajoꞌe̱ ku minengíre̱ kju̱a̱ndá Namiña Diuu̱. Ta̱nga ja xi tjibakuyéiri, ngují ni̱tjin nga batekjare nga inchakjién ku nga inchaꞌbi.

34Skengi Jesuu̱:

—Xu̱ta̱ xi kinikitꞌe sꞌuiꞌe kju̱a̱xke, batekjajíre̱ yajoꞌe̱ nga kjién nga kjitjián xke. 35Ta̱nga fichu ngu chu̱ba̱ nga mangijú xke, ku kjia nga batekjare yajo̱ꞌe nga kjién xi kinikitꞌe sꞌui.

36Te inchandsijínni kju̱a̱kitakún Jesuu̱ nga kitsuya:

«Tsa ngu xꞌao changa tjiyá, najmí xi xꞌao tjatse batetꞌa nga ꞌbetiu xꞌao changa. Tsa tjin xi ku̱a̱cha tsiꞌin, tsikjetsún xꞌao xi tjatse. Ku tu̱ ku nga chꞌao tsején jma nga kisꞌetiu tjatse xꞌao changa.

37»Ku tekuácha majín mincha bino tjatse ngaya tijí xi je changa, nga̱tꞌa nga je kusán ku kjabe ngaꞌñu bino tjatse kjendiya tji̱u̱xín changa. Ku chaja bino tja̱tse̱ ku tjiya tijí jma nga tjimincha. 38Kui kju̱a̱ nga bino tja̱tse̱ tsubare nga tji̱u̱xín xi tjatse̱ mincha.

39»Tsa ngu xu̱ta̱ kutꞌa bino changa, je ngite mejínre ꞌbíni bino tjatse, nga̱tꞌa je kubéni nga bino xi changa xi ndá ꞌyú ngisa.»

Currently Selected:

Luka̱ 5: MZI

Highlight

Copy